Asetram Nsɛm

Afoforo A Yɛsom Wɔn Ma Amanehunu Brɛ Ase

SƐNEA JULIÁN ARIAS KA KYERƐE

Bere a midii mfe 40 wɔ 1988 mu no, na ɛte sɛ nea mɛkɔ so ayɛ m’adwuma daa. Ná meyɛ amanaman ntam adwumakuw bi ɔmantam kwankyerɛfo. Nea na ɛka m’adwuma ho ne kar fɛfɛ bi, akatua pa, ne adwumayɛdan a emu yɛ ahomeka a ɛwɔ Madrid kurow no mfinimfini wɔ Spain. Adwumakuw no mpo maa mihuu biribi sɛ wɔbɛyɛ me adwuma no kwankyerɛfo wɔ ɔman no mu. Saa bere no manhu sɛ na nsakrae kɛse bi rebɛba m’asetra mu.

DA KORO bi, wɔ saa afe no mu, me duruyɛfo ka kyerɛɛ me sɛ manya multiple sclerosis, yare bi a enni sabea (a ɛka ehon nkwaadɔm atitiriw no). Meyɛɛ basaa. Akyiri yi, bere a mekenkan nea yare a ɛka ehon nkwaadɔm atitiriw no betumi ayɛ onipa no, ehu kaa me. * Ná ɛte sɛ nea ɛsɛ sɛ migyina asiane bi a ɛreba ano wɔ m’asetra nna a aka nyinaa mu. Na mɛyɛ dɛn ahwɛ me yere Milagros, ne me babarima Ismael a wadi mfe abiɛsa no? Na yɛbɛyɛ dɛn agyina ano? Bere a migu so rehwehwɛ nsɛmmisa yi ho mmuae no, awerɛhosɛm foforo sii.

Bere a me duruyɛfo kaa me yare ho asɛm kyerɛɛ me bɛyɛ ɔsram biako akyi no, me panyin frɛɛ me kɔɔ n’adwumayɛdan mu na ɔka kyerɛɛ me sɛ adwumakuw no hia nnipa a wɔwɔ “su pa.” Na obi a wanya yare a ɛsɛe nipadua—a afei na afi ase mpo—no nni saa nipasu no. Enti me panyin yii me adi ɛhɔ ara. Prɛko pɛ m’adwuma fii me nsa!

 Mebɔɔ mmɔden sɛ menya akokoduru wɔ m’abusua anim, nanso na mepɛ sɛ me nkoaa metew me ho na misusuw me tebea foforo no ho na midwennwen me daakye ho. Mebɔɔ mmɔden sɛ mɛko atia adwenemhaw a na ɛreba me so no. Nea ɛyɛɛ me yaw kɛse koraa ne sɛ mebɛyɛɛ obi a ne ho nni mfaso prɛko pɛ wɔ m’adwumakuw no ani so no.

Minyaa Ahoɔden Wɔ Mmerɛwyɛ Mu

Anigyesɛm ne sɛ, wɔ mmere a emu yɛ den yi mu no, mitumi nyaa nneɛma pii a ɛma ahoɔden de me ho too so. Ná mabɛyɛ Yehowa Dansefo bɛyɛ mfe 20 a atwam no. Enti mifii komam bɔɔ Yehowa mpae wɔ me nkate ne m’adwenem a ɛyɛ me naa wɔ daakye ho no ho. Me yere a ɔne me wɔ gyidi biako mu no hyɛɛ me den bere nyinaa, na minyaa mmoa fii nnamfo binom a wɔbɛn me a wɔn ayamye ne mmɔborohunu boaa me kɛse no hɔ.—Mmebusɛm 17:17.

Afoforo ho asɛyɛde a metee nka sɛ ɛda me so no nso boae. Ná mepɛ sɛ metete me babarima no yiye, kyerɛkyerɛ no, ne no di agoru, na metete no wɔ asɛnka adwuma no mu. Enti na mintumi mpa abaw. Bio nso, na meyɛ ɔpanyin wɔ Yehowa Adansefo asafo ahorow no biako mu, na na me Kristofo nuanom mmarima ne mmea a wɔwɔ hɔ no hia me mmoa. Sɛ memaa kwan maa m’amanehunu sɛee me gyidi a, anka nhwɛso bɛn na mɛyɛ ama afoforo?

M’asetra sesae wɔ honam fam ne sika fam a na mintumi nyɛ ho hwee—na enye koraa wɔ akwan bi so nanso wɔ akwan foforo so no na eye paa. Mmere bi metee sɛ oduruyɛfo bi reka sɛ: “Ɔyare nsɛe onipa; na mmom ɛsesa no.” Ná mahu sɛ ɛnyɛ nsakrae no nyinaa na enye.

Nea edi kan koraa no, me “honam mu nsɔe” no boaa me ma metee afoforo yare ase yiye na minyaa tema maa wɔn. (2 Korintofo 12:7) Metee nsɛm a ɛwɔ Mmebusɛm 3:5 a ɛka sɛ: ‘Fa wo koma nyinaa bata Yehowa ho, na mfa wo ho ntweri wo nhumu’ no ase yiye sen bere biara. Nea ɛsen ne nyinaa no, me tebea foforo no kyerɛɛ me nneɛma a ɛho hia ankasa wɔ asetram ne nea ɛma obi nya abotɔyam ne obu ma ne ho ankasa. Ná pii wɔ hɔ a metumi ayɛ wɔ Yehowa ahyehyɛde no mu. Metee Yesu nsɛm a ɛka sɛ: “Ɔma mu wɔ nhyira mmom sen ogye” no ase ankasa.—Asomafo no Nnwuma 20:35.

Asetra Foforo

Bere a wohuu yare ko a ayɛ me no, ankyɛ na wɔtoo nsa frɛɛ me sɛ menkɔ nhyiam bi wɔ Madrid, baabi a wɔkyerɛɛ Kristofo atuhoamafo sɛ wɔmmoa mma ntease mmra nnuruyɛfo ne wɔn Adansefo ayarefo ntam no. Akyiri yi, wɔhyehyɛɛ atuhoamafo no yɛɛ wɔn Ayaresabea Ntam Nkitahodi Boayikuw ahorow. Me fam no, saa nhyiam no bae wɔ ne bere mu pɛpɛɛpɛ. Minyaa adwuma pa, nea ɛbɛma me abotɔyam kɛse sen nea adwuma foforo biara a sika wom de bɛma me.

Wɔ nhyiam no ase no yesuae sɛ ɛsɛ sɛ Ayaresabea Ntam Nkitahodi Boayikuw ahorow a wɔahyehyɛ no foforo no kɔ ayaresabea ahorow, bisabisa nnuruyɛfo nsɛm, na wɔkasa kyerɛ ayaresa ho adwumayɛfo, a ne nyinaa atirimpɔw ne sɛ wɔbɛte wɔn ase na wɔasiw ntawntawdi ano. Boayikuw ahorow no boa mfɛfo Adansefo ma wɔhwehwɛ nnuruyɛfo a wɔwɔ ɔpɛ sɛ wɔbɛfa akwan bi so asa yare a wɔmfa mogya nni dwuma. Ɛwom, sɛ́ obi a minni aduruyɛ ho ntetee biara no, na mewɔ pii a ɛsɛ sɛ misua fa aduruyɛ mu din ahorow, aduruyɛ mu gyinapɛn, ne ayaresabea ho nhyehyɛe ho. Nanso, wɔ nhyiam no akyi no, mekɔɔ fie sɛ onipa foforo a wɔasiesie me ama asɛyɛde foforo a ɛmaa m’ani gyei.

 Ayaresabea Nsrahwɛ—Ɛma Abotɔyam

Ɛmfa ho mpo sɛ na me yare no de nkakrankakra rebubu me no, m’asɛyɛde sɛ Ayaresabea Ntam Nkitahodi Boayikuw muni no yɛɛ kɛse. Na wɔama me kɔ pɛnhyen sɛ ɔyarefo enti na minya bere de kɔ ayaresabea nsrahwɛ. Ɛmfa ho sɛ ɛtɔ mmere bi a huammɔdi ba no, nsrahwɛ ahorow yi yɛɛ nea na ɛyɛ mmerɛw na mfaso wɔ so sen sɛnea na mehwɛ kwan. Ɛwom sɛ seesei maka mmubuafo akongua mu de, nanso eyi nyɛɛ akwanside kɛse. Boayikuw no muni biako ne me kɔ bere nyinaa. Bio nso, ɛyɛ ade a nnuruyɛfo taa ne wɔn a wɔte mmubuafo akongua mu kasa, na ɛtɔ mmere bi a wɔhwɛ mmɔden a mebɔ de kɔsra wɔn no a, ɛte sɛ nea wɔde obu kɛse tie.

Masrasra nnuruyɛfo ɔhaha pii wɔ mfe du a atwam no mu. Ɛkame ayɛ sɛ na ebinom wɔ ɔpɛ sɛ wɔbɛboa yɛn fi mfiase pɛɛ. Oduruyɛfo Juan Duarte—koma ho oduruyɛfo bi a ɔwɔ Madrid a n’ani gye ho sɛ ɔbɛkyerɛ obu ama ɔyarefo ahonim—yɛɛ yɛn mmoa ntɛm ara. Efi saa bere no wayɛ Adansefo bɛboro 200 a wofi Spain mmeae ahorow oprehyɛn a wamfa mogya anni dwuma. Wɔ mfe a abɛsen kɔ mu no nnuruyɛfo pii afi ase reyɛ oprehyɛn a wɔmma mogya. Nsrahwɛ a yɛyɛ no daa no ka ho bi, nanso nkɔso no nso fi aduruyɛ mu nkɔanim ne ade pa a oprehyɛn a wɔmma mogya wom de aba mu. Na yegye di sɛ Yehowa ahyira yɛn mmɔdenbɔ so.

Manya nkuranhyɛ titiriw wɔ sɛnea koma ho nnuruyɛfo a waben wɔ mmofra ayaresa ho no gyee yɛn no. Wɔ mfe abien mu no yɛsrasraa kuw biako a nnuruyɛfo abien ne wɔn ahokafo a wɔhwɛ ma onipa tra nkwa mu wɔ oprehyɛnyɛ mu wom. Yɛmaa wɔn aduruyɛ ho nhoma a ɛkyerɛkyerɛɛ nea nnuruyɛfo afoforo a wɔyɛ adwuma koro yi reyɛ. Yenyaa yɛn mmɔdenbɔ so akatua wɔ 1999 mu bere a wɔreyɛ Aduruyɛ Ho Nhyiam a ɛfa Mmofra Koma ho Oprehyɛnyɛ ho no. Nnuruyɛfo abien no—ne oduruyɛfo biako a ofi England a ɔno nso te yɛn ase a odii wɔn anim no—yɛɛ Ɔdansefo abofra bi a na ɛhwehwɛ sɛ wosiesie ne koma mu ntini ketewa biako oprehyɛn a ɛyɛ den paa yiye no. * Bere a oduruyɛfo no biako fii oprehyɛn dan no mu bɛkaa sɛ oprehyɛn no yɛɛ yiye na wɔakyerɛ obu ama abusua no ahonim no, me ne awofo no dii ahurusi. Seesei nnuruyɛfo abien yi gye Adansefo ayarefo fi Spain afa nyinaa bere biara.

Nea ɛma minya abotɔyam ankasa wɔ nsɛm a ɛtete saa ho ne hu a mahu sɛ metumi aboa me nuanom Kristofo no. Mpɛn pii no, ɛyɛ mmere a emu yɛ den sen biara wɔ wɔn asetram no biako, bere a wokohu Ayaresabea Ntam Nkitahodi Boayikuw no. Ɛsɛ sɛ wɔkɔyɛ oprehyɛn, nanso nnuruyɛfo a wɔwɔ ɛhɔnom ayaresabea mpɛ sɛ wɔhwɛ wɔn anaasɛ wontumi nhwɛ wɔn a wɔmma wɔn mogya. Nanso, sɛ anuanom behu sɛ nnuruyɛfo a wɔaben wɔ aduruyɛ afã nyinaa mu wɔ Madrid ha a wɔte yɛn ase a, wonya akomatɔyam kɛse. Mahu sɛnea onuabarima bi nkyɛn a yɛkɔe wɔ ayaresabea kɛkɛ no maa n’anim tebea a na ɛnyɛ fɛ no sesa bɛyɛɛ nea ɛda abotɔyam adi.

 Atemmufo Kuw ne Aduruyɛ Mu Gyinapɛn Ahorow

Wɔ nnansa yi mfe mu no, Ayaresabea Ntam Nkitahodi Boayikuw no akɔsrasra atemmufo nso. Wɔ saa nsrahwɛ ahorow no mu no, yɛde nhoma bi a wɔato din sɛ Family Care and Medical Management for Jehovah’s Witnesses, (Abusua Hwɛ ne Aduruyɛ Ho Dwumadi Ma Yehowa Adansefo) a wɔhyɛɛ da yɛe na akyerɛkyerɛ mpanyimfo a ɛte saa no yɛn gyinabea wɔ mogya a wɔde di dwuma ne nnuru a mogya nnim a wɔde si mogya ananmu ho ma wɔn. Na saa nsrahwɛ yi ho hia kɛse, efisɛ mmere bi a atwam no, na atemmufo taa ma nnuruyɛfo tumi ma wɔhyɛ ayarefo ma wɔn mogya wɔ Spain.

Atemmufo adwumayɛdan mu yɛ beae a ɛyɛ ahomeka, na wɔ me nsrahwɛ a edi kan mu no, bere a mete me mmubuafo akongua mu nam abrannaa so no, metee nka sɛ menyɛ onipa titiriw biara. Nea ɛsɛee asɛm no koraa no, yenyaa akwanhyia ketewaa bi, na mifii akongua no mu hwee me nkotodwe so. Atemmufo ne mmaranimfo kakra a wohuu me tebea no fii ayamye mu bɛboaa me, nanso m’ani wui wɔ wɔn anim.

Ɛwom sɛ na atemmufo no nnim nea enti a yɛreba wɔn nkyɛn de, nanso wɔn mu dodow no ara daa ayamye adi kyerɛɛ yɛn. Ná ɔtemmufo a odi kan a mekɔsraa no no resusuw yɛn gyinabea no ho dedaw, na ɔkae sɛ ɔbɛpɛ sɛ ɔne yɛn kasa kɔ akyiri. Wɔ yɛn nsrahwɛ a edi hɔ mu no, n’ankasa piaa me kɔɔ n’adwumayɛdan mu, na ɔyɛɛ aso tiei. Biribi pa a efi nsrahwɛ a edi kan yi mu bae no hyɛɛ me ne m’ahokafo no nkuran maa yedii yɛn hu so, na ankyɛ na yehuu nneɛma pa foforo nso.

Wɔ saa afe no ara mu no, yegyaw Family Care nhoma no bi maa ɔtemmufo foforo a ogyee yɛn fɛw so, na ɔhyɛɛ bɔ sɛ ɔbɛkenkan asɛm a ɛwom no. Mede me telefon nɔma maa no, na sɛ ebia tebea bi a egye ntɛmpɛ sɔre a wafrɛ yɛn. Dapɛn abien akyi no ɔfrɛe sɛ ɛhɔnom oduruyɛfo bi aka akyerɛ no sɛ ɔnhyɛ na wɔmma Ɔdansefo bi a ehia sɛ wɔyɛ no oprehyɛn mogya. Ɔtemmufo no ka kyerɛɛ yɛn sɛ ɔpɛ sɛ yɛboa no ma ɔhwehwɛ kwan foforo a ɛbɛma wakyerɛ obu ama Ɔdansefo no wɔ mogya a ɔmpɛ sɛ ogye no ho. Anyɛ den kɛse amma yɛn sɛ yebenya ayaresabea foforo, baabi a nnuruyɛfo no yɛɛ oprehyɛn no ma ɛkɔɔ yiye a wɔamma no mogya. Bere a ɔtemmufo no tee nea efi mu bae  no n’ani gyei na ɔmaa yɛn awerɛhyem sɛ daakye ɔbɛhwehwɛ akwan foforo a ɛte saa ara.

Esiane sɛ na yɛpɛ sɛ nnuruyɛfo susuw hokwan ahorow a ɔyarefo no wɔ ne n’ahonim ho nti, aduruyɛ ho gyinapɛn ho nsɛm sɔree mpɛn pii wɔ m’ayaresabea nsrahwɛ no mu. Ayaresabea biako a ɛwɔ Madrid a wɔte yɛn ase no too nsa frɛɛ me sɛ menkɔ nkyerɛkyerɛ bi a na wɔreyɛ de akyerɛkyerɛ gyinapɛn a ɛteɛ ne nea ɛnteɛ ho ade no bi. Saa nkyerɛkyerɛ yi maa minyaa hokwan kaa yɛn gyinabea a egyina Bible so ho asɛm kyerɛɛ abenfo a wɔwɔ adwumakuw yi mu no. Ɛboaa me maa metee gyinae pii a ɛyɛ den a ɛsɛ sɛ nnuruyɛfo sisi no nso ase.

Ɔbenfo Diego Gracia, akyerɛkyerɛfo no mu biako, taa yɛ gyinapɛn a ɛteɛ ne nea ɛnteɛ ho nkyerɛkyerɛ a edi mũ ma Spain nnuruyɛfo, na wabɛyɛ obi a ogyina yɛn akyi denneennen wɔ hokwan a yɛwɔ sɛ yɛpaw nea yɛpɛ wɔ mogya a wɔde ma ho asɛm mu. * Nkitaho a yɛne no dii daa no maa wɔtoo nsa frɛɛ Yehowa Adansefo baa dwumadibea a ɛwɔ Spain no ananmusifo binom sɛ wɔmmɛkyerɛkyerɛ yɛn gyinabea mu nkyerɛ Ɔbenfo Gracia sukuupɔn ntoaso adesuafo a wobu wɔn mu binom sɛ ɔman no mu nnuruyɛfo papa paa no.

Tebea no a Migyina Ano

Ɛwom, adwuma a ɛma abotɔyam yi a meyɛ ma mfɛfo gyidifo no ntumi nnii m’ankasa haw ahorow nyinaa ho dwuma. Me yare no mu reyɛ den yiye. Nanso, anigyesɛm ne sɛ, m’adwenem da hɔ. Esiane sɛ me yere ne me ba no nnwiinwii nti, meda so ara di m’asɛyɛde horow ho dwuma. Sɛ ɛnyɛ wɔn mmoa a, anka mintumi nyɛ eyi. Me trɔɔs mpo mintumi ntoto mu na mahyɛ biribi agu so de ako awɔw. M’ani gye ho titiriw sɛ me ne me ba Ismael, a opia me kɔ baabiara no, bɛkɔ asɛnka Memeneda biara, na ama matumi ne afiewuranom pii akasa. Na meda so ara di m’asɛyɛde ahorow ho dwuma sɛ́ asafo mu panyin.

Mahyia mmere a emu yɛ den wɔ mfe 12 a atwam no mu. Ɛtɔ mmere bi na mehwɛ sɛnea me dɛmdi no aka m’abusua no a, ɛma midi yaw kɛse sen yare no ankasa. Minim sɛ wohu amane, ɛmfa ho mpo sɛ wɔnka ho asɛm no. Ɛnkyɛe pii na m’asew bea ne me papa wui wɔ afe biako ntam. Wɔ saa afe no ara mu no, na mintumi nkɔ baabiara gye sɛ metra mmubuafo akongua mu. Yare foforo bi a ɛsɛe nipadua na ekum me papa a na ɔte yɛn fie no. Milagros, a ɔhwɛɛ no no, tee nka te sɛ nea ɔrehwɛ nea ɛbɛto me daakye.

Nanso, nea eye ne sɛ, yɛn abusua no de biakoyɛ na ɛrehyia nsɛnnennen no. Mede ɔkwankyerɛfo agua asesa mmubuafo akongua , nanso seesei m’asetra ayɛ papa ankasa, efisɛ mede me ho ama koraa resom afoforo. Afoforo a yɛsom wɔn ma amanehunu brɛ ase, na Yehowa di ne bɔhyɛ so sɛ ɔbɛhyɛ yɛn den wɔ ahohia mu. Te sɛ Paulo no, metumi aka no nokwarem sɛ: “Mitumi ade nyinaa yɛ, nea ɔhyɛ me den no mu.”—Filipifo 4:13.

[Ase hɔ nsɛm]

[Adaka wɔ kratafa 24]

Ɔyere Adwene

Sɛ́ ɔyere no, ɔhokafo a wanya yare a ɛka ehon nkwaadɔm atitiriw no a wo ne no te no yɛ den—adwene, nkate, ne honam fam. Ɛsɛ sɛ minya adwempa wɔ nea mabɔ me tirim sɛ mɛyɛ ho na minya ɔpɛ sɛ memma daakye ho dadwen a ɛho nhia nhyɛ me so. (Mateo 6:34) Nanso, amanehunu ano a yebegyina no betumi ama obi ada su pa a eye sen biara adi. Yɛn aware asɔ sen kan no, na me ne Yehowa ntam abusuabɔ mu ayɛ den kɛse. Afoforo a wɔwɔ tebea a emu yɛ den saa ara mu no asetram nsɛm nso ahyɛ me den kɛse. Esiane ɔsom a ɛsom bo a Julián de ma ne nuanom nti, minya n’abotɔyam no bi, na mahu sɛ Yehowa nni yɛn huammɔ da, ɛmfa ho sɛ ebia da biara de asɛnnennen foforo bɛba no.

[Adaka wɔ kratafa 24]

Ɔbabarima Adwene

Minya nhwɛso a ɛkyɛn so wɔ me papa boasetɔ ne adwempa a ɔwɔ no mu, na sɛ mipia no kɔ baabiara a, mete nka sɛ mfaso wɔ me so. Minim sɛ ɛnyɛ bere nyinaa na metumi ayɛ nea mɛpɛ sɛ meyɛ. Seesei minnii mfe 20, nanso sɛ minyin a mɛpɛ sɛ mesom sɛ Ayaresabea Ntam Nkitahodi Boayikuw muni. Minim sɛ bɔhyɛ ahorow a ɛwɔ Bible mu no kyerɛ sɛ amanehunu yɛ bere tiaa mu ade, na anuanom mmarima ne mmea pii hu amane sen yɛn.

[Mfonini wɔ kratafa 22]

Me yere hyɛ me nkuran yiye

[Mfonini wɔ kratafa 23]

Me ne koma ho Oduruyɛfo Juan Duarte rebɔ nkɔmmɔ

[Mfonini wɔ kratafa 25]

Me ne me babarima no ani gye sɛ yɛbom yɛ adwuma wɔ asɛnka mu