“Edii Me Komam Ahiade Bi Ho Dwuma”

“MIFI koma nyinaa mu da mo ase wɔ akyɛde fɛfɛ a ɛne Bɛn Yehowa no ho. Edii me komam ahiade bi ho dwuma—ahiade a ɛne sɛ mehu sɛ Yehowa dɔ me na n’ani sɔ me. Mprempren mete nka sɛ mabɛn Yehowa ne ne Dɔba no kɛse. Mepɛ sɛ meka nhoma yi ho asɛm kyerɛ obiara, na mede bi ma m’adɔfo nyinaa.” Saa na Yehowa Dansefo bi tee nka wɔ nhoma foforo a ekura nkrafata 320 a woyii no adi wɔ “Ahenni Adawurubɔfo a Wɔyɛ Nsi” Amantam Nhyiam a wɔyɛe wɔ 2002 ne 2003 ase no ho. Ma yensusuw nhoma foforo yi afã bi ne nea enti a wotintimii no ho.

Nhoma Foforo no Afã Bi

Dɛn na ɛwɔ saa nhoma foforo yi mu? Ɛyɛ nsɛm a yɛasusuw ho wɔ adesua nsɛm abien yi mu nyinaa—ne afoforo pii! Nhoma yi kura ti ahorow 31, emu biara tenten bɛyɛ sɛ Ɔwɛn-Aban mu adesua asɛm. Wɔ nnianim asɛm no ne ti abiɛsa a edi kan akyi no, wɔakyekyɛ nhoma yi mu ayɛ no afã horow anan, na wɔasusuw Yehowa su atitiriw anan no mu biako ho wɔ ɔfã biara mu. Wɔde su no ho nkyerɛkyerɛmu tiawa na efi ɔfã biara ase. Ti ahorow kakra a edi hɔ no susuw sɛnea Yehowa da saa su no adi wɔ akwan horow so ho. Afei, ɔfã biara kura ti bi a ɛka Yesu ho asɛm. Dɛn ntia? Wiɛ, Yesu kae sɛ: “Nea wahu me no ahu agya no.” (Yohane 14:9) Yesu a ɔdaa Yehowa su adi pɛpɛɛpɛ no ma yehu sɛnea Onyankopɔn de ne su ahorow di dwuma ho nhwɛso ahorow a emu da hɔ fann. Ɔfã biara de ti bi a ɛkyerɛkyerɛ yɛn sɛnea yebesuasua Yehowa wɔ sɛnea ɔde ne su a yɛresusuw ho no di dwuma no na ewie. Bere a nhoma foforo yi reka Yehowa su ahorow ho asɛm no, ɛtwe adwene si Bible mu nhoma biara so.

Afã titiriw bi nso wɔ Bɛn Yehowa nhoma yi mu. Efi ti 2 rekɔ no, adaka bi wɔ eti biara mu a wɔato din “Nsɛmmisa a Ɛsɛ sɛ Wususuw Ho.” Wɔamfa kyerɛw nsɛm ne nsɛmmisa no amma sɛ nea wɔde reyɛ eti no mu ntĩmu. Mmom no, wɔyɛe sɛ ɛbɛboa wo ma wode Bible no asusuw asɛm no ho akɔ akyiri. Yɛkamfo kyerɛ sɛ kenkan Kyerɛwnsɛm no mu biara yiye. Afei susuw asɛmmisa no ho, na bɔ mmɔden sɛ wode bedi dwuma. Nsusuwho a ɛte saa betumi akanyan wo koma, na aboa ma woabɛn Yehowa bere nyinaa.—Dwom 19:14.

Wɔyɛɛ Bɛn Yehowa nhoma no mu mfonini ahorow no ho nhwehwɛmu siesiee no yiye sɛnea ɛbɛyɛ a ebetumi akyerɛkyerɛ na ahyɛ nkuran. Wɔde kratafa mũ biako ayɛ Bible mu nsɛm ho mfonini a ɛyɛ fɛ wɔ ti ahorow dunson mu.

Dɛn Nti na Wɔyɛe?

Dɛn nti na wɔyɛɛ Bɛn Yehowa nhoma no? Atirimpɔw titiriw nti a wɔyɛɛ saa nhoma foforo yi ne sɛ ɛbɛboa yɛn ma yɛahu Yehowa yiye na ama yɛatumi ne yɛn Nyankopɔn no anya abusuabɔ a emu yɛ den.

So wubetumi asusuw obi a obetumi anya Bɛn Yehowa nhoma no so mfaso, ebia Bible suani anaa onua anaa onuawa Kristoni bi a wayɛ mmerɛw ho? Na w’ankasa nso ɛ—so woafi ase rekenkan nhoma foforo yi? Sɛ wumfii ase a, dɛn nti na wonyɛ bere nhyehyɛe na wumfi ase ntɛm ara? Gye bere fa susuw nea wobɛkenkan no ho. Ɛmmra sɛ nhoma foforo yi bɛboa wo ma woabɛn Yehowa Nyankopɔn yiye, sɛnea ɛbɛyɛ a wode anigye ne nsiyɛ kɛse bɛka N’ahenni ho asɛmpa no!