“Onyankopɔn Ne Dɔ”
“Onyankopɔn Ne Dɔ”
“Nea ɔnnɔ no nhuu Nyankopɔn ɛ, na Onyankopɔn ne dɔ.”—1 YOHANE 4:8.
1-3. (a) Asɛm bɛn na Bible ka fa Yehowa su a ɛne ɔdɔ no ho, na ɔkwan bɛn so na saa asɛm yi yɛ soronko? (b) Dɛn nti na Bible ka sɛ “Onyankopɔn ne dɔ”?
YEHOWA su ahorow nyinaa yɛ nea ɛso bi nni, ɛyɛ pɛ, na ɛyɛ anigye. Nanso, Yehowa su ahorow no nyinaa mu nea ɛsen biara ne ɔdɔ. Biribi foforo biara nni hɔ a etumi twe yɛn bɛn Yehowa kɛse sɛ ne dɔ. Nea ɛyɛ anigye no, ɔdɔ nso ne Yehowa su titiriw. Yɛyɛ dɛn hu saa?
2 Bible ka biribi fa ɔdɔ ho a ɛnka saa da mfa Yehowa su atitiriw a aka no ho. Kyerɛwnsɛm no nka sɛ Onyankopɔn ne tumi anaa Onyankopɔn ne atɛntrenee anaa mpo Onyankopɔn ne nyansa. Ɔwɔ saa su ahorow no, ɔno ne saa su ahorow abiɛsa no wura. Nanso, wɔka asɛm bi a emu dɔ paa fa ɔdɔ ho wɔ 1 Yohane 4:8 sɛ: ‘Onyankopɔn ne dɔ.’ Yiw, ɔdɔ ayɛ Yehowa ma. Ɛyɛ ne su titiriw. Sɛnea ɛte no, yebetumi asusuw ho saa kwan yi so sɛ: Yehowa tumi ma otumi yɛ ade. N’atɛntrenee ne ne nyansa kyerɛ sɛnea ɔyɛ n’ade kwan. Nanso, Yehowa dɔ kanyan no ma ɔyɛ ade. Na ne dɔ ka sɛnea ɔde su afoforo di dwuma no ho bere nyinaa.
3 Wɔtaa ka sɛ Yehowa ne ɔdɔ ho nhwɛso titiriw. Enti, sɛ yɛpɛ sɛ yesua ɔdɔ ho ade a, ɛsɛ sɛ yesua Yehowa ho ade. Afei, momma yensusuw Yehowa dɔ a ɛso bi nni no afã bi ho.
Ɔdɔ a Ɛsen Biara a Wɔada no Adi
4, 5. (a) Dɛn ne ɔdɔ a ɛsen biara a wɔada no adi wɔ abakɔsɛm nyinaa mu? (b) Dɛn nti na yebetumi aka sɛ ɔdɔ a emu yɛ den sen biara na ama Yehowa ne ne Ba no ayɛ biako?
4 Yehowa ada ɔdɔ adi wɔ akwan pii so, nanso biako wɔ hɔ a ɛsen nea aka nyinaa. Ɛyɛ dɛn? Ɛyɛ soma a ɔsomaa ne Ba ma obehuu amane wu maa yɛn no. Yebetumi aka ma afata koraa sɛ eyi ne ɔdɔ a ɛsen biara a wɔada no adi wɔ abakɔsɛm nyinaa mu. Dɛn nti na yebetumi aka saa?
5 Bible frɛ Yesu “abɔde nyinaa abakan.” (Kolosefo 1:15) Wo de susuw ho hwɛ—na Yehowa Ba no wɔ hɔ ansa na amansan a aniwa hu yi reba. Ɛnde, bere tenten ahe na na Agya no ne Ɔba no abom atra? Nyansahufo bi bu akontaa sɛ amansan yi adi mfirihyia ɔpepepem 13. Nanso, sɛ akontaabu yi teɛ mpo a, ɛrenyɛ nea ɛware a ebetumi agyina hɔ ama Yehowa Abakan no nkwa nna! Dɛn na na ɔreyɛ wɔ saa mfe no nyinaa mu? Ɔba no de anigye som N’agya sɛ ‘odwumayɛni a waben.’ (Mmebusɛm 8:30; Yohane 1:3) Yehowa ne ne Ba no na wɔboom yɛɛ adwuma de yɛɛ nneɛma foforo nyinaa. Hwɛ anigye mmere ara a wonyae! Ɛnde, yɛn mu hena na obetumi ahu sɛnea ɔdɔ a atra hɔ bere tenteenten saa no mu den te? Ɛda adi pefee sɛ, ɔdɔ a emu yɛ den sen biara na ama Yehowa Nyankopɔn ne ne Ba no ayɛ biako.
6. Bere a wɔbɔɔ Yesu asu no, ɔkwan bɛn so na Yehowa daa sɛnea ɔte nka wɔ Ne Ba no ho adi?
6 Nanso, Yehowa somaa ne Ba no baa asase so ma wɔwoo no sɛ onipa ba. Saa a ɔyɛe no kyerɛe sɛ, na ɛsɛ sɛ Yehowa hwere abusuabɔ a emu yɛ den a ɔne ne Dɔba no wɔ wɔ soro no bere tenten bi. Bere a Yesu nyin bɛyɛɛ onipa a ɔyɛ pɛ no, ɔde anigye a emu yɛ den fi soro hwɛe. Bere a Yesu dii bɛyɛ mfirihyia 30 no, wɔbɔɔ no asu. Saa da no Agya no ankasa fi soro kasae sɛ: “Oyi ne me dɔba a ɔsɔ m’ani.” (Mateo 3:17) Bere a Yesu Agya hui sɛ ofi nokwaredi mu adi biribiara a wɔhyɛɛ ho nkɔm, biribiara a wɔhwehwɛ fii ne hɔ, ho dwuma no, ɛbɛyɛ sɛ n’ani gyei yiye!—Yohane 5:36; 17:4.
7, 8. (a) Tebea bɛn mu na Yesu fae wɔ Nisan 14, 33 Y.B., na ɛkaa ne soro Agya no dɛn? (b) Dɛn nti na Yehowa maa ne Ba no huu amane na owui?
7 Nanso, Yehowa tee nka dɛn wɔ Nisan 14, 33 Y.B., bere a woyii Yesu mae, na afei basabasayɛfo kuw a wɔn bo afuw kyeree no no? Bere a wodii Yesu ho fɛw, tetee ntasu guu no so, na wɔbobɔɔ no akuturuku no? Bere a wɔkaa no mpire ma n’akyi tetewee sɛ ntamabamma no? Bere a wɔde nnadewa bobɔɔ ne nsam ne ne nan mu fam dua ho na wogyaw no ma ɔsɛn hɔ na nkurɔfo sopaa no no? Agya no tee nka dɛn bere a ne Dɔba no sũ frɛɛ no wɔ n’ahohia mu no? Yehowa tee nka dɛn bere a Yesu guu ahome a etwa to, a na ɛno ne bere a edi kan koraa fi bere a wɔbɔɔ nneɛma nyinaa, a na Ne Dɔba no nni nkwa mu no?—Mateo 26:14-16, 46, 47, 56, 59, 67; 27:26, 38-44, 46; Yohane 19:1.
8 Esiane sɛ Yehowa wɔ nkate nti, yentumi mfa nsɛm nkyerɛkyerɛ ɛyaw a odii wɔ ne Ba no wu ho no mu. Nea yebetumi akyerɛkyerɛ mu ne nea enti a Yehowa maa kwan maa eyi bae no. Dɛn nti na Agya no maa ɛyaw a ɛte saa baa no so? Yehowa da biribi a ɛyɛ anigye adi kyerɛ yɛn wɔ Yohane 3:16—Bible mu asɛm a wɔato din Asɛmpa ketewaa no. Ɛka sɛ: “Sɛnea Onyankopɔn dɔ wiase ni, sɛ ɔde ne ba a ɔwoo no koro no mae, na obiara a ogye no di no anyera, na wanya daa nkwa.” Enti nea ɛmaa Onyankopɔn yɛɛ eyi ne: ɔdɔ. Wɔnnaa ɔdɔ a ɛsen eyi adi pɛn.
Sɛnea Yehowa Ma Yenya Ne Dɔ Ho Awerɛhyem
9. Dɛn na Satan pɛ sɛ yegye di wɔ sɛnea Yehowa bu yɛn ho, nanso dɛn ho na Yehowa ma yɛn awerɛhyem?
9 Nanso, asɛmmisa bi a ɛho hia sɔre: So Onyankopɔn dɔ yɛn sɛ ankorankoro? Ebinom begye atom sɛ Onyankopɔn dɔ adesamma nyinaa, sɛnea Yohane 3:16 ka no. Nanso, ɛte sɛ nea wɔte nka sɛ, ‘Onyankopɔn ntumi nnɔ me sɛ́ ankorankoro da.’ Nokwasɛm ne sɛ Satan Ɔbonsam ani gye ho sɛ ɔbɛma yɛagye adi sɛ Yehowa nnɔ yɛn, na ommu yɛn nso. Nanso, ɛmfa ho sɛnea ebia yɛte nka sɛ wɔnnɔ yɛn anaasɛ mfaso nni yɛn so no, Yehowa ma yɛn awerɛhyem sɛ ne nokware asomfo no mu biara som bo ma no.
10, 11. Ɔkwan bɛn so na nkasanoma ho bɛ a Yesu bui no kyerɛ sɛnea yɛsom bo wɔ Yehowa ani so?
10 Sɛ nhwɛso no, susuw Yesu nsɛm a wɔayɛ ho kyerɛwtohɔ wɔ Mateo 10:29-31 no ho hwɛ. Bere a Yesu reyɛ sɛnea mfaso wɔ n’asuafo no so ho mfatoho no, ɔkae sɛ: “So wɔntɔn nkasanoma abien nnye ɔban? Nanso wɔn mu biako mpo nkwati mo agya nhwe fam. Na mo ti nhwi mpo, wɔakan ne nyinaa. Enti munnsuro! Mosen nkasanoma bebree.” Susuw nea saa nsɛm no kyerɛ maa Yesu atiefo a wɔtraa ase wɔ afeha a edi kan mu no ho hwɛ.
11 Wɔ Yesu bere so no, na akasanoma ne nnomaa a wɔwe wɔn nam no mu nea na ne bo yɛ fow koraa. Na wɔde dwetɛ sika a enni bo koraa tɔ nkasanoma abien. Nanso, sɛnea Luka 12:6, 7 kyerɛ no, akyiri yi Yesu kae sɛ, sɛ obi yɛ sɛ ɔde mman abien bɛtɔ nkasanoma a, na ɛnyɛ anan na onya na mmom anum. Na wɔde anomaa biako to so te sɛ nea ɛnsom bo koraa. Ebia na nnomaa a ɛte saa no nsom bo koraa wɔ nnipa ani so, nanso na Ɔbɔadeɛ no bu wɔn dɛn? Yesu kae sɛ: “Onyankopɔn anim de, ani mpa wɔn mu biako so [a biako a wɔde to so no mpo ka ho].” Afei, ebia yebefi ase ahu nea na Yesu rekyerɛ no. Sɛ Yehowa bu akasanoma biako saa a, ɛnde hwɛ sɛnea obebu nipa kɛse! Sɛnea Yesu kae no, Yehowa nim yɛn ho nsɛm nyinaa. Hwɛ, yɛn ti nhwi mpo wɔakan!
12. Dɛn nti na yebetumi anya awerɛhyem sɛ na Yesu reka nokwasɛm bere a ɔkae sɛ wɔakan yɛn ti nhwi no?
12 Ebia ebinom besusuw sɛ na Yesu regugu nsɛm mu wɔ ha. Nanso, wode susuw owusɔre anidaso no ho hwɛ. Hwɛ sɛnea ɛbɛyɛ sɛ ɛsɛ sɛ Yehowa hu yɛn yiye na ama watumi asan abɔ yɛn! Yɛsom bo ma no araa ma ɔkae yɛn ho biribiara, a yɛn awosu a emu nneɛma dɔɔso ne yɛn tirim nsɛm ne osuahu ahorow a yɛanya mfirihyia pii mu no nyinaa ka ho. Sɛ yɛde toto ho a, yɛn ti nhwi a ɔbɛkan—a ɛbɛyɛ 100,000 na efuw wɔ yɛn mu dodow no ara ti so—no yɛ adwuma ketewa koraa. Hwɛ sɛnea Yesu nsɛm a ɛyɛ dɛ no ma yenya awerɛhyem sɛ Yehowa dwen yɛn ho sɛ ankorankoro!
13. Ɔkwan bɛn so na Ɔhene Yehosafat asɛm no da no adi sɛ ɛwom sɛ yɛnyɛ pɛ de, nanso Yehowa hwehwɛ yɛn ho nsɛm pa?
13 Bible da biribi foforo a ɛma yenya Yehowa dɔ ho awerɛhyem adi. Ɔhwehwɛ yɛn ho nneɛma pa kyerɛ ho anisɔ. Sɛ nhwɛso no, susuw Ɔhempa Yehosafat ho hwɛ. Bere a ɔhene no yɛɛ nkwaseade bi no, Yehowa diyifo ka kyerɛɛ no sɛ: “Na eyi nti abufuw a efi [Yehowa, NW] anim da wo so.” Aniberesɛm bɛn ni! Nanso, Yehowa asɛm no anso hɔ ara. Ɛkɔɔ so kae sɛ: “Nanso wɔahu wo ho nsɛm pa.” (2 Beresosɛm 19:1-3) Enti Yehowa trenee abufuw no amma wammu n’ani angu Yehosafat “ho nsɛm pa” so. Ɛwom sɛ yɛnyɛ pɛ de, nanso so ɛnyɛ awerɛkyekye sɛ yebehu sɛ yɛn Nyankopɔn hwehwɛ yɛn ho nsɛm pa?
Onyankopɔn a ‘Wayɛ Krado sɛ Ɔde Bɔne Befiri’
14. Sɛ yɛyɛ bɔne a, nkate a emu yɛ den bɛn na yebetumi anya, nanso ɔkwan bɛn so na yebetumi anya Yehowa bɔne fafiri so mfaso?
14 Sɛ yɛyɛ bɔne a, abasamtu, aniwu, ne afobu betumi ama yɛate nka sɛ yentumi nyɛ nkurɔfo a yɛfata sɛ yɛsom Yehowa bio. Nanso, kae sɛ, Yehowa ayɛ ‘krado sɛ ɔde bɔne befiri.’ (Dwom 86:5, NW) Yiw, sɛ yenu yɛn ho wɔ yɛn bɔne ho na yɛyere yɛn ho sɛ yɛrenyɛ bio a, yebetumi anya Yehowa bɔne fafiri so mfaso. Susuw sɛnea Bible kyerɛkyerɛ Yehowa dɔ no fã yi mu no ho hwɛ.
15. Yehowa ma yɛne yɛn bɔne ntam kwan ware dɛn?
15 Odwontofo Dawid de asɛm foforo a emu da hɔ kyerɛkyerɛɛ Yehowa fafiri mu sɛ: ‘Sɛ apuei ne atɔe ntam ware no, sɛ wama yɛn ne yɛn mmarato ntam aware ne no.’ (Dwom 103:12) Apuei ne atɔe ntam kwan ware dɛn? Ɔkwan bi so no, apuei ne atɔe ntam kwan ware bere nyinaa; afã abien no ntumi nhyia da. Nhomanimfo bi ka sɛ asɛm yi kyerɛ “sɛnea ebetumi ayɛ yiye; sɛnea yebetumi de yɛn adwene abu.” Dawid nsɛm a efi honhom mu no ma yehu sɛ, sɛ Yehowa de firi a, oyi yɛn bɔne fi yɛn ho kɔ akyirikyiri koraa.
16. Sɛ Yehowa de yɛn bɔne firi yɛn a, dɛn nti na ɛsɛ sɛ yenya awerɛhyem sɛ ɛno akyi no obu yɛn sɛ yɛn ho tew?
16 So woabɔ mmɔden sɛ wobɛpopa nkekae bi afi atade fitaa bi mu pɛn? Ebia ɛmfa ho mmɔden biara a wobɔe no, woda so hu nkekae no. Hyɛ sɛnea Yehowa kyerɛkyerɛ tumi a ɔwɔ sɛ ɔde bɔne firi mu no nsow: ‘Sɛ mo bɔne te sɛ dammaramma a, ɛbɛhoa sɛ sukyerɛma, sɛ ɛbere sɛ nkranhoma a, ɛbɛyɛ sɛ oguan nhwi.’ (Yesaia 1:18) Asɛmfua “dammaramma” kyerɛ ade kɔkɔɔ. * Ná “nkranhoma” yɛ aduru a na wɔde hyɛ ntama no mu nea ani dum paa. Yɛn ankasa mmɔdenbɔ ntumi nyi bɔne nkekae mfi yɛn ho da. Nanso, Yehowa betumi ayi bɔne a ɛte sɛ dammaramma ne nkranhoma no, na wama ayɛ fitaa te sɛ sukyerɛma anaa asaawa a wɔnhyɛɛ no aduru. Enti sɛ Yehowa de yɛn bɔne firi yɛn a, ɛnsɛ sɛ yɛte nka sɛ bɔne a ɛte saa no bɛtra yɛn so yɛn nkwa nna a aka nyinaa.
17. Ɔkwan bɛn so na Yehowa tow yɛn bɔne gu n’akyi?
17 Wɔ aseda dwom bi a Hesekia hyehyɛe bere a wogyee no fii owuyare bi mu no, ɔka kyerɛɛ Yehowa sɛ: ‘Woatow me bɔne nyinaa agu w’akyi.’ (Yesaia 38:17) Wɔka Yehowa ho asɛm wɔ ha sɛ ɔfa ɔdebɔneyɛfo a wanu ne ho bɔne tow gu N’akyi, baabi a Ɔrenhu anaasɛ Onnwen ho bio. Sɛnea nhwehwɛmu nhoma bi kyerɛ no, yebetumi aka adwene a ɛwɔ mu ho asɛm sɛ: “Woama me [bɔne] ayɛ sɛ nea ansi.” So ɛnyɛ awerɛkyekye?
18. Ɔkwan bɛn so na odiyifo Mika kyerɛ sɛ sɛ Yehowa de bɔne firi a, Oyi yɛn bɔne fi hɔ koraa?
18 Wɔ nsiesie ho bɔhyɛ bi mu no, odiyifo Mika kaa ahotoso a ɔwɔ sɛ Yehowa de ne nkurɔfo a wɔanu wɔn ho bɔne befiri wɔn no ho asɛm sɛ: ‘Hena ne Onyankopɔn sɛ wo a wutwa mmarato ho ma w’agyapade nkae no? Wobɛtow wɔn bɔne nyinaa agu ɛpo bun mu.’ (Mika 7:18, 19) Susuw nea na saa nsɛm no kyerɛ ma wɔn a wɔtraa ase wɔ Bible mmere mu no ho hwɛ. So na ɔkwan bi wɔ hɔ a wobetumi afa so ayi biribi a na ‘wɔatow agu ɛpo bun mu’? Enti na Mika nsɛm no kyerɛ sɛ, sɛ Yehowa de firi a, oyi yɛn bɔne fi hɔ koraa.
‘Yɛn Nyankopɔn Ayamhyehye’
19, 20. (a) Hebri asɛmfua a wɔkyerɛɛ ase “hu mmɔbɔ” anaa “nya ayamhyehye” no kyerɛ dɛn? (b) Ɔkwan bɛn so na Bible de nkate a ɛna wɔ ma ne ba no di dwuma kyerɛkyerɛ sɛnea Yehowa wɔ ayamhyehye ma yɛn no mu?
19 Ayamhyehye yɛ Yehowa dɔ no fã foforo. Dɛn ne ayamhyehye? Wɔ Bible mu no, ayamhyehye ne mmɔborohunu wɔ abusuabɔ a emu yɛ den. Hebri ne Hela nsɛmfua dodow bi twe adwene si ayamhyehye so. Sɛ nhwɛso no, wɔtaa kyerɛ Hebri adeyɛ asɛm ra·chamʹ, ase “hu mmɔbɔ” anaa “nya ayamhyehye.” Hebri asɛm yi a Yehowa de ka n’ankasa ho asɛm no ne asɛmfua a egyina hɔ ma “awotwaa” wɔ abusuabɔ, na ebetumi akyerɛ “ɛna ayamhyehye.”
20 Bible de atenka a ɛna wɔ ma ne ba di dwuma de kyerɛ yɛn sɛnea Yehowa ayamhyehye te. Yesaia 49:15 ka sɛ: “So ɔbea werɛ befi ne ba akokoaa, na ne yam renhyehye [ra·chamʹ] no ne yafumma ho? Sɛ eyinom werɛ befi po a, me de, me werɛ remfi wo.” Ɛyɛ den sɛ wubesusuw sɛ ɛna bi werɛ befi sɛ ɔbɛma ne ba kumaa aduan na wahwɛ no. Nokwarem no, akokoaa ntumi nyɛ ne ho hwee; akokoaa hia sɛ ne na hwɛ no awia ne anadwo. Nanso, ɛyɛ yaw sɛ yɛte sɛ ɛnanom pii bu wɔn ani gu wɔn mma so, titiriw wɔ saa “mmere a emu yɛ den” yi mu. (2 Timoteo 3:1, 3) Yehowa ka sɛ: “Me de, me werɛ remfi wo.” Ayamhyehye a Yehowa wɔ ma n’asomfo no yɛ nea emu yɛ den koraa sen atenka biara a nnipa betumi anya—ayamhyehye a ɛna bi nya ma ne ba akokoaa no.
21, 22. Dɛn na ɛbaa Israelfo so wɔ tete Misraim, na ɔkwan bɛn so na Yehowa tiee wɔn sufrɛ?
21 Ɔkwan bɛn so na Yehowa, te sɛ ɔwofo a ɔwɔ dɔ no, da ayamhyehye adi? Yehu saa su yi pefee wɔ sɛnea ɔne tete Israel dii nsɛm no mu. Eduu afeha a ɛto so 16 A.Y.B. mu no, na Israelfo ɔpepem pii yɛ nkoa wɔ Misraim, baabi a na wɔhyɛ wɔn so denneennen no. (Exodus 1:11, 14) Israelfo no su frɛɛ Yehowa hwehwɛɛ mmoa wɔ wɔn ahohia mu. Ɔkwan bɛn so na Onyankopɔn a ɔwɔ ayamhyehye no yɛɛ n’ade wɔ ho?
22 Ɛkaa Yehowa koma. Ɔkae sɛ: “Ohu na mahu me man a ɛwɔ Misraim no amanehunu, na wɔn su a . . . wosu frɛ no, mate, na mahu wɔn amanehunu.” (Exodus 3:7) Ná Yehowa ntumi nhwɛ ne nkurɔfo amanehunu anaa ontie wɔn sufrɛ a ne yam nhyehye no wɔn ho. Yehowa yɛ Onyankopɔn a ɔwɔ tema. Na tema—hu a obi tumi hu afoforo yaw—ne ayamhyehye wɔ abusuabɔ. Nanso, Yehowa ante nka amma ne nkurɔfo kɛkɛ; ɛkaa no ma ɔyɛɛ ade maa wɔn. Yesaia 63:9 ka sɛ: ‘Ne dɔ ne n’ayamhyehye mu na ogyee wɔn.’ Yehowa de “nsa a ɛyɛ den” na egyee Israelfo fii Misraim. (Deuteronomium 4:34) Ɛno akyi no, ɔnam anwonwakwan so maa wɔn aduan gyee wɔn kɔɔ wɔn ankasa asase a ɛsow aba so.
23. (a) Ɔkwan bɛn so na odwontofo no nsɛm no ma yɛn awerɛhyem sɛ Yehowa dwen yɛn ho kɛse sɛ ankorankoro? (b) Akwan bɛn so na Yehowa boa yɛn sɛ ankorankoro?
23 Ɛnyɛ Yehowa nkurɔfo nkutoo na ɔda ayamhyehye adi kyerɛ wɔn sɛ́ kuw. Yɛn Nyankopɔn a ɔwɔ dɔ no dwen yɛn ho kɛse sɛ ankorankoro. Yebetumi anya ahotoso sɛ ohu amanehunu biara a ebia yɛrefa mu no yiye. Odwontofo no kae sɛ: “[Yehowa, NW] ani wɔ treneefo so, na n’aso tie wɔn sufrɛ. [Yehowa, NW] bɛn wɔn a wɔn koma abubu, na ogye wɔn a wɔn honhom apɛtɛw.” (Dwom 34:15, 18) Ɔkwan bɛn so na Yehowa boa yɛn sɛ ankorankoro? Onyi nea ɛde yɛn amanehunu ba no mfi hɔ ankasa. Nanso, wayɛ nsiesiei pii ama wɔn a wosu frɛ no de hwehwɛ mmoa no. N’asɛm no de afotu a mfaso wɔ so ma a ebetumi aboa yɛn. Wɔ asafo no mu no, Yehowa ama yɛn ahwɛfo a wɔn ho akokwaw honhom fam a wɔbɔ mmɔden sɛ wɔbɛda n’ayamhyehye no bi adi akyerɛ bere a wɔboa afoforo no. (Yakobo 5:14, 15) Sɛ́ “mpaebɔ tiefo” no, Yehowa de ‘honhom kronkron ma wɔn a wobisa no’ no. (Dwom 65:2; Luka 11:13) Nsiesiei ahorow a ɛte saa nyinaa yɛ ‘yɛn Nyankopɔn ayamhyehye’ a ɔda no adi.—Luka 1:78.
24. Ɔkwan bɛn so na wobɛyɛ w’ade wɔ Yehowa dɔ ho?
24 So ɛnyɛ anigye sɛ yebesusuw yɛn soro Agya no dɔ ho? Wɔkaee yɛn wɔ asɛm a edi eyi anim no mu sɛ Yehowa ada ne tumi, n’atɛntrenee, ne ne nyansa adi wɔ ɔdɔ mu ama yɛanya so mfaso. Na yɛahu wɔ saa asɛm yi mu sɛ Yehowa ada ne dɔ adi akyerɛ adesamma tẽẽ—ne yɛn sɛ ankorankoro—wɔ akwan a ɛyɛ nwonwa so. Afei, ɛsɛ sɛ yɛn mu biara bisa ne ho sɛ, ‘Mɛyɛ m’ade dɛn wɔ Yehowa dɔ ho?’ Ɛmmra sɛ wubebua saa asɛmmisa no denam wo koma, w’adwene, wo kra, ne w’ahoɔden nyinaa a wode bɛdɔ no so. (Marko 12:29, 30) Ɛmmra sɛ sɛnea woyɛ w’ade da biara da no bɛda no adi sɛ ɛwɔ wo komam sɛ wobɛbɛn Yehowa kɛse. Na ɛmmra sɛ Yehowa, Onyankopɔn a ɔwɔ ɔdɔ no bɛbɛn wo kɛse—akosi daa!—Yakobo 4:8.
[Ase hɔ asɛm]
^ nky. 16 Nhomanimfo bi ka sɛ na dammaramma “yɛ kɔla bi a ɛka ade mu a wɔhoro a ɛnkɔ. Obosu, osu, adehoro, ne hyɛ a wɔhyɛ no bere tenten ntumi mma ase ntu.”
So Wokae?
• Yɛyɛ dɛn hu sɛ ɔdɔ yɛ Yehowa su titiriw?
• Dɛn nti na yebetumi aka sɛ Yehowa Ba a ɔsomaa no ma obehuu amane wu maa yɛn no ne ɔdɔ a ɛsen biara a wɔada no adi?
• Ɔkwan bɛn so na Yehowa ma yɛn awerɛhyem sɛ ɔdɔ yɛn sɛ ankorankoro?
• Akwan bɛn so na Bible kyerɛkyerɛ Yehowa fafiri mu fann?
[Adesua no ho Nsɛmmisa]
[Mfonini wɔ kratafa 15]
‘Onyankopɔn de ne ba a ɔwoo no koro no mae’
[Mfonini wɔ kratafa 16, 17]
“Mosen nkasanoma bebree”
[Asɛm Fibea]
© J. Heidecker/VIREO
[Mfonini wɔ kratafa 18]
Atenka a ɛna wɔ ma ne ba betumi akyerɛ yɛn sɛnea Yehowa ayamhyehye te