Sɛnea Yebenya Nokware Dɔ

“Ɔdɔ yɛ nkwa aduru; ɔdɔ yɛ nkwa ankasa.”​—Living to Purpose, a Joseph Johnson kyerɛwee wɔ 1871 mu no.

ƆKWAN bɛn so na nnipa sua ɔdɔ? Ɛne sɛ wobesua adwene ne nneyɛe ho ade? Sɛ́ wɔbɛkenkan akwankyerɛ nhoma ahorow? Sɛ́ wɔbɛhwɛ sini a nna ho nsɛm wom? Dabida. Nea edi kan koraa no, nnipa sua sɛ wɔbɛdɔ afoforo denam wɔn awofo nhwɛso ne ntetee a wɔde ma wɔn so. Mmofra besua nea ɔdɔ kyerɛ bere a wɔwɔ abusua a ɔdɔ wom mu, bere a wohu sɛ wɔn awofo hwɛ wɔn na wɔbɔ wɔn ho ban, bere a wɔne wɔn di nkitaho, na wɔkyerɛ wɔn ho anigye ankasa no. Wosua sɛ wɔbɛdɔ afoforo nso bere a wɔn awofo kyerɛ wɔn sɛ wonni papa ne bɔne ho nnyinasosɛm a edi mu akyi no.

Nokware dɔ nyɛ tema anaa nkate a obi wɔ kɛkɛ. Ɛyɛ nea afoforo pɛ bere nyinaa, sɛ wɔankyerɛ ho anisɔ saa bere no mpo a, ade a ɛtaa ba wɔ mmofra fam bere a wofi ɔdɔ mu teɛ wɔn so no. Ɔdɔ a pɛsɛmenkominya nnim a wɔda no adi ho nhwɛso biako a ɛyɛ pɛ ne Ɔbɔadeɛ no ankasa. Ɔsomafo Paulo kyerɛwee sɛ: “Me ba, mmu [Yehowa, NW] asotwe ade ketewa, nanso oyi wo ntɛn a, mma wo bo nntu. Na nea [Yehowa, NW] dɔ no no na ɔtwe n’aso.”—Hebrifo 12:5, 6.

Awofo, mobɛyɛ dɛn atumi asuasua Yehowa, na moada ɔdɔ adi wɔ mo abusua mu? Na nhwɛso a moyɛ wɔ mo ntam abusuabɔ mu sɛ okunu ne ɔyere no ho hia dɛn?

Monkyerɛkyerɛ Ɔdɔ Denam Mo Nhwɛso So

Sɛ woyɛ okunu a, so wubu wo yere sɛ ɔsom bo na ɔkorɔn, na wode nidi ne obu ma no? Sɛ woyɛ ɔyere a, so wodɔ wo kunu na woboa no? Bible ka sɛ ɛsɛ sɛ okunu ne ɔyere dɔ wɔn ho na wobu wɔn ho. (Efesofo 5:28; Tito 2:4) Sɛ wɔyɛ saa a, wɔn mma hu sɛ wɔde Kristofo dɔ reyɛ adwuma ankasa. Hwɛ asuade a tumi wom na ɛsom bo a ɛno betumi ayɛ!

Awofo ma ɔdɔ tra wɔn abusua mu nso bere a wodi abusua ho gyinapɛn ahorow a ɛkorɔn a ɛfa nneɛma te sɛ anigyede, abrabɔ pa, ne botae ahorow ho so no. Wiase nyinaa no, nkurɔfo ahu sɛ Bible no boa kɛse ma wɔhyehyɛ abusua ho gyinapɛn ahorow a ɛte saa, na ɛno yɛ adanse a edi mu a ɛkyerɛ sɛ Bible no “fi Nyankopɔn home mu, na eye ma ɔkyerɛkyerɛ, ntɛnyi, nteɛso ne trenee mu yɛn” ampa. (2 Timoteo  3:16) Nokwarem no, abrabɔ ho nnyinasosɛm ne akwankyerɛ a ɛwɔ Bepɔw so Asɛnka no nkutoo mu mpo yɛ nea wogye tom wɔ wiase nyinaa sɛ ebiara ne no nsɛ.—Mateo, ti 5 kosi 7.

Sɛ abusua mũ no nyinaa de wɔn ho to Onyankopɔn so hwehwɛ akwankyerɛ na wodi ne gyinapɛn ahorow so a, emuni biara te ahobammɔ nka, na akyinnye biara nni ho sɛ mmofra no benyin no, na wɔwɔ ɔdɔ ne obu ma wɔn awofo. Ɔkwan foforo so no, wɔ ofie a gyinapɛn abien a ɛmfata na emu gow wom mu no, ebia mmofra bɛyɛ abufufafo ne atuatewfo.—Romafo 2:21; Kolosefo 3:21.

Ɔwofo biako mmusua nso ɛ? So wonni mmoa biara a ɛbɛma wɔatumi de ɔdɔ akyerɛkyerɛ wɔn mma? Ɛnte saa. Ɛwom sɛ wontumi mfa biribiara nsi ɛna pa ne agya pa a wɔbom yɛ ade ananmu de, nanso osuahu kyerɛ sɛ sɛ ɔwofo bi nni hɔ mpo a, abusua no betumi akɔ so ayɛ nneɛma araa. Sɛ woyɛ ɔwofo a wunni hokafo a, bɔ mmɔden sɛ wode Bible nnyinasosɛm bedi dwuma wɔ fie. Yiw, abebusɛm bi ka kyerɛ yɛn sɛ: “Fa wo koma nyinaa bata [Yehowa, NW] ho, na mfa wo ho ntweri wo nhumu. Hu no w’akwan nyinaa mu, na ɔno na ɔbɛteɛ w’akwan”—a nea ɛka ho ne ɔwofoyɛ ho akwan.—Mmebusɛm 3:5, 6; Yakobo 1:5.

Mmabun pii a wɔda su pa adi no yɛ nea wɔtetee wɔn wɔ ɔwofo biako mmusua mu, na yetumi hu wɔn seesei sɛ wɔde nokwaredi resom Onyankopɔn wɔ Yehowa Adansefo Kristofo asafo mpempem pii a ɛwɔ wiase nyinaa no mu. Eyi yɛ adanse a ɛkyerɛ sɛ awofo a wonni ahokafo nso betumi de ɔdɔ akyerɛkyerɛ wɔn mma ma ayɛ yiye.

Sɛnea Yɛn Nyinaa Betumi Anya Ɔdɔ

Bible ka siei sɛ wɔ “nna a edi akyiri” mu no, nnipa rennya “ɔdɔ,” kyerɛ sɛ, abusuabɔ ankasa a anka ɛsɛ sɛ ɛtra abusuafo ntam bere nyinaa no bɛyera. (2 Timoteo 3:1, 3) Nanso, wɔn a ebia wɔtetee wɔn wɔ abusua a ɔdɔ nnim mpo mu no betumi asua sɛ wɔbɛdɔ afoforo. Ɔkwan bɛn so? Ɛdenam Yehowa, a ɔyɛ ɔdɔ Farebae ankasa na ɔda ɔdɔ adi kyerɛ wɔn a wofi koma nyinaa mu ba ne nkyɛn, a wobesuasua no no so. (1 Yohane 4:7, 8) Odwontofo bi kae sɛ: “M’agya ne me na agyaw me, na [Yehowa, NW] de, ogye me.”—Dwom 27:10.

Yehowa da ne dɔ adi kyerɛ yɛn wɔ akwan pii so. Nea ɛka eyi ho ne akwankyerɛ a ɔnam Bible so de ma yɛn sɛ agya, honhom kronkron no mmoa, ne mmoa a ɔdɔ wom a efi Kristofo nuayɛkuw no hɔ no. (Dwom 119:97-105; Luka 11:13; Hebrifo 10:24, 25) Susuw sɛnea nsiesiei abiɛsa yi betumi aboa wo ma woanya ɔdɔ kɛse ama Onyankopɔn ne mfɛfo nnipa no ho hwɛ.

Agya Akwankyerɛ a Efi Honhom Mu

Sɛ wo ne obi benya abusuabɔ pa a, ɛsɛ sɛ wuhu onii no yiye. Yehowa nam ne ho a ɔda no adi wɔ Bible mu so to nsa frɛ yɛn sɛ yɛmmɛn no. Nanso, Bible a yɛbɛkenkan no ara nnɔɔso. Ɛsɛ sɛ yɛde ne nkyerɛkyerɛ di dwuma na yehu mfaso a efi mu ba no. (Dwom 19:7-10) Yesaia 48:17 ka sɛ: “Me [Yehowa, NW], wo Nyankopɔn, mene nea ɔkyerɛ wo nea eye ma wo, na ogya wo kɔ ɔkwan a fa so no so.” Yiw, Yehowa, a ɔne ɔdɔ farebae ankasa no, kyerɛkyerɛ yɛn nea eye—ɛnyɛ sɛ ɔpɛ sɛ ɔhyehyɛ mmara ne ahyɛde a ɛho nhia de siw yɛn ahofadi kwan.

 Bible mu nokware nimdeɛ a yenya no nso boa yɛn ma yenya ɔdɔ ma yɛn mfɛfo nnipa. Nea enti a eyi te saa ne sɛ Bible mu nokware kyerɛkyerɛ yɛn Onyankopɔn adwene wɔ nnipa ho na ɛkyerɛ yɛn nnyinasosɛm a ɛsɛ sɛ yɛde di dwuma bere a yɛne yɛn ho yɛn ho redi nsɛm no. Yɛnam nsɛm a ɛte saa so nya biribi a edi mu a yebegyina so anya afoforo ho dɔ. Ɔsomafo Paulo kae sɛ: ‘Mebɔ eyi ho mpae sɛ mo dɔ nkɔ so mmoro so ara nimdeɛ ne ntease nyinaa mu.’—Filipifo 1:9.

Sɛ yɛbɛkyerɛkyerɛ sɛnea “nimdeɛ” betumi ama yɛde ɔdɔ adi dwuma ma afata no mu a, susuw nokwasɛm titiriw a wɔda no adi wɔ Asomafo no Nnwuma 10:34, 35 no ho: “Onyankopɔn nhwɛ onipa anim, na mmom ɔman biara mu, nea osuro no na ɔyɛ ade trenee no, ɔpɛ no agye no.” Sɛ Onyankopɔn gyina nnipa nneyɛe pa ne Onyankopɔn suro so bu wɔn atɛn, na onnyina ɔman anaa abusua a wofi mu so nyɛ saa a, so ɛnsɛ sɛ yebu yɛn mfɛfo nnipa saa ara a yɛnhwɛ nnipa anim?—Asomafo no Nnwuma 17:26, 27; 1 Yohane 4:7-11, 20, 21.

Ɔdɔ—Onyankopɔn Honhom Aba

Sɛnea osu a ɛtɔ ne bere mu gu nnuaba turo so ma wotwa nnɔbae pii no, saa ara na Onyankopɔn honhom betumi ama ankorankoro a wotie no no anya su a Bible frɛ no “honhom aba” no. (Galatifo 5:22, 23) Nea edi aba yi mu akoten ne ɔdɔ. (1 Korintofo 13:13) Nanso ɔkwan bɛn so na yɛnam nya Onyankopɔn honhom? Ɔkwan titiriw ne mpaebɔ. Sɛ yɛbɔ mpae hwehwɛ Onyankopɔn honhom a, ɔde bɛma yɛn. (Luka 11:9-13) So ‘wokɔ so’ bɔ mpae hwehwɛ honhom kronkron? Sɛ wobɔ a, ɛnde ɛsɛ sɛ n’aba a ɛsom bo, a ɔdɔ ka ho no, da adi kɛse wɔ w’asetram.

Nanso, honhom foforo bi wɔ hɔ a ɛne Onyankopɔn honhom di asi. Bible frɛ eyi “wiase honhom.” (1 Korintofo 2:12; Efesofo 2:2) Ɛwɔ nkɛntɛnso bɔne, na emfi baabiara sɛ Satan Ɔbonsam, adesamma ‘wiase’ a atwe ne ho afi Onyankopɔn ho ‘sodifo,’ no nkyɛn. (Yohane 12:31) Te sɛ mframa a ɛbɔ mfutuma ne nwura no, “wiase honhom” no kanyan nkate bɔne a ɛsɛe ɔdɔ na ɛhyɛ honam nnwuma ho nkuran.—Galatifo 5:19-21.

Nkurɔfo nya saa honhom bɔne no bere a wogyae wɔn ho mu ma honam fam adedodowpɛ, pɛsɛmenkominya su, basabasayɛ su horow, ne ɔdɔ ho adwene a ɛmfata a abu so wɔ wiase nnɛ no. Sɛ wopɛ sɛ wunya nokware dɔ a, ɛsɛ sɛ woko tia wiase honhom no denneennen. (Yakobo 4:7) Nanso, mfa wo ho nto w’ankasa w’ahoɔden so; kɔ Yehowa nkyɛn kɔhwehwɛ mmoa. Ne honhom no—tumi a ɛsen biara wɔ amansan no mu no—betumi ahyɛ wo den ma woadi nkonim.—Dwom 121:2.

Sua Ɔdɔ Fi Kristofo Nuayɛ no Mu

Sɛnea mmofra sua sɛ wɔbɛdɔ afoforo denam ɔdɔ a woyi kyerɛ wɔn wɔ fie so no, saa ara na yɛn nyinaa—mmofra ne mpanyin—betumi anyin wɔ ɔdɔ mu denam Kristofo foforo a yɛne wɔn bɛbɔ so. (Yohane 13:34, 35) Nokwarem no, Kristofo asafo no dwumadi titiriw biako ne  sɛ ɛbɛma tebea bi a ɛbɛma ankorankoro atumi ‘atwetwe wɔn ho akɔ ɔdɔ ne nnwuma pa mu’ abɛda hɔ.—Hebrifo 10:24.

Wɔn a ebia “wɔsam hɔ sɛ nguan” wɔ wiase a ɔdɔ nnim mu no titiriw kyerɛ ɔdɔ a ɛte saa ho anisɔ. (Mateo 9:36) Osuahu ada no adi sɛ abusuabɔ a ɔdɔ wom a wonya wɔ mpanyin bere mu no betumi adi nkɛntɛnso bɔne biara a ɔdɔ a wɔannya wɔ mmofraberem de ba no so. Enti, hwɛ hia a ɛho hia sɛ Kristofo a wɔahyira wɔn ho so nyinaa befi komam agye wɔn a wɔba wɔn mu foforo no fɛw so!

“Ɔdɔ To Ntwa Da”

Bible ka sɛ “ɔdɔ to ntwa da.” (1 Korintofo 13:8) Ɔkwan bɛn so na ɛte saa? Ɔsomafo Paulo ka kyerɛ yɛn sɛ: “Ɔdɔ wɔ abodwokyɛre, ne yam ye; ɔdɔ nyɛ ahoɔyaw; ɔdɔ nyɛ ahoahoa, ɛnhoran, ɛnyɛ ne ho sɛnea ɛmfata, ɛnhwehwɛ nea ɛyɛ n’ankasa de, ne bo nhaw no, ɛmfa bɔne nhyɛ ne yam.” (1 Korintofo 13:4, 5) Ɛda adi sɛ saa ɔdɔ yi nyɛ nsusuwii anaa nkate hunu bi kɛkɛ. Ɛnte saa koraa—wɔn a wɔda no adi no nim asetram abasamtu ne yawdi, nanso wɔmma eyi nsɛe ɔdɔ a wɔwɔ ma wɔn yɔnko nnipa no. Ɔdɔ a ɛte saa no yɛ “pɛyɛ hama” ankasa.—Kolosefo 3:12-14.

Susuw Kristoni abeawa bi a wadi mfe 17 a ɔwɔ Korea no nhwɛso ho hwɛ. Bere a ofii ase som Yehowa Nyankopɔn no, n’abusuafo ampene so na na ɛsɛ sɛ otu fi fie. Nanso, sɛ́ anka ne bo befuw no, ɔbɔɔ asɛm no ho mpae, na ɔmaa Onyankopɔn Asɛm ne ne honhom siesiee ne nsusuwii. Ɛno akyi no, ɔkyerɛw n’abusua bere nyinaa, na na ɔka ɔdɔ a edi mu a ɔwɔ ma wɔn ho asɛm wɔ ne nkrataa no mu. Ne nuanom mmarima mpanyimfo baanu fii ase suaa Bible no de yɛɛ ho biribi, na mprempren wɔyɛ Kristofo a wɔahyira wɔn ho so. Ne maame ne ne nuabarima kumaa nso gyee Bible mu nokware no. Nea etwa to koraa no, ne papa, a na ɔsɔretia no denneennen no, sakraa n’adwene. Ɔdansefo abeawa yi kyerɛw sɛ: “Yɛn nyinaa waree mfɛfo Kristofo, na mprempren, asomfo a wɔn dodow yɛ 23 na wɔwɔ yɛn abusua a wɔayɛ biako no mu.” Nkonim bɛn ara na ɔdɔ di sɛɛ yi!

So wopɛ sɛ wunya nokware dɔ na woboa afoforo ma wonya bi? Ɛnde, dan kɔ Yehowa, a ɔne saa su a ɛsom bo no Fibea, no nkyɛn. Yiw, fa N’asɛm to wo koma so, bɔ mpae hwehwɛ honhom kronkron, na wo ne Kristofo nuayɛkuw no mmɔ daa. (Yesaia 11:9; Mateo 5:5) Hwɛ akomatɔyam ara a ɛyɛ sɛ yebehu sɛ amumɔyɛfo nyinaa befi hɔ nnansa yi ara, na aka wɔn a wɔwɔ nokware Kristofo dɔ no nkutoo! Nokwarem no, ɔdɔ ne ade a ɛde anigye ba asetram.—Dwom 37:10, 11; 1 Yohane 3:14.

[Mfonini ahorow wɔ kratafa 6]

Mpaebɔ ne Onyankopɔn Asɛm sua bɛboa yɛn ma yɛanya nokware dɔ