Video a Ɛka Mmabun Koma

BERE a mmabaa ne mmerante bi hwɛɛ Young People Ask—How Can I Make Real Friends? * video no, ɛhyɛɛ wɔn mu pii nkuran ma wosusuw wɔn nneyɛe ho anibere so. Kyerɛwnsɛm mu afotu pa, nsɛm a Kristofo nkumaa bi kae, ne drama a ɛka koma a egyina Bible mu asɛm a ɛfa Dina ho so wɔ video no mu. (Genesis, ti 34) Nsɛm a edidi so a wɔka faa video no ho yi fi Mexico.

Martha ka sɛ: “Video no kaa me koma yiye. Ɛte sɛ nea wɔyɛ maa me. Misusuwii sɛ nim a na m’akyerɛkyerɛfo ne me mfɛfo sukuufo nim sɛ meyɛ Yehowa Adansefo no mu biako no nkutoo dɔɔso. Manni wɔn adanse amfa ansi so dua. M’ani asɔ nsɛm a Yehowa de ma no nyinaa, titiriw sɛ ɛka yɛn koma kɛse sɛnea video yi ayɛ no a.”

Juan Carlos ka sɛ: “Video yi ma wususuw nsɛm ho ankasa. Sɛ́ aberante no, madi mfomso ahorow bi, na mitumi de me ho totoo drama no mu nnipa no bi ho. Mfe bi a abɛsen kɔ no, na mewɔ asetra abien, na mihui sɛ asetra kwan a ɛte saa no bɛkɔ akowie bɔne. Bere a mehwɛɛ video no wiei no, masi me bo sɛ medi nokware ama Yehowa.”

Sulem kae sɛ: “Bere a mehwɛɛ video no, ɛkanyan me koma paa. Kan no, na magyae Bible no kenkan, na na mentaa mmɔ Yehowa mpae. Bere a mitiee nsɛm a mmabun no bi kae wɔ video no mu no, ɛkanyan me ma mesan fii ase suaa Bible no na mebɔ Yehowa mpae.”

Mmabun a wɔwɔ hɔ nnɛ hyia nsɛnnennen pii, na nnamfo a wɔpaw no nso betumi anya sɛnea wɔbɔ wɔn bra so nkɛntɛnso kɛse. (Dwom 26:4; Mmebusɛm 13:20) Young People Ask—How Can I Make Real Friends? video no reboa wɔn mu pii ma wɔasi gyinae pa wɔ nsɛm a ɛtete sɛɛ mu.

[Ase hɔ asɛm]