Ɛsɛ Sɛ Yebu Nkurɔfo Dɛn Bere A Yehowa Da No Rebɛn no?

“[Yehowa, “NW”] nkyɛ ne bɔhyɛ ho, . . . na mmom ɔma ne bo dwo kyɛ ma mo, ɔmpɛ sɛ nnipa bi bɛyera, na mmom ɔpɛ sɛ wɔn nyinaa ba adwensakra mu.”​—2 PETRO 3:9.

1, 2. (a) Ɔkwan bɛn so na Yehowa bu nkurɔfo nnɛ? (b) Nsɛm bɛn na yebetumi abisa yɛn ho?

YEHOWA asomfo wɔ ahyɛde a ɛne sɛ ‘wɔnyɛ amanaman nyinaa asuafo.’ (Mateo 28:​19) Bere a yɛyɛ adwuma yi na yɛtwɛn “Yehowa da kɛse no,” ehia sɛ yebu nkurɔfo sɛnea obu wɔn. (Sefania 1:​14, NW) Obu wɔn dɛn? Ɔsomafo Petro kae sɛ: “[Yehowa, NW] nkyɛ ne bɔhyɛ ho, sɛnea ebinom bu sɛ ɛkyɛ, na mmom ɔma ne bo dwo kyɛ ma mo, ɔmpɛ sɛ nnipa bi bɛyera, na mmom ɔpɛ sɛ wɔn nyinaa ba adwensakra mu.” (2 Petro 3:9) Onyankopɔn bu nnipa sɛ wɔn a wobetumi anya adwensakra. Nea ‘ɔpɛ ne sɛ wobegye nnipa nyinaa nkwa na wɔaba nokware nimdeɛ mu.’ (1 Timoteo 2:4) Hwɛ, Yehowa ani gye bere a ‘ɔbɔnefo san fi ne kwan so na onya nkwa no’!​—Hesekiel 33:11.

² So yɛn ankasa bu nkurɔfo sɛnea Yehowa bu wɔn? Te sɛ ɔno no, so yebu abusua anaa ɔman biara mufo sɛ wobetumi abɛyɛ “n’adidibea nguan”? (Dwom 100:3; Asomafo no Nnwuma 10:​34, 35) Ma yensusuw nhwɛso abien a ɛkyerɛ sɛnea ɛho hia sɛ  yenya Onyankopɔn adwene no ho. Wɔ nsɛm abien no nyinaa mu no, na ɔsɛe abɛn, na na wɔama Yehowa asomfo adi kan ahu nokwasɛm yi. Nhwɛso ahorow yi ho hia yiye bere a yɛretwɛn Yehowa da kɛse no.

Ná Abraham Kura Yehowa Adwene

3. Na adwene bɛn na Yehowa kura wɔ wɔn a na wɔte Sodom ne Gomora no ho?

³ Nhwɛso a edi kan no fa tete agya nokwafo Abraham ne Sodom ne Gomora nkurow bɔne no ho. Bere a Yehowa tee “Sodom ne Gomora nteɛm” no, wansɛe saa nkurow no ne emufo ntɛm ara. Odii kan yɛɛ nhwehwɛmu. (Genesis 18:​20, 21) Ɔsomaa abɔfo baanu kɔɔ Sodom, faako a wɔkɔtraa onipa treneeni Lot fie no. Anadwo a abɔfo no bedui no, “kurom hɔfo . . . betwaa ɔdan no ho hyiae, efi mmofra so kosi mpanyimfo so, ɔman mu no nyinaa,” a na wɔpɛ sɛ wɔne abɔfo no da mmarima ne mmarima nna. Ɛda adi pefee sɛ na kurom hɔfo bra a asɛe no kyerɛ sɛ ɛfata ɔsɛe. Nanso, abɔfo no ka kyerɛɛ Lot sɛ: “Wowɔ obi wɔ ha ka wo ho? Ase anaa mmabarima anaa mmabea anaa biribiara a wowɔ wɔ kurow yi mu, yi wɔn fi ha.” Yehowa buee kwan sɛ ɔde begye kurom hɔfo no bi, nanso awiei no, Lot ne ne mmabea baanu na wɔkwatii ɔsɛe.​—Genesis 19:​4, 5, 12, 16, 23-26.

4, 5. Dɛn nti na Abraham srɛ maa Sodomfo, na so na n’adwene a ɔwɔ wɔ nkurɔfo ho ne Yehowa de hyia?

⁴ Afei, ma yɛnsan nkɔ bere a Yehowa daa no adi sɛ ɔpɛ sɛ ɔkɔhwɛ Sodom ne Gomora nkurow no. Saa bere no Abraham srɛe sɛ: “Ebia sesɛɛ atreneefo aduonum wɔ kurow no mu, so wobɛpra wɔn agu, na atreneefo aduonum a ɛwɔ mu no nti woremfa mfiri kurow no anaa? Eyi mpare wo sɛ wubedi saa asɛm yi, sɛ wubekum ɔtreneeni ne ɔbɔnefo afra, na ɔtreneeni ayɛ sɛ ɔbɔnefo; eyi mpare wo. Nea obu asase nyinaa atɛn no remmu atɛntrenee anaa?” Abraham kaa asɛm “eyi mpare wo” no mprenu. Na Abraham osuahu ama onim sɛ Yehowa rensɛe atreneefo nka abɔnefo ho. Bere a Yehowa kae sɛ, sɛ ohu “atreneefo aduonum wɔ kurow no mu” a, ɔrensɛe Sodom no, Abraham tew dodow no so nkakrankakra kosii sɛ ebeduu du pɛ.​—Genesis 18:​22-33.

⁵ Sɛ na Abraham adesrɛ no ne Yehowa ankasa adwene nhyia a, so anka obetie? Ɛda adi sɛ anka ɔrentie. Sɛ “[Yehowa, NW] adamfo”  no, na ɛda adi sɛ Abraham ne no yɛ adwene. (Yakobo 2:​23) Bere a Yehowa dan n’adwene baa Sodom ne Gomora so no, na ɔwɔ ɔpɛ sɛ otie Abraham adesrɛ. Dɛn ntia? Efisɛ yɛn soro Agya no ‘mpɛ sɛ nnipa bi bɛyera na mmom ɔpɛ sɛ wɔn nyinaa ba adwensakra mu.’

Adwene a na Yona Kura Wɔ Nkurɔfo Ho ​—Ɛyɛ Soronko Koraa

6 Dɛn na Niniwefo yɛe wɔ Yona dawurubɔ no ho?

⁶ Afei susuw nhwɛso a ɛto so abien no ho​—Yona de no. Saa bere yi de, kurow a na wɔrebɛsɛe no no ne Niniwe. Wɔka kyerɛɛ odiyifo Yona sɛ ɔmmɔ dawuru sɛ kurow no bɔne ‘aba Yehowa anim.’ (Yona 1:2) Sɛ nkurow a ɛbemmɛn Niniwe no ka ho a, na ɛyɛ kurow kɛse a “nnansa na wɔde twa ho hyia.” Bere a awiei koraa no Yona yɛɛ osetie na ɔhyɛn Niniwe no, ɔkɔɔ so kae sɛ: “Ɛha adaduanan na Niniwe abutuw.” Bere a ɔkaa saa no, “Niniwefo no gyee Onyankopɔn dii, na wɔpaee mmuadadi, na wofurafuraa ntweaatam.” Niniwe hene mpo nuu ne ho.​—Yona 3:​1-6.

7. Ɔkwan bɛn so na Yehowa buu ahonu su a Niniwefo daa no adi no?

⁷ Ɛne nea wɔyɛe wɔ Sodom no bɔ abira koraa! Ɔkwan bɛn so na Yehowa buu Niniwefo a wonuu wɔn ho no? Yona 3:​10 ka sɛ: “Onyankopɔn nuu ne ho, bɔne a ɔkae sɛ ɔde bɛyɛ wɔn no ho, na wanyɛ.” Yehowa “nuu ne ho” a nea ɛkyerɛ ne sɛ ɔsakraa sɛnea ɔne Niniwefo no dii no efisɛ wɔsakraa wɔn akwan. Onyankopɔn gyinapɛn ahorow ansakra, nanso Yehowa sakraa ne gyinaesi bere a Niniwefo nuu wɔn ho no.​—Malaki 3:6.

8. Dɛn nti na Yona yɛɛ kusuu?

⁸ Bere a Yona hui sɛ wɔrensɛe Niniwe no, so ohuu nneɛma sɛnea na Yehowa hu no no? Dabi, efisɛ wɔka kyerɛ yɛn sɛ: “Na ɛyɛɛ Yona ani so asɛmmɔne sɛ, na ne bo fuwii.” Dɛn bio na Yona yɛe? Kyerɛwtohɔ no ka sɛ: “Ɔbɔɔ [Yehowa, NW] mpae sɛ: Ao, [Yehowa, NW]! So ɛnyɛ m’asɛm a meda so mewɔ m’asase so no mekae ni? Eyi ara nti na meyɛɛ ntɛm sɛ mereguan makɔ Tarsis, efisɛ minim sɛ wo de, woyɛ Onyankopɔn ɔdomfo ne mmɔborohunufo, wo bo kyɛ fuw na w’adɔe dɔɔso, na wunu wo ho bɔne ho.” (Yona 4:​1, 2) Ná Yona nim Yehowa su horow. Nanso, saa bere no de, odiyifo no yɛɛ kusuu na ɔne Onyankopɔn anyɛ adwene wɔ Niniwefo a wonuu wɔn ho no ho.

9, 10. (a) Asuade bɛn na Yehowa de maa Yona? (b) Dɛn nti na yebetumi anya adwene sɛ awiei koraa no Yona gyee adwene a na Yehowa kura wɔ Niniwefo ho no toom?

⁹ Yona fii Niniwe kɔe, ɔbɔɔ ɔsese, na ɔtraa ase wɔ onwini mu “sɛ enkosi sɛ obehu dekode a ɛbɛyɛ kurow no.” Yehowa maa adedenkuruma fefɛw nyinii na ama Yona anya onwini. Nanso, ade kyee no, dua no kisae. Bere a Yona bo fuwii wɔ ho no, Yehowa kae sɛ: “So eye sɛ wo bo fuw adedenkuruma no ho yi? . . . Na me de, Niniwe kurow kɛse a  nnipa bɛboro ɔpedu ahorow dumien a wonnim nifa ne benkum ne afieboa pii nso wɔ mu no de renyɛ me yaw anaa?” (Yona 4:​5-11) Hwɛ asuade a ɛyɛ maa Yona wɔ adwene a Yehowa kura wɔ nnipa ho no mu!

¹⁰ Wɔankyerɛw nea Yona yɛe wɔ asɛm a Onyankopɔn kae de kyerɛe sɛ odi yaw ma Niniwefo no ho anto hɔ. Nanso, ɛda adi sɛ odiyifo no sakraa adwene a na okura wɔ Niniwefo a wonuu wɔn ho no ho. Yegyina nokwasɛm a ɛyɛ sɛ Yehowa de no dii dwuma ma ɔkyerɛw asɛm a efi honhom mu yi so na ɛka saa.

Su Bɛn na Wowɔ?

11. Ɔkwan bɛn so na ɛda adi sɛ anka Abraham bebu nnipa a wɔte ase nnɛ no?

¹¹ Ɛnnɛ, ɔsɛe foforo da yɛn anim​—mprempren nneɛma nhyehyɛe bɔne yi sɛe wɔ Yehowa da kɛse no mu. (Luka 17:​26-​30; Galatifo 1:4; 2 Petro 3:​10) Anka Abraham bebu nnipa a wɔte wiase yi a ɛrenkyɛ na wɔasɛe no mu dɛn? Ɛda adi kɛse sɛ anka obedwen wɔn a wonnya ntee “ahenni ho asɛmpa” no ho. (Mateo 24:​14) Abraham srɛɛ Onyankopɔn mpɛn pii maa wɔn a na wobetumi ayɛ atreneefo wɔ Sodom no. So yɛn ankasa dwen nnipa a sɛ yɛma wonya hokwan a wɔde bɛsakra wɔn adwene na wɔasom Onyankopɔn a, anka wɔbɛpo wiase yi a Satan di so yi mu akwan no ho?​—1 Yohane 5:​19; Adiyisɛm 18:​2-4.

12. Dɛn nti na ɛyɛ mmerɛw sɛ yebenya su a ɛte sɛ Yona de no bi wɔ nkurɔfo a yehyia wɔn wɔ yɛn som adwuma no mu no ho, na dɛn na yebetumi ayɛ wɔ ho?

¹² Ɛfata sɛ yɛbɛpɛ sɛ amumɔyɛ bɛba awiei. (Habakuk 1:​2, 3) Nanso, ɛyɛ mmerɛw yiye sɛ yebenya Yona su no bi, a yennwen nnipa a wobetumi asakra wɔn adwene no yiyedi ho. Eyi te saa titiriw bere a yɛkɔ so hyia nnipa a wɔyɛ anibiannaso, wɔtan yɛn anaa wɔpɛ sɛ wɔne yɛn ham mpo bere a yɛde Ahenni asɛm no kɔ wɔn afie mu no. Ebia yebebu yɛn ani agu wɔn a Yehowa mmoaboaa wɔn ano wɔ nneɛma nhyehyɛe bɔne yi mu no so. (Romafo 2:4) Sɛ yɛn ho mu a yɛhwehwɛ anibere so no da no adi sɛ yɛwɔ su a mfiase no na Yona wɔ wɔ Niniwefo ho no ketewaa bi mpo a, yebetumi abɔ Yehowa mpae asrɛ no hɔ mmoa na ama yɛn adwene ne ne de ahyia.

13. Dɛn nti na yebetumi aka sɛ Yehowa dwen nkurɔfo ho nnɛ?

¹³ Yehowa dwen wɔn a wonnya mmɛsom no no ho, na otie ne nkurɔfo a wɔahyira wɔn  ho so no adesrɛ. (Mateo 10:​11) Sɛ nhwɛso no, “obebu atɛn” de atie wɔn mpaebɔ. (Luka 18:​7, 8) Afei nso, Yehowa bɛma ne bɔhyɛ ne n’atirimpɔw ahorow nyinaa anya mmamu wɔ n’ankasa bere a ɛsɛ mu. (Habakuk 2:3) Nea ɛka eyi ho ne sɛ obeyi nnebɔne nyinaa afi asase so, te sɛ nea ɔsɛee Niniwe bere a emufo san kɔyɛɛ bɔne no.​—Nahum 3:​5-7.

14. Dɛn na ɛsɛ sɛ yɛyɛ bere a yɛretwɛn Yehowa da kɛse no?

¹⁴ Enkosi sɛ wobeyi nneɛma nhyehyɛe bɔne yi afi hɔ wɔ Yehowa da kɛse no mu no, so yɛde boasetɔ bɛtwɛn na yɛayɛ n’apɛde a adagyew nnim? Yennim faako pɔtee a yɛbɛyɛ asɛnka adwuma no akodu ansa na Yehowa da no aba de, nanso yenim sɛ yɛbɛka Ahenni ho asɛmpa no wɔ asase so nyinaa akodu baabi a Onyankopɔn pɛ ansa na awiei no aba. Na akyinnye biara nni ho sɛ ɛsɛ sɛ yedwen “ade a wɔpɛ” a wonnya mfaa wɔn mmae no ho bere a Yehowa kɔ so de anuonyam hyɛ ne fi ma no.​—Hagai 2:7.

Yɛn Nneyɛe Ma Wohu Yɛn Adwene

15. Dɛn na ebetumi ama anisɔ a yɛwɔ ma asɛnka adwuma no ayɛ kɛse?

¹⁵ Ebia yɛte baabi a wɔnkyerɛ asɛnka adwuma no ho anigye kɛse, na yentumi ntu nkɔ baabi a wohia Ahenni adawurubɔfo pii nso. Fa no sɛ yebetumi anya nnipa du wɔ yɛn asasesin no mu ansa na awiei no aba. So wote nka sɛ ɛfata sɛ yɛhwehwɛ saa nnipa du no? Yesu “yam hyehyee” no maa nnipadɔm no “efisɛ na wɔabrɛ, na wɔsam hɔ sɛ nguan a wonni hwɛfo.” (Mateo 9:​36) Sɛ yesua Bible no na yɛtɔ yɛn bo ase kenkan Ɔwɛn-Aban ne Nyan! mu nsɛm no a, yebetumi ate wiase tebea no ase yiye. Eyi nso betumi ama anisɔ a yɛwɔ sɛ ehia sɛ yɛka asɛmpa no ayɛ kɛse. Bio nso, asɛm a egyina Bible so a wɔnam “akoa nokwafo ne ɔbadwemma” so de ma a yɛde di dwuma no ho anisɔ a yɛwɔ no betumi ama yɛaka nsɛm a ɛdan ti kɛse wɔ asasesin a yɛtaa yɛ mu adwuma no mu.​—Mateo 24:​45-47; 2 Timoteo 3:​14-17.

16. Ɔkwan bɛn so na yebetumi ama yɛn som adwuma no atu mpɔn kɛse?

¹⁶ Wɔn a wonnya nkyerɛɛ Bible nkrasɛm a ɛma nkwa ho anigye no ho a yedwen no ka yɛn ma yɛsakra bere a yɛkɔ afiewuranom nkyɛn wɔ yɛn asasesin mu ne akwan a yɛfa so no mu. So yehu sɛ nnipa pii nni fie bere a yɛkɔ hɔ no? Sɛ saa a, yebetumi ama yɛn asɛnka no atu mpɔn kɛse denam bere ne beae a yedi adanse a yɛbɛsakra mu no so. Apofofo koyi mpataa bere a wobetumi anya bi. So yebetumi ayɛ biribi a ɛte saa wɔ yɛn honhom fam mpataayi adwuma no mu? (Marko 1:​16-​18) Dɛn nti na wonsɔ anwummere anaa telefon so adansedi nhwɛ wɔ baabi a mmara ma kwan? Ebinom ahu sɛ kar gyinabea, afirikafo ahomegyebea, baabi a wɔtɔn pɛtrol, ne aguadidan mu yɛ ‘baabi a woyi mpataa.’ Wɔ a yɛwɔ Abraham su no bi wɔ nkurɔfo ho no nso da adi bere a yɛde hokwan ahorow di adanse bɔnnɔ so no.

17. Akwan bɛn so na yebetumi ahyɛ asɛmpatrɛwfo ne afoforo a wɔsom wɔ amannɔne no nkuran?

¹⁷ Nnipa ɔpepem pii nnya ntee Ahenni asɛm no. Wɔ yɛn asɛnka akyi no, so yebetumi akyerɛ sɛ yedwen nnipa a wɔte saa ho bere a yɛwɔ yɛn fie mpo no? So yenim asɛmpatrɛwfo anaa bere nyinaa asomfo a wɔresom wɔ amannɔne? Sɛ saa a, yebetumi akyerɛw wɔn nkrataa de akyerɛ wɔn adwuma no ho anisɔ. Ɔkwan bɛn so na ɛno bɛkyerɛ sɛ yedwen nnipa ho? Yɛn nkuranhyɛ ne nkamfo nkrataa no betumi ahyɛ wɔn den ma wɔatra baabi a wɔama wɔn dwumadi no, ma enti wɔaboa nnipa pii ma wɔabenya nokware no ho nimdeɛ. (Atemmufo 11:​40) Yebetumi abɔ mpae ama asɛmpatrɛwfo ne wɔn a nokware no ho kɔm de wɔn wɔ nsase foforo so no nso. (Efesofo 6:​18-​20) Ɔkwan foforo a yɛbɛfa so akyerɛ sɛ yedwen wɔn ho ne sɛ yebeyi sika fam ntoboa de aboa adwuma a Yehowa  Adansefo yɛ wɔ wiase nyinaa no.​—2 Korintofo 8:​13, 14; 9:​6, 7.

So Wubetumi Atu Akɔ Baabi Foforo?

18. Dɛn na Kristofo binom ayɛ de ama Ahenni nneɛma anya nkɔso wɔ ɔman a wɔte mu no mu?

¹⁸ Wɔn a wɔatu kɔ mmeae a wohia Ahenni adawurubɔfo pii no anya wɔn ahofama no so akatua. Nanso, bere a Yehowa Adansefo foforo tra wɔn ankasa man mu no, wɔasua kasa foforo sɛnea ɛbɛyɛ na wɔde honhom fam mmoa ama atubrafo. Wɔanya mmɔdenbɔ a ɛte saa so mfaso. Sɛ nhwɛso no, Adansefo baason a wɔreboa nnipa bi a wɔka China kasa wɔ kurow bi a ɛwɔ Texas, U.S.A., mu no nyaa nnipa 114 ma wɔbaa Awurade Anwummeduan no ase wɔ 2001 mu. Wɔn a wɔreboa akuw a ɛte saa no ahu sɛ wɔn asasesin no ahoa ama otwa.​—Mateo 9:​37, 38.

19. Dɛn na ɛfata sɛ woyɛ bere a woredwen ho sɛ wubetu akɔ ɔman foforo mu akɔtoa Ahenni asɛnka adwuma no so wɔ hɔ no?

¹⁹ Ebia wo ne w’abusua te nka sɛ mubetumi atu akɔ baabi a wohia Ahenni adawurubɔfo pii. Nanso, nea edi kan no, nyansa wom sɛ ‘mobɛtra ase abu ho akontaa.’ (Luka 14:​28) Eyi yɛ nokware titiriw bere a obi resusuw ho sɛ obetu akɔtra ɔman foforo bi mu no. Obiara a osusuw biribi saa ho no betumi abisa ne ho nsɛm te sɛ eyi: ‘So metumi ahwɛ m’abusua? So metumi anya akwantu tumi krataa a ehia no? So meka saa ɔman no mu kasa dedaw anaa mewɔ ɔpɛ sɛ mesua? So masusuw wim tebea ne amammerɛ no ho? So metumi ayɛ “mmoa” na ɛnyɛ adesoa ama me mfɛfo gyidifo a wɔwɔ saa ɔman no mu no?’ (Kolosefo 4:​10, 11) Nea ɛbɛyɛ na woahu mmoa ko a wohia wɔ ɔman a woretu akɔtra mu no mu no, bere nyinaa ɛfata sɛ wobɛkyerɛw Yehowa Adansefo baa dwumadibea a ɛhwɛ asɛnka adwuma no so wɔ saa beae no krataa. *

20. Ɔkwan bɛn so na Kristoni aberante bi yeree ne ho boaa ne mfɛfo gyidifo ne afoforo a wɔwɔ amannɔne asase bi so no?

²⁰ Kristoni bi a ɔka ho na wɔresisi Ahenni Asa wɔ Japan no tee sɛ wohia wɔn a wɔwɔ adansi ho nimdeɛ ma wɔasi beae bi a wɔbɛsom wɔ Paraguay. Esiane sɛ na ɔyɛ ɔhokwafo na ɔwɔ mmerantebere mu ahoɔden nti, otu kɔɔ saa ɔman no mu na ɔno nkutoo yɛɛ adwuma asram awotwe sɛ bere nyinaa dwumayɛni wɔ adwuma no mu. Bere a ɔtraa hɔ no, osuaa Spania kasa na ɔyɛɛ ofie Bible adesua ahorow. Na otumi hu sɛ wohia Ahenni adawurubɔfo wɔ saa ɔman no mu. Ɛwom sɛ ɔsan baa Japan de, nanso ankyɛ na ɔsan kɔɔ Paraguay kɔboae ma wɔboaboaa nnipa ano baa saa Ahenni Asa no so.

21. Bere a yɛretwɛn Yehowa da kɛse no, dɛn na ɛsɛ sɛ yedwen ho titiriw?

²¹ Onyankopɔn bɛhwɛ ma yɛayɛ asɛnka adwuma no awie, ma ɛne n’apɛde ahyia. Ɛnnɛ, ɔreyɛ honhom fam otwa adwuma a etwa to no ntɛmntɛm. (Yesaia 60:​22) Ɛnde, bere a yɛtwɛn Yehowa da no, momma yɛmfa nsi nyɛ otwa adwuma no bi na yemmu nnipa sɛnea yɛn Nyankopɔn a ɔwɔ ɔdɔ no bu wɔn no.

[Ase hɔ asɛm]

So Wokae?

• Bere a yɛretwɛn Yehowa da no, ɛsɛ sɛ yebu nkurɔfo dɛn?

• Ná adwene bɛn na Abraham kura wɔ atreneefo a na ɛbɛyɛ sɛ wɔte Sodom no ho?

• Yona buu Niniwefo a wonuu wɔn ho no dɛn?

• Ɔkwan bɛn so na yebetumi akyerɛ sɛ yekura adwene a Yehowa kura wɔ nnipa a wonnya ntee asɛmpa no ho no bi?

[Adesua no ho Nsɛmmisa]

[Mfonini wɔ kratafa 16]

Abraham buu nkurɔfo sɛnea Yehowa bu wɔn no

[Mfonini wɔ kratafa 17]

Yona benyaa Yehowa adwene no bi wɔ Niniwefo a wonuu wɔn ho no ho

[Mfonini ahorow wɔ kratafa 18]

Nkurɔfo ho a yedwen no ka yɛn ma yɛsakra bere ne akwan a yɛfa so ka asɛmpa no mu