Eusebius—“So Ɔyɛ Asɔre Abakɔsɛm Agya”?

WƆ AFE 325 Y.B. mu no, Roma Ɔhempɔn Constantine hyiaa asɔfopɔn nyinaa wɔ Nicaea. Ne botae: sɛ́ wobesiesie ɔsɛmpɔw bi a ɛfa Onyankopɔn ne ne Ba ntam abusuabɔ ho a na wɔagye ho akyinnye pii no. Ná ɔbarima a wobu no sɛ onim nhoma sen biara wɔ ne bere sofo mu, Eusebius a ofi Kaesarea no ka wɔn a wɔbaa ase no ho. Ná Eusebius de nsi asua Kyerɛwnsɛm no, na na wagyina Kristofo onyame biako som no akyi.

Encyclopædia Britannica ka sɛ, wɔ Nicaea Bagua no ase no, “Constantine ankasa na ɔyɛɛ oguamtrani, de nnamyɛ dii nsɛm a wosusuw ho no anim, na ɔno ankasa na ɔde adwene . . . a ɛho hia a ɛfa ɔkwan a wɔbɛfa so akyerɛ abusuabɔ a ɛda Kristo ne Onyankopɔn ntam a ɛwɔ gyidikasɛm a bagua no de too gua mu ho, ‘a ɛne sɛ ɔne Agya no kura nyamesu biako no’ bae . . . Bere a na ɔhempɔn no ho hu aka asɔfopɔn no, wɔn nyinaa de wɔn nsa hyɛɛ gyidi a na wɔn mu pii nnye ntom no ase, gye wɔn mu baanu pɛ.” So na Eusebius ka wɔn a wɔamfa wɔn nsa anhyɛ ase no ho? Asuade bɛn na yebetumi anya afi ɔfã a ogyinae no mu? Momma yɛnhwehwɛ ntetee a Eusebius nyae​—abodin ahorow ne nnwuma a ɔyɛe mu.

Ne Nhoma Ahorow a Ɛfata sɛ Yesusuw Ho

Ɛda adi sɛ, wɔwoo Eusebius wɔ Palestina bɛyɛ afe 260 Y.B. Ɔde ne ho bɔɔ Pamphilus, Kaesarea asɔre no sohwɛfo wɔ ne mmofraase. Bere a Eusebius de ne ho hyɛɛ Pamphilus nyamekyerɛ sukuu mu no, ɔbɛyɛɛ osuani a osuaa ade anibere so. Ɔde nsiyɛ suaa Pamphilus nhomakorabea hɔ nhoma pii. Eusebius suaa ade denneennen, titiriw Bible no. Ɔbɛyɛɛ Pamphilus adamfo paa nso, na akyiri yi ɔfrɛɛ ne ho “Pamphilus ba Eusebius.”

Ɛdefa Eusebius botae ahorow ho no, ɔkae sɛ: “Ɛyɛ m’atirimpɔw sɛ mɛkyerɛw sɛnea Asomafo akronkronfo no dii ade nnidiso nnidiso ne mmere a efi yɛn Agyenkwa no bere so de besi yɛn bere yi so ho asɛm; akyerɛ nsɛm pii a ɛho hia a wɔkyerɛ sɛ esisii wɔ asɔre no abakɔsɛm mu; na makyerɛ wɔn a wɔhwɛɛ asɔre akɛse no so, ne wɔn a wɔaka anaa wɔakyerɛw Onyankopɔn ho asɛm wɔ awo ntoatoaso biara mu no.”

Wɔkae Eusebius wɔ ne nhoma a wobu no kɛse a ne din ne History of the Christian Church no ho. Wosusuw sɛ ne nhoma a ɛyɛ apo du a wotintimii bɛyɛ afe 324 Y.B. mu no yɛ asɔre no tete abakɔsɛm a ɛho hia sen biara a wɔakyerɛw. Esiane eyi nti, wɔbɛfrɛɛ Eusebius sɛ asɔre abakɔsɛm agya.

Church History akyi no, Eusebius kyerɛw Chronicle, a ɛyɛ apo abien. Ná po a edi kan no yɛ wiase abakɔsɛm a wɔabɔ no mua. Wɔ afeha  a ɛto so anan no mu no, ɛbɛyɛɛ nhoma a wogyinaa so yɛɛ wiase mmerebu ho nhwehwɛmu. Po a ɛto so abien no twee adwene sii mmere a abakɔsɛm mu nsɛm sisii so. Eusebius de mmere mu nsɛdi hyehyɛɛ mmere a aman horow mu ahemfo dii ade no ma ɛsesaa so.

Eusebius kyerɛw abakɔsɛm nhoma foforo abien a ne din de Martyrs of Palestine ne Life of Constantine. Ɔkyerɛw nea edi kan no wɔ afe 303-10 Y.B., na ɛka wɔn a wowuwui sɛ mogya adansefo no ho asɛm. Ɛbɛyɛ sɛ Eusebius huu saa nsɛm yi. Otintim nhoma a edi akyiri a ɛyɛ apo anan no wɔ Ɔhempɔn Constantine wu akyi wɔ afe 337 Y.B., na abakɔsɛm mu nsɛm a ɛho hia ho nkyerɛkyerɛmu na ɛwom. Sɛ́ anka ɛbɛyɛ abakɔsɛm tẽẽ no, ɛyɛ nkamfo mmom na ɛwom.

Nsɛm a ɛwɔ Eusebius nhoma a ɔde gyinaa ne som akyi mu no bi ne nsɛm a ɔde buaa Hierocles​—Roma amrado bi a na ɔyɛ ne bere soni no. Bere a Hierocles kyerɛw nsɛm tiaa Kristofo no, Eusebius yii ano maa wɔn. Afei nso, ɔkyerɛw nhoma 35 a na wobu no sɛ ɛho hia sen biara, na ɛkyerɛkyerɛ nsɛm mu kɔ akyiri de kyerɛ sɛ Onyankopɔn ne Kyerɛwnsɛm no kyerɛwfo. Eyi mu 15 a edi kan no kyerɛ sɛ ɛfata sɛ Kristofo gye Hebri nkyerɛwee kronkron no tom. Afoforo 20 a aka no de adanse ma sɛ ɛteɛ sɛ Kristofo kodii nnyinasosɛm ne ɔsom foforo mu nneyɛe akyi kaa Yudafo ahyɛde a na wogye tom no ho. Sɛ yɛka ne nyinaa bom a, saa nhoma yi ka nsɛm de gyina Kristosom akyi sɛnea na Eusebius te ase no.

Eusebius dii bɛyɛ mfirihyia 80 (bɛyɛ 260-​bɛyɛ 340 Y.B.), na ɔbɛyɛɛ tetefo a wɔkyerɛw nhoma pii sen biara no mu biako. Ne nhoma no mu nsɛm fa nsɛm a esisii wɔ mfeha abiɛsa a edi kan no mu de besii Ɔhempɔn Constantine bere so ho. Wɔ n’asetra awiei bere mu no, ɔde nnwuma a ɔyɛe sɛ Kaesarea ɔsɔfopɔn no kaa ne nhomakyerɛw adwuma no ho. Ɛwom sɛ wonim Eusebius yiye sɛ abakɔsɛm kyerɛwfo de, nanso na ɔyɛ obi a ogyina ne som akyi, asase mfoniniyɛfo, ɔsɛnkafo, ne nhomakyerɛwfo a ɔhwehwɛ nsɛm ne nhoma mu.

N’atirimpɔw Abien No

Dɛn nti na Eusebius yɛɛ nnwuma akɛse a ɛte saa? Mmuae no gyina ne gyidi a na ɔwɔ sɛ ɔte bere a ɛreba awiei ma foforo afi ase mu no so. Ɔtee nka sɛ na nsɛm akɛse asisi wɔ awo ntoatoaso a na atwam no mu, na na ɛsɛ sɛ ɔkyerɛw ho nsɛm to hɔ ma nkyirimma.

Ná Eusebius wɔ atirimpɔw foforo​—atirimpɔw a ɛne sɛ obegyina ne som akyi. Ogye dii sɛ Kristosom fi Onyankopɔn. Nanso, na ebinom reko tia saa adwene yi. Eusebius kyerɛwee sɛ: “Ɛyɛ m’atirimpɔw nso sɛ mɛbobɔ wɔn a esiane sɛ wɔn ani gye nneɛma foforo ho nti wɔadi mfomso akɛse no din ne wɔn dodow, wɔn a wɔfrɛ wɔn ho nimdeɛ hufo nanso ɛnte saa, a wɔte sɛ mpataku a wɔsɛe Kristo nguan atirimɔden so no.”

So Eusebius buu ne ho Kristoni? Ɛda adi sɛ obuu ne ho saa, efisɛ ɔfrɛɛ Kristo sɛ “yɛn Agyenkwa.” Ɔkae sɛ: “Ɛyɛ me botae . . . sɛ mɛka asiane ahorow a ɛtoo Yuda man no nyinaa ho asɛm ntɛm ara esiane pɔw bɔne a wɔbɔ tiaa yɛn Agyenkwa no nti, na mayɛ akwan ne mpɛn dodow a Amanaman mufo akasa atia Onyankopɔn asɛm ho kyerɛwtohɔ, na makyerɛkyerɛ su a wɔn a wɔako ama Onyankopɔn asɛm no ada no adi wɔ mmere ahorow mu wɔ mogya ne ayayade mu, ɛne mpaemuka ahorow a wɔayɛ wɔ yɛn bere yi mu, ne ɔdom ne ayamye mu a yɛn Agyenkwa no afi aboa wɔn nyinaa no mu.”

 Ne Nhwehwɛmu a Ɛkɔ Akyiri

Nhoma dodow a Eusebius ankasa kenkanee na ɔtwee adwene sii so dɔɔso yiye. Eusebius nhoma nkutoo so na wɔnam da nnipa atitiriw bi a wɔtraa ase wɔ afeha a ɛto so abiɛsa Yɛn Bere yi mu no ho nsɛm adi. Ne nhoma mu nkutoo na yehu nsɛm bi a mfaso wɔ so a ɛfa akuw atitiriw bi ho. Onya fii nneɛma a wɔnam so nya nimdeɛ a enni hɔ mprempren mu.

Eusebius de nsi ne ahwɛyiye na ɛboaboaa ne nsɛm ano. Ɛte sɛ nea ɔde ahwɛyiye bɔɔ mmɔden yɛɛ nyiyim wɔ nsɛm a edi mũ ne nea enni mũ mu. Nanso, mfomso wɔ ne nhoma ahorow no mu. Ɛtɔ mmere bi a odi mfomso wɔ sɛnea ɔkyerɛkyerɛ nnipa ne wɔn nneyɛe mu no mu, na ɛyɛ a ɔnte wɔn ase mpo. Ɛtɔ mmere bi a odi mfomso wɔ ne mmerebu mu. Ná Eusebius nnim sɛnea ɔde ahokokwaw da nsɛm adi nso. Nanso, ɛmfa ho ne sintɔ ahorow no, wobu ne nhoma pii sɛ agyapade a ɛsom bo.

So na N’ani Gye Nokware Ho?

Ná ɔsɛmpɔw a ɛfa Agya no ne Ɔba no ntam abusuabɔ ho a wɔnkaa ho asɛm nsii no haw Eusebius. So na Agya no wɔ hɔ ansa na Ɔba no reba, sɛnea na Eusebius gye di no? Anaasɛ na Agya no ne Ɔba no nyinaa wɔ hɔ? Obisae sɛ: “Sɛ na wɔn nyinaa wɔ hɔ a, ɛbɛyɛ dɛn na Agya no ayɛ Agya, na Ɔba no ayɛ Ɔba?” Ɔde Kyerɛwnsɛm mu nsɛm mpo gyinaa ne gyidi no akyi, twee adwene sii Yohane 14:​28 so, nea ɛka sɛ ‘Agya no yɛ kɛse sen Yesu,’ ne Yohane 17:3, baabi a wɔka Yesu ho asɛm sɛ nea nokware Nyankopɔn koro no ‘somaa’ no no. Bere a Eusebius reka Kolosefo 1:​15 ne Yohane 1:1 ho asɛm no, ɔkae sɛ Logos, anaa Asɛm no, yɛ “Onyankopɔn a wonhu no no suban”​—Onyankopɔn Ba.

Nanso, anwonwasɛm ne sɛ, bere a Nicaea Bagua no reba awiei no, Eusebius gyinaa adwene a ɛne eyi bɔ abira akyi. Ɔpenee ɔhempɔn no adwenkyerɛ a ɛne Kyerɛwnsɛm mu gyinabea bɔ abira a ɛne sɛ Onyankopɔn ne Kristo yɛ pɛ no so.

Nea Yebetumi Asua Afi Mu

Dɛn nti na Eusebius gyaee ne ho mu wɔ Nicaea Bagua no ase na ogyinaa nkyerɛkyerɛ a ɛne Kyerɛwnsɛm nhyia akyi? So na ɔwɔ amammuisɛm ho botae ahorow bi? Nea edi kan no, dɛn nti koraa na ɔkɔɔ bagua no ase? Ɛwom sɛ wɔfrɛɛ asɔfopɔn no nyinaa de, nanso wɔn mu kakraa bi pɛ​—300​—na wɔkɔɔ ase ankasa. So ebetumi aba sɛ na Eusebius pɛ sɛ ɔkora ne gyinabea a ɔwɔ wɔ asetram no so? Dɛn nti na na Ɔhempɔn Constantine bu no kɛse saa? Eusebius traa ɔhempɔn no nifa so wɔ bagua no ase.

Ɛda adi sɛ Eusebius buu n’ani guu Yesu ahwehwɛde a ɛne sɛ N’akyidifo ‘nyɛ wiase no fã no’ so. (Yohane 17:​16; 18:​36) Osuani Yakobo bisae sɛ: “Awaresɛefo, munnim sɛ wiase adamfofa ne ɔtan a wɔtan Onyankopɔn?” (Yakobo 4:4) Na hwɛ sɛnea Paulo afotu no fata: “Mo ne wɔn a wonnye nni nntwe kɔndua koro”! (2 Korintofo 6:​14) Ɛmmra sɛ yɛbɛkɔ so atwe yɛn ho afi wiase no ho bere a ‘yɛsɔre Agya no honhom ne nokware mu’ no.​—Yohane 4:24.

[Mfonini wɔ kratafa 31]

Nicaea Bagua no ho mfonini

[Asɛm Fibea]

Scala/Art Resource, NY

[Mfonini Fibea wɔ kratafa 29]

Courtesy of Special Collections Library, University of Michigan