So Wutumi ‘Twɛn’?
So Wutumi ‘Twɛn’?
“Nnipa bɛn na ɛsɛ sɛ moyɛ wɔ abrabɔ kronkron ne onyamesom pa mu bere a motwɛn na moma Yehowa da no ba tra mo adwenem no!”—2 PETRO 3:11, 12, NW.
1, 2. Ɔkwan bɛn so na yebetumi ayɛ ‘twɛn a yɛbɛtwɛn’ Yehowa da no ho mfatoho?
YƐ ABUSUA bi a wɔrehwɛ ahɔho a wɔrebedidi kwan ho mfonini wɔ w’adwenem. Bere a wɔahyɛ sɛ wobedu hɔ no rebɛn ntɛmntɛm. Ɔyere no ani abere reyɛ aduan no ho nneɛma a etwa to. Ne kunu ne wɔn mma reboa ma wɔahwɛ ama wɔawie biribiara. Obiara ani agye. Yiw, abusua mũ no nyinaa retwɛn bere a ahɔho no bɛba no denneennen, na wɔrehwɛ kwan sɛ wobedi aduan a ɛyɛ dɛ anya fekubɔ pa.
2 Sɛ́ Kristofo no, yɛretwɛn biribi a ɛho hia sen saa mpo. Dɛn na yɛretwɛn? Yɛn nyinaa retwɛn “Yehowa da no”! Ansa na ɛbɛba no, ehia sɛ yɛyɛ sɛ odiyifo Mika a ɔkaa eyi no: “Na me de, [Yehowa, NW] na mehwɛ no kwan, mɛtwɛn me nkwagye Nyankopɔn no.” (Mika 7:7) So ɛno kyerɛ sɛ ɛnsɛ sɛ yɛyɛ biribiara? Dabi. Adwuma pii wɔ hɔ a ɛsɛ sɛ yɛyɛ.
3. Sɛnea 2 Petro 3:11, 12 kyerɛ no, su bɛn na ɛsɛ sɛ Kristofo nya?
3 Ɔsomafo Petro boa yɛn ma yenya su a ɛfata bere a yɛretwɛn no. Ɔka sɛ: “Nnipa bɛn na ɛsɛ sɛ moyɛ wɔ abrabɔ kronkron ne onyamesom pa mu bere a motwɛn na moma Yehowa da no ba tra mo adwenem no!” (2 Petro 3:11, 12, NW) Hyɛ no nsow sɛ ɛyɛ asɛm a ɔteɛɛm kae. Ná ɛnyɛ asɛm a Petro rebisa. Wɔ ne nkrataa abien a honhom kaa no ma ɔkyerɛwee no mu no, ɔkaa nnipa ko a ɛsɛ sɛ Kristofo yɛ ho asɛm. Otuu wɔn fo nso sɛ wɔnkɔ so ‘nna abrabɔ kronkron ne onyamesom pa adi.’ Ɛwom sɛ na bɛyɛ mfe 30 atwam fi bere a Yesu Kristo de “wiase awiei” ho sɛnkyerɛnne mae no de, nanso na ɛsɛ sɛ Kristofo kɔ so ma wɔn ani da hɔ. (Mateo 24:3) Na ɛsɛ sɛ ‘wɔtwɛn ma Yehowa da no ba tra wɔn adwenem.’
4. Dɛn na ‘Yehowa da no a yɛbɛma atra yɛn adwenem’ no kyerɛ?
4 Nea Hela asɛmfua a wɔakyerɛ ase wɔ ha sɛ ‘moma ɛtra mo adwenem’ no kyerɛ ankasa ne sɛ “moma ɛyɛ ntɛm.” Nokwarem no, yentumi mma Yehowa da no ‘mma ntɛm’ ankasa. Enti, ‘yennim da no ne dɔn ko’ a Yesu Kristo bɛba abebu N’agya atamfo atɛn no. (Mateo 24:36; 25:13) Nhwehwɛmu nhoma bi kyerɛkyerɛ mu sɛ nea adeyɛ asɛm a wonyaa asɛm “moma ɛyɛ ntɛm” fii mu no kyerɛ wɔ ha ne sɛ “‘wobɛyɛ no ntɛm,’ ma enti ɛne ‘sɛ wobɛyɛ nsi, wobɛyɛ nnam, wubedwen biribi ho no wɔ abusuabɔ kɛse.’” Enti na Petro rehyɛ ne mfɛfo gyidifo nkuran sɛ wɔmfa “ɔpɛ a emu yɛ den” nhwɛ Yehowa da no kwan. Ná wobetumi ayɛ eyi denam ma a wɔbɛma atra wɔn adwenem bere nyinaa so. (2 Petro 3:12, NW, ase hɔ asɛm) Esiane sɛ “[Yehowa, NW] da kɛse a ɛyɛ hu no” abɛn paa nti, ɛsɛ sɛ yenya saa adwenkoro no ara bi.—Yoel 2:31.
Fa “Abrabɔ Kronkron” Twɛn
5. Ɔkwan bɛn so na yebetumi akyerɛ sɛ yɛde “ɔpɛ a emu yɛ den” hwɛ kwan sɛ yebehu “Yehowa da no”?
5 Sɛ yɛde “ɔpɛ a emu yɛ den” hwɛ kwan sɛ yebenya nkwa Yehowa da no a, yɛde yɛn “abrabɔ kronkron ne onyamesom pa” bɛda no adi. Ebia asɛm “abrabɔ kronkron” no bɛma yɛakae Petro afotu yi yiye: “Sɛ asoɔmmerɛw mma, na monnyɛ mo ho sɛnea kan a munnim biribi no mo akɔnnɔ te no, na mmom te sɛ nea ɔfrɛɛ mo no yɛ kronkron no, mo nso monyɛ kronkron abrabɔ nyinaa mu, na wɔakyerɛw sɛ: Monyɛ kronkron, efisɛ me, meyɛ kronkron.”—1 Petro 1:14-16.
6. Sɛ yɛbɛyɛ kronkron a, dɛn na ɛsɛ sɛ yɛyɛ?
6 Sɛ yɛbɛyɛ kronkron a, ɛsɛ sɛ yekura honam, adwene, abrabɔ, ne honhom fam ahotew mu. So yɛresiesie yɛn ho ama “Yehowa da no” denam yɛ a yɛyɛ yɛn ho kronkron sɛ ankorankoro a Yehowa din da wɔn so no so? Ɛnyɛ mmerɛw sɛ yebekura ahotew a ɛte saa mu nnɛ, efisɛ wiase no abrabɔ gyinapɛn ahorow resɛe bere nyinaa. (1 Korintofo 7:31; 2 Timoteo 3:13) So yehu sɛ nsonsonoe a ɛda yɛn abrabɔ ne wiase no de ntam no reyɛ kɛse? Sɛ ɛnte saa a, ɛsɛ sɛ yɛma ɛhaw yɛn. So ebetumi aba sɛ ɛmfa ho sɛ yɛn ankasa gyinapɛn korɔn sen wiase no de no, ɛresɛe? Sɛ saa a, ɛsɛ sɛ yɛyɛ biribi pa de siesie nneɛma na ama yɛasɔ Onyankopɔn ani.
7, 8. (a) Ɔkwan bɛn so na yebetumi abu yɛn ani agu hia a ɛho hia sɛ yɛda “abrabɔ kronkron” adi no so? (b) Nsiesiei bɛn na ɛho behia sɛ yɛyɛ?
7 Esiane nguamansɛm a ɛba Intanɛt so, ne sɛ wotumi hwɛ wɔ kokoam nti, ebinom a anka wonnya ɔbrasɛe ho nneɛma a ɛte saa no renya “nna ho nsɛm bebree a enni ano” nnɛ, sɛnea oduruyɛfo bi kae no. Sɛ yɛkɔhwehwɛ afide wɔ Intanɛt so a, akyinnye biara nni ho sɛ na yɛrebu yɛn ani agu Bible ahyɛde a ese ‘yɛnnka ade a ɛho ntew’ no so. (Yesaia 52:11) So na yɛrema ‘Yehowa da no ba atra yɛn adwenem’ ampa? Anaasɛ ebia wɔ yɛn adwenem no, na yɛretu saa da no ahyɛ da, na yɛresusuw sɛ, sɛ yɛde afide gu yɛn adwene ho fi mpo a, yɛda so ara wɔ bere a yɛde bɛtew yɛn ho? Sɛ yɛahyia ɔhaw bi a ɛte sɛ eyi a, hwɛ sɛnea ɛsɛ sɛ yɛsrɛ Yehowa ntɛm ara ma ‘ɔma yɛn ani twa adehunu hwɛ ho, na ama yɛanya ne kwan mu nkwa’!—Dwom 119:37.
8 Yehowa Adansefo dodow no ara, mmofra ne mpanyin nyinaa redi Onyankopɔn abrabɔ gyinapɛn a ɛkorɔn no so, na wɔrekwati saa wiase yi ɔbrasɛe mu nnaadaa no. Esiane sɛ wonim sɛnea yɛn mmere yi gye ntɛmpɛ na wonim Petro kɔkɔbɔ a ese “[Yehowa, NW] da no bɛba sɛ owifo ba” nti, wɔkɔ so da “abrabɔ kronkron” adi. (2 Petro 3:10) Wɔn nneyɛe kyerɛ sɛ ‘wɔretwɛn na wɔma Yehowa da no ba tra wɔn adwenem.’ *
Fa “Onyamesom Pa” Twɛn
9. Dɛn na ɛsɛ sɛ onyamesom pa ka yɛn ma yɛyɛ?
9 Sɛ yɛbɛma Yehowa da no atra yɛn adwenem a, “onyamesom pa” nso ho hia. Nea ɛka “onyamesom pa” ho ne nidi a yɛde ma Onyankopɔn a ɛkanyan yɛn ma yɛyɛ nea ɛsɔ n’ani no. Nokwaredi mu a yebefi de yɛn ho abata Yehowa ho ne tumi a ɛkanyan yɛn ma yɛda onyamesom pa a ɛte saa no adi. Ɛyɛ ne pɛ sɛ “wogye nnipa nyinaa nkwa na wɔba nokware nimdeɛ mu.” (1 Timoteo 2:4) Onyankopɔn ‘mpɛ sɛ nnipa bi bɛyera, na mmom ɔpɛ sɛ wɔn nyinaa ba adwensakra mu.’ (2 Petro 3:9) Ɛnde, so ɛnsɛ sɛ yɛma onyamesom pa kanyan yɛn ma yɛhyɛ mmɔden a yɛbɔ sɛ yɛbɛboa nkurɔfo ma wɔasua Yehowa ho ade na wɔasuasua no no mu den?—Efesofo 5:1.
10. Dɛn nti na ɛsɛ sɛ yɛhwɛ yɛn ho yiye wɔ “ahonyade nnaadaa” ho?
10 Sɛ yɛhwehwɛ Onyankopɔn Ahenni kan a, onyamesom pa bɛyɛ yɛn asetra ma. (Mateo 6:33) Eyi kyerɛ sɛ yebenya honam fam nneɛma ho adwene a ɛkari pɛ. Yesu bɔɔ kɔkɔ sɛ: “Monhwɛ na monhwɛ mo ho yiye pɛpɛe [anibere, NW] ho! Na ɛnyɛ onipa ade a wanya na aboro so no mu na ne nkwa wɔ.” (Luka 12:15) Ɛwom sɛ ebia ɛbɛyɛ den sɛ yebesusuw sɛ sikanibere afura yɛn ani de, nanso ɛyɛ papa sɛ yebehu sɛ ‘nneɛma nhyehyɛe yi mu dadwen ne haw ne ahonyade nnaadaa’ betumi ‘amia Onyankopɔn asɛm no.’ (Mateo 13:22) Ebia ɛrenyɛ mmerɛw sɛ yebenya asetrade. Enti, wɔ wiase no mmeae bi no, nnipa pii susuw sɛ, sɛ wobenya asetra pa a, ɛsɛ sɛ wotu kɔ ɔman a wodi yiye so, na ebia wogyaw wɔn mmusua hɔ mfe kakra. Onyankopɔn nkurɔfo bi mpo asusuw saa. Sɛ wɔkɔ ɔman foforo so a, ebia wobetumi de nnɛyi nneɛma amena wɔn mmusua. Nanso, dɛn na ebetumi aba wɔn adɔfo a wɔwɔ wɔn man mu no honhom fam yiyedi so? Sɛ wonni tiyɛ ho dwuma yiye wɔ fie a, so wobenya honhom fam yiyedi a ehia na ama wɔanya nkwa Yehowa da no?
11. Ɔkwan bɛn so na odwumayɛni tubrafo bi daa no adi sɛ onyamesom pa ho hia sen ahonyade?
11 Otubrafo bi a ofi Philippines suaa Bible mu nokware no fii Yehowa Adansefo a wɔwɔ Japan hɔ. Bere a osuaa tiyɛ ho asɛyɛde a ɛwɔ Kyerɛwnsɛm mu no, ohui sɛ ehia sɛ ɔboa n’abusua ma wɔbɛyɛ Yehowa asomfo. (1 Korintofo 11:3) Ne yere a na ɔwɔ ne kurom no sɔre tiaa ne som foforo a na wahu no denneennen, na ɔpɛe sɛ ɔkɔ so de sika mena abusua no mmom sen sɛ ɔbɛsan aba ne kurom abɛkyerɛkyerɛ wɔn ne gyidi a egyina Bible so no. Nanso, esiane sɛ nneɛma gye ntɛmpɛ wɔ bere yi mu na n’adɔfo ho asɛm hia no nti, ɔkɔɔ ne kurom. Boasetɔ mu a ofi ne n’abusuafo dii wɔ ɔdɔ mu no so baa mfaso. Bere bi akyi no, n’abusua no bɛyɛɛ biako wɔ nokware som mu, na ne yere de ne ho hyɛɛ bere nyinaa som adwuma no mu.
12. Dɛn nti na ɛsɛ sɛ yɛde honhom fam nneɛma di kan wɔ asetram?
12 Wobetumi de yɛn tebea no atoto nnipa a wɔwɔ ɔdan a ɛrehyew mu no ho. So ɛbɛyɛ nea nyansa wom sɛ yɛde ahoyeraw betu mmirika akyinkyin mu sɛnea ɛbɛyɛ na yɛayi honam fam nneɛma afi ɔdan a ɛrehyew a ɛreyɛ adwiriw agu no mu? Mmom no, so ɛrenyɛ nea ɛho hia koraa sɛ yebegye nkwa—yɛn ankasa nkwa ne yɛn abusuafo ne afoforo a wɔte ɔdan no mu de? Wiɛ, nneɛma nhyehyɛe bɔne yi rebɛn ne sɛe ntɛmntɛm, na nnipa nkwa da asiane mu. Esiane sɛ yenim eyi nti, akyinnye biara nni ho sɛ ɛsɛ sɛ yɛde honhom fam nneɛma di kan na yɛnam nsiyɛ so de yɛn adwene si Ahenni asɛnka adwuma a egye nkwa no so.—1 Timoteo 4:16.
Ehia sɛ Yɛyɛ Wɔn a “Wonni Nkekae”
13. Sɛ Yehowa da no ba a, tebea bɛn mu na yɛbɛpɛ sɛ wohu yɛn?
13 Bere a Petro resi so dua sɛ ehia sɛ yɛtwɛn no, ɔkae sɛ: “Adɔfo, sɛ moretwɛn eyinom nti, mommɔ mmɔden na [Onyankopɔn ahu] mo sɛ nnipa a wonni nkekae ne dɛm asomdwoe mu.” (2 Petro 3:14) Wɔ Petro afotu a ese yɛnna abrabɔ kronkron ne onyamesom pa adi akyi no, osii so dua sɛ ehia sɛ awiei koraa no Yehowa behu yɛn sɛ nnipa a Yesu mogya a ɛsom bo no atew wɔn ho. (Adiyisɛm 7:9, 14) Eyi hwehwɛ sɛ obi nya Yesu afɔrebɔ no mu gyidi na ɔbɛyɛ Yehowa somfo a wahyira ne ho so abɔ asu.
14. Dɛn na ‘nkekae’ a enni yɛn ho no kyerɛ?
14 Petro hyɛ yɛn nkuran sɛ yɛnyɛ nea yebetumi biara mma wonhu yɛn sɛ wɔn a “wonni nkekae.” So yɛrema yɛn atade a ɛne Kristofo abrabɔ ne nipasu no ayɛ nea nkekae nnim, nea wiase no nkekae nnim? Sɛ yehu nkekae bi wɔ yɛn ntade mu a, yɛbɔ mmɔden sɛ yebeyi afi mu ntɛm ara. Sɛ ɛyɛ atade a yɛn ani gye ho paa na nkekae no aka mu a, yɛde ahwɛyiye kɛse na eyi fi mu. So yɛte nka saa ara bere a sɛnea yɛbɛka no no, yɛn nipasu anaa abrabɔ fam sintɔ bi nti, nkekae aba yɛn Kristofo ntade mu no?
15. (a) Dɛn nti na na ɛsɛ sɛ Israelfo no yɛ wɔn ntade ano nnwow? (b) Dɛn nti na nnɛyi Yehowa asomfo yɛ soronko?
15 Na ɛsɛ sɛ Israelfo no yɛ “wɔn ntama ano nnwow,” na ‘wɔde bibiri hama suso ntama ano nnwow no mu.’ Dɛn ntia? Sɛnea ɛbɛyɛ a wɔbɛkae Yehowa mmara nsɛm, wɔadi so na ‘wɔayɛ kronkron ama’ wɔn Nyankopɔn. (Numeri 15:38-40) Sɛ Yehowa nnɛyi asomfo no, yɛyɛ soronko wɔ wiase no ho efisɛ yedi Onyankopɔn mmara ne ne nnyinasosɛm so. Sɛ nhwɛso no, yekura abrabɔ fam ahotew mu, kyerɛ obu ma kronkron a mogya yɛ, na yɛkwati abosonsom biara. (Asomafo no Nnwuma 15:28, 29) Nnipa pii kyerɛ obu ma yɛn wɔ yɛn bo a yɛasi pintinn sɛ yɛremma nkekae mma yɛn ho no ho.—Yakobo 1:27.
Ehia sɛ Yɛyɛ Wɔn a “Wonni Dɛm”
16. Dɛn na ‘dɛmdi’ a yɛremma ɛmma yɛn ho no kyerɛ?
16 Petro san ka sɛ ɛsɛ sɛ wohu yɛn sɛ wɔn a “wonni dɛm.” Ɔkwan bɛn so na ebetumi aba saa? Wubetumi apopa anaa woahohoro nkekae ma akɔ nanso wuntumi nyɛ saa wɔ dɛmdi ho. Dɛmdi kyerɛ sɛ biribi atoto wɔ yɛn mu. Ɔsomafo Paulo tuu ne mfɛfo Kristofo a wɔwɔ Filipi no fo sɛ: “Monkwati huhuhuhu ne nkyinnye nyɛ ade nyinaa, na moayɛ nnipa a wonnunu wɔn, na wɔyɛ kronn, Onyankopɔn mma a wonni dɛm nnɛ mma abusua a wɔakɔntɔn na wɔakyea a mohyerɛn wɔn mu sɛ akanea ewiase.” (Filipifo 2:14, 15) Sɛ yedi saa afotu no akyi a, yɛbɛkwati anwiinwii ne akyinnyegye, na yɛde adwempa bɛsom Onyankopɔn. Ɔdɔ a yɛwɔ ma Yehowa ne yɛn yɔnkonom no bɛka yɛn bere a yɛka “ahenni ho asɛmpa yi” no. (Mateo 22:35-40; 24:14) Afei nso, yɛbɛkɔ so abɔ asɛmpa no dawuru ɛwom mpo sɛ ebia nnipa dodow no ara rente nea enti a yɛde yɛn bere bɔ afɔre de bɔ mmɔden sɛ yɛbɛboa afoforo ma wɔasua Onyankopɔn ne N’asɛm Bible ho ade ase de.
17. Dɛn na ɛsɛ sɛ ɛyɛ yɛn botae bere a yɛrebɔ mmɔden sɛ yebenya hokwan ahorow wɔ Kristofo asafo no mu no?
17 Esiane sɛ yɛpɛ sɛ wohu yɛn sɛ ‘yenni dɛm’ nti, ɛsɛ sɛ yɛpɛɛpɛɛ adwene a yekura wɔ nneɛma a yɛyɛ nyinaa ho no mu. Yɛagyae wiase akwan a pɛsɛmenkominya nti wɔfa so yɛ nneɛma, te sɛ mmɔden a wɔbɔ sɛ wobenya ahonyade ne tumi no. Sɛ yɛrebɔ mmɔden anya hokwan ahorow wɔ Kristofo asafo no mu a, ɛmmra sɛ yɛbɛma yɛn botae akɔ so ayɛ papa na ɔdɔ a yɛwɔ ma Yehowa ne afoforo no akanyan yɛn bere nyinaa. Ɛyɛ akomatɔyam sɛ yebehu sɛ honhom mufo a wɔde anigye ne ahobrɛase pɛ sɛ wɔsom Yehowa ne wɔn mfɛfo gyidifo no ‘repɛ hwɛfodwuma.’ (1 Timoteo 3:1; 2 Korintofo 1:24) Nokwarem no, wɔn a wɔfata sɛ wɔsom sɛ mpanyimfo no ‘yɛn Onyankopɔn nguankuw no, ɛnyɛ ɔhyɛ so, na mmom ɔdɔ so, ɛnyɛ sɛ wɔn a wodi asafotow no so bakoma, na mmom wɔyɛ nhwɛso ma nguankuw no.’—1 Petro 5:1-4.
Ehia sɛ Yɛtra “Asomdwoe Mu”
18. Su horow bɛn na wɔde nim Yehowa Adansefo yiye?
18 Awiei koraa no, Petro ka kyerɛ yɛn sɛ ɛsɛ sɛ wohu yɛn wɔ “asomdwoe mu.” Nea ɛbɛyɛ na yɛadu ahwehwɛde yi ho no, ehia sɛ asomdwoe tra yɛne Yehowa ne yɛn yɔnko nnipa ntam. Petro sii so dua sɛ ɛho hia sɛ ‘yɛde ɔdɔ a emu yɛ den dodɔ yɛn ho,’ na yɛma asomdwoe tra yɛne yɛn mfɛfo Kristofo ntam. (1 Petro 2:17; 3:10, 11; 4:8; 2 Petro 1:5-7) Sɛ yebekura asomdwoe mu a, ɛsɛ sɛ yɛdodɔ yɛn ho. (Yohane 13:34, 35; Efesofo 4:1, 2) Ɔdɔ ne asomdwoe a yɛwɔ no da adi titiriw bere a yɛyɛ yɛn amanaman ntam nhyiam ahorow no. Wɔ nhyiam bi a wɔyɛe wɔ Costa Rica wɔ 1999 mu ase no, ɔdetɔnfo bi a ɔwɔ wimhyɛn gyinabea hɔ no bo fuwii efisɛ Adansefo a wɔwɔ hɔ a wɔrema nhyiamfo akwaaba no siw baabi a ɔtɔn ade no anim a na wonnim. Nanso, da a ɛto so abien no, ohuu ɔdɔ ne asomdwoe a ɛdaa adi wɔ anigye a wɔde maa nhyiamfo no akwaaba no mu, ɛwom sɛ na ɛhɔnom Adansefo no nnim wɔn ankasa de. Da a etwa to no, ɔdetɔnfo no bɛkaa wɔn ho ma wɔmaa wɔn nkurɔfo akwaaba na ɔkae sɛ wɔne no mmɛyɛ Bible adesua.
19. Dɛn nti na ɛho hia sɛ yɛne yɛn mfɛfo gyidifo di asomdwoe akyi?
19 Komam a yefi hwehwɛ sɛ yɛbɛma asomdwoe atra yɛne yɛn nuanom mmarima ne mmea ntam no betumi aka sɛnea yɛretwɛn Yehowa da no ne wiase foforo a wɔahyɛ ho bɔ no nokware mu no. (Dwom 37:11; 2 Petro 3:13) Fa no sɛ ɛyɛ den ma yɛn sɛ yɛbɛma asomdwoe atra yɛne yɛn yɔnko gyidini bi ntam. So yebetumi ayɛ ho mfonini wɔ yɛn adwene mu sɛ yɛne no te hɔ asomdwoe mu wɔ Paradise? Sɛ onua bi wɔ biribi tia yɛn a, ɛsɛ sɛ ‘yɛma asomdwoe ba yɛne no ntam’ ntɛm ara. (Mateo 5:23, 24) Sɛ yɛpɛ sɛ asomdwoe tra yɛne Yehowa ntam a, saa a yɛbɛyɛ no ho hia.—Dwom 35:27; 1 Yohane 4:20.
20. Akwan bɛn so na ɛsɛ sɛ yɛda no adi sɛ yetumi ‘twɛn’?
20 So yɛn ankasa ‘retwɛn na yɛama Yehowa da no atra yɛn adwenem’? Yɛnam abrabɔ kronkron a yɛda no adi wɔ wiase a ɔbrasɛe wom yi mu so da no adi sɛ yɛwɔ ɔpɛ a emu yɛ den sɛ yebehu amumɔyɛ awiei. Afei nso, yɛde onyamesom pa da ɔpɛ a emu yɛ den a yɛwɔ sɛ Yehowa da no ne asetra wɔ Ahenni nniso ase no bɛba no adi. Na hwɛ a yɛhwɛ kwan sɛ yɛbɛtra ase wɔ wiase foforo a asomdwoe wom mu no da adi wɔ asomdwoe a yɛhwehwɛ sɛ yɛne yɛn mfɛfo asomfo benya nnɛ no mu. Yɛnam akwan a ɛte saa so da no adi sɛ yetumi ‘twɛn’ na yɛma ‘Yehowa da no ba tra yɛn adwenem.’
[Ase hɔ asɛm]
^ nky. 8 Sɛ wopɛ nhwɛso ahorow a, hwɛ January 1, 2000, Ɔwɛn-Aban no kratafa 16 ne 1997 Yearbook of Jehovah’s Witnesses, kratafa 51.
So Wokae?
• Dɛn na ‘Yehowa da a yɛbɛma atra yɛn adwenem’ no kyerɛ?
• Ɔkwan bɛn so na yɛde yɛn abrabɔ da no adi sɛ ‘yɛretwɛn’?
• Dɛn nti na “onyamesom pa” ho hia?
• Dɛn na ɛsɛ sɛ yɛyɛ na ama Yehowa ahu yɛn sɛ ‘nkekae ne dɛm nni yɛn ho asomdwoe mu’?
[Adesua no ho Nsɛmmisa]
[Mfonini wɔ kratafa 11]
‘Twɛn a yɛtwɛn’ no da adi wɔ abrabɔ kronkron mu
[Mfonini ahorow wɔ kratafa 12]
Ahenni asɛnka adwuma no gye nkwa
[Mfonini wɔ kratafa 14]
Bere a yɛtwɛn Yehowa da no, momma yɛne afoforo nni asomdwoe akyi