Susuw Nsɛm Ho Yiye​—Yɛ Ade Wɔ Nyansam

SUSUW adeyɛ yi ho: Yesu Kristo rekyerɛkyerɛ mu sɛ nyamesom mu atamfo a wɔwɔ Yerusalem no bɛma ne ho ahiahia no na wɔakum no. Ɔsomafo Petro a ɔyɛ n’adamfo paa no nnye nni. Nokwarem no, ɔde Yesu kɔ nkyɛn kɔka n’anim. Akyinnye biara nni ho sɛ Petro fi koma nyinaa mu dwen Yesu ho ankasa. Nanso Yesu buu Petro nsusuwii no dɛn? Yesu kae sɛ: “Fi me so, Satan! Woyɛ me hintidua, efisɛ wunnwen Onyankopɔn de, na mmom nnipa de na wudwen yi.”​—Mateo 16:​21-23.

Hwɛ sɛnea ɛbɛyɛ sɛ ɛno maa Petro ho dwiriw no! Sɛ́ anka ɔbɛyɛ mmoa mmom no, saa bere yi de na ‘ɔyɛ hintidua’ ma ne Wura a ɔdɔ no no. Ɛyɛɛ dɛn na ɛbaa saa? Ɛbɛyɛ sɛ na mfomso a nnipa taa di wɔ wɔn nsusuwii mu no anya Petro so nkɛntɛnso​—nea na osusuw nkutoo na ogye dii.

Nnye Wo Ho Nni Mmoro So

Ade biako a entumi mma wunsusuw nsɛm ho yiye ne su a ɛne sɛ wubegye wo ho adi aboro so. Ɔsomafo Paulo bɔɔ mfɛfo Kristofo a na wɔwɔ tete Korinto no kɔkɔ sɛ: “Nea ɛyɛ no sɛ ogyina hɔ nhwɛ yiye, na wanhwe ase.” (1 Korintofo 10:​12) Dɛn nti na Paulo kaa eyi? Ɛda adi sɛ na onim sɛnea ɛyɛ mmerɛw sɛ nnipa nsusuwii betumi asɛe​—na Kristofo adwene mpo ‘betumi asɛe afi Kristo fam kronnyɛ no ho.’​—2 Korintofo 11:3.

Eyi too Paulo nananom awo ntoatoaso no nyinaa. Saa bere no, Yehowa ka kyerɛɛ wɔn sɛ: “Ɛnyɛ m’adwene ne mo adwene, na ɛnyɛ mo akwan ne m’akwan.” (Yesaia 55:8) Na wɔyɛ “wɔn ankasa ani so anyansafo,” na nnebɔne na efii mu bae. (Yesaia 5:​21) Ɛnde, akyinnye biara nni ho sɛ, ntease wom sɛ yɛbɛhwehwɛ akwan a yɛn ankasa bɛfa so asusuw nsɛm ho yiye, na yɛnam so akwati ɔhaw a ɛte saa.

Hwɛ Yiye Wɔ Honam Fam Nsusuwii Ho

Honam fam nsusuwii nyaa Korintofo binom so nkɛntɛnso bɔne. (1 Korintofo 3:​1-3) Wɔde adwene sii nnipa nyansapɛ so sen Onyankopɔn Asɛm. Akyinnye biara nni ho sɛ na wɔn a wokura Helafo nsusuwii saa bere no yɛ anyansafo ankasa. Nanso wɔ Onyankopɔn ani so no, na wɔyɛ nkwaseafo. Paulo kae sɛ: “Wɔakyerɛw sɛ: Mɛsɛe anyansafo nyansa, na mɛma animdefo nimdeɛ ayɛ ɔkwa. Onyansafo wɔ he? Kyerɛwfo wɔ he? Wi yi ase kyinnyegyefo wɔ he? Onyankopɔn nnan wi yi ase nyansa nkwaseasɛm anaa?” (1 Korintofo 1:​19, 20) Ná  ɛnyɛ Onyankopɔn honhom na edi anyansafo a wɔte saa no so, na mmom “wiase honhom.” (1 Korintofo 2:​12) Ná wɔn nyansapɛ ne wɔn nsusuwii no ne Yehowa nsusuwii nhyia koraa.

Ná onii a saa honam fam nsusuwii no nyinaa fi no ne Satan Ɔbonsam a ɔnam ɔwɔ so daadaa Hawa no. (Genesis 3:​1-6; 2 Korintofo 11:3) So ɔda so ara yɛ asiane ma yɛn? Yiw! Sɛnea Onyankopɔn Asɛm kyerɛ no, Satan “afura” nkurɔfo “adwene ani” araa ma seesei ‘ɔredaadaa amanaman nyinaa.’ (2 Korintofo 4:4; Adiyisɛm 12:9) Hwɛ hia a ɛho hia sɛ yɛbɛma yɛn ani ada hɔ wɔ ne nnɛɛdɛɛ ho!​—2 Korintofo 2:11.

Hwɛ Yiye Wɔ “Nnipa Kusumdi” Ho

Ɔsomafo Paulo bɔɔ “nnipa kusumdi” nso ho kɔkɔ. (Efesofo 4:​14) Ohyiaa “nnaadaa adwumayɛfo” a na wɔayɛ wɔn ho sɛ nea wɔreka nokware no ho asɛm nanso ne paa mu de, na wɔrekyinkyim no no. (2 Korintofo 11:​12-15) Nea ɛbɛyɛ na mmarima a wɔte saa adu wɔn botae ho no, wɔde adanse pɔtee bi, nsɛm a ɛkanyan nkate, nsɛm a enni nnyinaso, adɛfɛdɛfɛsɛm, ne atosɛm ankasa di dwuma.

Wɔn a wɔsɛe nkurɔfo adwene no de asɛm te sɛ “matew-me-ho kuw” ka afoforo ho asɛm de sɛe wɔn. Wɔ asɛm bi a wɔkamfo kyerɛɛ Europa Bagua no Mmarahyɛ Bagua Nhyiam no mu no, wɔkyerɛe sɛ “ɛbɛyɛ nyansahyɛ kɛse ama” mpanyimfo a wɔyɛ nyamesom akuw foforo mu nhwehwɛmu no, “sɛ wɔmfa saa asɛm no nni dwuma bio.” Dɛn ntia? Wɔtee nka sɛ asɛm “matew-me-ho kuw” no nkura adwempa koraa. Ɔkae nso sɛ: “Wɔ ɔmanfo adwenem nnɛ no, matew-me-ho kuw kyerɛ adebɔne anaa biribi a ɛyɛ hu yiye.” Wɔ ɔkwan a ɛte saa ara so no, Hela anyansafo no dii mfomso bɔɔ ɔsomafo Paulo sobo sɛ ɔyɛ “obi a ɔkeka nsɛnhunu,” anaasɛ “obi a ɔsesaw nnuaba.” Nea na eyi kyerɛ ara ne sɛ ɔyɛ obi a ɔworo nsɛm, obi a ɔsesaw nimdeɛ ase mporoporowa bere nyinaa. Nokwarem no, na Paulo ‘reka wɔn Yesu ne owusɔre ho asɛmpa no.’​—Asomafo no Nnwuma 17:​18, NW, ase hɔ asɛm.

So akwan a wɔn a wɔsɛe nkurɔfo fa so no yɛ adwuma? Yiw. Wɔn atosɛm no ayɛ ade titiriw a ɛde mmusua ne ɔsom mu nitan aba denam adwemmɔne a wɔma nkurɔfo nya fa aman anaa ɔsom afoforo ho no so. Nnipa pii nam wɔn atosɛm no so akeka nsɛmmɔne pii afa mmusua a wosua a afoforo mpɛ wɔn asɛm no ho. Adolf Hitler de akwan a ɛte saa dii dwuma fefeefe bere a ɔkaa Yudafo ne afoforo ho asɛm sɛ nnipa a “wɔasɛe,” “amumɔyɛfo,” ne “nnipa a wotutu” ɔman “ase” no. Mma nnaadaasɛm a ɛte saa nnsɛe wo nsusuwii da.​—Asomafo no Nnwuma 28:​19-​22.

Nnaadaa Wo Ho

Ɛyɛ mmerɛw nso sɛ yɛbɛdaadaa yɛn ho. Nokwarem no, ebetumi ayɛ den sɛ yebegyae yɛn nsusuwii ahorow a yɛn ani gye ho mu anaasɛ yɛbɛma yɛn adwenem ayɛ yɛn naa wɔ ho mpo akɔ akyiri. Dɛn ntia? Efisɛ yɛtaa fi nkate mu kyerɛ yɛn nsusuwii ho anigye. Afei nso yebetumi adaadaa yɛn ho denam nneɛma hunu a yebesusuw ho so​—sɛ́ yɛn ankasa bedwennwen nneɛma bi ho de akyerɛ sɛ nneɛma a mfomso wɔ ho ne gyidi ahorow a ɛmfata koraa no yɛ nokware.

Eyi too afeha a edi kan mu Kristofo binom. Ná wonim Onyankopɔn Asɛm, nanso wɔamma kwan ma anni wɔn nsusuwii so. Nea ɛkowiei ne sɛ ‘wɔnam atoro nsusuwii so daadaa wɔn ho.’ (Yakobo 1:​22, 26) Ade biako a ebetumi akyerɛ sɛ yɛredaadaa yɛn ho ne bere a yehu sɛ yɛn bo fuw bere a obi regye yɛn kyim wɔ yɛn gyidi ho no. Sɛ́ anka yɛn bo befuw mmom no, ɛyɛ nea nyansa wom sɛ yebebue yɛn adwene mu na yɛatie nea afoforo wɔ ka no yiye​—sɛ yɛte nka mpo sɛ nea yɛreka no na ɛteɛ a.​—Mmebusɛm 18:17.

Hwehwɛ “Onyankopɔn Ho Nimdeɛ”

Dɛn na yebetumi ayɛ na ama yɛasusuw nsɛm ho yiye? Mmoa pii wɔ hɔ, nanso ɛsɛ sɛ yenya ɔpɛ sɛ yɛbɛyɛ ho adwuma. Ɔhene Salomo nyansafo no kae sɛ: “Me ba, sɛ wutie me nsɛm, na wode me mmara nsɛm sie wo  nkyɛn, sɛ wobɛyɛ asõ atie nyansa, na woakom wo koma ama ntease, yiw, sɛ wusu frɛ nhumu, na woma wo nne so frɛ ntease, sɛ wohwehwɛ n’akyi kwan sɛ dwetɛ, na wobɔre hwehwɛ no sɛ akorade a ahintaw a, ɛno na wubehu [Yehowa, NW] suro, na woahu Onyankopɔn ho nimdeɛ.” (Mmebusɛm 2:​1-5) Yiw, sɛ yɛn ankasa bɔ mmɔden sɛ yɛde Onyankopɔn Asɛm mu nokware bɛhyɛ yɛn adwene mu a, yebenya nokware nyansa, nhumu, ne ntease ankasa. Enti, yɛbɛhwehwɛ nneɛma a ɛsom bo sen sika anaa honam fam akorade foforo biara koraa.​—Mmebusɛm 3:​13-​15.

Akyinnye biara nni ho sɛ nyansa ne nimdeɛ yɛ nneɛma titiriw a ɛma yesusuw nsɛm ho yiye. Onyankopɔn Asɛm ka sɛ: “Sɛ nyansa ba wo koma mu, na nimdeɛ sɔ wo kra ani a, adwempa bɛhwɛ wo so, na ntease abɔ wo ho ban, na ayi wo afi bɔne kwan mu, ne onipa a ɔka akɔntɔnkyesɛm ho, afi wɔn a wogyaw trenee akwan kɔnantew sum akwan so no ho.”​—Mmebusɛm 2:​10-13.

Ɛho hia titiriw sɛ yɛbɛma Onyankopɔn nsusuwii adi yɛn nsusuwii so bere a yɛwɔ ahohia anaa asiane mu no. Nkate a emu yɛ den te sɛ abufuw anaa osuro betumi ama ayɛ den sɛ yɛn nsusuwii bɛteɛ. Salomo ka sɛ: “Amimyɛ bɔ onyansafo dam.” (Ɔsɛnkafo 7:7) ‘Yɛn koma’ betumi ‘ahuru ahyɛ Yehowa’ mpo. (Mmebusɛm 19:3) Ɔkwan bɛn so? Sɛ́ yɛde yɛn haw ahorow ho sobo bɛto Onyankopɔn so na yɛnam so asusuw sɛ ɛteɛ sɛ yɛbɛyɛ nneɛma bi a ɛne ne mmara ne ne nnyinasosɛm nhyia. Sɛ́ yɛn ankasa yebesusuw sɛ yenim biribiara no, ɛmmra sɛ yebetie afotufo a wonim nyansa a wɔhwehwɛ sɛ wɔnam Kyerɛwnsɛm so bɛboa yɛn no. Na sɛ ɛho hia a, momma yensiesie yɛn ho sɛ yɛbɛpo nsusuwii a yɛakura mu denneennen no mpo bere a ɛbɛda adi sɛ mfomso wɔ ho no.​—Mmebusɛm 1:​1-5; 15:22.

‘Monkɔ So Mmisa Onyankopɔn’

Yɛte mmere a ɛyɛ hu na nneɛma yɛ sakasaka mu. Sɛ yebetumi ada atɛmpa adi na yɛayɛ ade nyansam a, ɛho hia sɛ yɛbɔ mpae daa hwehwɛ Yehowa akwankyerɛ. Paulo kyerɛw sɛ: “Monnna nnnwen biribiara nnhaw mo ho, na mmom ade nyinaa mu momfa mpaebɔ ne ɔsrɛ, ɛne aseda mma mo adesrɛ nnu Nyankopɔn asom; na Onyankopɔn asomdwoe a ɛtra adwene nyinaa so no bɛhwɛ mo koma ne mo adwene so Kristo Yesu mu.” (Filipifo 4:​6, 7) Sɛ yenni nyansa a yɛde bedi ɔhaw anaa sɔhwɛ ahorow a emu yɛ den ho dwuma a, ɛsɛ sɛ ‘yɛkɔ so bisa Onyankopɔn, efisɛ ɔno na ɔma nnipa nyinaa ade kwa a ahohora biara nnim.’​—Yakobo 1:5-8.

Esiane sɛ na ɔsomafo Petro nim sɛ ehia sɛ mfɛfo Kristofo nya nyansa nti, ɔhwehwɛe sɛ ‘ɔbɛkanyan wɔn nsusuwii.’ Ɔpɛe sɛ ‘wɔkae nsɛm a adiyifo kronkron no aka ato hɔ ne wɔn a wɔyɛ asomafo no ahyɛde a ɛyɛ Awurade ne Agyenkwa,’ Yesu Kristo, ‘de no.’ (2 Petro 3:​1, 2) Sɛ yɛyɛ eyi na yɛma yɛn adwene ne Yehowa Asɛm hyia a, yebesusuw nsɛm ho yiye na yɛayɛ ade nyansam.

[Mfonini ahorow wɔ kratafa 21]

Tete Kristofo no maa Onyankopɔn nyansa mmom dii wɔn nsusuwii so, na ɛnyɛ nyansapɛfo nsusuwii

[Nsɛm Fibea]

Nyansapɛfo, efi benkum kosi nifa: Epicurus: Photograph taken by courtesy of the British Museum; Cicero: Reproduced from The Lives of the Twelve Caesars; Plato: Roma, Musei Capitolini

[Mfonini ahorow wɔ kratafa 23]

Mpaebɔ ne Onyankopɔn Asɛm sua ho hia