Ahiafo Kɔ So Di Hia Kɛse

“Nokwarem no, abusua biara ntumi nni yiye na wɔn ani nnye bere a wɔn mu dodow no ara di hia na wɔyɛ mmɔbɔ no.”

SIKASƐM ho ɔbenfo Adam Smith kaa saa asɛm no wɔ afeha a ɛto so 18 mu tɔnn. Nnipa pii gye di sɛ nokwasɛm a ɛwɔ nea ɔkae no mu no da adi kɛse mpo nnɛ. Sɛnea adefo sen ahiafo no abɛyɛ kɛse paa. Wɔ Philippines no, sika a ɛhɔnom nnipa mu ɔha mu nkyem abiɛsa mu biako de hwɛ wɔn ho da biara no nnu (U.S.) $1, ɛyɛ sika a wɔtaa de simma kakraa bi na enya wɔ aman a wɔwɔ sika kɛse no mu. Amanaman Nkabom no Human Development Report 2002 ka sɛ “sika a wiase no mu nnipa ɔha mu nkyem 5 a wɔwɔ sika sen biara nya no dɔɔso sen nea ɔha mu nkyem 5 a wodi hia sen biara no nya no mpɛn 114.”

Bere a nnipa binom wɔ ahotɔ bi no, ɔpepem pii tete mmeae a mmara mma kwan na wɔasisi adangow wɔ baabiara a wobetumi. Afoforo nni bi saa; wɔtete mmɔnten so, a ebia duasin tratraa anaa rɔba bi na wɔda so wɔ fam. Wɔn mu pii fa ɔkwan biara a wobetumi so na ama wɔanya nea wɔde bɛhwɛ wɔn ho​—wɔsesaw sumina so nneɛma, soa afoforo nneɛma a emu yɛ duru, anaasɛ wopia mfiri de sesaw nneɛma gow a wotumi de yɛ nneɛma foforo tɔn.

Ɛnyɛ aman a afei na wɔrenya nkɔso no mu nko na wohu sɛ adefo sen ahiafo, na mmom sɛnea Wiase Nyinaa Sikakorabea no ka no “wohu sɛ ‘nkurɔfo di hia’ wɔ mmeae bi wɔ aman nyinaa mu.” Efi Bangladesh kosi United States no, ɛmfa ho sɛnea ebinom di yiye no, wɔn a wɔbrɛ yiye ansa na wɔanya nea ɛbɛso wɔn di anaasɛ wɔanya dabere no wɔ hɔ. The New York Times faa 2001 U.S. Nnipakan Dwumadibea no amanneɛbɔ bi mu asɛm kae de kyerɛe sɛ sɛnea adefo sen ahiafo wɔ United States no akɔ so ayɛ kɛse. Ɛkae sɛ: “Nnipa no mu nkyem anum mu biako a wɔwɔ sika sen biara no nyaa akatua a mmusua nyae no mu fã wɔ afe a etwaam no mu . . . Wɔn a wodi hia sen biara no nyaa ɔha mu nkyem 3.5.” Tebea no te saa ara wɔ aman foforo pii mu anaasɛ enye koraa sen saa. Wiase Nyinaa Sikakorabea no amanneɛbɔ bi kyerɛe sɛ sika a wiase no mu nnipa ɔha mu nkyem 57 de hwɛ wɔn ho da biara no nnu $2.

Nea ɛma asɛm no sɛee koraa no, amanneɛbɔ a ɛne sɛ adwumakuw mu mpanyimfo faa akwammɔne so nyaa wɔn  ho no haw nnipa ɔpepem pii wɔ 2002 mu. Sɛ wɔanyɛ biribi a ebu mmara so ankasa mpo a, sɛnea wɔkae wɔ Fortune nsɛmma nhoma no mu no, nnipa pii tee nka sɛ adwumakuw mu mpanyimfo yi “renya wɔn ho yiye ma ɛyɛ abofono.” Sɛ ebinom susuw nea ɛrekɔ so wɔ wiase no ho a, wontumi nhu sɛnea wobetumi aka sɛ nya a ebinom nya sika akɛseakɛse a wobu akontaa sɛ ɛyɛ dɔla ɔpepem pii no mpofirim no fata bere a nnipa pii di hia no.

So Ohia Bɛtra Hɔ Daa?

Eyi nkyerɛ sɛ obiara mmɔ mmɔden sɛ ɔbɛyɛ ahiafo tebea no ho biribi. Ɛda adi sɛ aban mpanyimfo a wɔwɔ adwene pa ne ahyehyɛde ahorow a wɔde mmoa ma de nhyehyɛe a ɛbɛma tebea no asakra ato gua. Nanso, nokwasɛm no da so ara de abasamtu ba. Wɔ mmɔden atitiriw pii a wɔabɔ sɛ wɔbɛma wɔn tebea ayɛ papa akyi no, Human Development Report 2002 ka sɛ “aman pii di hia sen sɛnea na wodi wɔ mfe 10, 20, ne wɔ nsɛm bi mu no, mfe 30 a atwam ni no mu.”

So eyi kyerɛ sɛ ahiafo nni anidaso? Yɛto nsa frɛ wo sɛ kenkan asɛm a edi hɔ no na susuw nyansa a mfaso wɔ so a ebetumi aboa nnɛ ne ano aduru a ebia wunsusuw ho no nso ho.