Asetram Nsɛm

Anigye Ne Nea Yehowa Ne Ne Nyankopɔn

SƐNEA TOM DIDUR KA KYERƐE

Ná yɛagye ɔmanfo asa no atua ho ka dedaw. Na yɛhwɛ kwan sɛ nnipa bɛyɛ 300 na wɔbɛba ɔmansin nhyiam no ase wɔ Porcupine Plain, Saskatchewan, Canada. Sukyerɛma fii ase tɔe Wukuda, na eduu Fida no na wim ayɛ fitaa a wunhu hwee. Ewim yɛɛ nwini koduu digrii Celsius 40. Nnipa aduonu awotwe, a na mmofra kakra ka ho, na wɔbae. Sɛ ɔmansin sohwɛfo foforo no, na eyi ne ɔmansin nhyiam a edi kan a mereyɛ, na sɛ obi a na madi mfirihyia 25 no, na me ho yeraw me. Ansa na mɛka nea esii akyerɛ wo no, ma menka sɛnea ɛyɛe a mibenyaa ɔsom adwuma ho kwan soronko yi ho asɛm.

ME NA metɔ so ason wɔ me nuanom baawɔtwe a yɛn nyinaa yɛ mmarimaa no mu. Ná ɔpanyin paa ne Bill, wɔn a na wodidi so ne Metro, John, Fred, Mike, ne Alex. Wɔwoo me wɔ afe 1925 mu, na Wally ne akumaa koraa. Yɛtraa kurow bi a ɛbɛn Ukraina, Manitoba, baabi a na m’awofo, Michael ne Anna Didur wɔ afuw ketewaa bi mu. Paapa yɛɛ adwuma wɔ keteke kwan so. Esiane sɛ na asese a esisi keteke kwan ho wɔ mmeae bi a atew ne ho nyɛ baabi pa a wɔtete abusua kɛse nti, yɛtraa afuw no mu. Mpɛn pii na na Paapa nni fie, enti Maame na ɔtetee yɛn. Bere ne bere mu no, na okodi dapɛn anaa nea ɛboro saa wɔ Paapa nkyɛn, nanso ɔhwɛ kyerɛɛ yɛn aduannoa, adetõ, ne ofie nnwuma. Na esiane sɛ na yɛyɛ Greece Katolek Asɔre no mufo nti, na mpaebɔ a yɛbɛkyere agu yɛn tirim ne amanne foforo a  yɛbɛyɛ no ka ntetee a Maame de maa yɛn fii yɛn mmofraase pɛɛ no ho.

Bible Mu Nokware no a Mihui

Mifi me mpanyin afe so na m’ani gyee ho sɛ mɛte Bible no ase. Ofipamfo bi a ɔyɛ Yehowa Dansefo bɛsraa yɛn abusua no daa kenkan Bible no afã bi a ɛfa Onyankopɔn Ahenni, Harmagedon, ne wiase foforo no mu nhyira ahorow ho asɛm kyerɛ yɛn. Na Maame ani nnye asɛm a na ɔka no ho koraa, nanso Mike ne Alex ani gyee ho. Nokwarem no, nea wosuae no kanyan wɔn ma wɔpoe sɛ wɔbɛkɔ sraadi wɔ wiase ko a ɛto so abien no mu. Enti wɔde Mike too afiase bere tiaa bi, bere a wɔde Alex kɔɔ adwumayɛban mu wɔ Ontario no. Bere bi akyi no, Fred ne Wally nso gyee nokware no. Nanso, me nuanom mpanyimfo paa baasa no anye nokware no. Maame ko tiaa nokware no mfirihyia pii mpo, nanso akyiri yi ogyinaa Yehowa afã ma ɛyɛɛ yɛn nyinaa nwonwa. Wɔbɔɔ no asu bere a na wadi mfirihyia 83. Maame wui no na wadi mfirihyia 96. Paapa nso kyerɛɛ nokware no ho anigye ansa na ɔrewu.

Bere a midii mfirihyia 17 no, mituu kwan kɔɔ Winnipeg kɔhwehwɛɛ adwuma, na me ne wɔn a wobetumi aboa me ma masua Bible no bɔe. Saa bere no na wɔabara Yehowa Adansefo, nanso yɛkɔɔ so yɛɛ asafo nhyiam ahorow daa. Wɔyɛɛ asafo nhyiam a edi kan a mekɔe no wɔ obi fie. Esiane sɛ wɔtetee me wɔ Greece Katolek asɔre mu nti, nea metee mfiase no yɛɛ me foforo koraa. Nanso, nkakrankakra no, mebɛtee nea enti a asɔfo ne asɔremma nhyehyɛe no yɛ ade a ennyina Kyerɛwnsɛm so ne nea enti a Onyankopɔn ani annye ho bere a asɔfo no hyiraa akodi so no ase. (Yesaia 2:4; Mateo 23:8-10; Romafo 12:17, 18) Ɛyɛɛ me sɛ nea Paradise asase so asetra no yɛ nea ɛfata na ntease wom kɛse sen sɛ wobɛkɔ akyirikyiri baabi akɔtra hɔ daa.

Esiane sɛ migye dii sɛ eyi ne nokware no nti, mihyiraa me ho so maa Yehowa, na wɔbɔɔ me asu wɔ afe 1942 mu wɔ Winnipeg. Eduu afe 1943 no, na wɔayi bara a wɔabara Yehowa Adansefo wɔ Canada no afi hɔ, na asɛnka adwuma no nyaa nkɔso. Na Bible mu nokware no nso regye ntini kɛse wɔ me koma mu. Minyaa hokwan somee sɛ asafo mu ɔpanyin, na minyaa hokwan maa baguam kasa ahorow yɛɛ asasesin a wɔmfa nhyɛɛ obiara nsa mu adwuma. Nhyiam akɛse a mekɔe wɔ United States no boae kɛse ma minyaa honhom fam nkɔso.

Yehowa Som Adwuma Mu a Metrɛwee

Mede me ho hyɛɛ akwampae adwuma mu wɔ afe 1950 mu, na wɔtoo nsa frɛɛ me sɛ menkɔsom sɛ ɔmansin sohwɛfo wɔ saa afe no December mu. Minyaa hokwan nyaa me ntetee wɔ beae bi a ɛbɛn Toronto fii Charlie Hepworth, onua nokwafo bi a ɔwɔ osuahu hɔ. M’ani gyei nso sɛ minyaa hokwan gyee me ntetee no dapɛn a etwa to no fii me nua Alex, a na ɔwɔ ɔmansin adwuma no mu dedaw wɔ Winnipeg no hɔ.

Meda so ara kae me mansin nhyiam a edi kan a mekaa ho asɛm mfiase no. Sɛnea ɛte no, na midwen nea ebefi mu aba no ho. Yɛn ɔmantam sohwɛfo, Onua Jack Nathan, maa yɛn nyinaa nyaa dwumadi no mu kyɛfa na yɛn ani gyei. Yɛne wɔn a wobenya dwumadi no mu kyɛfa no bobɔɔ dwumadi no so. Yɛkaa osuahu ahorow, yɛɛ sɛnea wɔka nsɛm kyerɛ wɔ afie afie, sankɔhwɛ ahorow, ne sɛnea wɔyɛ ofie Bible adesua ahorow ho ɔyɛkyerɛ kyerɛe. Yɛtoo Ahenni nnwom. Na aduan wɔ hɔ pii. Ɛkame ayɛ sɛ nnɔnhwerew abien biara na yɛnom kɔfe di atoduan. Ebinom dedaa benkyi ne asɛnka agua no so, na afoforo daa fam. Eduu Kwasida no na sukyerɛmma no ano abrɛ ase kakra ma enti yenyaa nnipa 96 ma wobetiee  baguam kasa no. Osuahu no ma misuaa sɛnea wogyina tebea ahorow a ano yɛ den ano.

Me mansin dwumadi a edi hɔ no de me kɔɔ Alberta, British Columbia atifi fam, ne Yukon Territory, asase a owia bɔ wɔ so ɔdasum no. Akwan a mitu faa Alaska Highway fi Dawson Creek, British Columbia, kɔ Whitehorse, Yukon (ɔkwan a ne tenten yɛ kilomita 1,477), a ɛyɛ mmonkyemmɔnka no so fa ne adansedi gye boasetɔ ne ahwɛyiye. Na sukyerɛma a edwiriw gu, mmepɔw a ɛso yɛ toro, ne sukyerɛma a ɛretɔ a ɛmma wunhu ade yiye no yɛ asɛnnennen ankasa.

Nea ɛyɛe a nokware no duu Atifi fam Tɔnn hɔ no maa me ho dwiriw me. Bere bi me ne Walter Lewkowicz kɔɔ ofie ketewaa bi a ɛbɛn Lower Post, British Columbia, a ɛda Alaska Highway a ɛbɛn Yukon Territory hye so no mu. Na yenim sɛ obi hyɛ ofie no mu efisɛ yetumi hwɛɛ mfɛnsere ketewaa bi mu hui sɛ kanea ketewaa bi bobɔ n’ani. Na abɔ bɛyɛ anwummere nnɔnkron, na yɛbɔɔ ɔpon no mu. Ɔbarima bi teɛɛm sɛ yɛmmra mu, enti yɛkɔɔ mu. Hwɛ sɛnea yɛn ho dwiriw yɛn bere a yehui sɛ akwakoraa bi da ne mpa so rekenkan Ɔwɛn-Aban nsɛmma nhoma no! Nokwarem no, na ɔwɔ nea aba foforo koraa sen nea na yɛde rema no. Ɔkyerɛkyerɛɛ mu sɛ wimhyɛn na ɛde ne de no ba. Esiane sɛ na yɛafi yɛn asafo mu nnawɔtwe saa bere yi nti, na yennyaa nsɛmma nhoma a aba foforo no bi. Ɔbarima no daa ne ho adi sɛ wɔfrɛ no Fred Berg, na ɛwom sɛ na wakra nsɛmma nhoma no mfirihyia pii de, nanso na eyi ne nea edi kan a Yehowa Adansefo asra no. Fred ma yɛdaa ne fie anadwo no. Yetumi kaa Kyerɛwnsɛm mu nokware ahorow pii kyerɛɛ no, na yɛyɛɛ nhyehyɛe maa Adansefo foforo a wɔtaa fa mpɔtam hɔ bɛsraa no daa.

Mede mfirihyia pii somee wɔ amansin nketewa abiɛsa mu. Na ɛtrɛw fi Grande Prairie, Alberta, a ɛwɔ apuei fam kosi Kodiak, Alaska, a ɛwɔ atɔe fam, a ne tenten bɛyɛ kilomita 3,500.

Ɛyɛ anigye sɛ mihui sɛ Yehowa ayamye wɔ hɔ ma nnipa nyinaa wɔ mmeae a atew ne ho ne baabiara, na Onyankopɔn honhom kanyan  wɔn a wɔpɛ daa nkwa no adwene ne wɔn koma. Ná onipa biako a ɔte saa ne Henry Lepine a ofi Dawson City, Yukon, a mprempren wɔfrɛ hɔ Dawson no. Ná Henry te baabi a atew ne ho. Nokwarem no, na watra baabi a wotu sika kɔkɔɔ no bɛboro mfirihyia 60 a na ontuu kwan da. Nanso, Yehowa honhom kanyan ɔbarima a wadi mfirihyia 84 yi ma otwaa kwan a ne tenten bɛboro kilomita 1,600 kɔɔ ɔmansin nhyiam wɔ Anchorage, ɛwom sɛ na ɔnkɔɔ asafo nhyiam da de. N’ani gyee dwumadi no ho, na odii fekubɔ no ho ahurusi. Bere a Henry san kɔɔ Dawson City no, odii nokware kosii sɛ owui. Nnipa pii a na wonim Henry no susuw ho sɛ dɛn na ɛkanyan akwakoraa yi ma otwaa kwantenten a ɛte saa no. Eyi a na wɔn a wɔn mfe akɔ anim no repɛ ahu no maa wɔn mu kakra gyee nokware no. Enti ɔkwan bi so no, Henry tumi dii adanse pa.

Minyaa Yehowa Dom

Wɔ afe 1955 mu no, m’ani gyei sɛ wɔtoo nsa frɛɛ me sɛ menkɔ Ɔwɛn Aban Gilead Bible Sukuu adesuakuw a ɛto so 26 no bi. Saa ntetee yi hyɛɛ me gyidi den, na ɛboaa me ma mebɛn Yehowa yiye. Miwiei no, wɔmaa me kɔtoaa ɔmansin adwuma no so wɔ Canada.

Mesomee Ontario mantam no mu bɛyɛ afe biako. Afei wɔsan de me kɔɔ Atifi fam a ɛhɔ yɛ fɛ no. Meda so ara tumi yɛ atempɔn a ɛdeda atare a ani tew ne kar mu a mete nam mmepɔw a sukyerɛmma wowɔ atifi no ho mfonini wɔ m’adwene mu. Sɛ edu ahohuru bere a, abon ne sare no so nhwiren no yɛ fɛ yiye. Mframa no mu tew na nsu no ani yɛ kurennyenn. Asisi, mpataku, atorɔm, ne wuram mmoa foforo kyinkyin wɔn atrae a obiara nhaw wɔn.

Nanso, nsɛnnennen wɔ Alaska—ɛnyɛ wim tebea a ɛsakrasakra no nko na mmom akwan atenten no nso. Na me mansin no tenten yɛ kilomita 3,200 fi apuei fam kosi atɔe fam. Saa bere no, na wɔmma ɔmansin sohwɛfo biara kar. Ɛhɔnom anuanom no ankasa na na wotu wɔn ho ma de wɔn kar fa me fi asafo biako mu kɔ foforo mu. Nanso, ɛtɔ mmere bi a, na ɛsɛ sɛ mesrɛ lɔre anaa nsrahwɛfo bi kar tra mu.

Biribi a ɛte saa sii wɔ Alaska Highway no so wɔ Tok Junction, Alaska, ne Mile 1202, anaa Scotty Creek mpɔtam hɔ. Na ɔkwan a ɛda mmeae abien a aban adwumayɛfo a wogyigye amantow wɔ ntam no yɛ kilomita 160. Mitwaa United States towgyefo no ho wɔ Tok, na minyaa kar kɔɔ m’anim bɛyɛ kilomita 50. Na ɛno akyi no, kar biara amma, na menantewee bɛyɛ nnɔnhwerew du twaa kilomita 40. Akyiri yi na mibehui sɛ bere a mitwaa towgyefo no ho no na wɔhyɛe sɛ kar biara mfa kwan no so efisɛ sukyerɛmma adwiriw agu wɔ baabi a na ɛbɛn towgyefo no. Eduu ɔdasum no na ewim ayɛ nwini ma adu bɛyɛ digrii Celsius -23, na na aka me bɛyɛ kilomita 80 a metwa ansa na madu baabi a ɛbɛn sen biara a mɛda. Na me ho pere me sɛ menya baabi ahyɛ atumi agye m’ahome.

Bere a meretɔ gu so kɔ no, mihuu kar bi a wɔagyaw asi ɔkwan no nkyɛn, a na sukyerɛmma akata ne fã bi. Misusuwii sɛ sɛ mitumi kɔ mu kɔda emu nkongua tofoo no so a metumi agyina anadwo awɔw no ano. Mitumi piaa sukyerɛmma  no pii fii ho buee ɔpon no, nanso na wɔatutu mu nkongua no ma ato dade. Anigyesɛm ne sɛ, mihuu ɔdan bi wɔ ɔkwan no so a na enni akyiri koraa. Bere a mebrɛɛ kakra no, mitumi kɔɔ mu sɔɔ ogya, na mitumi gyee m’ahome nnɔnhwerew kakra. Ade kyee anɔpa no, mitumi nyaa kar kɔɔ ahɔhotrabea a ɛbɛn hɔ no konyaa aduan a na mihia yiye no, na mekyekyeree me nsateaa a na ɛho atwitwa no.

Yehowa Ma Enyin Wɔ Atifi Fam

Ná me nsrahwɛ a edi kan wɔ Fairbanks no hyɛ nkuran yiye. Yɛn asɛnka adwuma sow aba yiye, na nnipa bɛyɛ 50 betiee baguam kasa saa Kwasida no. Yehyiae wɔ asɛmpatrɛwfo fie ketewa bi a na Vernor ne Lorraine Davis te no mu. Na nkurɔfo atwetwe wɔn kɔn fi gyaade, pia mu, ne abrannaa so retie ɔkasa no. Sɛnea nnipa bae no ma yehui sɛ sɛ Ahenni Asa ba Fairbanks a, asɛnka adwuma no betim wɔ hɔ. Enti ɛdenam Yehowa mmoa so no, yɛtɔɔ ɔdan kɛse bi a na anka ɛyɛ asa a wɔsaw wɔ so tutu kosii asase bi a ɛfata so. Yetuu abura, na yɛhyehyɛɛ aguaree ne baabi a wɔsɔ ogya to. Afe biako mu no, na yɛanya Ahenni Asa wɔ Fairbanks a yɛde di dwuma. Bere a yɛde gyaade kaa ho no, yɛyɛɛ ɔmantam nhyiam wɔ asa no so wɔ afe 1958 mu, nnipa 330 na wɔbae.

Wɔ afe 1960 ahohuru bere mu no mede kar twaa kwantenten kɔɔ Yehowa Adansefo adwumayɛbea ti wɔ New York kogyee ntetee a wɔde maa ahwɛfo akwantufo nyinaa a wɔwɔ United States ne Canada no bi. Bere a mewɔ hɔ no, Onua Nathan Knorr ne anuanom foforo a asɛyɛde hyehyɛ wɔn nsa no bisabisaa me nsɛm faa baa dwumadibea a yebetumi abue wɔ Alaska no ho. Asram kakra akyi no, yɛn ani gyei sɛ yɛtee sɛ Alaska benya n’ankasa baa dwumadibea wɔ September 1, 1961 mu. Wɔmaa Onua Andrew K. Wagner bɛhwɛɛ baa dwumadibea hɔ adwuma no so. Na ɔne ne yere Vera, asom wɔ Brooklyn mfirihyia 20, na na wɔayɛ akwantu adwuma no nso bi pɛn. Yɛn ani sɔɔ Alaska baa dwumadibea no a wɔhyehyɛe no, efisɛ ɛtew kwan a na ɔmansin sohwɛfo no twa no so, na ɛma otumi de n’adwene sii asafo ahorow no ne akuw a na ɛwowɔ nsase a atew ne ho so ahiade pɔtee so.

Afe 1962 ahohuru bere yɛɛ anigye bere wɔ Atifi fam. Wobuee Alaska baa dwumadibea no ano, na wɔyɛɛ ɔmantam nhyiam wɔ Juneau, Alaska. Wosisii Ahenni Asa wɔ Juneau ne Whitehorse, Yukon, na wɔtetee akuw a atew ne ho pii nso.

Mesan Baa Canada

Mfirihyia pii a abɛsen kɔ no, na me ne Margareta Petras a ofi Canada di nkrataakyerɛw. Reta, sɛnea na wɔfrɛ no bere nyinaa no, fii akwampae som adwuma ase wɔ afe 1947 mu, na owiee Gilead wɔ afe 1955 mu, na na ɔreyɛ akwampae adwuma wɔ Canada apuei fam. Meka kyerɛɛ no sɛ mɛware no, na ɔpenee so. Yɛwaree wɔ Whitehorse wɔ February 1963 mu. Saa afe no otwabere mu no, wɔmaa me kɔyɛɛ ɔmansin adwuma wɔ Canada atɔe fam, na yɛde anigye somee wɔ hɔ mfirihyia 25 a edii hɔ no.

Esiane yare nti, wɔ afe 1988 mu no, wɔma yɛkɔyɛɛ akwampaefo atitiriw adwuma wɔ Winnipeg, Manitoba. Nea na ɛka eyi ho ne Nhyiam Asa bi so a yɛhwɛe bɛyɛ mfirihyia anum no. Yɛda so ara yɛ asuafoyɛ adwuma a ɛyɛ anigye no sɛnea yɛn ahoɔden betumi. Wɔ ɔmansin adwuma no mu no, yefii Bible adesua pii ase maa afoforo toaa so. Mprempren, ɛdenam Yehowa dom so no, yefi ase na yenya anigye foforo sɛ yɛhwɛ ma asuafo no nya nkɔso hyira wɔn ho so gye asubɔ.

Migye di sɛ Yehowa som ne asetra kwan a eye sen biara. Mfaso wɔ so na abotɔyam wom, na ɛma ɔdɔ a yɛwɔ ma Yehowa no mu yɛ den da biara. Eyi na ɛma yenya nokware anigye no. Teokrase dwumadi biara a ɛhyɛ yɛn nsa, baabiara a yɛwɔ wɔ asase so no, yɛne odwontofo a ɔkaa eyi no yɛ adwene sɛ: “[Nhyira, NW] ne ɔman a wɔte sɛɛ, nhyira ne ɔman a [Yehowa, NW] ne wɔn Nyankopɔn.”—Dwom 144:15.

[Mfonini wɔ kratafa 24, 25]

Wɔ ɔmansin adwuma no mu

[Mfonini wɔ kratafa 25]

Yɛkɔsraa Henry Lepine wɔ Dawson City. Me na migyina benkum no

[Mfonini wɔ kratafa 26]

Ahenni Asa a edi kan wɔ Anchorage

[Mfonini wɔ kratafa 26]

Me ne Reta, 1998