Ohia Ano Aduru Koraa a Wobenya

WƆ AWERƐHOSƐM a ɛfa ohia ho a wɔte fi wiase nyinaa akyi no, ebinom wɔ hɔ a wɔwɔ anidaso sɛ wobetumi ayɛ biribi pɔtee wɔ ho. Sɛ nhwɛso no, sɛnea Manila Bulletin no mu asɛmti bi kyerɛ no, Asia Nkɔsodwuma Sikakorabea no bɔɔ amanneɛ sɛ “Asia betumi atu ohia ase wɔ mfe 25 mu.” Sikakorabea no kamfoo sikasɛm mu nkɔso kyerɛe sɛ ɛne ɔkwan a wɔbɛfa so ama nkurɔfo agyae ohia buroburoo di.

Ahyehyɛde ne nniso afoforo de nyansahyɛ ne nhyehyɛe pii ama de abɔ mmɔden sɛ wɔde bedi ɔhaw no ho dwuma. Eyi mu bi ne: asetram ahyiakwa ho sika nhyehyɛe, nhomasua a etu mpɔn, ɛka a aman a afei na wɔrenya nkɔso de aman a wɔanya nkɔso wɔ mfiridwuma mu a wobetwam, aguadi mu akwanside a wobeyi afi hɔ na ama aman a ahiafo dɔɔso wom atumi atɔn wɔn aguade a wɔmmrɛ, ne adan a ne bo nyɛ den a wobesisi ama ahiafo.

Wɔ afe 2000 mu no, Amanaman Nkabom Bagua Kɛse no de botae horow a wobedu ho wɔ 2015 mu sisii hɔ. Eyi mu bi ne ohia buroburoo ne ɔkɔm a wobetu ase ne aman ahorow mu akatua a wɔbɛma ayɛ pɛ. Nanso, ɛmfa ho sɛnea ebia saa botae horow no korɔn kɛse no, nnipa pii nnye nni sɛ wobetumi adu ho wɔ wiase a emu apaapae yi mu.

 Nneɛma Pa a Wɔbɛyɛ De Adi Ohia Ho Dwuma

Esiane sɛ anidaso a wɔwɔ sɛ wɔbɛma tebea no ayɛ papa ankasa wɔ wiase nyinaa no sua nti, ɛhe na obi betumi akɔhwehwɛ mmoa? Sɛnea yɛaka dedaw no, baabi wɔ hɔ a nkurɔfo benya nyansa a ebetumi aboa wɔn nnɛ. Ɛyɛ he? Ɛyɛ Onyankopɔn Asɛm, Bible no.

Dɛn na ɛma Bible da nsow wɔ nhoma afoforo nyinaa ho? Efi obi a ɔwɔ tumi sen biara, yɛn Bɔfo no hɔ. Ɔde nyansa a ɛsom bo​—nnyinasosɛm a nnipa nyinaa betumi de adi dwuma wɔ baabiara ne bere biara mu aka emu nsɛm ho. Sɛ ahiafo de nnyinasosɛm ahorow yi di dwuma a, ɛbɛboa wɔn ma wɔanya asetra a akomatɔyam kɛse wom mpo nnɛ. Ma yɛnhwɛ ɛho nhwɛso kakra.

Nya sika ho adwene a ɛteɛ. Bible ka sɛ: “Na nyansa onwini ase tra te sɛ sika onwini ase tra, na nimdeɛ yɛ mfaso, na nyansa gye ne wura nkwa.” (Ɔsɛnkafo 7:​12) Dɛn na ɛkyerɛ? Ɛnyɛ biribiara na sika betumi ayɛ. Nokwarem no, ɛma yenya ahobammɔ bi. Ɛma yetumi totɔ nneɛma bi a yehia, nanso ɛnyɛ biribiara na etumi yɛ. Nneɛma a ɛsom bo kɛse wɔ hɔ a sika ntumi ntɔ. Nokwasɛm yi a yebehu no bɛboa yɛn ma yɛanya honam fam nneɛma ho adwene a ɛkari pɛ, na ama yɛakwati abasamtu a wɔn a wɔde wɔn asetra nyinaa boaboa sika ano hyia no. Sika ntumi ntɔ nkwa, nanso nyansa a yɛde bɛyɛ ade no betumi abɔ yɛn nkwa ho ban nnɛ na abue hokwan ma yɛanya nkwa a enni awiei mpo.

Nni mmoro nea wunya. Nneɛma a yɛpɛ no nyɛ nea yehia ankasa. Ɛsɛ sɛ yɛde nea yehia di kan. Ɛyɛ mmerɛw sɛ yebegye adi sɛ yehia biribi, bere a nokwarem no, ɛyɛ biribi a yɛpɛ na ɛnyɛ nea yehia. Onyansafo bedi kan de akatua a onya no adi nneɛma a ohia ntɛm ara​—aduan, ntade, dabere, ne nea ɛkeka ho no ho dwuma. Afei, ansa na ɔbɛtɔ biribi foforo no, ɔbɛhwɛ ahu sɛ sika a aka no betumi atɔ nneɛma foforo anaa. Wɔ Yesu mfatoho ahorow no biako mu no, ɔkamfo kyerɛe sɛ ɛsɛ sɛ onipa no ‘tra ase bu ho akontaa ansa.’​—Luka 14:28.

Wɔ Philippines no, na ɛyɛ den ma Eufrosina, ɔwofo bi a onni ɔhokafo a ɔwɔ mma baasa no sɛ obenya nea wɔde bɛhwɛ wɔn ho de ne sika adi dwuma nyansam, efi bere a ne kunu gyaw no hɔ mfe bi ni no. Wɔ saayɛ mu no, watete ne mma no ma wɔahu nneɛma a ɛsɛ sɛ wɔde di kan wɔ wɔn sikasɛm nhyehyɛe mu. Sɛ nhwɛso no, ebia na mmofra no ahu biribi a wɔpɛ. Sɛ anka ɔbɛka sɛ ɔremfa mma wɔn no, ɔne wɔn susuw ho denam eyi a ɔka so: “Sɛ mopɛ a, metumi de ama mo, nanso ɛsɛ sɛ musi gyinae. Sika a yɛwɔ no betumi atɔ ade biako pɛ. Yebetumi de atɔ ade a mopɛ yi anaa yebetumi de atɔ nam kakra ne atosode de aka yɛn mo a yebedi dapɛn yi ho. Afei, nea ɛwɔ he na mopɛ? Munsi gyinae.” Mpɛn pii no mmofra no te ase ntɛm ara, na wɔpene so sɛ wɔbɛpɛ sɛ wonya aduan no mmom sen biribi foforo biara.

Ma w’ani nsɔ nea wowɔ. Bible nnyinasosɛm foforo ka sɛ: “Sɛ yɛwɔ nnuan ne nea yɛde kata yɛn ho a, momma ɛno ara nnɔɔ yɛn so.” (1 Timoteo 6:8) Sika ankasa mfa anigye mma. Adefo pii nni anigye, nanso ahiafo pii wɔ anigye kɛse. Ahiafo yi asua sɛ wɔbɛma wɔn ani asɔ  nneɛma a ne bo nyɛ den a wohia wɔ asetra mu no. Yesu kae sɛ ɛsɛ sɛ yenya ‘aniwa a eye’ a yɛde si nneɛma a ɛho hia kɛse so. (Mateo 6:​22) Eyi boa obi ma n’ani sɔ nea ɔwɔ. Ahiafo pii te nka sɛ wɔwɔ akomatɔyam kɛse efisɛ wɔne Onyankopɔn anya abusuabɔ pa na wɔwɔ abusua asetra a anigye wom​—nneɛma a yentumi mfa sika ntɔ.

Eyinom yɛ Bible mu nyansahyɛ ahorow a mfaso wɔ so a ebetumi aboa wɔn a wodi hia ma wɔagyina wɔn tebea no ano no mu kakraa bi pɛ. Pii wɔ hɔ. Sɛ nhwɛso no, kwati nneyɛe a ɛmfata te sɛ sigaretnom ne kyakyatow a ɛsɛe sika; hu nneɛma a ɛho hia kɛse wɔ asetra mu, titiriw honhom fam botae ahorow; wɔ baabi a adwuma ho yɛ na no, bɔ mmɔden yɛ nsaano dwuma anaa adwuma bi a afoforo hia. (Mmebusɛm 22:​29; 23:​21; Filipifo 1:​9-​11) Bible no kamfo kyerɛ sɛ fa ‘nyansa ne adwempa’ di dwuma efisɛ ‘ɛbɛyɛ nkwa ama wo.’​—Mmebusɛm 3:​21, 22.

Ɛwom sɛ Bible mu nyansahyɛ ahorow betumi ama wɔn a wɔreko atia ohia no anya ahotɔ bi de, nanso nsɛmmisa a ɛfa daakye ho da so ara wɔ hɔ. So ahiafo bɛkɔ so adi hia daa? So wobedi sɛnea wɔn a wɔyɛ adefo paa sen no wɔn a wodi hia buroburoo no ho dwuma? Ma yɛnhwehwɛ ano aduru a nnipa pii nnim no mu.

Bible no Ma Yenya Anidaso

Nnipa pii gye tom sɛ Bible no yɛ nhoma pa. Nanso, mpɛn pii no wonnim sɛ ɛka nsɛm pɔtee a ɛkyerɛ sɛ ɛrenkyɛ nsakrae akɛse bɛba no.

Onyankopɔn pɛ sɛ ɔyɛ ade de di adesamma haw ahorow a ohia ka ho, no ho dwuma. Esiane sɛ ada adi sɛ nnipa nniso horow ntumi nyɛ anaasɛ wɔmpɛ sɛ wɔyɛ nti, Onyankopɔn pɛ sɛ ɔde foforo si ananmu. Ɔkwan bɛn so? Bible ka pefee wɔ Daniel 2:​44 sɛ: “Ɔsoro Nyankopɔn bɛma ahenni a wɔrensɛe no da, na wɔrennyaw n’ahenni mma ɔman foforo bi so, na ebebubu ahenni horow no nyinaa ama asã, na ɛno de, ebegyina daa.”

Sɛ Onyankopɔn yi “ahenni horow” anaa nniso horow yi fi hɔ wie a, n’ankasa Sodifo a wapaw no no bedi hene. Saa Sodifo no nyɛ onipa na mmom obi a ɔwɔ tumi a ɔwɔ soro te sɛ Onyankopɔn ankasa, a obetumi ayɛ nsakrae ahorow a ehia no na wayi sen a ebinom sen afoforo nnɛ no afi hɔ no. Onyankopɔn apaw n’ankasa Ba sɛ ɔnyɛ eyi. (Asomafo no Nnwuma 17:​31) Dwom 72:​12-​14 ka nea Sodifo yi bɛyɛ sɛ: “Na obegye ohiani a osu frɛ no, ne ɔmanehunufo a onni boafo. Ɔbɛkora ɔbrɛfo ne ohiani so, na wagye ahiafo kra nkwa. Obegye wɔn kra afi nhyɛso ne atirimɔdensɛm mu, na wɔn mogya bo ayɛ den n’anim.” Anidaso a ɛyɛ nwonwa bɛn ara ni! Afei de yebenya ahotɔ! Onyankopɔn Sodifo a wapaw no no bedi ama ahiafo ne abrɛfo.

Wobedi ɔhaw ahorow pii a ohia de ba no ho dwuma saa bere no. Dwom 72:​16 ka sɛ: “Asase  no so aburofuw bedu mmepɔw atifi, ɛso aba bɛwosow sɛ Lebanon, na nkurow no asoa sɛ asase so wura.” Ɔkɔm, sika a wonni, ne nneɛma a wɔnhwɛ so yiye remma aduan ho nyɛ na.

Wobedi ɔhaw afoforo nso ho dwuma. Sɛ nhwɛso no, asase so nnipa bebree nni wɔn ankasa fie. Nanso, Onyankopɔn hyɛ bɔ sɛ: “Na wobesisi adan atra mu, na wɔayeyɛ bobe nturo adi mu aba. Wɔrensisi adan mma obi ntra mu, na wɔrennua mma obi nni, na me man nna bɛyɛ sɛ dua nna, na wɔn a mapaw wɔn yi bedi wɔn nsa ano adwuma.” (Yesaia 65:​21, 22) Obiara benya n’ankasa fie na wanya n’adwuma ho anigye. Enti, Onyankopɔn rehyɛ bɔ sɛ yebenya ohia ano aduru koraa. Nsonsonoe akɛse remma adefo ne ahiafo ntam, na nkurɔfo renhwehwɛ nea wobedi kɛkɛ.

Sɛ obi te Bible mu bɔhyɛ ahorow bere a edi kan a, ebia ɔbɛte nka sɛ ntease nnim. Nanso, Bible no mu a yɛhwehwɛ kɔ akyiri no kyerɛ sɛ Onyankopɔn bɔ ahorow a ɔhyɛe wɔ tete no abam. (Yesaia 55:​11) Enti ɛnyɛ asɛm no ne sɛ sɛ ebia ɛbɛba. Mmom no asɛmmisa no ankasa ne sɛ, Dɛn na ɛsɛ sɛ woyɛ na woanya so mfaso, sɛ ɛba a?

So Wobɛkɔ Hɔ Bi?

Esiane sɛ nniso no yɛ Onyankopɔn de nti, ɛsɛ sɛ yɛyɛ nnipa a Onyankopɔn begye yɛn atom sɛ ɔmamma wɔ saa nniso no ase. Onnyaw yɛn a ɔnkaa sɛnea yɛbɛfata no nkyerɛɛ yɛn. Ɔde akwankyerɛ ahorow ama wɔ Bible mu.

Sodifo a wɔapaw no, Onyankopɔn Ba no yɛ ɔtreneeni. (Yesaia 11:​3-5) Enti, wɔbɛhwɛ kwan sɛ wɔn a wobegye wɔn atom ama wɔn nkwa wɔ nniso yi ase no nso bɛyɛ atreneefo. Mmebusɛm 2:​21, 22 ka sɛ: “Na tẽefo na ɛbɛtra asase no so, na wɔn a wɔyɛ pɛ no na ɛbɛtra mu; na wobegu abɔnefo ase afi asase so na wɔatu nkontompofo afi so.”

So ɔkwan bi wɔ hɔ a yɛbɛfa so ahu sɛnea yebedu ahwehwɛde yi ho? Yiw, ebi wɔ hɔ. Sɛ wusua Bible no de emu akwankyerɛ ahorow di dwuma a, wubetumi afata na woanya daakye a ɛyɛ anigye. (Yohane 17:3) Yehowa Adansefo ani begye sɛ wɔbɛboa wo wɔ saa adesua no mu. Yɛto nsa frɛ wo sɛ fa hokwan yi di dwuma na ama woaka abusua a wɔrenni hia na wonsisi wɔn da no ho.

[Mfonini wɔ kratafa 5]

Eufrosina: “Sikasɛm ho nhyehyɛe a ɛyɛ katee boa m’abusua ma wonya nea wohia”

[Mfonini ahorow wɔ kratafa 6]

Yɛrentumi mfa sika ntɔ yɛne Onyankopɔn ntam abusuabɔ pa ne abusua asetra a anigye wom