Onyankopɔn Adwene Wɔ Awufo ho

ƆDƆFO bi wu yɛ ahometew ankasa. Adehwere, huammɔdi, ne ankonamyɛ nka a wɔbɛte no yɛ ade a wontumi nte ase. Awerɛhodi betumi ama obi ate nka sɛ onni boafo biara, efisɛ ɛmfa ho ahonyade dodow, tumi, anaa nkɛntɛnso biara a ɔwɔ no, obiara nni asase so a obetumi ama nea wawu no asan aba nkwa mu.

Nanso, yɛn Bɔfo no hwɛ ade wɔ ɔkwan foforo so. Sɛnea ɔde fam dɔte nwenee nnipa a wodi kan no, saa ara na obetumi nso abɔ onipa a wawu no foforo. Ne saa nti, Onyankopɔn betumi ahu awufo sɛ nea wɔte nkwa mu. Ɛdefa tete asomfo a wɔawuwu ho no, Yesu kae sɛ: “Wɔn nyinaa te ase ma [Onyankopɔn].”—Luka 20:38.

Bere a Yesu wɔ asase so no, wɔmaa no tumi a ɔde benyan awufo. (Yohane 5:21) Enti, na ɔwɔ adwene a N’agya wɔ wɔ wɔn a wowuu nokwaredi mu ho no bi. Sɛ nhwɛso no, bere a n’adamfo Lasaro wui no, Yesu ka kyerɛɛ n’asuafo no sɛ: “Merekɔ makonyan no.” (Yohane 11:11) Wɔ nnipa ani so no, na Lasaro awu, nanso wɔ Yehowa ne Yesu ani so no, na Lasaro ada.

Wɔ Yesu Ahenni nniso ase no, “owusɔre a wɔn a wɔteɛ ne wɔn a wɔnteɛ bɛsɔre” bɛba. (Asomafo no Nnwuma 24:15) Bere kɔ so no, wɔn a wobenyan wɔn no benya nkyerɛkyerɛ a efi Onyankopɔn nkyɛn na wɔanya daa nkwa wɔ asase so ho anidaso.—Yohane 5:28, 29.

Yiw, ɔdɔfo bi wu betumi de ahohia ne yawdi pii a ebetumi atra hɔ mfe pii aba. Nanso, sɛ yɛma adwene a Onyankopɔn wɔ wɔ awufo ho no tra yɛn adwenem a, ebetumi ama yɛn awerɛkyekye pii na ama yɛanya anidaso.—2 Korintofo 1:3, 4.