Yɛbɛnantew Yehowa Din Mu Akosi Daa!
Yɛbɛnantew Yehowa Din Mu Akosi Daa!
“Yɛbɛnantew [Yehowa, “NW”] yɛn Nyankopɔn din mu de akosi daa daa.”—MIKA 4:5.
1. Nsɛm bɛn na ɛwɔ Mika nkɔmhyɛ no ti 3 kosi 5 mu?
NÁ Yehowa wɔ biribi ka kyerɛ ne nkurɔfo, na ɔde Mika na edii dwuma sɛ ne diyifo. Ná ɛyɛ Onyankopɔn atirimpɔw sɛ ɔbɛyɛ ade atia nnebɔneyɛfo. Ná ɔrebɛtwe Israel aso wɔ n’ahonisom ho. Nanso, anigyesɛm ne sɛ, na Yehowa behyira wɔn a wɔnantew ne din mu no. Saa nsɛm yi na wɔkyerɛkyerɛ mu pefee wɔ Mika nkɔmhyɛ no ti 3 kosi 5 no mu.
2, 3. (a) Su bɛn na na ɛsɛ sɛ Israel akannifo no da no adi, nanso dɛn ankasa na na wɔreyɛ? (b) Ɔkwan bɛn so na wobɛkyerɛkyerɛ kasakoa a wɔde dii dwuma wɔ Mika 3:2, 3 no mu?
2 Onyankopɔn diyifo no kae sɛ: “Muntie ɛ, Yakob atitiriw ne Israel fi atemmufo, so ɛnyɛ mo na ɛsɛ sɛ muhu atemmu?” Yiw, ɛno ne adwuma a na ɛsɛ sɛ wɔyɛ, nanso dɛn ankasa na na wɔreyɛ? Mika kae sɛ: “Mo na motan papa na modɔ bɔne, mugua wɔn were fi wɔn ho, ne wɔn nam fi wɔn nnompe ho, na mo na moadi me man nam, na moaworɔw wɔn were afi wɔn ho, na moabubu wɔn nnompe mu, na moatwitwa no sɛ kutu mu ade, ne ɔsɛn mu nam.”—Mika 3:1-3.
3 Hwɛ, na akannifo no rehyɛ ahiafo a wonni aboafo no so! Wɔn a wotiee Mika no tee kasakoa a wɔde dii dwuma wɔ ha no ase ntɛm koraa. Sɛ wokum oguan na sɛ wɔrebɛnoa a, wodi kan worɔw ne were, na afei wotwitwa nam no. Ɛtɔ mmere bi a, wɔpaapae nnompe no mu na ama hon no afi adi. Wɔnoa nam no ne nnompe no nyinaa wɔ kutu kɛse mu, te sɛ nea Mika kaa ho asɛm no. (Hesekiel 24:3-5, 10) Ayayade a na nkurɔfo a wɔwɔ Mika bere so no rehu wɔ wɔn akannifo atirimɔdenfo nsam no ho mfatoho a ɛfata bɛn ara ni!
Yehowa Hwehwɛ sɛ Yebu Atɛntrenee
4. Abirabɔ bɛn na na ɛda Yehowa ne Israel akannifo no ntam?
4 Ná abirabɔ kɛse bi da Ɔhwɛfo a ɔwɔ dɔ, Yehowa, ne Israel akannifo no ntam. Esiane sɛ wɔamfa atɛntrenee anyɛ adwuma nti, wɔantumi anni wɔn asɛyɛde a ɛne sɛ wɔbɛbɔ nguankuw no ho ban no so. Mmom no, wofi pɛsɛmenkominya mu sisii sɛnkyerɛnne kwan so nguan no, buu wɔn ntɛnkyea na wɔmaa wɔde wɔn ho hyɛɛ “mogyahwiegu mu,” sɛnea yehu wɔ Mika 3:10 no. Dɛn na yebetumi asua afi saa tebea yi mu?
5. Dɛn na na Yehowa hwɛ kwan sɛ wɔn a wodi ne nkurɔfo anim no bɛyɛ?
5 Onyankopɔn hwɛ kwan sɛ wɔn a wodi ne nkurɔfo anim no bebu atɛntrenee. Eyi ne ade a yehu wɔ Yehowa asomfo mu nnɛ. Afei nso, eyi ne Yesaia 32:1 hyia, baabi a yɛkenkan sɛ: ‘Hwɛ, trenee so na ɔhene bi bedi hene, na asafohene nso, atɛntrenee so na wobedi asafohene.’ Nanso, dɛn na yehui wɔ Mika bere so? ‘Wɔn a wɔtan papa na wɔn ani gye bɔne ho’ no kɔɔ so kyeaa atemmu.
Henanom Mpaebɔ na Wotie?
6, 7. Asɛm a ɛho hia bɛn na wɔasi so dua wɔ Mika 3:4?
6 So na Mika bere so amumɔyɛfo no betumi ahwɛ kwan sɛ wobenya Yehowa anim dom? Dabida! Mika 3:4 ka sɛ: “Wobesu afrɛ [Yehowa, NW] na ɔremmua wɔn, na ɔde n’anim behintaw wɔn bere no mu, sɛnea wɔmaa wɔn nsɛnni yɛɛ bɔne no.” Eyi si asɛntitiriw bi so dua.
7 Sɛ yɛkɔ so yɛ bɔne a, Yehowa rentie yɛn mpaebɔ. Ɛno te saa titiriw bere a yɛyɛ nyaatwom, na yɛkata yɛn bɔne so boapa yɛ sɛnea yɛresom Onyankopɔn wɔ nokwaredi mu no. Sɛnea Dwom 26:4 kyerɛ no, Dawid too dwom sɛ: “Me ne nnipa huhuw antra, na me ne nyaatwomfo anhyia mu.” Ɛnde ɛbɛyɛ dɛn na Yehowa betie wɔn a wɔboapa bu N’asɛm so no mpaebɔ!
Onyankopɔn Honhom Hyɛɛ Wɔn Den
8. Dɛn na wɔbɔɔ Mika bere so adiyifo no kɔkɔ wɔ ho?
8 Nneyɛe bɔne bɛn na na abu so wɔ Israel akannifo mu sɛɛ yi! Atoro adiyifo maa Onyankopɔn nkurɔfo wɔɔ ntwɛtwɛdɛ wɔ honhom fam. Akannifo adifudepɛfo teɛɛm sɛ “Asomdwoe!” nanso nokwarem no, na wɔrenoa nea ɔmfa biribi nhyɛ wɔn anom no so sa. “Ne saa nti,” Yehowa kae sɛ, “ade bɛsa mo, mo anisoadehu ho, na esum aduru mo, mo nkɔmhyɛ ho, na owia bɛtɔ adiyifo no so, na adekyee adan wɔn so sum kabii; na adehufo no ani bewuwu, na nkɔmhyɛfo no anim asinsiam, na wɔn nyinaa bɛkatakata wɔn ano.”—Mika 3:5-7a.
9, 10. ‘Ano a wɔkata’ no kyerɛ dɛn, na dɛn nti na na ɛnsɛ sɛ Mika yɛ biribi a ɛte saa?
9 Dɛn nti na ‘wɔkatakataa wɔn ano’? Eyi yɛ biribi a na Mika bere sofo no yɛ esiane aniwu nti. Na ɛsɛ sɛ saa mmarima amumɔyɛfo yi ani wu. Na “Onyankopɔn mmuae bi nni hɔ” mma amumɔyɛfo no. (Mika 3:7b) Yehowa ntie ahantanfo amumɔyɛfo biara mpaebɔ.
10 Biribiara nni hɔ a na ɛbɛma Mika ‘akata n’ano.’ N’ani anwu. Yehowa tiee ne mpaebɔ. Hyɛ Mika 3:8 no nsow, faako a odiyifo nokwafo no kaa eyi no: “Me de, [Yehowa, NW] honhom mu tumi ne atemmu ne mmaninyɛ ahyɛ me ma.” Hwɛ aseda ara a Mika de mae sɛ wɔ bere tenten a ɔde nokwaredi yɛɛ ne som adwuma no nyinaa mu no, ‘Yehowa honhom mu tumi ma ɔyɛɛ mã’ bere nyinaa! Eyi ma onyaa ahoɔden a ‘ɔde bɛka Yakob mmarato ne Israel bɔne.’
11. Ɔkwan bɛn so na wɔhyɛ nnipa den ma wɔka Onyankopɔn asɛm no?
11 Ná Mika hia ahoɔden a ɛboro nnipa de so na ama watumi aka Onyankopɔn atemmu akyerɛ. Ná ohia Yehowa honhom. Na yɛn nso ɛ? Gye sɛ Yehowa de ne honhom kronkron no hyɛ yɛn den ansa na yɛatumi ayɛ yɛn asɛnka adwuma no. Sɛ yɛboapa kɔ so yɛ bɔne na yɛyɛ sɛ yɛbɛka asɛm no a, ɛbɛyɛ ɔkwa. Sɛ ɛba saa a Onyankopɔn ntumi ntie mpae a yɛbɔ hwehwɛ ahoɔden de ayɛ adwuma yi no. Akyinnye biara nni ho sɛ yɛrentumi nka yɛn soro Agya no atemmusɛm gye sɛ ‘Yehowa honhom’ wɔ yɛn so. Ɛdenam mpaebɔ a otie ne honhom kronkron no mmoa so no, yetumi de akokoduru ka Onyankopɔn asɛm te sɛ Mika.
12. Dɛn nti na Yesu tete asuafo no tumi ‘kɔɔ so de nnam nyinaa kaa Onyankopɔn asɛm no’?
12 Ebia wokae asɛm a ɛwɔ Asomafo no Nnwuma 4:23-31 no. Fa no sɛ woyɛ afeha a edi kan no mu Yesu asuafo no mu biako. Ataafo a wɔyɛ mpi ahwehwɛ sɛ wɔbɛma Kristo akyidifo no amua wɔn ano. Nanso saa anokwafo yi bɔ wɔn Amansan Hene no mpae sɛ: “[Yehowa, NW], hwɛ wɔn ateɛteɛ, na ma wo nkoa mfa nnam nyinaa nka w’asɛm.” Dɛn na efii mu bae? Bere a wɔbɔɔ mpae no, beae a wohyiae hɔ wosowee, na honhom kronkron hyɛɛ wɔn nyinaa mama, na wɔde nnam kaa Onyankopɔn asɛm. Enti ɛmmra sɛ yɛbɛdan akɔ Yehowa nkyɛn wɔ mpaebɔ mu, na yɛde yɛn ho ato ne honhom kronkron no mmoa so bere a yɛyɛ yɛn som adwuma no.
13. Dɛn na na ɛbɛba Yerusalem ne Samaria so, na dɛn ntia?
13 Susuw Mika bere no ho bio. Sɛnea Mika 3:9-12 kyerɛ no, na atumfoɔ a wodi mogya ho fɔ no gye adanmude ansa na wɔabu atɛn, na asɔfo gye akatua ansa na wɔakyerɛkyerɛ, na na atoro adiyifo gye sika ansa na wɔahyɛ nkɔm. Ɛnyɛ nwonwa sɛ na Onyankopɔn ahyɛ sɛ Yuda ahenkurow, Yerusalem, ‘bɛdan abo akuwakuw’! Esiane sɛ atoro som ne dwowtwa buu so wɔ Israel nso nti, wɔde honhom kaa Mika ma ɔbɔɔ kɔkɔ sɛ Onyankopɔn bɛma Samaria ayɛ “abokuw.” (Mika 1:6) Nokwarem no, odiyifo no traa ase huu ɔsɛe a wɔhyɛɛ ho nkɔm a Asiria asraafodɔm de baa Samaria so wɔ afe 740 A.Y.B. mu no. (2 Ahene 17:5, 6; 25:1-21) Ɛda adi sɛ Yehowa ahoɔden so nkutoo na na wɔnam betumi aka asɛm a tumi wom a na etia Yerusalem ne Samaria no.
14. Ɔkwan bɛn so na nkɔmhyɛ a wɔyɛɛ ho kyerɛwtohɔ wɔ Mika 3:12 no nyaa ne mmamu, na ɔkwan bɛn so na ɛsɛ sɛ ɛka yɛn?
14 Akyinnye biara nni ho sɛ na Yuda ntumi nkwati Yehowa atemmu. Nea ɛbɛyɛ na nkɔmhyɛ a ɛwɔ Mika 3:12 anya mmamu no, “wɔbɛfɛntɛm” Sion “sɛ afuw.” Yehu wɔ yɛn afeha a ɛto so 21 yi mu sɛ nneɛma yi sisii bere a Babilon sɛee Yuda ne Yerusalem wɔ afe 607 A.Y.B. mu no. Eyi sii wɔ Mika nkɔmhyɛ no akyi mfe pii, nanso na ɔwɔ ahotoso sɛ ɛbɛbam. Enti ɛsɛ sɛ yenya ahotoso sɛ mprempren nneɛma nhyehyɛe bɔne yi bɛba awiei ɔkwan biara so wɔ ‘Yehowa da’ a wɔaka ho asɛm asie no mu.—2 Petro 3:11, 12.
Yehowa Toto Nneɛma
15. Ɔkwan bɛn so na wode w’ankasa nsɛm bɛkyerɛkyerɛ nkɔmhyɛ a wɔayɛ ho kyerɛwtohɔ wɔ Mika 4:1-4 no mu?
15 Sɛ yɛhwɛ yɛn akyi a, yehu sɛ Mika san kaa anidaso asɛm bi a ɛyɛ anigye. Nsɛm a ɛma abotɔyam bɛn ara na yehu wɔ Mika 4:1-4 sɛɛ yi! Mika kae sɛ: ‘Nna a edi akyiri no mu no, Yehowa fi bepɔw no betim hɔ ataa mmepɔw atifi, na wɔama so asen nkoko nyinaa, na aman asen yuu aba so. Na obebu aman pii mu atɛn, na waka aman akɛse a ɛwɔ akyirikyiri no anim, na wɔde wɔn mfoa abobɔ nsɔw, na wɔde wɔn mpeaw ayeyɛ nnare; ɔman bi remmã afoa so nhyɛ ɔman bi, na wɔrensua akodi bio. Na wɔbɛtratra wɔn bobe ne wɔn borɔdɔma ase, na obi bi renyi wɔn hu, efisɛ asafo Yehowa ano na aka.’
16, 17. Ɔkwan bɛn so na Mika 4:1-4 renya mmamu nnɛ?
16 Henanom ne “aman pii” ne “aman akɛse” a wɔbɔɔ wɔn din wɔ ha no? Ɛnyɛ wiase yi aman ne nniso ahorow no. Mmom no, nkɔmhyɛ no fa ankorankoro a wofi amanaman nyinaa mu adan aba ɔsom kronn a biakoyɛ wom wɔ Yehowa bepɔw a ɛyɛ nokware som mu no ho.
17 Nea ɛne Mika nkɔmhyɛ no hyia no, ɛrenkyɛ Yehowa som a ɛho tew begye ntini wɔ asase nyinaa so. Ɛnnɛ, wɔrekyerɛkyerɛ ‘wɔn a wɔpɛ daa nkwa’ no wɔ Yehowa akwan so. (Asomafo no Nnwuma 13:48) Yehowa rebu atɛn, na ɔretoto nneɛma wɔ honhom fam ama wɔn a wogyina Ahenni no afã no. Wobenya wɔn ti adidi mu wɔ “ahohia kɛse” no mu sɛ “nnipakuw kɛse” no fã. (Adiyisɛm 7:9, 14) Esiane sɛ wɔde wɔn nkrante abobɔ nsɔw nti, ɛnnɛ mpo wɔne wɔn mfɛfo Yehowa Adansefo ne afoforo tra asomdwoe mu. Hwɛ sɛnea ɛbɛyɛ anigye sɛ wobɛka wɔn ho!
Wɔasi Wɔn Bo sɛ Wɔbɛnantew Yehowa Din Mu
18. Dɛn na ‘obi bobe ne ne borɔdɔma ase a ɔbɛtra no’ kyerɛ?
18 Wɔ yɛn bere yi so a ehu akata asase so sɛ mununkum no, yɛn ani gye sɛ nnipa pii resua Yehowa akwan. Yɛn ani gyina sɛ yebehu bere a abɛn pɛɛ a Onyankopɔn adɔfo nyinaa rensua akodi bio, na wɔbɛtratra wɔn bobe ne wɔn borɔdɔma ase nso no. Wɔtaa dua borɔdɔma wɔ bobe nturo mu. (Luka 13:6) Obi bobe ne ne borɔdɔma ase a ɔbɛtra no kyerɛ tebea ahorow a asomdwoe, yiyedi, ne ahobammɔ wom. Mprempren mpo, abusuabɔ a yɛne Yehowa wɔ no ma yenya asomdwoe ne honhom fam ahobammɔ. Sɛ tebea a ɛte saa kɔ so wɔ Ahenni nniso ase a, yɛrensuro biribiara na yebenya ahobammɔ daa.
19. Yehowa din mu a yɛbɛnantew no kyerɛ dɛn?
19 Sɛ yebenya Onyankopɔn anim dom ne ne nhyira a, ɛsɛ sɛ yɛnantew Yehowa din mu. Wɔda eyi adi wɔ ɔkwan a tumi wom so wɔ Mika 4:5, baabi a odiyifo no kaa eyi no: “Aman no mu biara nantew ne nyame din mu, na yɛn de, yɛbɛnantew [Yehowa, NW] yɛn Nyankopɔn din mu de akosi daa daa.” Yehowa din mu a yɛbɛnantew no nkyerɛ ka a yɛbɛka kɛkɛ sɛ ɔne yɛn Nyankopɔn. Ɛhwehwɛ pii sen Kristofo nhyiam ahorow a yɛbɛkɔ ne Ahenni asɛnka adwuma no mu kyɛfa a yebenya, ɛwom sɛ saa nnwuma no nso ho hia de. Sɛ yɛrenantew Yehowa din mu a, na yɛahyira yɛn ho so ama no a yɛrebɔ mmɔden afi ɔkra nyinaa mu adɔ no asom no nokwaredi mu. (Mateo 22:37) Na sɛ́ ne nokware asomfo no, akyinnye biara nni ho sɛ yɛasi yɛn bo sɛ yɛbɛnantew Yehowa, yɛn Nyankopɔn, din mu daa daa.
20. Dɛn na wɔka siei wɔ Mika 4:6-13?
20 Afei momma yensusuw nkɔmhyɛ nsɛm a ɛwɔ Mika 4:6-13 no ho nhwɛ. Na ɛsɛ sɛ “Sion babea” kɔ nnommumfa mu wɔ “Babel tɔnn.” Saa pɛpɛɛpɛ na ɛtoo Yerusalemfo wɔ afeha a ɛto so ason A.Y.B. mu no. Nanso, Mika nkɔmhyɛ no kyerɛe sɛ nkaefo bi bɛsan aba Yuda, na bere a Yehowa san siesie Sion no, ɔbɛhwɛ ahu sɛ wɔayam n’atamfo.
21, 22. Ɔkwan bɛn so na Mika 5:2 nyaa mmamu?
21 Wɔhyɛɛ nsɛm akɛse foforo a ebesisi ho nkɔm wɔ Mika ti 5. Sɛ nhwɛso no, hyɛ nea wɔkae wɔ Mika 5:2-4 no nsow. Mika hyɛɛ nkɔm sɛ Onyankopɔn Sodifo a wapaw no—nea “n’adifi fi tete nteredee”—befi Betlehem aba. Obedi tumi sɛ ɔhwɛfo ‘wɔ Yehowa ahoɔden mu.’ Afei nso, saa Sodifo yi bɛyɛ kɛse, ɛnyɛ Israel nko, na mmom ‘akosi asase ano nohoa.’ Onii ko a ɔbɛyɛ no bɛma wiase nyinaa ho adwiriw wɔn, nanso yɛn de, yɛn ho rennwiriw yɛn.
22 Hena ne onipa a ɔsen biara a wɔwoo no Betlehem no? Na hena na ‘ɔbɛyɛ kɛse akosi asase ano nohoa no’? Ɛnyɛ obiara sɛ Mesia, Yesu Kristo! Bere a Herode Ɔkɛseɛ no bisaa asɔfo mpanyin ne akyerɛwfo no faako a wɔbɛwo Mesia no, wobuae sɛ: “Betlehem, a ɛwɔ Yudea.” Wɔfaa nsɛm a ɛwɔ Mika 5:2 no mpo kae. (Mateo 2:3-6) Ná nnipa mpapahwekwa no bi nso nim eyi, efisɛ Yohane 7:42 ka sɛ wɔkae sɛ: “Kyerɛwnsɛm no anka sɛ Dawid asefo mu ne Betlehem a Dawid traa hɔ no mu na Kristo no befi?”
Nokware Home Ma Nkurɔfo No
23. Dɛn na ɛrekɔ so wɔ Mika 5:7 mmamu ho?
23 Mika 5:5-15 kyerɛe sɛ nkonim a Asiriafo bedi wɔ wɔn ntua mu no bɛyɛ bere tiaa bi pɛ, na ɛdaa no adi sɛ Onyankopɔn bedi were wɔ amanaman a wontie no no so. Mika 5:7 hyɛɛ bɔ sɛ wɔbɛsan de Yudafo nkaefo a wɔanu wɔn ho aba wɔn man mu, nanso saa nsɛm yi fa yɛn bere yi ho nso. Mika kae sɛ: “Yakob nkae no bɛyɛ aman bebree mu sɛ obosu a efi [Yehowa, NW] nkyɛn, sɛ nhabamma so nsuwɔnsea.” Ɔde sɛnkyerɛnne kwan so adeyɛ a ɛfata yi hyɛɛ nkɔm sɛ honhom fam Yakob, anaa Israel nkaefo no bɛyɛ Onyankopɔn nhyira a ɔde ama nkurɔfo no. Yesu “nguan foforo” a wɔwɔ asase so anidaso no ani gye sɛ wɔne nnɛyi “Nyankopɔn Israel” nkaefo no de biakoyɛ resom, na wɔboa ma wɔma afoforo nya ɔhome honhom fam. (Yohane 10:16; Galatifo 6:16; Sefania 3:9) Ɛdefa eyi ho no, biribi titiriw wɔ hɔ a ɛsɛ sɛ yesusuw ho. Sɛ́ Ahenni adawurubɔfo no, ɛsɛ sɛ yɛn nyinaa kyerɛ hokwan a yɛanya sɛ yɛbɛma afoforo anya nokware home no ho anisɔ.
24. Mika ti 3 kosi 5 no mu nsɛntitiriw bɛn na ahyɛ wo nkuran?
24 Dɛn na woanya afi Mika nkɔmhyɛ no ti 3 kosi 5 no mu? Ebia nsɛntitiriw te sɛ eyinom: (1) Onyankopɔn hwɛ kwan sɛ wɔn a wodi ne nkurɔfo anim no de atɛntrenee bedi dwuma. (2) Sɛ yɛboapa kɔ so yɛ bɔne a, Yehowa rentie yɛn mpaebɔ. (3) Gye sɛ Onyankopɔn nam ne honhom kronkron no so hyɛ yɛn den ansa na yɛatumi ayɛ yɛn asɛnka adwuma no. (4) Sɛ yebenya Onyankopɔn anim dom a, ɛsɛ sɛ yɛnantew Yehowa din mu. (5) Sɛ́ Ahenni adawurubɔfo no, ɛsɛ sɛ yɛkyerɛ hokwan a yɛanya sɛ yɛbɛma nkurɔfo anya nokware home no ho anisɔ. Ebia nsɛntitiriw foforo nso anya wo so nkɛntɛnso. Dɛn bio na yebetumi asua afi Bible nkɔmhyɛ nhoma yi mu? Asɛm a edi hɔ no bɛboa yɛn ma yɛanya asuade a edi mũ afi Mika nkɔmhyɛ a ɛhyɛ gyidi den no ti abien a etwa to no mu.
Wubebua Dɛn?
• Dɛn na Onyankopɔn hwehwɛ fi wɔn a wodi ne nkurɔfo anim no hɔ?
• Dɛn nti na mpaebɔ ne honhom kronkron ho hia wɔ ɔsom a yɛde ma Yehowa no mu?
• Ɔkwan bɛn so na nkurɔfo ‘nantew Yehowa din mu’?
[Adesua no ho Nsɛmmisa]
[Mfonini wɔ kratafa 15]
So wubetumi akyerɛkyerɛ Mika mfatoho a ɛfa ɔsɛn ho no mu?
[Mfonini ahorow wɔ kratafa 16]
Te sɛ Mika no, yɛde akokoduru yɛ yɛn som adwuma no