Mmoa Ankasa a Ɛwɔ Hɔ Ma Ahiafo

BERE a na Yesu Kristo, Onyankopɔn Ba no wɔ asase so no, ɔde yɛɛ n’ahiasɛm ankasa sɛ ɔbɛboa ahiafo. Obi a ohuu Yesu som adwuma no kaa ho asɛm sɛ: “Anifuraefo hu ade, na mmubuafo nantew, akwatafo ho fi, na asotifo te asɛm, awufo nyan, na wɔka asɛmpa kyerɛ ahiafo.” (Mateo 11:5) Nanso, ahiafo ɔpepem pii a wɔwɔ hɔ nnɛ no nso ɛ? So asɛmpa bi wɔ hɔ ma wɔn? Yiw, anidaso asɛm bi wɔ hɔ!

Ɛwom sɛ wɔtaa bu ani gu ahiafo so na werɛ fi wɔn wɔ wiase yi mu de, nanso Onyankopɔn Asɛm, Bible no, hyɛ bɔ sɛ: “Ɛnyɛ daa na ne werɛ befi ohiani, na abrɛfo anidaso ayera.” (Dwom 9:18) Saa awerɛkyekyesɛm yi benya ne mmamu bere a Onyankopɔn Ahenni, ɔsoro nniso ankasa no bɛba abesi nnipa nniso ananmu no. (Daniel 2:44) Yesu, sɛ́ saa ɔsoro nniso no Hene no, “ɔbɛkora ɔbrɛfo ne ohiani so, na wagye ahiafo kra nkwa. Obegye wɔn kra afi nhyɛso ne atirimɔdensɛm mu, na wɔn mogya bo ayɛ den n’anim.”—Dwom 72:13, 14.

Asetra bɛyɛ dɛn bere a Kristo di asase so no? Wɔn a wɔbɛtra Kristo wiase nniso no ase no bedi wɔn nsa ano adwuma. Bible ka wɔ Mika 4:3, 4 sɛ: “Wɔbɛtratra wɔn bobe ne wɔn borɔdɔma ase, na obi bi renyi wɔn hu, efisɛ asafo [Yehowa, NW] ano na aka.” Onyankopɔn Ahenni beyi ɔhaw a ɛne yare ne owu mpo afi hɔ. (Yesaia 25:8) Hwɛ sɛnea saa wiase no bɛyɛ soronko! Yebetumi anya Bible bɔhyɛ ahorow yi mu gyidi efisɛ Onyankopɔn ankasa na waka.

Anidaso asɛm a Bible de ma akyi no, ɛboa yɛn ma yegyina da biara da nsɛnnennen te sɛ ɔkwan a yɛbɛfa so adi obu a yenni mma yɛn ho, a ebia efi hia a ahia yɛn nti no ano. Kristoni a ahia no nam Bible sua so nim sɛ ɔsom bo wɔ Onyankopɔn anim te sɛ Kristoni a odi yiye ara pɛ. Bible mu nhoma a ɛne Hiob no ka sɛ Onyankopɔn ‘nhwɛ atitiriw anim, na ommu ɔdehye nsen ɔbrɛfo; efisɛ ne nsa ano adwuma ne wɔn nyinaa.’ (Hiob 34:19) Onyankopɔn dɔ wɔn baanu nyinaa.—Asomafo no Nnwuma 10:34, 35.