Bere a Bɔhyɛ Ahorow Ba Mu Ɔkwan Biara So

WƆ ABAKƆSƐM mu no, yehu bɔhyɛ pii a nnipa anni so. Mpɛn pii na amanaman anni asomdwoe apam ahorow a wɔahyɛ da de wɔn nsa ahyɛ ase no so, na eyi de wɔn manfo akɔhyɛ akodi a ɛyɛ hu mu. Napoleon kae bere bi sɛ: “Nniso horow no nni wɔn bɔhyɛ so gye sɛ wɔhyɛ wɔn anaasɛ wohu sɛ ɛsodi bɛba wɔn mfaso ansa.”

Na ɛbɔ a ankorankoro hyɛ nso ɛ? Sɛ obi anni ne bɔhyɛ so a, hwɛ huammɔdi ara a ɛyɛ! Sɛ ɔyɛ obi a wunim no na wugye no di a, ɛnde na asɛm no asɛe koraa. Ɛwom, ebia na nnipa no ntumi nni wɔn bɔhyɛ so anaa wɔmpɛ sɛ wɔbɛyɛ saa.

Hwɛ nsonsonoe a ɛda nnipa bɔhyɛ ne Onyankopɔn de ntam! Wotumi de ho to Onyankopɔn bɔhyɛ so koraa. Yebetumi de yɛn ho ato bɔ biara a Yehowa Nyankopɔn hyɛ no so. Ɛbɛbam wɔ ɔkwan biara so. Yesaia 55:11 twe adwene si Onyankopɔn anom asɛm a enni huammɔ da so sɛ: “Saa ara na m’asɛm a efi m’anom bɛyɛ: ɛrensan mma me nkyɛn kwa, gye sɛ ɛyɛ nea mepɛ na ewie nea enti a mesomae no.”

Enti ɛsɛ sɛ yebu Onyankopɔn bɔhyɛ ahorow a wɔakyerɛw ato hɔ wɔ Bible mu no dɛn? Yebetumi de yɛn ho ato so ampa. Sɛ́ nhwɛso no, ɔsomafo Yohane kyerɛwee sɛ: “Hwɛ, Onyankopɔn ntamadan wɔ nnipa mu, na ɔbɛtra mu wɔ wɔn mu, na wɔayɛ ne man, na Onyankopɔn ankasa ne wɔn bɛtra. Na ɔbɛpopa wɔn aniwam nusu nyinaa. Na owu nni hɔ bio, na awerɛhow ne osu ne ɛyaw bi nni hɔ bio, efisɛ kan nneɛma no atwam.” (Adiyisɛm 21:3, 4) Sɛ wudi Yesu nsɛm yi so a, wubetumi anya saa nhyira no mu anigye: “Na eyi ne daa nkwa, sɛ wobehu wo, nokware Nyankopɔn koro no, ne nea wosomaa no, Yesu Kristo no.”—Yohane 17:3.