Asetram Nsɛm

Yehowa Twe Ahobrɛasefo Ba Nokware No Mu

SƐNEA ASANO KOSHINO KA KYERƐE

Wɔ 1949 mu, bere a na Wiase Ko II baa awiei nkyɛe biara no, ɔhɔho bi a ɔyɛ tenten a na ɔwɔ adamfofa su bɛsraa abusua a na meyɛ adwuma ma wɔn wɔ Kobe Kuropɔn mu no. Ná ɔne Yehowa Dansefo ɔsɛmpatrɛwfo a odi kan koraa a waba Japan. Ne nsrahwɛ no na ebuee kwan maa mibehuu Bible mu nokware. Nanso ma minni kan nka me ho asɛm nkyerɛ wo.

WƆWOO me wɔ 1926 mu wɔ akuraa ketewa bi ase wɔ Okayama Mantam no atifi fam. Me na na metɔ mmofra baawɔtwe no so anum. Na Paapa ntoto ɔsom a ɔde ma yɛn hɔnom nyame a ɔwɔ Shinto asɔredan mu no ase koraa. Enti yɛn a na yɛyɛ mmofra no nyaa afahyɛ ne abusua nhyiam ahorow a na wɔyɛ no afe biara no mu anigye.

Bere a na merenyin no, na mewɔ asetram nsɛmmisa pii, nanso na owu ho asɛm haw me sen biara. Ná amammerɛ hwehwɛ sɛ nkurɔfo bewu wɔ fie, na wɔn mma begyina wɔn wupa ho agyam wɔn. Me werɛ howee yiye paa bere a me nanabea wui ne bere a me nuabarima a na onnya nnii afe biako mpo wui no. Ná misuro paa sɛ mesusuw m’awofo wu ho. ‘So nea asetra kyerɛ ara ni? Anaasɛ biribi foforo wɔ akyi?’ Na mepɛ sɛ mihu.

Bere a na mewɔ mfitiase sukuu afe a ɛto so asia wɔ 1937 mu no na China ne Japan Ko no fii ase. Wɔhyɛɛ mmarima de wɔn kɔɔ akono wɔ China. Sukuu mmofra teɛteɛɛm kamfoo ɔhempɔn no sɛ “banzai!” (nya nkwa daa) de gyaw wɔn agyanom anaa wɔn nuabarimanom kwan. Na nkurɔfo gye di sɛ Japan, ɔman a onyame di so, ne ne hempɔn a wobu no sɛ onyame teasefo no, bedi nkonim.

 Ankyɛ na wɔde owu ho amanneɛ fi akono bɛbɔɔ mmusua horow. Na ɛyɛ den sɛ wɔbɛkyekye mmusua a wɔn nkurɔfo atotɔ no werɛ. Ɔtan fii ase hyɛɛ wɔn komam ma, na sɛ wokunkum atamfo no pii a, na wodi ho ahurusi. Nanso bere koro no ara no, misusuwii sɛ, ‘Nkurɔfo a wɔwɔ atamfo no afã nso behu amane sɛnea sɛ yɛn adɔfo wuwu a yehu amane no ara.’ Ebeduu bere a miwiee mfitiase sukuu no, na ɔko no mu retrɛw kɛse wɔ China.

Ɔhɔho Bi a Mihyiaa No

Sɛ́ akuafo no, na bere nyinaa yɛn abusua no di hia, nanso me papa maa mekɔɔ sukuu bere dodow a na ontua ho ka biara no. Enti wɔ 1941 mu no, mekɔɔ mmeawa sukuu wɔ Okayama Kuropɔn a ɛrekɔ hɔ bɛyɛ kilomita 100 no mu. Wɔyɛɛ sukuu no sɛ ɛbɛtete mmeawa ma wɔabɛyɛ ɔyerenom ne ɛnanom pa daakye, na sukuu no de asuafo no kɔtraa adefo mmusua a wɔwɔ nkurow akɛse mu nkyɛn ma wokosuaa sɛnea wɔhwɛ fie so. Sɛ edu anɔpa a, na adesuafo no yɛ adwuma wɔ fie de sua ofie adeyɛ, na sɛ edu awia a, na wɔkɔ sukuu mu.

Bere a me kyerɛkyerɛfo a ɔhyɛ kimono atade ama me akwaaba awie no, ɔde me kɔɔ ofie kɛse bi mu. Nanso, biribi nti, ɔbea a na ɔwɔ fie hɔ no annye me. Enti ɔkyerɛkyerɛfo no bisae sɛ, “So yɛnkɔ Owurayere Koda fie?” Ɔde me kɔɔ atɔe famfo fie bi mu na ɔbɔɔ dɔn a na ɛbɔ pon akyi no. Bere a yɛtwɛn kakra no, ɔbea bi a ne ti so afuw dwen bae. Me ho dwiriw me! Ná ɔnyɛ Japanni, na na minhuu obi a ofi Atɔe fam man mu da. Ɔkyerɛkyerɛfo no kaa me ho asɛm kyerɛɛ Owurayere Maud Koda, na ntɛm ara ogyaw me hɔ kɔe. Metwee me bag no ase kɔɔ fie no mu a na ehu aka me. Akyiri yi na mihui sɛ na Owurayere Maud Koda yɛ Amerikani a waware Japanni barima a na wakosua ade wɔ United States. Ná ɔkyerɛ Engiresi kasa wɔ ntoaso sukuu ahorow a wosua aguadi ho ade mu.

Ade kyee no, mifii ase yɛɛ adwuma a na adagyew nnim koraa. Ná Owurayere Koda kunu no anya abiribiriw yare, ma enti na ɛsɛ sɛ meboa ma wɔhwɛ no. Esiane sɛ na mente Engiresi kasa koraa nti, ɛhaw me kakra. Bere a Owurayere Koda ne me kasae wɔ Japan kasa mu no, me ho tɔɔ me. Daa na mete sɛ wɔreka Engiresi kasa kyerɛ wɔn ho, na nkakrankakra mitumi tee saa kasa no. M’ani gyee anigye a na ɛwɔ fie hɔ no ho.

Sɛnea na Maud wɔ ne kunu yarefo no ho adagyew no yɛɛ me anigye. Na ɔbarima no ani gye Bible akenkan ho. Akyiri yi na mibehui sɛ na awarefo no atɔ The Divine Plan of the Ages nhoma a wɔakyerɛ ase kɔ Japan kasa mu no wɔ sotɔɔ bi a wɔtɔn nhoma dedaw wom mu, na na wɔde mfe pii akra Engiresi kasa mu Ɔwɛn-Aban no bi.

Da bi, wɔkyɛɛ me Bible. M’ani gyei efisɛ na saa bere no ne bere a edi kan wɔ m’asetra mu a manya m’ankasa Bible. Sɛ merekɔ sukuu a na mekenkan, na sɛ mifi sukuu reba fie nso a na mekenkan, nanso mante nneɛma pii ase. Esiane sɛ wɔtetee me sɛ Japanni a ɔyɛ Shintoni nti, na Yesu Kristo ho asɛm yɛ me ade foforo koraa. Ná minnim sɛ awiei koraa no, eyi na na menam so begye Bible mu nokware a ɛbɛma manya nsɛm a mifi me mmofraase abisa wɔ asetra ne owu ho no ho mmuae, no atom.

 Awerɛhosɛm Abiɛsa

Ankyɛ na mfe abien a mede suaa adwuma no baa awiei, na na ɛsɛ sɛ me ne abusua no di nkra. Bere a miwiee sukuu no, mede me ho kɔbɔɔ mmeawa atuhoamafo fekuw bi, na meboae ma wɔpam po so asraafo ntade. Amerikafo wim akohyɛn B-29 no fii ase totoo atopae, na wɔ August 6, 1945 no, wɔtow atɔm topae too Hiroshima. Nna kakra bi akyi no, wɔtoo me nkra sɛ Maame yare denneennen. Mefaa keteke a edi hɔ no kɔɔ fie. Bere a merefi keteke no mu asi fam no, obusuani bi hyiaa me ka kyerɛɛ me sɛ, Maame anya aka baabi. Owui wɔ August da a ɛto so 11. Ade a na misuro mfe pii ni no anya abam! Ɔne me renkasa anaa ɔrenserew nkyerɛ me bio.

Wɔ August 15 no, ɛbɛdaa adi sɛ Japan adi nkogu. Enti na ɛsɛ sɛ migyina nsɛm abiɛsa a asisi wɔ nna du pɛ ntam no ano: atɔm topae a edii kan towee, Maame wu, ne nkogu a Japan dii a abɛyɛ Japanfo abakɔsɛm mu ade titiriw. Anyɛ yiye koraa no, na ɛyɛ awerɛkyekye sɛ yebehu sɛ afei de nnipa renwu wɔ ɔko no mu bio. Bere a na awerɛhow akita me no, migyae adwuma no san kɔɔ me kurom.

Meba Nokware no Mu

Da bi, minyaa krataa bi a na menhwɛ kwan fii Maud Koda a ɔwɔ Okayama hɔ. Obisae sɛ ebia metumi aba abɛboa no wɔ ofie nnwuma mu, esiane sɛ na ɔrebebue Engiresi sukuu bi nti. Na minhu nea menyɛ, nanso megyee nsa a ɔto frɛɛ me no so. Mfe kakra bi akyi no, mitu kɔtraa Koda abusua no nkyɛn wɔ Kobe.

Afe 1949 ahohuru bere mfiase mu no, ɔbarima tenten bi a ɔwɔ adamfofa su bɛsraa Koda abusua no. Ná wɔfrɛ no Donald Haslett, na na ofi Tokyo aba Kobe rebɛhwehwɛ dan ama asɛmpatrɛwfo wɔ hɔ. Ná ɔne Yehowa Dansefo ɔsɛmpatrɛwfo a odi kan koraa a waba Japan. Onyaa fie no bi, na wɔ November 1949 mu no, asɛmpatrɛwfo pii beduu Kobe. Da koro, wɔn mu baanum bɛsraa Koda abusua no. Wɔn mu baanu, Lloyd Barry ne Percy Iszlaub, mu biara de bɛyɛ simma du kasae wɔ Engiresi mu kyerɛɛ wɔn a na wɔahyia wɔ fie hɔ no. Na asɛmpatrɛwfo no nim Maud sɛ onuawa Kristoni, na ɛda adi sɛ wɔn fekubɔ no hyɛɛ no nkuran. Saa bere no ansa na ɛhyɛɛ me nkuran sɛ mesua Engiresi kasa no.

Ɛdenam asɛmpatrɛwfo a wɔyɛ nsi mmoa so no, mede nkakrankakra benyaa Bible mu nokware atitiriw mu ntease. Minyaa nsɛm a na mifi me mmofraase abisa no ho mmuae. Yiw, Bible no de asetra a enni awiei wɔ paradise asase so ho anidaso, ne owusɔre ma “wɔn a wɔwɔ ada mu nyinaa” ho bɔhyɛ ma. (Yohane 5:28, 29; Adiyisɛm 21:1, 4) Medaa Yehowa ase sɛ wama anidaso a ɛte saa ayɛ yiye denam ne Ba, Yesu Kristo ogye afɔre no so.

Teokrase Dwumadi Ahorow a Ɛyɛ Anigye

Wɔyɛɛ teokrase nhyiam a edi kan wɔ Japan wɔ Kobe asɛmpatrɛwfo fie fi December 30, 1949, kosi January 1, 1950 mu. Me ne Maud kɔɔ bi. Kan no, na ofie kɛse a sɛ wugyina hɔ a wutumi hu Po a ɛda Asase ntam ne Awaji Supɔw no yɛ Nasini bi fie. Esiane sɛ na minni Bible mu nimdeɛ pii nti, mante nea wɔkae no pii ase. Nanso m’ani gyee asɛmpatrɛwfo a wofi wɔn pɛ mu ne Japanfo no boom dii nkitaho no ho. Nnipa a wɔn dodow si 101 na wɔba betiee saa nhyiam yi baguam ɔkasa no.

Ɛno akyi bere tiaa bi no, misii gyinae sɛ mede me ho bɛhyɛ asɛnka adwuma no mu bi. Na egye akokoduru na ama matumi akɔ afie afie esiane sɛ na meyɛ obi a mefɛre ade nti. Anɔpa bi, Onua Lloyd Barry baa yɛn fie bɛfaa me kɔɔ asɛnka. Ofii ase fii fie a na edi Onuawa Koda de no so pɛɛ. Ɛkame ayɛ sɛ na mede me ho asie n’akyi retie asɛm a ɔreka no. Bere a ɛto so abien a mekɔɔ asɛnka no, me ne asɛmpatrɛwfo afoforo baanu na ɛkɔe. Japanni aberewa bi gyee yɛn, otiee yɛn, na akyiri yi ɔmaa yɛn mu biara nufusu kuruwa biako nomee. Ɔpenee so ma yɛne no hyehyɛɛ ofie Bible adesua, na awiei koraa no, ɔbɛyɛɛ Kristoni a wagye asubɔ. Nkɔanim a na ɔrenya no hyɛɛ me nkuran.

Wɔ April 1951 mu no, Onua Nathan H. Knorr, a ofi Brooklyn adwumayɛbea ti hɔ no bɛsraa Japan bere a edi kan. Nnipa bɛyɛ 700 na wobetiee baguam ɔkasa a ɔmae wɔ Kyoritsu Asa a ɛwɔ Kanda, Tokyo no. Nnipa a wɔbaa nhyiam titiriw  yi ase nyinaa ani gyei bere a woyii Ɔwɛn-Aban a wɔakyerɛ ase kɔ Japanfo kasa mu a edi kan adi no. Ɔsram a edi hɔ no, Onua Knorr kɔsraa Kobe, na wɔ nhyiam titiriw a wɔyɛɛ wɔ hɔ ase no, wɔbɔɔ me asu de yɛɛ m’ahosohyira ma Yehowa no ho sɛnkyerɛnne.

Bɛyɛ afe akyi no, wɔhyɛɛ me nkuran sɛ memfa me ho nhyɛ bere nyinaa som adwuma, akwampae adwuma, no mu. Saa bere no na akwampaefo kakraa bi na wɔwɔ Japan, na na minhu ɔkwan a mɛfa so ahwɛ me ho. Afei nso na misusuw ɔkwan a mɛfa so anya obi aware no ho. Nanso mibehui sɛ ɛsɛ sɛ mede Yehowa a mɛsom no no di kan wɔ m’asetra mu, enti mede me ho hyɛɛ akwampae adwuma no mu wɔ 1952 mu. Anigyesɛm ne sɛ, mitumi de bere fã yɛɛ adwuma maa Onuawa Koda bere a na mereyɛ akwampae adwuma no.

Bɛyɛ sɛ saa bere no, me nuabarima a na misusuw sɛ wɔakum no wɔ ɔko no mu no ne n’abusua fii Taiwan san baa fie. Ná m’abusuafo nkyerɛɛ Kristosom ho anigye da, nanso ɛdenam akwampae adwuma mu nnamyɛ so no, mifii ase de nsɛmma nhoma ne nhomawa horow menaa wɔn. Akyiri yi, me nuabarima no ne n’abusua tu kɔtraa Kobe esiane n’adwuma nti. Mibisaa m’akumaa sɛ: “So woakenkan nsɛmma nhoma no?” Na obuae sɛ: “Ɛyɛ nsɛmma nhoma a emu yɛ anigye paa,” maa ɛyɛɛ me nwonwa. Ofii ase ne asɛmpatrɛwfo no biako suaa Bible no, na me nuabea kumaa a na ɔne wɔn te no kɔkaa ne ho wɔ adesua no mu. Bere bi akyi no, wɔn baanu bɛyɛɛ Kristofo a wɔagye asubɔ.

Amanaman Ntam Onuayɛ Maa M’ani Gyei

Bere tiaa bi akyi no, wɔtoo nsa frɛɛ me sɛ menkɔ Ɔwɛn Aban Gilead Bible Sukuu adesuakuw a ɛto so 22 no bi, maa me ho dwiriw me. Me ne Onua Tsutomu Fukase ne nnipa a yedi kan wɔ Japan a wɔtoo nsa frɛɛ yɛn ma yɛkɔɔ sukuu no bi. Wɔ 1953 mu, ansa na sukuu no refi ase no, yetumi kɔɔ Wiase Foforo Asafo Nhyiam a wɔyɛe wɔ Yankee Stadium wɔ New York no bi. Amanaman ntam onuayɛ a Yehowa nkurɔfo daa no adi no maa m’ani gyei yiye.

Nhyiam no da a ɛto so anum no, na nhyiamfo a wofi Japan, a wɔn mu dodow no ara yɛ asɛmpatrɛwfo no bɛhyɛ wɔn atade a wɔfrɛ no kimono no. Esiane sɛ na kimono a makra sɛ wɔmfa mfa po so hyɛn mu mmrɛ me no mmedui nti, mebɔɔ Onuawa Knorr de mmɔkwaa. Bere a dwumadi no rekɔ so no, osu fii ase tɔe, na na ɛhaw me sɛ anhwɛ a na kimono no afɔw. Saa bere no ara, obi fii m’akyi de soro atade a nsu ntumi mfa mu hyɛɛ me bɔkɔɔ. Onuawa biako a na ogyina me nkyɛn bisaa me sɛ, “So wunim onii ko a ɔyɛɛ saa no?” Akyiri yi na mihui sɛ na ɛyɛ Onua Frederick W. Franz, a ɔyɛ Sudikuw no muni no. Hwɛ sɛnea mihuu ɔdɔ a ɛwɔ Yehowa ahyehyɛde no mu fae!

Ná Gilead adesuakuw a ɛto so 22, a na adesuafo 120 no fi aman 37 so no yɛ amanaman ntam adesuakuw ampa. Ɛwom sɛ na yɛwɔ kasa ho akwanside de, nanso yenyaa amanaman ntam onuayɛ no mu anigye. Da bi a na sukyerɛmma retɔ wɔ February 1954 mu no, miwiee m’adesua na wɔsan maa me dwumadi wɔ Japan. Na me yɔnko suani, Inger Brandt, onuawa a na ofi Sweden, na na ɔbɛyɛ me yɔnko dwumayɛni wɔ Nagoya Kurom. Bere a yɛkɔɔ hɔ no, yɛkɔkaa asɛmpatrɛwfo kuw bi a na wɔde wɔn afi Korea aba esiane ɔko no nti no ho. Mfe kakraa a midii wɔ asɛmpatrɛw adwuma mu no som bo maa me paa.

 Anigye a Yɛde Som sɛ Awarefo

Wɔtoo nsa frɛɛ me sɛ memmɛsom wɔ Tokyo Betel wɔ September 1957 mu. Na Japan baa dwumadibea no yɛ abansoro dan a wɔde nnua asi a ɛtoa so abien. Nnipa baanan, a na Onua Barry a ɔyɛ baa dwumadibea sohwɛfo no ka ho, na na yɛwɔ baa dwumadibea hɔ. Na abusua no mufo a aka no yɛ asɛmpatrɛwfo. Wɔmaa me adwuma sɛ nsɛm asekyerɛfo, ne obi a ɔhwɛ nsɛm a wɔakyerɛ ase mu, ne afei sɛ obi a osiesie hɔ, horo nneɛma, noa aduan, ne nea ɛkeka ho.

Ná adwuma a yɛreyɛ wɔ Japan no mu retrɛw, ma enti wɔtoo nsa frɛɛ anuanom mmarima pii baa Betel. Wɔn mu biako bɛyɛɛ ɔpanyin wɔ asafo a na mewom no mu. Wɔ 1966 mu no, me ne saa onua no, Junji Koshino, waree. Yɛwaree akyi no, wɔmaa Junji dwumadi sɛ ɔmansin sohwɛfo. Ná ɛyɛ anigye sɛ yebehu anuanom mmarima ne mmea pii bere a yetutuu akwan kɔɔ asafo ahorow mu no. Esiane sɛ na wɔama me dwumadi sɛ nsɛm asekyerɛfo nti no, na meyɛ saa adwuma no wɔ ofie a yɛbɛtra mu dapɛn no mu no mu. Sɛ yɛretu kwan a, na ɛsɛ sɛ yɛsoa nsɛm asekyerɛ nhoma akɛse ka yɛn nnaka ne bag ahorow no ho.

Yɛyɛɛ ɔmansin adwuma no bɛboro mfe anan na yehui sɛ na ahyehyɛde no rekɔ so trɛw. Woyii baa dwumadibea no kɔɔ Numazu, na mfe bi akyi no, wɔde kɔɔ Ebina, faako a mprempren baa dwumadibea no wɔ no. Me ne Junji de mfe pii asom wɔ Betel, na mprempren yɛne abusua a emufo bɛyɛ 600 na ɛresom. Wɔ May 2002 mu no, yɛn nnamfo a wɔwɔ Betel no fii ayamye mu hyɛɛ mfe 50 a mede ayɛ bere nyinaa som adwuma no ho fa.

Ɛyɛ Me Anigye sɛ Mihu Nkɔso No

Bere a mifii ase som Yehowa wɔ 1950 mu tɔnn no, na adawurubɔfo kakraa bi na wɔwɔ Japan. Ɛnnɛ Ahenni adawurubɔfo bɛboro 210,000 na wɔwɔ ha. Nokwarem no, nnipa a wɔte sɛ nguan mpempem pii na wɔatwe wɔn aba Yehowa nkyɛn, sɛnea wɔyɛɛ me no ara.

Asɛmpatrɛwfo baanan ne onuawa a ɔbɛsraa yɛn wɔ Onuawa Koda fie wɔ 1949 mu tɔnn no, ne afei Onuawa Maud Koda, nyinaa awie wɔn asetra wɔ nokwaredi mu. Saa ara nso na me nuabarima, a na ɔyɛ asafo mu somfo, ne m’akumaa, a ɔyɛɛ akwampae adwuma mfe 15 no nso awuwu. Anidaso bɛn na ɛwɔ hɔ ma m’awofo a me mmofraase no na misuro sɛ wobewu no? Owusɔre anidaso ho bɔhyɛ a Bible no de ma no ma me anidaso ne awerɛkyekye.—Asomafo no Nnwuma 24:15.

Sɛ mehwɛ m’akyi a, mete nka sɛ nkitaho a me ne Maud dii wɔ 1941 mu no yɛɛ m’asetram nsakrae bere titiriw. Sɛ manhyia no saa bere no, na sɛ anka bere a ɔtoo nsa frɛɛ me sɛ memmra ne no mmɛyɛ adwuma bio wɔ ɔko no akyi no mankɔ a, ɛda adi sɛ anka mɛkɔ akɔtra yɛn afum wɔ yɛn akuraa a atew ne ho wɔ akyirikyiri no, a anka merenhu asɛmpatrɛwfo no saa bere no. Hwɛ sɛnea meda Yehowa ase sɛ ɔnam Maud ne asɛmpatrɛwfo a wodi kan no so twee me baa nokware no mu!

[Mfonini wɔ kratafa 25]

Me ne Maud Koda ne ne kunu. Me na mewɔ anim benkum so no

[Mfonini wɔ kratafa 27]

Me ne asɛmpatrɛwfo a wofi Japan wɔ Yankee Stadium wɔ 1953 mu. Me na mewɔ benkum so koraa no

[Mfonini ahorow wɔ kratafa 28]

Me ne me kunu, Junji, wɔ Betel