Hena Bɔhyɛ na Wubetumi De Wo Ho Ato So?

“BERE a ɔyɛ otumfoɔ no, na tumi wɔ ne bɔhyɛ mu, nanso mprempren a ɔnyɛ otumfoɔ bio no, tumi biara nni ne bɔhyɛ mu.”—King Henry the Eighth, a William Shakespeare kyerɛwee.

Bɔhyɛ ahorow a tumi wom a Shakespeare kaa ho asɛm wɔ ha yi yɛ Engiresi ɔsɔfopɔn Thomas Wolsey, a odii amammui mu tumi kɛse wɔ England wɔ afeha a ɛto so 16 mu no nsɛm. Ebinom bɛka sɛ nea Shakespeare kaa ho asɛm no fa bɔhyɛ ahorow a wɔte no nnɛ mu dodow no ara nso ho. Mpɛn pii no, wɔhyɛ nkurɔfo bɔ pii nanso wonni ne nyinaa so. Enti, ɛnyɛ den sɛ yɛbɛte nea enti a nkurɔfo pii adwenem yɛ wɔn naa wɔ bɔhyɛ biara ho no ase.

Huammɔdi Abu So

Sɛ nhwɛso no, wɔ ntawntawdi a ɛyɛ hu a esii wɔ Balkan aman mu wɔ 1990 mfe no mu no, Amanaman Nkabom Ahobammɔ Bagua no kae sɛ Bosnia kurow a ɛne Srebrenica no yɛ “beae a ahobammɔ wɔ.” Ɛno yɛɛ te sɛ bɔ a ahotoso wom a Amanaman Nkabom aman no hyɛe. Nkramofo aguanfo mpempem pii a wɔwɔ Srebrenica nso susuwii saa ara. Nanso, awiei no, guankɔbea ho bɔhyɛ no yɛɛ ɔkwa. (Dwom 146:3) Wɔ July, 1995 mu no, asraafo a na wɔretu sa no piaa UN asraafo no kɔɔ nkyɛn kɛkɛ na wotwiw faa ɔman no so. Nkramofo a wɔboro 6,000 tu yerae, na anyɛ yiye koraa no, wokunkum Nkramofo a wɔnyɛ asraafo 1,200.

Bɔhyɛ a wonni so ahyɛ asetra fã biara ma. Nnipa te asisi nka wɔ “nnaadaa ne nkontompo aguade ho dawurubɔ pii” a wɔde guan wɔn ho nnɛ no mu. Wɔn abasam atu wɔ “amammuifo pii ɔsatu a wontumi nni emu bɔhyɛ biara so no ho.” (The New Encyclopædia Britannica, Po 15, kratafa 37) Nyamesom akannifo a wɔwɔ wɔn mu ahotoso a wɔhyɛ bɔ sɛ wɔbɛhwɛ nguankuw no so no yɛ wɔn ayayade a ɛyɛ abofono. Wɔ nnwuma te sɛ sukuu ho ntetee ne nnuruyɛ mpo mu—a wɔkyerɛ sɛ egyina mmɔborohunu ne dwen a wodwen afoforo ho akwankyerɛ so no—ebinom ama afoforo ahwere wɔn mu ahotoso na wɔasisi anaa wɔadi wɔn a wɔwɔ wɔn hwɛ ase no awu. Ɛnyɛ nwonwa sɛ Bible no bɔ yɛn kɔkɔ sɛ yennye nsɛm nyinaa nni!—Mmebusɛm 14:15.

 Bɔhyɛ Horow a Wodii So

Nokwarem no, nnipa pii di wɔn bɔhyɛ so, na ɛtɔ da bi a ɛma wɔhwere ade kɛse. (Dwom 15:4) Wɔn bɔhyɛ yɛ wɔn ntanka, na wodi so. Afoforo fi nokwaredi mu pɛ sɛ wodi wɔn bɔ a wɔhyɛ so wɔ adwempa mu. Wɔayɛ krado na wɔwɔ ɔpɛ sɛ wobedi bɔ a wɔhyɛe so nanso wontumi nnyɛ saa. Ebia tebea horow bɛsɛe nhyehyɛe pa a ɛsen biara mpo.—Ɔsɛnkafo 9:11.

Sɛnea ɛte biara no, tebea no ankasa ne sɛ ɛyɛ den paa ma nnipa pii sɛ wobenya gyidi wɔ obiara bɔhyɛ mu. Enti asɛmmisa no sɔre sɛ: So bɔhyɛ ahorow bi wɔ a yebetumi de yɛn ho ato so? Yiw. Yebetumi anya bɔhyɛ ahorow a ɛwɔ Onyankopɔn Asɛm, Bible, mu no mu ahotoso. Dɛn nti na wonhwehwɛ nea asɛm a edi hɔ no ka fa saa asɛm no ho mu? Ebia wobɛka sɛ, sɛnea nnipa ɔpepem pii ayɛ dedaw no, yebetumi anya Onyankopɔn bɔhyɛ ahorow mu ahotoso ankasa.

[Mfonini Fibea wɔ kratafa 3]

AP Photo/Amel Emric