Dɛn Nti na Yehowa Adansefo Kɔ So Ba Wo Nkyɛn Saa?

WƆ WIASE nyinaa no, wonim mmɔden a Yehowa Adansefo bɔ de wɔn ho hyɛ wɔn afie afie asɛnka mu no yiye. Nnipa binom nte nea enti a Adansefo no kɔ so ba wɔn nkyɛn no ase, ne titiriw no sɛ bere bi a atwam no wɔkyerɛɛ Adansefo no asɛm no ho anigye kakra bi a. Nkrataa abien bi a wonya fii Russia no boa kyerɛkyerɛ nea enti a ɛte saa no mu.

Masha, ababaa bi a wadi mfe 19 a ɔwɔ Khabarovsk no ka sɛ: “Nokwarem no, bere bi a atwam no na mebɔ mmɔden paa sɛ mesiw Yehowa Adansefo kwan.” Nanso, bere a ɔkenkan Adansefo no nsɛmma nhoma a wɔatintim no mu kakraa bi no, ɔsesaa ne suban. Masha kyerɛw sɛ: “Nea mekenkan no yɛ anigye yiye na ɛma nneɛma mu da hɔ paa, nanso nea ehia paa no, ɛma obi hwɛ wiase no wɔ ɔkwan soronko so. Mede nkakrankakra bɛtee asetra mu atirimpɔw ase.”

Svetlana a ofi Ussuriysk kurow a ɛda Vladivostok atifi fam bɛyɛ kilomita 80 no kyerɛwee sɛ: “Nnansa yi ara na mafi ase sɛ mɛkenkan Ɔwɛn-Aban ne Nyan! Saa nsɛmma nhoma ahorow yi ho hia kɛse wɔ yɛn bere yi mu. M’ani gye nsɛm a ɛwom no nyinaa ho. Nsɛm no yɛ anigye, aba wom na ɛma nneɛma mu da hɔ nso. Meda mo ase! Meda mo ase paa sɛ mowɔ wiase yi mu na moreyɛ biribi a ɛte saa ne adwuma a ɛho hia yi.”

Yehowa Adansefo a wɔwɔ wiase nyinaa no bu ɔsomafo Paulo asɛm a ɛkanyan adwene yi aniberesɛm: ‘Sɛ ɔsɛnkafo nni hɔ a, ɛbɛyɛ dɛn na nkurɔfo bɛte?’ (Romafo 10:14) Dɛn nti na wunnye bere kakraa bi mfa ntie Adansefo no bere foforo a wɔbɛba abɛsra wo no? Wo nso wubenya anigye wɔ nkrasɛm a ɛma awerɛkyekye a ɛwɔ Onyankopɔn Asɛm, Bible, mu no ho.