So Ɛsɛ Sɛ Yɛhwehwɛ Mmoa Fi Abɔfo Hɔ?

SO ƐYƐ papa sɛ yebesũ afrɛ abɔfo wɔ ahohia mu? Nnipa pii susuw saa. Nokwasɛm ne sɛ New Catholic Encyclopedia ka sɛ: “Obi bɔ . . . abɔfo mpae . . . a nea ɛkyerɛ ara ne sɛ wonni mma yɛn wɔ Onyankopɔn anim.” So ɛsɛ sɛ yesũ frɛ abɔfo sɛ wonni mma yɛn?

Onyankopɔn abɔfo anokwafo no mu baanu pɛ, Mikael ne Gabriel, na wɔbɔ wɔn din wɔ Onyankopɔn Asɛm no mu. (Daniel 8:16; 12:1; Luka 1:26; Yuda 9) Esiane sɛ wɔabɔ saa din yi wɔ Bible no mu nti, ɛma yehu sɛ ɔbɔfo biara yɛ honhom abɔde a ɔwɔ hɔ ankasa na ɔnyɛ tumi anaa ahoɔden bi kɛkɛ. Nanso, abɔfo binom ampɛ sɛ wɔda wɔn din adi. Sɛ nhwɛso no, bere a Yakob bisaa ɔbɔfo bi a ɔbɛsraa no no din no, wammɔ ankyerɛ no. (Genesis 32:29; Atemmufo 13:17, 18) Wɔnyɛɛ abɔfo din ho kyerɛwtohɔ wɔ Bible no mu na amma nnipa antwe adwene ansi wɔn so wɔ ɔkwan a ɛmfata so.

Abɔfo no adwuma no bi ne sɛ wɔde Onyankopɔn nkrasɛm bɛbrɛ nnipa. Nokwasɛm ne sɛ, nea Hebri ne Hela nsɛmfua a wɔkyerɛɛ ase “ɔbɔfo” no kyerɛ ankasa ne “ɔsomafo.” Nanso, abɔfo nyɛ ntamgyinafo a wotie nnipa mpaebɔ de kɔ Ɔsorosoroni no ahengua anim. Onyankopɔn aka sɛ yɛmfa ne Ba Yesu Kristo a ɔkae sɛ ‘biribiara a mobɛsrɛ agya no me din mu no, ɔde bɛma mo’ no so na ɛmmra n’anim.—Yohane 15:16; 1 Timoteo 2:5.

Sɛ yɛfa ɔkwampa so kɔ Yehowa Nyankopɔn anim a, ɔnyɛ obi a onni bere sɛ obetie yɛn. Bible no ma yɛn awerɛhyem yi sɛ: “[Yehowa, NW] bɛn wɔn a wɔfrɛ no nyinaa, wɔn a wɔfrɛ no nokware mu nyinaa.”—Dwom 145:18.