So Onyankopɔn Asɛm Hyɛ Wo Den?

SƐ WUHYIA ɔhaw a, dɛn na woyɛ wɔ ho? Wɔ Yesu fam no, kyerɛwsɛm a ɛfata a ɔkaee no boaa no ma ɔko tiaa Satan sɔhwɛ no. (Mateo 4:1-11) Saa ara nso na Onyankopɔn Asɛm hyɛɛ Ɔhene Dawid den bere a ohyiaa sɔhwɛ ahorow no. Ɔkae sɛ: “Me mu dadwen dɔɔso a, w’awerɛkyekye gye me kra ani.”—Dwom 94:19.

Saa ara na yɛn nso sɛ yehyia ɔhaw na sɛ yɛkae kyerɛwsɛm bi a ɛka yɛn koma paa, ebetumi akyekye yɛn werɛ anaasɛ ahyɛ yɛn den. Sɛ nhwɛso no, Rex a seesei wadi mfe 89 no ayɛ bere nyinaa ɔsɛmpakafo fi afe 1931. Nanso, ɔka sɛ: “Sɛ na wɔma me dwumadi titiriw bi wɔ ɔsom adwuma no mu a, na metaa te nka sɛ mintumi nyɛ.” Ɔyɛɛ dɛn dii so? “Mekaee kyerɛwsɛm a ɛka me koma paa, Mmebusɛm 3:5, nea ɛka sɛ: ‘Fa wo koma nyinaa bata [Yehowa, NW] ho, na mfa wo ho ntweri wo nhumu’ no. Saa kyerɛwsɛm yi a mekaee na mede dii dwuma no boaa me ma mitumi yɛɛ me dwumadi ahorow yiye.”

Mmofra mpo nya kyerɛwsɛm a ɛka wɔn koma paa so mfaso. Jack a wadi mfe asia no ka sɛ kyerɛwsɛm a ɛka ne koma paa yɛ Mateo 24:14. Saa kyerɛwsɛm yi kanyan no ma ɔne n’awofo kɔ asɛnka. Ɔka sɛ: “M’ani gye ho sɛ me ne me maame, me papa, ne me nuabea bɛkɔ asɛnka Memeneda biara.”

Te sɛ Yesu no, so ɛtɔ da bi a wuhyia wo gyidi ho sɔhwɛ tee? Ɛnde Filipifo 4:13 betumi ayɛ kyerɛwsɛm a ɛbɛka wo koma paa no mu biako. So “dadwen” hyɛ wo so te sɛ Ɔhene Dawid? Ɛnde Filipifo 4:6, 7 a wobɛkae no betumi aboa wo ma woadi so. Ɛtɔ da bi a, ɛyɛ a wususuw sɛ ɔsom a wode ma Onyankopɔn no yɛ ɔkwa? Ɛnde 1 Korintofo 15:58 a wobɛkae no bɛhyɛ wo den.

Sɛ yɛkyere kyerɛwsɛm a ɛfata no bi gu yɛn tirim a, yɛma hokwan ma Onyankopɔn Asɛm no nya yɛn asetra so tumi anaa ahoɔden. (Hebrifo 4:12) Kyerɛwsɛm a ɛka koma paa saa no betumi ahyɛ yɛn den na akyekye yɛn werɛ nso.—Romafo 15:4.