Ade a Ɛbɛma Yɛanya Onyinkyɛ ne Anigye

WƆTAA ka asɛm bi sɛ, “obiara pɛ sɛ onyin kyɛ; nanso obiara mpɛ sɛ ɔbɔ akwakoraa.” Nnipa pii a aka kakra na onyin ama wɔagyae adwuma no hwɛ kwan sɛ wobenya bere pii ama wɔn ho na wɔn asɛyɛde ayɛ kakraa bi. Nanso, wosuro sɛ wɔbɛyɛ nkurɔfo a wonni atirimpɔw biara na mfaso nni wɔn so. Wosuro nso sɛ wɔbɛyɛ ankonam, wɔrennya anigye, na wɔn akwahosan asɛe.

Ɛnde, dɛn na ebetumi ama obi anya asetra a anigye wom? Nnamfo pa ne mmusua a wɔwɔ dɔ boa ma mmofra ne mpanyin nyinaa nya anigye. Nanso nea ɛsɛ sɛ afoforo yɛ na ama wɔn a wɔn mfe akɔ anim anya anigye no nyɛ biribi a ɛho hyɛ da hia. Nea ehia paa mpo ne ade a obi a ne mfe akɔ anim betumi ayɛ ama afoforo no.

Awarefo 423 a wɔn mfe akɔ anim mu nhwehwɛmu a wɔde bere tenten yɛe no daa no adi sɛ “afoforo asetra a yɛbɛboa ma atu mpɔn no betumi aboa ma yɛn ankasa anya nkwa tenten.” Stephanie Brown, a ɔyɛɛ nhwehwɛmu no, kyerɛkyerɛ mu sɛ: “Nea ɛdaa adi yi kyerɛ sɛ ɛnyɛ nea yenya fi afoforo hɔ no na ɛma ɛyɛ mfaso kɛse sɛ yɛne wɔn bɛbɔ; na mmom nea yɛde ma wɔn.” Nneɛma a yebetumi de ama no bi ne afoforo a yɛbɛboa wɔn wɔ ofie nnwuma mu, mmofra a yɛbɛhwɛ wɔn, nneɛma bi a yebetu kwan akɔyɛ ama wɔn, kar ho nhyehyɛe a yɛbɛyɛ ama wɔn, anaa aso a yɛbɛyɛ ama obi a ɔpɛ sɛ ɔka asɛm bi kyerɛ yɛn no.

Bɛyɛ mfirihyia 2,000 a atwam ni no, Yesu Kristo kae sɛ: “Ɔma mu wɔ nhyira mmom sen ogye.” (Asomafo no Nnwuma 20:35) Ɛnyɛ sika pii a obi akora so wɔ sikakorabea anaa nnuru ne nnuan a ɛmma ɔmmɔ akwakoraa na ɛbɛma wanya nkwa tenten na n’ani agye. Mmom no, nea ɛbɛma wanya nkwa tenten ne sɛ ɔbɛyɛ nam na ɔde ne bere ne n’ahoɔden aboa afoforo ma wɔn asetra atu mpɔn.

Nanso, ɛnyɛ adema ara kwa na ɛmma obi mmɔ akwakoraa, ɔnyare, anaa onwu. Onyankopɔn Ahenni nkutoo na ebeyi nneɛma a ɛte saa afi hɔ. Wɔ ne nniso ase no, yare befi hɔ, na “owu” mpo “nni hɔ bio.” (Adiyisɛm 21:3, 4; Yesaia 33:24) Nokwarem no, adesamma asoɔmmerɛfo bɛtra ase anigye mu wɔ paradise asase so daa. (Luka 23:43) Yehowa Adansefo ani gye ho sɛ wɔbɛma afoforo nsa aka ade a egyina Bible so a ɛbɛma nkurɔfo anya nkwa tenten a anigye wom no.