Sɛnea Yehowa Ahobrɛase Boa Yɛn

NÁ Dawid yɛ onipa a wahu amane pɛn. N’ase barima, Ɔhene Saul a na n’ani bere no no yɛɛ no ayayade. Saul bɔɔ mmɔden sɛ ɔde peaw bekum Dawid mprɛnsa, na ɔkɔɔ so taa ne so sɛ aboa mfe pii, maa Dawid bɛyɛɛ oguanfo. (1 Samuel 18:11; 19:10; 26:20) Nanso, Yehowa boaa Dawid. Yehowa gyee no fii Saul ne n’atamfo foforo nsam. Enti, yebetumi ate Dawid nkate a ɔdaa no adi wɔ dwom yi mu no ase: “[Yehowa, NW] nye mo botan, na m’akoban, na me gyefo. . . . Edze wo [Yehowa] nkwagye akokyɛm no ama me: Na w’ahobrɛadze ama mayɛ kɛse.” (2 Samuel 22:2, 36, Fante Bible) Dawid bɛyɛɛ onipa kɛse wɔ Israel. Ɛnde, ɔkwan bɛn so na Yehowa ahobrɛase baa asɛm no mu?

Sɛ Kyerɛwnsɛm no ka Yehowa ho asɛm sɛ ɔbrɛ ne ho ase a, ɛnkyerɛ sɛ ɔtɔ sin wɔ ɔkwan bi so anaasɛ ɔhyɛ afoforo ase. Mmom no, saa su pa yi da no adi sɛ ɔwɔ ayamhyehye a emu dɔ ma nnipa a wofi komam bɔ mmɔden sɛ wobenya n’anim dom no, na ɔno nso hu wɔn mmɔbɔ. Yɛkenkan wɔ Dwom 113:6, 7 sɛ: ‘Yehowa brɛ ne ho ase hwɛ fam, ɔsoro ne asase so, ɔma ɔbrɛfo so fi mfutuma mu.’ Brɛ a “ɔbrɛ ne ho ase hwɛ fam” no kyerɛ sɛ “ɔbɔ ne mu ase hwɛ ade.” (Today’s English Version) Enti, Yehowa ankasa fi soro ‘bɔɔ ne mu ase’ sɛnea ɛbɛyɛ a obetie Dawid a ɔyɛ nipa a ɔnyɛ pɛ nanso ɔwɔ ɔpɛ sɛ ɔbɛsom Onyankopɔn no. Enti, Dawid ma yɛn awerɛhyem sɛ: “[Yehowa, NW] wɔ ɔsorosoro, na ɔhwɛ ahobrɛasefo.” (Dwom 138:6) Ɛsɛ sɛ mmɔborohunu a Yehowa daa no adi wɔ Dawid ho ne abotare ne ayamhyehye a onya maa no no hyɛ wɔn a wɔpɛ sɛ wɔyɛ Onyankopɔn apɛde no nyinaa nkuran.

Ɛwom sɛ Yehowa a ɔyɛ Otumfo no wɔ dibea a ɛkorɔn sen biara wɔ amansan no mu de, nanso ɔwɔ ɔpɛ sɛ ɔne yɛn mu biara bedi nsɛm. Eyi ma yenya awerɛhyem sɛ yebetumi de yɛn ho ato ne mmoa a ɛwɔ hɔ daa no so wɔ bere a emu yɛ den paa mpo mu. Biribiara nni hɔ a ɛsɛ sɛ ɛma yesuro sɛ ne werɛ befi yɛn. Ɛdefa sɛnea Yehowa ne  ne nkurɔfo, tete Israelfo no dii ho no, wɔka Yehowa ho asɛm ma ɛfata sɛ “ɔkaee [wɔn wɔn] ahobrɛase mu, na n’adɔe wɔ hɔ daa.”—Dwom 136:23.

Sɛ́ Yehowa asomfo a wɔwɔ hɔ nnɛ no, yebetumi ahu amane sɛnea Dawid hui no. Ebetumi aba sɛ wɔn a wɔnsom Nyankopɔn no di yɛn ho fɛw, anaa ebia na yɛreko yare bi anaa ebia na yɛn adɔfo bi awuwu. Sɛnea yɛn tebea te biara no, sɛ yɛwɔ koma pa a, yebetumi akɔ Yehowa anim wɔ mpaebɔ mu asrɛ no sɛ onhu yɛn mmɔbɔ. Yehowa ‘bɛbɔ ne mu ase’ ahwɛ yɛn na watie yɛn mpaebɔ. Odwontofo a honhom kaa no no kyerɛwee sɛ: “[Yehowa, NW] ani wɔ treneefo so, na n’aso tie wɔn sufrɛ.” (Dwom 34:15) So ɛnka wo koma sɛ wubesusuw Yehowa ahobrɛase a ɛma yɛbɛn no no ho?

[Mfonini ahorow wɔ kratafa 30]

Sɛnea Yehowa tiee Dawid mpaebɔ no, saa ara na nnɛ nso Yehowa ayɛ krado sɛ obetie yɛn mpaebɔ