So Yebenya Ahobammɔ Ankasa Da Bi?

HENA na n’ani nnye ho sɛ obehu sɛ mmofra ne wɔn awofo redi agoru anigye so? Mmofra a wɔte saa no te nka sɛ wɔwɔ ahobammɔ koraa wɔ wɔn awofo nkyɛn. Nanso, mmofra pii nni anigye a ɛte saa. Mmom no, mmofra binom wɔ hɔ a, ɛsɛ sɛ wodwen baabi a wobenya de wɔn ti ato anadwo ho da biara. So anidaso bi wɔ hɔ ma mmofra a wonni baabi da yi ne afoforo a wonni ahobammɔ no?

Ɛwom sɛ ɛte sɛ nea anidaso biara nni hɔ de, nanso Onyankopɔn Asɛm ma yɛn anidaso. Odiyifo Yesaia ka siei sɛ da bi bɛba a nnipa nyinaa bɛtra ase dwoodwoo. Ɔkyerɛwee sɛ: “Wobesisi adan atra mu, na wɔayeyɛ bobe nturo adi mu aba. Wɔrensisi adan mma obi ntra mu, na wɔrennua mma obi nni.”—Yesaia 65:21, 22.

Nanso, saa anidaso yi wɔ nnyinaso pa bi? Asɛmmisa yi ho hia efisɛ ɛnyɛ bere nyinaa na asɛmfua “anidaso” kyerɛ sɛ biribi bɛyɛ yiye ankasa. Sɛ nhwɛso no, wɔ Brazil no, wɔtaa ka sɛ: “A esperança é a última que morre.” Nea ɛkyerɛ ankasa ne sɛ, “Anidaso ne ade a ɛnsa da.” Adwene a ɛwɔ eyi mu ne sɛ bere mpo a biribiara nni hɔ a ɛkyerɛ sɛ anidaso bi wɔ hɔ no, nnipa pii kɔ so kura anidaso mu. Nanso, anidaso a Onyankopɔn teasefo no ma yenya no yɛ soronko. Ɔsomafo Paulo kyerɛwee sɛ: “Obiara a ogye no [Onyankopɔn] di no ani renwu.” (Romafo 10:11) Bible nkɔmhyɛ ahorow a abam dedaw no ma yɛn awerɛhyem sɛ bɔ foforo biara a Yehowa Nyankopɔn ahyɛ no nso bɛbam. Sɛ saa bɔhyɛ ahorow no bam a, tebea a ɛma mmofra da abɔnten no befi hɔ.

Ɛnnɛ mpo, afotu a mfaso wɔ so a ɛwɔ Bible mu no betumi aboa wɔn a wonni anidaso no ma wɔn asetra ayɛ yiye na wɔanya ahobammɔ ankasa. Ɛno bɛyɛ dɛn ayɛ yiye? Yehowa Adansefo a wɔwɔ wo mpɔtam hɔ ani begye ho sɛ wɔbɛboa wo na woanya asɛmmisa yi ho mmuae.