Onyankopɔn Nnamfo Wɔ “Nnamfo Nsupɔw” So

Wɔ 1932 mu no, hyɛn bi de biribi a ɛsom bo yiye kɔɔ Tonga. Hyɛn no so panyin de nhomawa bi a wɔato din “Where Are the Dead?” maa Charles Vete. Charles gye dii sɛ wahu nokware no. Bere bi akyi no, Yehowa Adansefo adwumayɛbea ti no penee Charles adebisa a ɛne sɛ wɔmma ɔnkyerɛ nhomawa no ase nkɔ ne kurom kasa mu no so. Bere a ɔkyerɛɛ nhomawa no ase wiei no, wɔde nea wotintimii no mu 1,000 kɔmaa no, na ofii ase de memaa nkurɔfo. Saa kwan yi so na wɔnam fii ase guu Yehowa Ahenni aba no wɔ Tonga ahemman mu.

NSUPƆW 171 na ɛka bom yɛ Tonga supɔw no, na nnipa te emu 45 so. Wɔfrɛ nea ɛso sen biara wom no sɛ Tongatapu, na ɛwɔ kilomita 2000 wɔ Auckland a ɛwɔ New Zealand no atifi fam apuei. James Cook, Britaniani a okyin hwehwɛ nsase so a wagye din a ɔtraa ase wɔ afeha a ɛto so 18 mu no too nsupɔw a atew ne ho yi din sɛ Nnamfo Nsupɔw.

Nsupɔw akuw abiɛsa na ɛka bom yɛ Tonga a nnipa dodow a wɔte hɔ yɛ 106,000, na nea ɛyɛ atitiriw wom ne Tongatapu, Ha’apai, ne Vava’u. Yehowa Adansefo asafo anum a ɛwɔ hɔ no mu abiɛsa wɔ Tongatapu a nnipa a wɔte hɔ no dɔɔso sen biara no, biako Ha’apai ɛna nea ɛka ho no wɔ Vava’u. Sɛnea ɛbɛyɛ na Yehowa Adansefo aboa nkurɔfo ma wɔabɛyɛ Yehowa nnamfo nti wɔwɔ asɛmpatrɛwfo fie ne nhoma asekyerɛfo dwumadibea wɔ ahenkurow Nuku’alofa mu.—Yesaia 41:8.

Efi 1930 reba no, ná nnipa pii nim sɛ Charles Vete yɛ Yehowa Dansefo, ɛwom sɛ wɔbɔɔ no asu wɔ 1964 mu de. Afoforo kɔkaa ne ho ma wɔyɛɛ adansedi adwuma no, na wosii Ahenni Asa a etumi fa nnipa 30 wɔ 1966 mu. Wɔtew asafo a na Ahenni adawurubɔfo a wɔwom yɛ 20 wɔ Nuku’alofa wɔ 1970 mu.

Efi saa bere no, wotumi hu pefee sɛ odiyifo Yesaia nsɛm yi abam wɔ Tonga nsupɔw  no so: “Wɔnhyɛ [Yehowa, NW] anuonyam, na wɔnka n’ayeyi nsu ano aman mu.” (Yesaia 42:12) Ahenni adwuma no akɔ so atrɛw, na wɔaboa nnipa pii ma wɔne Yehowa anya abusuabɔ. Nnipa a wɔn dodow sen biara a ɛyɛ 407 na wɔkɔɔ ɔmantam nhyiam a wɔyɛe wɔ Nuku’alofa wɔ 2003 mu, na wɔbɔɔ nnipa 5 asu. Nnipa 621 na wɔkɔɔ Nkaedi no ase wɔ 2004 mu, na eyi kyerɛ sɛ wobetumi anya nkɔso.

Wɔkwati Akɛsesɛm

Nanso wɔ ahenkurow no akyi no, ɛda adi sɛ na wɔda so hia Ahenni adawurubɔfo wɔ mmeae foforo. Sɛ nhwɛso no, ehia sɛ nnipa 8,500 a wɔte Ha’apai nsupɔw 16 no so no te Bible mu nokware no ho nsɛm pii. Ha’apai nsupɔw no da fam, mmɛ wɔ so na ne mpoano no woware na ɛso anhwea yɛ fitaa. Po no mu tew yiye, na mpɛn pii no wubetumi ahu ase bɛboro mita 30. Emu nkoko a mpataa ahorow bɛboro ɔha a wɔn ho yɛ fɛ wom no mu aguare yɛ anigye yiye. Wɔn nkuraa taa yɛ nketewa. Ɛwom sɛ afie no nyɛ akɛse de, nanso wosii ma etumi gyina ahum ano.

Mango ne aborɔfo nkate nnua ma wonya onwini ne aduan. Nnuan a wɔkɔfa bɛnoa no gye wɔn bere mu fã kɛse no ara. Wɔ prakonam akyi no, nsupɔw no sotefo di po mu nam pii a wonya no. Mfuw a mmusua yɛ no ma wonya nnuan ne atosode. Nnuaba te sɛ akutu wɔ hɔ; kube nnua ne kwadu abu so. Wɔkyerɛ wɔn mma nhabannuru, nhaban, abon, ne nnua ntini a wonim no.

Nokwarem no, ade a ɛsom bo paa wɔ Ha’apai ne hɔfo a wɔpɛ nnipa asɛm a wotumi tra beae a asomdwoe wɔ yi. Wɔkwati akɛsesɛm. Mmea dodow no ara nwene nneɛma te sɛ nkɛntɛn, tapa ntama, ne kɛtɛ. Sɛ Tonga mmea reyɛ adwuma a, wɔtra nnua a ase wɔ onwini ase, bɔ nkɔmmɔ, to dwom serew, na mpɛn pii no na wɔn mma di agoru anaa wɔada wɔ baabi a ɛbɛn wɔn. Sɛ asorɔkye no ano brɛ ase a, mmea no taa kɔhwehwɛ adɔde ne nsunam foforo wɔ nsu no mu abotan no mu de yɛ nnuan a ɛyɛ dɛ.

Mmarima dodow no ara de wɔn mmere dɔw mfuw, yi mpataa, sen akorow, na wosiesie asawu. Mmarima, mmea ne mmofra, de ahyɛmma a wɔakuru so di nsupɔw no so akɔneaba de kɔsrasra wɔn abusuafo, de kɔ ayaresabea, de kodi gua.

Asɛmpa no Du Akyirikyiri

Asɛmpatrɛwfo baanu ne akwampaefo baanu bi kɔɔ hɔ wɔ Nkaedi bere no mu wɔ 2002 mu wɔ tebea pa yi mu. Ná wɔne Ha’apaifo di nkitaho wɔ bere ne bere mu dedaw, na na wɔanya nhoma a Yehowa Adansefo tintimii a na wɔne wɔn resua Bible mpo.

Ná Bible akyerɛkyerɛfo baanan a wɔkɔsraa wɔn no kura botae abiɛsa: sɛ wɔde Bible ho nhoma bɛmema wɔn, wɔne wɔn befi Bible adesua ase, na wɔato nsa afrɛ anigyefo akɔ Awurade Anwummeduan no ase. Wotumi duu botae ahorow abiɛsa yi nyinaa ho. Nnipa aduakron ason gyee nsa a wɔto frɛɛ wɔn sɛ wɔmmra Yesu wu Nkaedi no ase no so. Ɛwom sɛ osu tɔɔ pii na na mframa rebɔ denneennen de, nanso wɔn mu binom de  ahyɛmma tuu kwan no. Esiane sɛ na wim tebea nye nti, wɔn mu pii daa baabi a wɔyɛɛ Nkaedi no, na ade kyee no wɔsan kɔɔ wɔn fie.

Nneɛma anyɛ mmerɛw amma nea ɔmaa Nkaedi kasa no. Ɔsɛmpatrɛwfo a ɔmaa kasa no kae sɛ: “Na ɛyɛ den yiye sɛ wode ɔman foforo so kasa bɛma Nkaedi kasa abien da koro anwummere. Wubetumi atwa sɛnea me yam hyehyee me no ho mfonini wɔ w’adwenem. Hwɛ sɛnea mpaebɔ boaa me! Mekaee nsɛmfua ne ɔkasamu a menkae sɛ masua.”

Esiane sɛ asɛmpakafo no kɔboaa anigyefo a wɔwɔ wɔ Ha’apai nsupɔw no so nti, wɔbɔɔ awarefo baanu bi a wɔte hɔ no asu. Mmea no biako kunu kyerɛɛ Adansefo no nhoma ho anigye bere a na wɔretete no ma wadi sɔfo wɔ asɔre a ɛwɔ hɔ no mu no.

Ɛwom sɛ ɔbarima yi ne ne yere yɛ ahiafo de, nanso sɛ wɔbɔ wɔn din wɔ asɔre no mu bere a wɔbɔ wɔn afe afe afɔre no a, wɔtaa yi sika kɛse. Ɔdansefo bi a na wakɔ wɔn nkyɛn pɛn no ka kyerɛɛ ɔbarima no sɛ ommue ne Bible no mu na ɔnkenkan 1 Timoteo 5:8. Ɔsomafo Paulo kyerɛwee sɛ: “Sɛ obi nhwɛ n’ankasa ne nnipa ne, ne titiriw no, ne fiefo a, wapa gyidi, na ɔyɛ onipa bɔne sen nea onnye nni.” Bible nnyinasosɛm yi kaa ne kunu no koma. Ohui sɛ bere a otua sika pii a asɔre no gye fi ne hɔ no, na ɛno mma ɔmmfa n’abusua ahiade atitiriw mma wɔn. Bere a edi hɔ a na wogyigye sika wɔ asɔre no mu no, na okura sika wɔ ne ho de nanso wamma ne werɛ amfi 1 Timoteo 5:8 no. Bere a wɔbɔɔ ne din no, ɔde akokoduru ka kyerɛɛ ɔsɔfo no sɛ n’abusua ahiade ho hia kɛse. Esiane eyi nti, asɔre no mpanyimfo kasa tiaa awarefo no wɔ asɔremma no anim.

Bere a ɔbarima no ne ne yere ne Yehowa Adansefo suaa Bible no akyi no, wɔbɛyɛɛ asɛmpa no ho adawurubɔfo. Ɔbarima no ka sɛ: “Bible mu nokware no ama masakra. Memmɔ m’abusua atirimɔden bio. Memmow nsa bio. Nnipa a wɔwɔ m’akuraa ase no tumi hu nsakrae a nokware no ama aba m’asetra mu no. Mewɔ anidaso sɛ wobenya nokware no ho dɔ sɛnea me nso meyɛ no.”

Wɔde Quest no Hwɛhwɛɛ Nkurɔfo

Asram kakra wɔ 2002 Nkaedi no akyi no, hyɛn foforo de nneɛma bi a ɛsom bo kɔɔ Ha’apai a ɛwɔ akyirikyiri no. Hyɛn bi a wɔfrɛ no Quest a ne tenten yɛ mita 18 a efi New Zealand no kɔfaa Tonga nsupɔw no so. Ná Gary ne Hetty ne wɔn babea Katie na wɔte mu. Ná Tonga anuanom baakron ne asɛmpatrɛwfo baanu kaa wɔn ho kɔɔ hɔ mprenu. Adansefo a wɔwɔ hɔ no de ahokokwaw kaa hyɛn no, ɛtɔ bere bi a na wɔka fa nsu mu abotan ntam. Na ɛnyɛ akwantu a wɔde gye wɔn ani. Wɔn a wɔte mu no kɔe sɛ wɔrekɔkyerɛkyerɛ Bible mu nokware no. Wɔfaa po kɛse no so kɔɔ nsupɔw 14 so. Ná wɔnkaa Ahenni ho asɛmpa no wɔ saa nsupɔw no bi so da.

Nnipa no yɛɛ wɔn ade dɛn wɔ ho? Wɔde ahopere, anigye ne ahɔhoyɛ su a wɔda no adi wɔ supɔw no so no maa asɛnkafo no akwaaba. Bere a nsupɔw no sofo huu nea enti a wɔabɛsra wɔn no, wofii wɔn komam daa anisɔ adi. Adansefo a wɔkɔɔ  supɔw no so no hui pefee sɛ ɛsotefo no kyerɛ obu ma Onyankopɔn Asɛm na wɔma honhom fam nneɛma ho hia wɔn.—Mateo 5:3.

Na wɔn a wɔkɔ hɔ no taa tra nnua ase a nnipa a wɔwɔ Kyerɛwnsɛm mu nsɛmmisa pii atwa wɔn ho ahyia. Sɛ ade sa a, wɔtoa Bible mu nkɔmmɔbɔ no so wɔ wɔn afie mu. Supɔw no biako sofo srɛɛ Adansefo a wɔrefi hɔ akɔ no denneennen sɛ: “Monnkɔ! Sɛ mokɔ a, hena na obebua yɛn nsɛmmisa no?” Ɔdansefo biako kae sɛ: “Bere nyinaa ɛyɛ den sɛ yebegyaw nnipa pii a wɔte sɛ nguan a nokware no ho kɔm de wɔn no hɔ akɔ. Yɛagu nokware aba pii.” Bere a Quest no duu supɔw biako so no, Adansefo no hui sɛ obiara fura ayitama. Na aban nipa a ɔwɔ kurom hɔ no yere awu. Ne kunu no daa anuanom ase sɛ wɔbɛkaa Bible mu awerɛkyekyesɛm kyerɛɛ wɔn.

Na ɛnyɛ mmerɛw sɛ wɔbɛkɔ nsupɔw no bi so. Hetty kyerɛkyerɛ mu sɛ: “Supɔw no biako nni baabi pa a nhyɛmma gyina, abotan atenten nkutoo na esisi po no mu. Na yɛn hyɛn ketewaa bi nkutoo na yetumi de kɔ hɔ. Na ɛsɛ sɛ yedi kan totow yɛn bag ma nnipa pii a wogyinagyina mpoano hɔ no. Afei, sɛ hyɛn no du abotan no ano a, yehuru fi mu ansa na asorɔkye no atwe akɔ.”

Nanso, ɛnyɛ hyɛn no mufo nyinaa na wɔwɔ akokoduru. Adapɛn abien akyi no, hyɛn no so panyin kyerɛw ba a wɔsan baa Tongatapu no ho asɛm sɛ: “Na ɛsɛ sɛ yetwa nnɔnhwerew 18 kwan. Esiane sɛ na ayarefo wɔ yɛn mu nti, na yentumi ntwa kwan no ntɛmntɛm. Na ɛyɛ yɛn anigye sɛ yɛbɛsan akɔ yɛn kurom nanso na ɛyɛ yɛn awerɛhow nso sɛ yɛagyaw nnipa pii a wɔate Ahenni ho asɛm no hɔ. Yɛagyaw wɔn ama Yehowa, na ne honhom kronkron ne abɔfo reboa wɔn ma wɔanya nkɔso wɔ Onyankopɔn som mu.”

Nsupɔw a Ɛbɛsow Ahenni Aba

Bere a Quest no kɔe akyi bɛyɛ asram asia no, wɔpaw akwampaefo atitiriw baanu, Stephen ne Malaki, sɛ wɔnkɔka asɛm no wɔ Ha’apai supɔw so. Wɔkɔkaa awarefo baanu a na wɔbɔɔ wɔn asu nkyɛe no ho ma wɔkyerɛkyerɛɛ afoforo Bible no. Ná adawurubɔfo no ne afoforo bɔ nkyerɛkyerɛ ho nkɔmmɔ a ɛyɛ anigye, na wɔde Bible no di dwuma yiye.

Wɔ December 1, 2003 mu no, wɔtew asafo wɔ Ha’apai, nea ɛto so anum wɔ Tonga. Mmofra pii ka wɔn a wɔkɔ asafo nhyiam no ho. Wɔasua sɛnea wotie asɛm. Wɔtra ase komm na wɔwɔ ɔpɛ sɛ wɔbɛma mmuae bere a atiefo nya adesua no mu kyɛfa no. Ɔmansin sohwɛfo no kae sɛ “Me Nhoma a Ɛka Bible Mu Nsɛm ho nimdeɛ a wɔwɔ no kyerɛ sɛ awofo ntoto asɛyɛde a wɔwɔ sɛ wɔde Bible mu nokware bedua wɔn mma komam no ase koraa.” Ɛda adi sɛ wobenya Yehowa nnamfo pii wɔ saa nsupɔw no so.

Bɛboro mfe 70 ni a Charles Vete kyerɛɛ nhomawa Where Are the Dead? no ase kɔɔ ne kurom kasa a ɛne Tonga mu, na onnim sɛ Ahenni aba no begye ntini wɔ ne manfo komam saa. Ɛwom sɛ mfiase no na wɔyɛ nnipa kakraa bi de, nanso Yehowa akɔ so ahyira asɛmpa no ho dawurubɔ a ɛretrɛw bere nyinaa wɔ baabi a atew ne ho no so. Ɛnnɛ, yebetumi aka sɛ Tonga ka nsupɔw a ɛwɔ akyirikyiri a ɛsotefo redan aba Yehowa nkyɛn no ho. (Dwom 97:1; Yesaia 51:5) Yehowa nnamfo pii wɔ “Nnamfo Nsupɔw” no so nnɛ.

[Mfonini wɔ kratafa 8]

Charles Vete, 1983

[Mfonini wɔ kratafa 9]

Ɔrenwene tapa ntama

[Mfonini wɔ kratafa 10]

Wɔde “Quest” no trɛw asɛmpa no mu wɔ Tonga

[Mfonini wɔ kratafa 11]

Nsɛm asekyerɛfo a wɔwɔ Nukuʹalofa

[Mfonini Ahorow Fibea wɔ kratafa 9]

Ɔrenwene tapa ntama: © Jack Fields/CORBIS; mfonini no akyi adwinni a ɛwɔ kratafa 8 ne 9, ne mpataayi: © Fred J. Eckert