“Dɛn na Ɛboa Wo?”

SAA asɛm yi a ɔhɔho bi bisaa Muriel a ɔwɔ mma baasa wɔ adidibea bi no maa no ho dwiriw no. Na Muriel de ne mma no akohu oduruyɛfo bi na wamfi hɔ ntɛm. Na onni bere a ɛbɛma ɔde wɔn akɔ fie akodi anwummeduan ansa na wɔakɔ Kristofo nhyiam. Enti ɔde mmofra no kɔɔ adidibea bi a ɛbɛn hɔ sɛnea ɛbɛyɛ a wobenya biribi adi.

Bere a wɔreyɛ awie adidi no, papa bi bɛn Muriel ka kyerɛɛ no sɛ: “Na merehwɛ wo fi bere a wobaa ha nyinaa. Na mahu nsonsonoe kɛse bi wɔ wo mma no ne mmofra a metaa hyia wɔn no ho. Wunim sɛnea mmofra wɔbere apon ne nkongua fa. Wɔde wɔn nan gu ɔpon so. Na wopiapia nkongua no. Nanso wo mma no te hɔ komm na wɔwɔ suban pa nso. Dɛn na ɛboa wo?”

Muriel buae sɛ: “Me ne me kunu ne yɛn mma no sua Bible no daa, na yɛbɔ mmɔden de nea yesua no di dwuma wɔ yɛn asetram. Yɛyɛ Yehowa Adansefo.” Papa no kae sɛ: “Meyɛ Yudani na meka wɔn a wonyaa wɔn ti didii mu wɔ Okunkɛse no mu no ho. Mekae sɛ mihui sɛ wɔtaa Yehowa Adansefo wɔ Germany. Na ɛno mpo no wohu sɛ wɔyɛ soronko. M’ani agye wo mma no su pa no ho yiye. Ɛsɛ sɛ mehwehwɛ mo som no mu.”

Bible no yɛ akwankyerɛ nhoma pa a wɔde tete mmofra. Yehowa Adansefo ani gye ho sɛ wɔbɛboa afoforo ma wɔanya mfaso afi akwankyerɛ a ɛwɔ Kyerɛwnsɛm no mu no so. Yɛde anigye to nsa frɛ wo sɛ pene saa mmoa no so.