Anwonwade a Woahu!

ASƐMFUA “anwonwade” no wɔ nkyerɛase foforo a ɛne “asɛm, biribi, anaasɛ adeyɛ bi a ɛyɛ soronko koraa.” Yɛn nyinaa ahu anwonwade a ɛte saa pɛn, a ɛnyɛ Onyankopɔn na ɔyɛe.

Esiane sɛ adesamma anya nimdeɛ wɔ abɔde mu mmara ho nti, wɔatumi ayɛ nneɛma bi a bere a atwam no na wosusuw sɛ wontumi nyɛ no. Sɛ nhwɛso no, mfe ɔha bi a abɛsen kɔ no, na ebetumi aba sɛ nnipa pii susuw sɛ wɔrentumi nyɛ nea kɔmputa, television, ahunmu mfiridwuma ho nimdeɛ, ne nneɛma a ɛtete saa a wɔatumi ayɛ wɔ nnɛ bere yi mu ama abu so no.

Esiane sɛ nyansahufo bi ahu sɛ wonni Onyankopɔn abɔde a ɛyɛ nwonwa ho nimdeɛ pii nti, wogye tom sɛ wontumi nka no pen sɛ hwee nni hɔ a entumi nsi. Nea wobetumi aka  ara ne sɛ ebia biribi ntumi nsi. Enti wɔhwɛ kwan sɛ nyansahufo betumi ayɛ “anwonwade” bi daakye.

Sɛ yɛde nea “anwonwade” kyerɛ ankasa mpo reka nneɛma a tumi a “ɛboro nnipa de so” yɛ ho asɛm a, yebetumi aka sɛ yɛn mu biara ahu bi pɛn. Sɛ nhwɛso no, yehu owia, ɔsram, nsoromma—nneɛma nyinaa a Ɔbɔadeɛ no ankasa a ne “tumi boro nnipa de so” yɛe. Bio nso, hena na obetumi akyerɛ sɛnea nipadua no yɛ adwuma yiye fa? sɛnea amemene no yɛ adwuma? anaasɛ ɔkwan a akokoaa a ɔda yafunu mu fa so nyin mu pɛpɛɛpɛ? Nhoma a ɛne The Body Machine no kyerɛkyerɛ mu sɛ: “Nkate a ɛwɔ nipadua mu a ɛkanyan no ma ɛyɛ adwuma pɛpɛɛpɛ no te sɛ afiri hwanyann bi, afiri a n’ankasa yɛ adwuma, na etumi dannan ne ho, kɔmputa a n’ankasa yɛ ne ho adwuma—eyi yɛ biribi a ɛyɛ nwonwa wɔ akwan pii so.” Nokwarem no, Onyankopɔn a ɔbɔɔ “nipadua” no yɛ anwonwade, anwonwade a ɛma yɛn ho kɔ so dwiriw yɛn. Anwonwade ahorow pii nso wɔ hɔ a woahu pɛn, a ebia wunnim sɛ ɛno nso yɛ anwonwade.

So Nhoma Betumi Ayɛ Biribi a Ɛyɛ Nwonwa?

Nhoma biara nni hɔ a wɔakyekyɛ pii sen Bible no. So wuhu Bible no sɛ anwonwade? So yebetumi aka sɛ “tumi a ɛboro nnipa de so” na ɛma ɛbae? Yiw, nnipa na wɔkyerɛw Bible no, nanso wɔka sɛ ɛyɛ Onyankopɔn nsusuwii na wɔkyerɛwee na ɛnyɛ wɔn de. (2 Samuel 23:1, 2; 2 Petro 1:20, 21) Susuw ho hwɛ. Nnipa 40 a wɔtraa ase wɔ mfe bɛboro 1,600 mu na wɔkyerɛwee. Na ɛsono nnwuma a na wɔn mu biara yɛ, ebinom yɛ nguanhwɛfo, asraafo, apofofo, aban adwumayɛfo, aduruyɛfo, asɔfo, ne ahemfo. Nanso, wɔn nyinaa tumi kyerɛw anidaso nsɛm a abirabɔ nnim na ɛyɛ nokware.

Yehowa Adansefo sua Bible no yiye na wogye tom sɛ “ɛnyɛ sɛ nnipa asɛm, na mmom sɛ Onyankopɔn asɛm” sɛnea ɔsomafo Paulo kyerɛwee no. (1 Tesalonikafo 2:13) Mfe pii a atwam ni no, wɔn nhoma ahorow no akyerɛkyerɛ sɛnea Bible mu nsɛm a wɔka sɛ ɛbɔ ne ho abira no betumi ne ho ahyia mu. Bible mu nsɛm a abirabɔ nnim no da no adi sɛ Onyankopɔn ankasa na ɔkyerɛw. *

Nhoma biara nni hɔ a nkurɔfo atu wɔn ani asi so sɛ wɔbɛsɛe no sen Bible no. Nanso, ɛda so ara wɔ hɔ, na anyɛ yiye koraa no ɛwɔ kasa ahorow bɛboro 2,000 mu. Sɛnea wɔakora nhoma no ankasa ne emu nsɛm so ma ɛyɛ pɛpɛɛpɛ no di adanse sɛ Onyankopɔn de ne ho gyee mu. Bible no yɛ anwonwade ankasa!

Anwonwade a “Ɛwɔ Nkwa na Ahoɔden Wɔ Mu”

Anwonwade ahorow bi a abɛsen kɔ—anwonwakwan so ayaresa ne owusɔre ahorow—no nsi bio. Nanso yɛwɔ nea yetumi gyina so nya awerɛhyem sɛ wɔ Onyankopɔn wiase foforo no mu no, anwonwade ahorow a ɛte saa besi bio, saa bere no de ebesi wɔ wiase nyinaa. Ɛde daa ahotɔ bɛba na ɛbɛkyɛn nea mprempren yenim no.

Bible no a wɔnam anwonwakwan so de mae  no betumi ayɛ biribi a ɛte sɛ anwonwade nnɛ mpo denam ka a ɛbɛka nnipa ma wɔayɛ nsakrae wɔ wɔn nnipa su mu so. (Hwɛ ho nhwɛso bi wɔ adaka, “Tumi a Ɛwɔ Onyankopɔn Asɛm Mu,” no mu wɔ kratafa 8.) Hebrifo 4:12 ka sɛ: “Onyankopɔn asɛm wɔ nkwa, na ahoɔden wɔ mu, na ano yɛ nnam sen nkrante anofanu biara, na ehwirew mu kodu sɛ ɛpaapae ɔkra ne honhom, akwaa ne hon mu, na ɛyɛ koma nsusuwii ne adwene temmufo.” Yiw, wɔde Bible no adi dwuma kɛse de asakra nnipa bɛboro ɔpepem asia a wɔwɔ wɔ wiase nyinaa asetra, ma wɔanya atirimpɔw wɔ asetra mu na ama wɔanya daakye anidaso a ɛyɛ nwonwa.

Adɛn nti na womma Bible no nyɛ anwonwade wɔ w’asetra mu?

[Ase hɔ asɛm]

[Adaka/Mfonini wɔ kratafa 7]

NA WAWU DEDAW ANAASƐ ONWUI?

Sɛnea Yohane 19:33, 34 kyerɛ no, na Yesu awu dedaw bere a “asraafo no mu biako de peaw wɔɔ ne mfem, na ntɛm ara mogya ne nsu fii mu bae” no. Nanso, nkyerɛase horow bi ka wɔ Mateo 27:49, 50 sɛ na Yesu nwui bere a asɛm yi sii no. Adɛn nti na ɛsono nea obiara ka?

Mose Mmara no barae sɛ wonnnyaw ɔdebɔneyɛfo wɔ asɛndua so anadwo mu nyinaa. (Deuteronomium 21:22, 23) Nanso wɔ Yesu mmere so no, sɛ na wɔbɔ ɔdebɔneyɛfo bi duam kosi anwummere na sɛ onwui a, na nea wɔtaa yɛ ne sɛ wobubu n’anan, na ama wawu ntɛm. Na ɔrentumi ntene ne mu wɔ dua no so na watumi ahome yiye. Nea ɛmaa asraafo no bubuu nnebɔneyɛfo baanu a na wɔka Yesu ho no anan nanso wɔammubu Yesu de mu no ne sɛ wosusuwii sɛ na wawu. Ɛbɛyɛ sɛ ɔsraani no de peaw wɔɔ ne mfem sɛnea ɛbɛyɛ a ebeyi adwenem naayɛ biara afi hɔ, na akyiri yi wannyan amma wɔanni atoro anka sɛ wanya owusɔre.

Nsɛm a ɛwɔ Mateo 27:49, 50 no nka nsɛm nnidiso nnidiso sɛnea esisii no. Ɛka sɛ: ‘Obi foforo faa peaw de wɔɔ ne mfem maa mogya ne nsu bae. Yesu san teɛɛm denneennen na ogyaa ne honhom mu.’ Nanso nsɛm a wɔakyerɛw akyeakyea no no nni tete Bible nsaano nkyerɛwee nyinaa mu. Animdefo bi gye di sɛ ɛyɛ nsakrae a wɔyɛɛ no akyiri yi wɔ Yohane Asɛmpa no mu nanso wɔamfa anhyɛ baabi pa. Esiane eyi nti, nkyerɛase pii de saa asɛm no hyɛ nkahyemde mu anaa wɔkyerɛw nsɛm bi wɔ ase de kyerɛkyerɛ mu, anaasɛ woyi fi mu koraa.

Westcott ne Hort nkyerɛwee a wɔde dii dwuma kɛse wɔ New World Translation nkyerɛase no mu no de asɛm no hyɛ nkahyemde abien mu. Ɛka sɛ “adwene paa a yebetumi anya ne sɛ ɛbɛyɛ akyerɛwfo no na wɔde saa asɛm no hyɛɛ mu.”

Enti adanse a edi mu ne sɛ Yohane 19:33, 34 yɛ nokwasɛm ma enti na Yesu awu dedaw bere a Roma sraani no de peaw wɔɔ no no.

 [Adaka/Mfonini wɔ kratafa 8]

TUMI A ƐWƆ ONYANKOPƆN ASƐM MU

Detlef a onnya nnii mfe aduonu a n’awofo agyae aware no de ne ho kɔhyɛɛ nnubɔnenom, asanom, ne nnwom a ano yɛ den boro so tie mu. * Ɔde ne ho kɔbɔɔ basabasayɛfo kuw bi ho, na ankyɛ na polisifo kyeree no esiane ne subammɔne no nti.

Wɔ afe 1992 mu no, basabasayɛfo 60 ne apoobɔfo 35 koo ntɔkwaw wɔ adidibea ne asanombea bi wɔ Germany apuei fam. Wɔboroo apoobɔfo no mu biako a wɔfrɛ no Thomas pasaa pirapiraa no ma owui. Bere a wodii wɔn a wodii ntɔkwaw no anim no mu pii a Detlef ka ho asɛm a wɔkaa ho asɛm pii wɔ atesɛm nkrataa mu akyi no, wɔde wɔn koguu afiase.

Bere a woyii Detlef fii afiase wɔ bere tiaa bi akyi no, Yehowa Ɔdansefo bi maa no kratawa bi. Kratawa no asɛmti ne “Dɛn Nti na Ɔhaw Ahyɛ Asetra Mu Ma Saa?” Detlef huu nokwasɛm a ɛwɔ nea kratawa no ka no mu ntɛm ara, na ofii ase ne Adansefo no suaa Bible no. Eyi sesaa n’asetra koraa. Wayɛ Yehowa Ɔdansefo a ɔyɛ nsi fi afe 1996.

Siegfried a kan no na ɔno nso yɛ ɔpoobɔfo a na n’adamfo paa ne Thomas, aberante a wokum no no nso bɛyɛɛ Ɔdansefo akyiri yi, na mprempren ɔyɛ asafo mu panyin. Bere bi a Siegfried kɔmaa Bible mu ɔkasa wɔ Detlef asafo mu no (nea ɛkɔbae ne sɛ na Thomas maame nso taa kɔ nhyiam wɔ hɔ), Detlef too nsa frɛɛ no ma wokodidii. Bɛyɛ mfe du a atwam ni no, na anka wɔnka koraa. Nanso nnɛ, wohu wɔn sɛ anuanom.

Detlef ne Siegfried hwɛ kwan sɛ wɔbɛma Thomas akwaaba aba nkwa mu wɔ asase so paradise no mu. Detlef ka sɛ: “Eyi ho a misusuw kɛkɛ no ma metew nusu. Manu me ho paa wɔ nea meyɛe no ho.” Wɔn baanu nyinaa wɔ ɔpɛ sɛ wɔbɛboa Thomas saa bere no, sɛnea ɛnnɛ wɔboa afoforo ma wobehu Yehowa na wonya anigye wɔ anidaso a Bible no de ma no mu.

Yiw, eyi yɛ tumi a ɛwɔ Onyankopɔn Asɛm mu!

[Ase hɔ asɛm]

[Mfonini wɔ kratafa 6]

Nipadua no yɛ abɔde a ɛyɛ nwonwa

[Asɛm Fibea]

Anatomy Improved and Illustrated, London, 1723, Bernardino Genga