So Wode Wo Ho Toto Afoforo Ho?

YƐN mu hena na onhyiaa obi a ne ho yɛ fɛ, ɛte sɛ nea wagye din, ɔte nsɛm ase ntɛm, anaasɛ ɔbɔ mmɔden yiye wɔ sukuu sen no? Ebia afoforo wɔ apɔwmuden anaa adwuma a akomatɔyam kɛse wom, wodi yiye, anaa ɛte sɛ nea wɔwɔ nnamfo pii sen yɛn. Ebia wɔwɔ ahonyade pii, sika pii, kar foforo, anaasɛ ɛte sɛ nea wɔwɔ anigye kɛse sen yɛn. Sɛ yehu nneɛma a ɛtete saa a, so yɛde yɛn ho toto afoforo ho? So yentumi nkwati sɛ yɛde yɛn ho bɛtoto afoforo ho? Dɛn nti na ebia Kristoni bɛpɛ sɛ ɔkwati eyinom? Na ɔkwan bɛn so na yebetumi ama yɛn ani asɔ nea yɛwɔ a yɛremfa yɛn ho ntoto obiara ho?

Nea Enti Ne Bere a Ebia Yɛde Yɛn Ho Bɛtoto Afoforo Ho

Adwene biako a ebia ɛma nkurɔfo de wɔn ho toto afoforo ho ne sɛ ɛma sɛnea wobu wɔn ho no yɛ kɛse. Nkurɔfo koma taa tɔ wɔn yam bere a wohu sɛ asi wɔn yiye te sɛ wɔn atipɛnfo no. Adwene foforo nso ne sɛ ntotoho yɛ mmɔden a yɛbɔ sɛ yebehu sɛnea yɛte no yiye, yebehu nea yebetumi ayɛ ne nea yentumi nyɛ. Yɛhwɛ nea afoforo atumi ayɛ. Sɛ wɔte sɛ yɛn wɔ akwan pii so na wɔatumi adu botae bi ho a, ebia yɛbɛte nka sɛ yebetumi adu botae a ɛtete saa ara ho.

Nnipa a wɔsɛ wɔn ho—wokura bɔbeasu koro, mfe a wɔadi yɛ pɛ, wɔn asetra mu gyinabea yɛ pɛ, na wonim wɔn ho no na wɔtaa de wɔn ho toto wɔn ho wɔn ho ho. Sɛ ɛsono yɛn koraa wɔ obi ho a, yɛntaa mfa yɛn ho ntoto no ho. Sɛ yɛbɛka wɔ ɔkwan foforo so a, ɛbɛyɛ den sɛ abeawa bi de ne ho bɛtoto obi a ɔhyɛ ntade ahorow de kyerɛ ma nkurɔfo hwɛ no ho sen sɛ ɔde ne ho bɛtoto ne mfɛfo sukuufo ho.

Nneɛma bɛn na yɛde yɛn ho toto afoforo ho wom? Yebetumi de yɛn ho atoto afoforo ho wɔ biribiara anaa su biara a wobu no sɛ ɛsom bo wɔ yɛn mpɔtam hɔ—sɛ ebia nyansa, ahoɔfɛ, ahonyade, ntade mu. Nanso, yɛtaa de nneɛma a yɛn ani gye ho na ɛyɛ ntotoho. Sɛ nhwɛso no, ɛda adi sɛ, sɛ yɛn ani nye bɔɔlbɔ ho a, yɛremfa yɛn ho ntoto obi a onim bɔ ho.

 Ntotoho de nneɛma pii ba, ɛma obi koma tɔ ne yam anaa onya adwenemhaw, ɛma ɔkamfo afoforo na onya ɔpɛ sɛ obesuasua wɔn anaasɛ ɔhaw na ɔfa wɔn ho tan. Saa nkate yi bi betumi apira yɛn, na ɛne Kristofo su horow nhyia.

Ntotoho a Ɛde Akansi Ba

Wɔn a wɔbɔ mmɔden sɛ wɔbɛyɛ “nkonimdifo” bere a wɔde wɔn ho to afoforo ho no da akansi honhom adi. Wɔpɛ sɛ wɔkyɛn afoforo, na wɔn ani nsɔ sɛnea wɔte no gye sɛ wɔte nka sɛ wɔkyɛn saafo no. W’ani rennye sɛ wo ne saafo no bɛbɔ. Wɔne afoforo ntam adamfofa ne abusuabɔ sɛe. Ɛnyɛ ahobrɛase nko na saafo no nni, na mmom wɔntaa mfa Bible mu afotu a ɛkyerɛ sɛ yɛnnɔ yɛn yɔnkonom no nni dwuma nso, efisɛ wɔn su betumi ama afoforo ate nka sɛ wɔba fam.—Mateo 18:1-5; Yohane 13:34, 35.

Ma a wɔma nkurɔfo te ka sɛ “wɔba fam” no pira wɔn wɔ ɔkwan bi so. Sɛnea nhoma kyerɛwfo bi kyerɛ no, “yedi yaw kɛse wɔ yɛn nkogudi ho bere a ɛte sɛ nea nnipa a yɛne wɔn wɔ tebea koro mu no anya nneɛma a yɛpɛ no.” Enti akansi honhom kanyan nitan, abufuw, na ɛmma yɛnkyerɛ obi ho anigye esiane ahode, yiyedi, dibea, hokwan ahorow, ne nea ɛkeka ho a ɔwɔ nti. Eyi ma yesi akan pii—ade bɔne a ɛbɛkɔ so bere nyinaa. Bible no kasa tia “akansi.”—Galatifo 5:26, NW.

Aniberefo bɔ mmɔden sɛ wɔbɛbɔ obu a wɔwɔ ma wɔn ho a asɛe no ho ban denam nea wɔn atamfo atumi ayɛ a wɔbrɛ no ase no so. Ebia ɛbɛyɛ te sɛ nea saa nneyɛe no yɛ biribi ketewaa bi, nanso sɛ yɛanhu na yɛansiw ano a, ebetumi ama yɛayɛ bɔne a anibere wom. Susuw Bible mu nsɛm abien bi a nitan de bae ho hwɛ.

Bere a Isak kɔtraa Filistifo no mu no, onyaa “nguankuw ne anantwikuw ne nkoa pii. Na Filistifo ani beree no.” Nea wɔyɛe ne sɛ wosiw abura a Isak agya Abraham tui no, na wɔn hene no ka kyerɛɛ Isak sɛ omfi hɔ nkɔ. (Genesis 26:1-3, 12-16) Nea wɔyɛe no yɛ anibere bɔne a ɛsɛe ade. Na ɛnyɛ wɔn dɛ sɛ Isak redi yiye wɔ wɔn ntam.

Mfehaha pii akyi no, Dawid daa ne ho adi sɛ ɔdɔmmarima wɔ akono. Israelfo mmea dii nea otumi yɛe no ho ahurusi too dwom yi sɛ: “Saul akum n’apem, na Dawid akum ne pedu.” Ɛwom sɛ Saul nyaa ayeyi bi de, nanso obuu saa ntotoho no sɛ ɛbrɛ n’ase, na ɛkanyan nitan wɔ ne komam. Efi saa bere no, onyaa Dawid ho menasepɔw. Ankyɛ na ɔbɔɔ mmɔden a edi kan sɛ obekum Dawid. Hwɛ sɛnea nitan betumi ama obi ayɛ atirimɔdenne kɛse!—1 Samuel 18:6-11.

Enti sɛ yɛde yɛn ho toto afoforo ho, wɔ nea wɔatumi ayɛ anaa hokwan ahorow a wɔwɔ ho na ɛkanyan nitan anaa akansi a, ɛsɛ sɛ yɛhwɛ yiye! Eyinom yɛ nkate a ebedi yɛn awu na ɛne Onyankopɔn nsusuwii nhyia. Nanso ansa na yɛbɛhwehwɛ sɛnea yebetumi ako atia su horow a ɛte saa no mu no, momma yensusuw biribi foforo a ɛma nkurɔfo yɛ ntotoho no ho.

Yɛn Ho Mu a Yɛhwehwɛ ne Akomatɔyam

‘So minim nyansa, me ho yɛ fɛ, meyɛ onimdefo, mewɔ apɔwmuden, mefata obu, afoforo dɔ me? Ɛte saa kodu he?’ Yɛntaa nhwɛ yɛn ho wɔ ahwehwɛ mu mmisa nsɛm a ɛtete saa. Nanso, sɛnea nhoma kyerɛwfo bi kyerɛ no, “akyinnye biara nni ho sɛ nsɛmmisa a ɛte saa taa ba yɛn adwenem na ɛma yenya mmuae a ɛma yenya akomatɔyam bi.” Obi a onnim nea obetumi ayɛ susuw eyinom ho a akansi anaa anibere biara nnim. Ɔrepɛɛpɛɛ ne ho mu ahwɛ kɛkɛ. Mfomso biara nni ho ankasa. Nanso, ɔkwan pa a yɛbɛfa  so ayɛ eyi ne sɛ yɛremfa yɛn ho ntoto afoforo ho.

Ɛsono nea obiara tumi yɛ, na egyina nneɛma pii so. Ebinom wɔ hɔ a ɛte sɛ nea bere nyinaa wɔbɔ mmɔden sen yɛn. Enti, sɛ anka yɛde anibere bɛhwɛ wɔn no, ɛsɛ sɛ yɛde Onyankopɔn trenee gyinapɛn a ɛde nea ɛteɛ ho akwankyerɛ pa ma susuw nea yetumi yɛ ho. Yehowa ani gye sɛnea yɛn mu biara te no ho. Enhia sɛ ɔde yɛn toto obiara ho. Ɔsomafo Paulo tu yɛn fo sɛ: “Na ma obiara nsɔ n’ankasa n’adwuma nhwɛ, ɛno na obenya n’ankasa ne ho biribi ahoahoa ne ho, na ɛnyɛ obi ho.”—Galatifo 6:4.

Nitan a Yɛbɛko Atia

Esiane sɛ nnipa nyinaa nyɛ pɛ nti, ebehia sɛ yɛkɔ so bɔ mmɔden sɛ yɛbɛko atia nitan. Eye sɛ yebehu nea Kyerɛwnsɛm no ka kyerɛ yɛn sɛ: “Munni kan nnidi mo ho ni” no, nanso ɛnyɛ mmerɛw koraa sɛ yɛbɛyɛ saa. Paulo huu n’ankasa su wɔ bɔne ho. Nea ɛbɛyɛ na wako atia no na ɛsɛ sɛ ‘ɔhyɛ ne nipadua ahometew, na odi no nya.’ (Romafo 12:10; 1 Korintofo 9:27) Wɔ yɛn fam no, ɛno bɛkyerɛ sɛ ɛsɛ sɛ yɛko tia nsusuwii a ɛma yesi akan no na yɛde nea ɛyɛ papa si ananmu. Ehia sɛ yɛbɔ mpae srɛ Yehowa sɛ ɔmmoa yɛn na ‘yɛannwen antra nea ɛsɛ sɛ yedwen.’—Romafo 12:3.

Bible adesua ne nea yesua a yedwennwen ho nso boa. Sɛ nhwɛso no, susuw Paradise a ɛbɛba daakye a Onyankopɔn ahyɛ ho bɔ no ho hwɛ. Saa bere no obiara benya asomdwoe, akwahosan pa, aduan bebree, ofi pa, ne adwuma a akomatɔyam wom. (Dwom 46:8, 9; 72:7, 8, 16; Yesaia 65:21-23) So obi bɛte nka sɛ ɛsɛ sɛ ɔne ɔfoforo si akan? Dabida. Biribiara nni hɔ obegyina so ayɛ saa. Ɛwom, Yehowa nkaa sɛnea asetra bɛyɛ saa bere no ho biribiara nkyerɛɛ yɛn de, nanso ntease wom sɛ yebenya adwene sɛ obiara betumi ayɛ nneɛma a n’ani gye ho na wasua nea ɔpɛ. Ebia obi besua ɔsoro abɔde ho ade, ɔfoforo nso bɛyɛ ntadetam a ɛyɛ fɛ. Dɛn nti na obi ani bɛbere ɔfoforo? Nea yɛn mfɛfo bɛyɛ no bɛhyɛ yɛn nkuran na ɛrenhyɛ yɛn abufuw. Nkate a ɛte saa no rentra hɔ bio.

Sɛ eyi ne asetra a yɛpɛ a, so ɛnsɛ sɛ yɛbɔ mmɔden sɛ yebenya su koro no ara nnɛ? Yɛwɔ honhom fam paradise mu dedaw, na yenhyia wiase a yɛte mu no mu ɔhaw ahorow no mu pii. Esiane sɛ akansi honhom befi hɔ wɔ Onyankopɔn wiase foforo no mu nti, ntease ankasa wom sɛ yɛbɛkwati no nnɛ.

Ɛnde, so ɛyɛ mfomso sɛ yɛde yɛn bɛtoto afoforo ho? Anaasɛ ɛbɛyɛ nea ɛfata sɛ yɛbɛyɛ saa wɔ bere bi mu?

Ntotoho a Ɛfata

Ntotoho pii de abufuw ne adwenemhaw aba, nanso ɛnsɛ sɛ ɛba saa bere nyinaa. Hyɛ afotu a ɔsomafo Paulo de mae wɔ eyi ho no nsow: ‘Monyɛ wɔn a wɔnam gyidi ne abodwokyɛre so nyaa bɔhyɛ no asuafo.’ (Hebrifo 6:12) Mmɔden a yɛbɛbɔ sɛ yebenya su horow a ɛte sɛ Yehowa tete asomfo anokwafo de no bi betumi asow aba. Ɛwom, ebia eyi bɛma yɛayɛ ntotoho bi. Nanso, ebetumi aboa yɛn ma yɛahu nhwɛso ahorow a yebetumi asuasua ne nea ehia sɛ yenya nkɔso wom.

 Susuw Yonatan ho hwɛ. Ɔkwan bi so no, na ɔwɔ nea obegyina so ayɛ oniberefo. Sɛ Israel Hene Saul babarima panyin no, ɛbɛyɛ sɛ bere bi na Yonatan hwɛ kwan sɛ obedi hene, nanso Yehowa paw abarimaa Dawid a na Yonatan anyin sen no mfe 30. Sɛ anka Yonatan benya ne ho menasepɔw no, ɔdaa adamfofa su soronko adi kyerɛɛ Dawid, na ɔboaa no sɛ ɔhene a Yehowa apaw no. Ná Yonatan yɛ honhom muni ankasa. (1 Samuel 19:1-4) Esiane sɛ na Yonatan nte sɛ ne papa a obuu Dawid sɛ ne tamfo nti, ohui sɛ Yehowa na ɔrekyerɛ nneɛma kwan na ɔyɛɛ N’apɛde; wamfa ne ho antoto Dawid ho, ammisa sɛ “Dɛn nti na wampaw me na ɔpaw Dawid?”

Sɛ yɛwɔ yɛn mfɛfo Kristofo mu a, ɛnsɛ sɛ yesuro sɛ ebia afoforo rebɔ mmɔden ayɛ pii asen yɛn anaasɛ wobegye yɛn dibea afi yɛn nsam. Akansi mfata. Kristofo a wɔn ho akokwaw no da biakoyɛ ne ɔdɔ adi na wonsi akan. Asetra ho nimdefo Francesco Alberoni ka sɛ: “Ɔdɔ tamfo kɛse ne nitan. Sɛ yɛdɔ obi a, yɛpɛ sɛ esi no yiye, na yɛn ani gye bere a esi no yiye na n’ani gye no.” Enti, sɛ wɔpaw obi foforo wɔ Kristofo asafo no mu de hokwan bi ma no a, nea ɔdɔ wom a ɛsɛ sɛ yɛyɛ ne sɛ yɛbɛpene so. Saa na Yonatan yɛe. Sɛ yɛboa wɔn a wɔde nokwaredi resom wɔ Yehowa ahyehyɛde mu no a, wobehyira yɛn te sɛ nea wohyiraa no no.

Yebetumi akyerɛ nhwɛso pa a yɛn mfɛfo Kristofo yɛ no ho anigye ma afata. Yɛn ho a yɛde bɛtoto wɔn ho wɔ ɔkwan a ɛkari pɛ so no betumi akanyan yɛn ma yɛasuasua wɔn gyidi. (Hebrifo 13:7) Nanso, sɛ yɛanhwɛ yiye a, afoforo a yebesuasua wɔn no betumi ama yɛne wɔn asi akan. Sɛ yɛte nka sɛ obi a yɛn ani gye ne ho bɔ ne ho mmɔden sen yɛn na yɛbɔ mmɔden sɛ yebebu no abomfiaa anaa yɛbɛkasa atia no a, na yensuasua no na mmom yɛn ani bere no.

Onipa a ɔnyɛ pɛ biara nni hɔ a ɔyɛ nhwɛso a ɛyɛ pɛ. Ne saa nti Kyerɛwnsɛm no ka sɛ: “Munsua Onyankopɔn sɛ mma adɔfo.” Afei nso, “Kristo nso huu amane maa mo gyaw mo nhwɛso, sɛ munni n’anammɔn akyi.” (Efesofo 5:1, 2; 1 Petro 2:21) Yehowa ne Yesu su horow—wɔn dɔ, anigye, tema, ne ahobrɛase na ɛsɛ sɛ yɛbɔ mmɔden suasua. Ɛsɛ sɛ yegye bere de yɛn ho toto wɔn su, wɔn atirimpɔw ne akwan a wɔfa so yɛ ade ho. Saa ntotoho no betumi ama yɛn asetra ayɛ papa, na ama yɛanya akwankyerɛ, ahotɔ ne ahobammɔ pa na ebetumi aboa yɛn ma yɛn ho akokwaw sɛ Kristofo mmarima ne mmea. (Efesofo 4:13) Sɛ yɛyɛ nea yebetumi biara de suasua wɔn nhwɛso a ɛyɛ pɛ no a, akyinnye biara nni ho sɛ yɛrempɛ sɛ yɛde yɛn ho bɛtoto yɛn mfɛfo nnipa ho.

[Mfonini wɔ kratafa 28, 29]

Ɔhene Saul ani beree Dawid

[Mfonini wɔ kratafa 31]

Yonatan ammu Dawid a na wanyin sen no no sɛ ne tamfo da