Asetram Nsɛm

Ayisaa A Onni Obiara Nya Agya Bi A Ɔwɔ Ɔdɔ

SƐNEA DIMITRIS SIDIROPOULOS KA KYERƐE

Ɔsraani panyin bi de tuo kyerɛɛ me so kaa no abufuw so sɛ, “Som gye tuo yi na tow.” Nanso meka kyerɛɛ no nidi mu sɛ menyɛ. Asraafo a wɔwɔ hɔ no hui sɛ ɔsraani panyin no atow tuo no afa me bati so no, wɔn koma tui. Ná ɛte sɛ nea merebewu. Anigyesɛm ne sɛ, minyaa me ti didii mu. Nanso na eyi nyɛ bere a edi kan a anka mereyɛ ahwere me nkwa.

NA M’ABUSUA fi abusuakuw bi a wɔte bɛn Kayseri mu, wɔ Cappadocia, Turkey. Ɛda adi sɛ ankorankoro bi a wofi saa beae yi gyee Kristosom toom wɔ afeha a edi kan Y.B. mu. (Asomafo Nnwuma 2:9) Nanso, ebeduu afeha a ɛto so 20 mfiase no, na nneɛma asesa koraa.

Mebɛyɛɛ Oguanfo ne Ayisaa

Bere a wɔwoo me wɔ afe 1922 mu akyi asram kakraa bi no, mmusua ntam akodi sɔree maa m’abusua no guan kɔɔ Greece. M’awofo a na ehu aka wɔn no gyaw biribiara hɔ gye me a na madi asram kakraa bi pɛ no. Wɔfaa ahokyere a emu yɛ den pii mu akyi no, woduu Kiria akuraa a ɛbɛn Drama wɔ Greece atifi fam a na wɔn ho ayɛ basaa na wɔn asɛm ayɛ mmɔbɔ.

Bere a midii mfe anan na wɔwoo me nuabarima kumaa no, me papa wui. Ná wadi mfe 27 pɛ, nanso na ahokyere a emu yɛ den a wafa mu no ama no ayɛ mmerɛw. Maame nso huu amane paa, na ankyɛ na ɔno nso wui. Ɛkaa me ne me nuabarima no nkutoo a na yenni hwee koraa a yɛde bɛhwɛ yɛn ho. Wɔde yɛn kɔɔ mmeae ahorow pii a na wɔhwɛ nyisaa, na bere a midii mfe 12 no, wɔde me kɔɔ baako bi mu wɔ Thessalonica, na misuaa sɛnea wosiesie mfiri wɔ hɔ.

 Bere a na merenyin wɔ mmeae ahorow pii a wɔhwɛ nyisaa a ɛhɔ nyɛ anika mu no, na minhu nea enti a wosisi nnipa binom na wohu amane pii saa. Mibisaa me ho nea enti a Onyankopɔn ma nneɛma bɔne a ɛte saa ho kwan. Wɔkyerɛkyerɛɛ yɛn sɛ Onyankopɔn ne tumi nyinaa wura wɔ yɛn adesua a ɛfa ɔsom ho mu, nanso wɔamma yɛn nkyerɛkyerɛmu a ɛfata biara wɔ bɔne a adɔɔso no ho. Na wɔtaa ka sɛ Greece Ortodɔks Asɔre no ne ɔsom a eye paa. Mibisae sɛ, “Sɛ ɔsom a eye paa ne Ortodɔks a, adɛn nti na obiara nkɔ bi?” Mannya mmuae a ɛtɔ asom biara.

Nanso, na yɛn kyerɛkyerɛfo no wɔ obu kɛse ma Bible no, na ɔmaa yehui sɛ ɛyɛ nhoma kronkron. Na baabi a wɔhwɛ nyisaa no kwankyerɛfo nso wɔ adwene a ɛte saa ara wɔ Bible no ho, nanso na yenhu nea enti a ɔmfa ne ho nhyɛ ɔsom mu adeyɛ mu. Bere a mibisabisaa mu no, wɔka kyerɛɛ me sɛ bere bi na ɔne Yehowa Adansefo, ɔsom bi a na minnim ho hwee, sua ade.

Bere a misuaa m’adwuma no wiei wɔ baabi a wɔhwɛ nyisaa wɔ Thessalonica no, na madi mfe 17. Ná Wiase Ko II no afi ase, na na Greece hyɛ Nasi nniso no ase. Ná ɔkɔm rekunkum nnipa wɔ ɔman no mu. Sɛnea ɛbɛyɛ na manya m’ano aduan no, miguan kɔɔ akuraa bi ase kodii paa gyee akatua ketewaa bi.

Minyaa Mmuae Fii Bible Mu

Bere a mesan kɔɔ Thessalonica wɔ April 1945 mu no, m’adamfo bi a me ne no traa mmeae ahorow a wɔhwɛ nyisaa mu wɔ me mmofraase no nuabea bɛsraa me. Paschalia ka kyerɛɛ me sɛ ne nuabarima no ayera na obisaa me sɛ minim baabi a ɔwɔ anaa. Bere a yɛrebɔ nkɔmmɔ no ɔkae sɛ ɔyɛ Yehowa Dansefo ma ɔkae sɛ Onyankopɔn ani gye nnipa ho.

Mefaa asɛm a ɔkae no ho abufuw kasakasae pii. Adɛn nti na na mahu amane saa fi me mmofraase? Dɛn nti na na mabɛyɛ ayisaa? Bere a yehia Onyankopɔn sen biara no, dɛn nti na yenhu no? Obuae sɛ, “So wugye di sɛ Onyankopɔn na wama saa tebea yi aba?” Ofii ne Bible mu kyerɛɛ me sɛ, ɛnyɛ Onyankopɔn na ɔma nnipa hu amane. Eyi boaa me ma mihui sɛ Ɔbɔadeɛ no dɔ nnipa na ɛrenkyɛ koraa obesiesie nneɛma. Ɔde kyerɛw nsɛm te sɛ Yesaia 35:5-7 ne Adiyisɛm 21:3, 4; kyerɛɛ me ma mihui sɛ ɛrenkyɛ na wɔayi akodi, basabasayɛ, yare, ne owu afi hɔ ama nokwaredifo atra asase so daa.

Minyaa Abusua Bi a Wɔboaa Me

Metee sɛ akofofo bi a wɔnyɛ asraafo akum Paschalia nuabarima no wɔ wɔn akodi bi mu. Mekɔsraa n’abusua no sɛ merekɔkyekye wɔn werɛ, nanso wɔn mmom na wɔde Kyerɛwnsɛm no kyekyee me werɛ. Mesan kɔɔ wɔn nkyɛn kɔpɛɛ Bible mu awerɛkyekyesɛm, na ankyɛ na mebɛyɛɛ Yehowa Adansefo kuw ketewaa bi a na wohyiam sua ade som wɔ sum ase no muni. Ɛmfa ho sɛ na wɔabara Adansefo no, na masi me bo sɛ mɛkɔ so ne wɔn abɔ.

Minyaa ɔdɔ a ɛwɔ abusua mu a na mahwere no wɔ saa Kristofo kuw a wɔbrɛ wɔn ho ase no mu. Wɔboaa me maa minyaa Onyankopɔn asɛm mu ntease a na mihia no denneennen no. Minyaa nnamfo a wɔwɔ ahofama na wodwen nnipa ho a na wɔayɛ krado na wɔwɔ ɔpɛ sɛ wɔbɛboa me akyekye me werɛ wɔ wɔn mu. (2 Korintofo 7:5-7) Nea ɛsen saa no, wɔboaa me ma mebɛnee Yehowa, a na mabebu no sɛ me soro Agya a ɔwɔ ɔdɔ no. Ná ne su ahorow te sɛ ɔdɔ, ayamhyehye, ne tema a emu yɛ den no ka koma yiye. (Dwom 23:1-6) Afei de na manya Kristofo abusua ne Agya bi a ɔwɔ ɔdɔ! Ɛkaa me koma. Ankyɛ na ɛkaa me ma mihyiraa me ho so maa Yehowa bɔɔ asu wɔ September 1945 mu.

Kristofo nhyiam a mekɔe no maa minyaa nimdeɛ pii, na ɛsan nso hyɛɛ me gyidi den. Esiane sɛ na kar nni hɔ nti, na yɛn mu dodow bi taa nantew kilomita num kwan fi yɛn akuraa ase hɔ kɔ baabi a yehyiam no. Na me werɛ remfi nkɔmmɔ a ɛfa Onyankopɔn som ho a na yɛtaa bɔ no da. Wɔ afe 1945 mu no, bere a metee sɛ metumi de me ho ahyɛ bere nyinaa som  adwuma no mu no, mifii akwampae adwuma ase. Ná abusuabɔ a emu yɛ den a me ne Yehowa benya no ho hia, efisɛ na ɛrenkyɛ na mahyia me gyidi ne me nokwaredi ho sɔhwɛ a emu yɛ den.

Ɔsɔretia Ankosi Hwee

Ná polisifo taa ba baabi a yɛyɛ nhyiam no de tuo behunahuna yɛn. Esiane sɛ na ɔmanko rekɔ so wɔ Greece nti, na ɔman no hyɛ asraafo ase. Amanyɔkuw ahorow no de nitan kasa tiaa wɔn ho wɔn ho. Asɔfo no faa saa tebea yi so maa atumfoɔ no gye dii sɛ yɛyɛ Komunisfo, ma nti wɔtaa yɛn atirimɔden so.

Wɔkyeree me ne anuanom a na ɛka me ho no mpɛn bebree wɔ mfe mmienu ntam, na emu mpɛn nsia de wobuu yɛn fɔ sɛ wɔmfa yɛn ngu afiase asram anan. Nanso, esiane sɛ na wɔde ebinom abegu afiase wɔ amammuisɛm ho na ɛhɔ ayɛ ma dedaw nti, wogyaee yɛn. Yɛde ahofadi kakra a yenyae a na yɛnhwɛ kwan no kɔɔ so yɛɛ asɛnka adwuma no, nanso bere bi akyi no wɔsan kyeree yɛn bio—mprɛnsa wɔ nnawɔtwe baako mu. Ná yenim sɛ wɔatwa yɛn nuanom no bi asu kɔ nsupɔw a adan amamfo so. So na me gyidi yɛ den yiye a metumi afa sɔhwɛ a ɛte saa mu?

Tebea no mu bɛyɛɛ den paa bere a wɔkae sɛ memfa me ho nkɔkyerɛ wɔ polisifo adwumam da biara nkosi bere a wɔahyɛ no. Atumfoɔ no de me kɔɔ Evosmos, a ɛbɛn Thessalonica, baabi a na polisifo adwumayɛbea bi wɔ sɛnea ɛbɛyɛ a wobetumi de wɔn ani adi m’akyi. Minyaa dan bi a ɛbɛn hɔ tuaa ho ka, na mifii ase yɛɛ adwuma sɛ odwumfo a okyinkyin twiw nkyɛnsee a wɔnoa mu aduan a wɔde kɔbere ayɛ ho de hwɛɛ me ho. Esiane odwumfo adwuma yi nti, bere a na meyɛ akwampae adwuma no wɔ nkuraa a na ɛbemmɛn hɔ ase no, mitumi wurawuraa afie mu a polisifo no adwene amma so. Ɛno maa nnipa pii tee asɛmpa no na wogye toom. Wɔn mu bɛboro du hyiraa wɔn ho so bɛyɛɛ Yehowa asomfo.

Medaa Afiase Ahorow Awotwe Mu Wɔ Mfe Du Mu

Polisifo no de wɔn ani dii m’akyi kosii afe 1949 awiei, na ɛno akyi no mesan kɔɔ Thessalonica a na mepɛ sɛ mekɔtoa bere nyinaa som adwuma no so. Bere a na m’adwene yɛ me sɛ me sɔhwɛ to atwa no, mpofirim ara na wɔhyɛe sɛ menkɔ sraadi wɔ afe 1950 mu. Esiane sɛ na minni ɔfã biara sɛ Kristoni nti, na masi me bo sɛ ‘merensua akodi.’ (Yesaia 2:4) Ɛno maa afiasenna tenten a na ɛde me bɛkɔ Greece afiase ahorow a agye dimmɔne mu fii ase.

Ne nyinaa fii ase wɔ Drama kurow no mu. Nnawɔtwe kakra a edi kan a wɔde me kɔtoo afiase wɔ hɔ no, asraafo foforo a na afei na wɔafa wɔn wɔ sraadi mu no fii ase suaa sɛnea wɔtow tuo. Da bi, wɔde me kɔɔ baabi a wosua tuo tow no. Ɔsraani panyin baako de tuo kyerɛɛ me so sɛ mennye ntow. Bere a manyɛ no, ofii ase totow tuo no baa me so. Bere a asraafo mpanyimfo foforo hui sɛ ɛnyɛ ade a mɛyɛ no, wofii ase bobɔɔ me basabasa. Wɔsɔɔ sigaret de hyehyew me nsam kosii sɛ edumii. Ɛno akyi no, wɔde me kɔtoo afiasedan a obiara nka me ho wom mu. Wɔkɔɔ so yɛɛ eyi nnansa. Sigaret a wɔde hyehyew me nsam no yɛɛ me yaw papaapa, na ɛmaa etwã bɛdedaa me nsa ho mfe pii.

Wɔde me kɔɔ asraafo atrae bi wɔ Iráklion, Crete ansa na wodii m’asɛm wɔ asraafo asɛnnibea. Wɔboroo me basabasa wɔ hɔ sɛnea ɛbɛyɛ  a mɛpa me gyidi. Esiane sɛ na misuro sɛ anhwɛ a na mapa me gyidi nti, mebɔɔ mpae a emu yɛ den srɛɛ me soro Agya no sɛ ɔnhyɛ me den. Mekaee asɛm a ɛwɔ Yeremia 1:19 a ɛka sɛ: “Wɔne wo bedi ako, nanso wɔrentumi wo, efisɛ midi w’akyi, [Yehowa, NW] asɛm ni, na megye wo.” “Onyankopɔn asomdwoe” a edwudwo koma no maa minyaa ahotɔ ne asomdwoe. Mihuu sɛnea nyansa wom sɛ yɛde yɛn ho nyinaa bɛto Yehowa so.—Filipifo 4:6, 7; Mmebusɛm 3:5.

Wodii m’asɛm wiei no, wobuu me fɔ sɛ wɔmfa me nto afiase me nkwa nna nyinaa. Ná wobu Yehowa Adansefo sɛ wɔyɛ “Ɔman no atamfo” a wɔsen biara. M’afiasenna no fii ase wɔ nsɛmmɔnedifo afiase a ɛwɔ Itsedin, a enni Canea, baabi a wɔde me nkoaa kɔtoo afiasedan baako mu. Ná Itsedin yɛ abankɛse dedaw bi, na na akisi agye dan a wɔde me kɔtoo mu no afa. Ná metaa de kuntu dedaw bi a atetew kata me ho nyinaa fi me ti so kosi me nan ase sɛnea ɛbɛyɛ a sɛ akisi no bɛnantenantew me so a wɔn ho nka me honam. Mpafe a emu yɛ den bi bɛyɛɛ me. Oduruyɛfo no kae sɛ ɛsɛ sɛ metra awia mu, na ɛno maa mitumi ne nneduafo no pii bɔɔ nkɔmmɔ wɔ abɔnten hɔ. Nanso, me tebea no sɛee koraa, na bere a mogya tuu me wɔ m’aharawa mu akyi no, woyii me kɔɔ Iráklion ayaresabea.

Me mfɛfo Kristofo a wɔabɛyɛ m’abusuafo no san yɛɛ me mmoa bio bere a na mihia wɔn no. (Kolosefo 4:11) Anuanom a wɔwɔ Iráklion no bɛsraa me bɛkyekyee me werɛ hyɛɛ me nkuran. Meka kyerɛɛ wɔn sɛ mihia Bible ho nhoma na ama matumi adi wɔn a wɔn ani gye asɛm no ho no adanse. Wɔbrɛɛ me adaka bi a kwan baako da ase baabi a metumi de nhoma asie hɔ a obiara nhu. Hwɛ sɛnea m’ani gyei sɛ bere a mede daa saa afiase ahorow mu no, anyɛ yiye koraa no yetumi boaa nneduafo baasia ma wɔbɛyɛɛ Kristofo!

Saa bere no na ɔmanko no aba awiei, ma enti wɔtew m’afiasenna no so yɛɛ no mfe du. Mekɔtoaa m’afiasenna a aka no so wɔ Rethimno, Genti Koule, ne Cassandra afiase. Bere a aka kakraa ma manya mfe du wɔ afiase ahorow awotwe mu no, wogyaee me na mesan kɔɔ Thessalonica, na me nuanom Kristofo a wɔdɔ me no gyee me fɛw so paa.

Kristofo Onuayɛ Kuw no Boaa Me Maa Minyaa Nkɔso

Bere a woyii me fii afiase no na Adansefo a wɔwɔ Greece no anya ahofadi kakraa de resom.  Ntɛm ara na me de ho kwan no san fii bere nyinaa som adwuma no ase. Ankyɛ na minyaa nhyira foforo bio. Mibehuu Kristoni bea nokwafo Katina a na ɔdɔ Yehowa na ɔyɛ nnam wɔ asɛnka adwuma no mu, na yɛwaree wɔ October 1959 mu. Yɛn babea a yɛwoo no, Agape, ne m’ankasa m’abusua a wɔyɛ Kristofo a minyae no, boaa me maa me werɛ fii amane a mihui sɛ ayisaa no. Nea ɛho hia sen biara no, na yɛn abusua no ani gye sɛ yɛbɛsom wɔ yɛn soro Agya, Yehowa a ɔwɔ ɔdɔ no ahobammɔ ase.—Dwom 5:11.

Esiane sɛ na sikasɛm ho ayɛ den ama me nti, ɛmaa migyaee akwampae adwuma no, nanso meboaa me yere maa no toaa bere nyinaa som adwuma no so. Ade titiriw bi sii wɔ m’asetram sɛ Kristoni wɔ afe 1969 mu bere a wɔyɛɛ Yehowa Adansefo amanaman ntam nhyiam wɔ Nuremberg, Germany no. Bere a meyɛɛ ahoboa sɛ mɛkɔ bi no, mede akwammisa kɔe sɛ mepɛ tumi krataa. Bere a me yere kɔɔ polisifo adwumam kobisaa nea nti a bosome mmienu atwam a me nsa nkaa me tumi krataa no, polisifo panyin bi twee nhoma kɛse bi fii ne drɔɔ mu bisaa no sɛ: “Worehwehwɛ tumi krataa ama saa nipa yi na wakɔsesa nkurɔfo gyidi wɔ Germany? Dabida! Ne ho yɛ hu.”

Ɛdenam Yehowa ne anuanom binom mmoa so no, wɔde me kaa tumi krataa a wɔde maa kuw bi ho ma nti mitumi kɔɔ saa nhyiam a na ɛyɛ anigye no bi. Nnipa dodow a wɔbae no boroo 150,000, na na mitumi hu pefee sɛ Yehowa honhom na aka saa amanaman ntam Kristofo abusua yi abom rekyerɛ wɔn kwan. Bere bi akyi no, na mɛba abehu sɛnea Kristofo onuayɛ kuw no som bo fa no yiye.

Me yere a ɔyɛ me hokafo nokwafo a medɔ no no wui wɔ afe 1977 mu. Mebɔɔ mmɔden paa sɛ mede Bible nnyinasosɛm bɛtete me babea no. Na minyaa mmoa. Me nuanom Kristofo no boaa me bio wɔ eyi yɛ mu. Mɛda me nuanom no ase da biara wɔ mmoa a wɔyɛɛ me wɔ saa bere a na ɛyɛ den no mu ho. Wɔn mu binom mpo tu bɛtraa yɛn fie hwɛɛ me babea no kosii bere bi. Me werɛ remfi wɔn ahofama a efi ɔdɔ mu no da.—Yohane 13:34; 35.

Agape nyin waree onuabarima Elias. Wɔwɔ mmabarima baanan, na wɔn nyinaa wɔ nokware no mu. Mfe kakra ni, yare a ɛma nipa fã dwudwo aka me mpɛn pii na minni apɔwmuden papa. Me babea no ne n’abusua hwɛ me yiye. Ɛmfa ho sɛ minni apɔwmuden papa no, mewɔ nneɛma pii a ɛsɛ sɛ midi ho ahurusi. Mekae bere a na anuanom bɛyɛ ɔha pɛ na wɔwɔ Thessalonica nyinaa a na yewia yɛn ho hyiam wɔ nkurɔfo afie mu no. Seesei Adansefo a wɔyɛ nsi bɛyɛ mpem num na wɔwɔ saa beae hɔ. (Yesaia 60:22) Anuanom nkumaa taa ba me nkyɛn wɔ amantam nhyiam ase bebisa me sɛ: “Wokae bere a na wode nsɛmma nhoma ba yɛn fie no?” Ɛwom sɛ ebia na wɔn awofo nkenkan nsɛmma nhoma no de, nanso wɔn mma no kenkanee, na wobehuu Onyankopɔn som!

Sɛ mehwɛ nkɔanim a aba Yehowa ahyehyɛde no mu a, mete nka sɛ sɔhwɛ a mefaa mu no nyinaa fata. Bere nyinaa meka kyerɛ me mmanana ne mmofra nkumaa foforo sɛ wɔnkae wɔn soro Agya no wɔ wɔn mmeranteberem, na ɔrennyaw wɔn da. (Ɔsɛnkafo 12:1) Yehowa maa n’asɛm baa mu, bɛyɛɛ “nyisaa se” anaa agya maa me. (Dwom 68:5) Ɛwom sɛ na meyɛ ayisaa a onni obiara wɔ me mmofrase de, nanso awiei koraa no minyaa Agya bi a ɔwɔ ɔdɔ!

[Mfonini wɔ kratafa 22]

Meyɛɛ adwuma sɛ obi a ɔnoa aduan wɔ Drama afiase hɔ

[Mfonini wɔ kratafa 23]

Me ne Katina wɔ yɛn ayeforohyia da, afe 1959

[Mfonini wɔ kratafa 23]

Nhyiam bi a yɛyɛe wɔ kwae bi a ɛbɛn Thessalonica mu, 1960 awiei

[Mfonini wɔ kratafa 24]

Yɛne yɛn babea, 1967