Ahenni Adawurubɔfo Bɔ Amanneɛ

 Wɔhwehwɛɛ Wɔn a Wɔfata Wɔ Australia Nkuraa Ase

MFE 12 ni na Yehowa Adansefo nkaa asɛm no wɔ Australia man no fã kɛse bi a atew ne ho mu. Enti Yehowa Adansefo a wɔwɔ Darwin, ɔman no Atifi Fam Mantam no ahenkurow mu no yɛɛ nnankron asɛnka ɔsatu ho nhyehyɛe a emu yɛ den a wɔde bɛhwehwɛ wɔn a wɔfata.—Mateo 10:11.

Wɔtoo wɔn bo ase fii ase yɛɛ ɔsatu no ho nhyehyɛe bosome 12 ansa na wɔrefi ase. Wɔyɛɛ asase a ne kɛse bɛboro kilomita ahinanan 800,000 ho mfonini—asase a ne kɛse te sɛ New Zealand man no mmɔho mmiɛnsa. Nea ɛbɛyɛ na yɛanya sɛnea asase yi a atew ne ho kɛse te ho adwene bi no, fa no sɛ efi obi nkwanta so kɔ baabi a ɔyɛn ne nantwi trɛw kɔ akyiri bɛboro kilomita 30! Bio nso, baabi a wɔyɛn nantwi no bi wɔ hɔ a, efi hɔ kɔ beae foforo a wɔyɛn bi no yɛ kilomita 300 anaa nea ɛboro saa.

Adansefo a wɔn dodow yɛ 145 na wotuu wɔn ho mae de wɔn ho hyɛɛ ɔsatu no mu. Ebinom fi Tasmania a ɛwɔ akyirikyiri na wɔbae. Ebinom de kar a etumi fa kwan a enye so a wɔahyehyɛ wɔn nneɛma wom bae, ebi ne nneɛma a wɔde bɛbɔ ntamadan atra mu, kar ho nneɛma, ne pɛtro. Ebinom de wɔn nneɛma guu adaka a wɔde bɔ kar to soa nneɛma mu. Bio nso, wɔpɛɛ bɔs akɛse mmienu a ebiara fa nnipa 22 a ebetumi afa kwan a enye so tuaa ho ka maa wɔn a wonni kar a ɛwɔ ahoɔden a ɛfata no. Anuanom a na wɔwɔ bɔs mu no titiriw na wodii nnipa a wɔtete nkurow nketewa a ɛwɔ baabi a na wɔrekɔyɛ asɛnka adwuma no adanse.

Anuanom a na wodi ɔsatu no anim no maa sɛnea wɔbɛka asɛmpa no wɔ asasesin a ɛyɛ soronko yi mu ho ɔkasa yɛɛ ho ɔyɛkyerɛ ansa na wɔrefi akwantu no ase. Sɛ nhwɛso no, sɛ wobetumi aka asɛm no ma atu mpɔn wɔ Aboriginefo mu a, ɛtaa hwehwɛ sɛ wodi mmara bi so na wohu Aboriginefo no amanne ahorow. Wosusuw sɛnea wɔbɛyɛ wɔn ade wɔ nneɛma a atwa wɔn ho ahyia ho nso na abɔ wuram mmoa a ɛwɔ hɔ ho ban.

 Wonyaa osuahu a ɛda nsow pii. Sɛ nhwɛso no, anuanom no yɛɛ nhyehyɛe sɛ wɔbɛma baguam ɔkasa a egyina Bible no so wɔ Aboriginefo akuraa baako ase. Ɔbaa panyin a ɔwɔ akuraa no ase ankasa na ɔkɔkaa ho asɛm kyerɛɛ nkurɔfo. Wowiei no, wɔn a wɔbae no gyee nhoma 5 ne nhomawa 41. Wɔne Aborigineni bi kasae wɔ akuraa foforo ase. Ná n’ankasa mpo wɔ ne Bible a ɛyɛ King James Version, nanso na ayɛ dedaw na atetew. Bere a wobisaa no sɛ onim Onyankopɔn din no, ɔkae sɛ yiw na afei oyii Ɔwɛn-Aban dedaw bi fii ne soro atade kotoku mu. Ɔkenkan asɛm a ɛwɔ Marko 12:30 a ɛka sɛ: “Dɔ [Yehowa, NW] wo Nyankopɔn fi wo koma nyinaa mu” no fii Ɔwɛn-Aban no mu. Ɔkae sɛ, “M’ani gye saa kyerɛwsɛm no ho ankasa.” Bere a wɔne no bɔɔ Bible mu nkɔmmɔ kɔɔ akyiri wiei no, ogyee Bible foforo ne Bible ho nhoma ahorow bi.

Owura bi a ɔhwɛ beae baako a ne kɛse yɛ hɛkta mpem ahanan a wɔyɛn anantwi wɔ hɔ a ɛbɛn Carpentaria Faka no kyerɛɛ Ahenni nkrasɛm no ho anigye. Bere a wɔde Me Nhoma a ɛka Bible Mu Nsɛm ne Nimdeɛ A Ɛde Kɔ Daa Nkwa Mu * nhoma kyerɛɛ no no, obisae sɛ wɔwɔ nhoma no bi wɔ Kriol kasa mu anaa. Ná asɛm yi yɛ nwonwa, efisɛ ɛmfa ho sɛ Aboriginefo pii tumi ka Kriol kasa no, wɔn mu kakraa bi pɛ na wotumi kenkan. Nea ɛkɔbae ne sɛ, sɛɛ adwumayɛfo 50 no nyinaa a wɔyɛ adwuma wɔ saa beae yi nim Kriol kasa no kan. Owura no a ɔhwɛ hɔ no ani gyei sɛ onyaa Bible ho nhoma wɔ Kriol kasa mu, na ɔde ne telefon nɔma maa wɔn sɛnea ɛbɛyɛ a wobetumi asan ahwehwɛ n’akyi kwan.

Wɔ saa nnankron a wɔde dii adanse fefeefe mu no, wɔmaa Bible 120, nhoma 770, nsɛmma nhoma 705, ne nhomawa 1,965. Bio nso, wɔyɛɛ sankɔhwɛ 720, na wofii Bible adesua ahorow 215 ase.

Nokwasɛm ni, afei de wɔmaa nnipa pii a wɔtete saa asase kɛse yi so a wɔfata a na Bible mu nokware ho kɔm de wɔn no mee.—Mateo 5:6.

[Ase hɔ asɛm]

[Asase mfonini wɔ kratafa 30]

(Wopɛ nsɛm a wɔahyehyɛ awie no a, hwɛ nhoma no mu)

AUSTRALIA

ATIFI FAM MANTAM

Darwin

Carpentaria Faka

Sydney

TASMANIA