Adwinnade Bi A Mfaso Wɔ So A Ɛboa Nkyerɛase

BIBLE no Kyerɛwfo, Yehowa Nyankopɔn, pɛ sɛ wɔka Ahenni no ho asɛmpa kyerɛ “aman ne mmusuakuw ne kasa ne nkurɔfo nyinaa.” (Adiyisɛm 14:6) Ɔpɛ sɛ adesamma nyinaa nsa ka n’Asɛm a wɔakyerɛw no a wɔmmerɛ ho. Ne saa nti, wɔakyerɛ Bible no ase akɔ kasa pii mu sen nhoma biara wɔ wiase no mu. Nsɛm asekyerɛfo mpempem pii agye bere pii ne mmɔdenbɔ akyerɛ Onyankopɔn nsusuwii ase akɔ kasa foforo mu.

Nanso Bible no nyɛ nkyerɛwee a ɛsɛ sɛ wɔkyerɛ ase ara kɛkɛ. Mpɛn pii no, Bible no ankasa ayɛ mmoa a wɔnam so tumi kyerɛ nhoma pii ase. Nsɛm asekyerɛfo pii de sɛnea wɔakyerɛ Bible mu nsɛm ase wɔ kasa ahorow mu no ayɛ ntotoho ma wɔatumi akyerɛ nsɛm bi ase wɔ ɔkwan a ɛfata so. Wɔde nsɛm ahorow a ɛwɔ Bible no mu a ɛboa ma wɔkyerɛ nsɛm ase no adi dwuma seesei wɔ kɔmputa nsɛm asekyerɛ dwumadi mu nso.

Ɛyɛ den sɛ wɔde kɔmputa bɛkyerɛ nsɛm ase yiye. Animdefo bi te nka mpo sɛ nsɛm asekyerɛ boro nea kɔmputa betumi ayɛ so. Dɛn ntia? Efisɛ ɔkasa nyɛ nsɛm mfuamfua bi kɛkɛ. Kasa biara wɔ kwan a wɔfa so keka ne nsɛm bom, ɛho mmara, baabi a kasa no ho mmara nyɛ adwuma, kasakoa, ne ne kasa nsiananmu ahorow. Mmɔden a wɔabɔ sɛ wɔde bɛhyɛ kɔmputa mu ma ayɛ eyinom nyinaa ntumi nyɛ yiye. Ntease nni nkyerɛase ahorow a kɔmputa ayɛ no pii mu.

Nanso, mprempren yi, kɔmputa ho anyansahufo rehwehwɛ akwan afoforo a wɔbɛfa so de kɔmputa akyerɛ nsɛm ase. Kɔmputa nkyerɛase ho ɔbenfo panyin, Franz Josef Och, ka sɛ: “Nanso, seesei, kɔmputa ho anyansahufo rehwehwɛ nhwɛsode a wɔde bedi dwuma de kɔmputa akyerɛ nsɛm ase mu.” Yɛmfa no sɛ wopɛ sɛ wokyerɛ Hindi kasa ase kɔ Engiresi kasa mu. Nea edi kan no, fa nsɛm bi a ɛwɔ hɔ a ɛwɔ kasa ahorow abien no nyinaa mu no, na bɔ hyɛ kɔmputa bi so. Kɔmputa no de kasa biako nsɛm toto kasa foforo no nsɛm ho. Sɛ nhwɛso no, sɛ kɔmputa no hu Hindi asɛmfua bi wɔ mmeae pii, na bere biara no kasasin a ɛne no hyia wɔ Engiresi kasa mu no yɛ “ofie” a,  ɛnde kɔmputa no fa no sɛ saa Hindi asɛmfua no gyina hɔ ma “ofie.” Na ebetumi ayɛ sɛ nsɛm a ɛbemmɛn ho yɛ din nkyerɛkyerɛmu, te sɛ, “kɛse,” “ketewa,” “dedaw,” anaa “foforo.” Enti, kɔmputa no boaboa nsɛmfua a ɛne no hyia ne nsɛm a wɔakeka abom ahorow ano. Bere a kɔmputa no anya saa “ntetee” a ebetumi agye nna anaa adapɛn kakra bi pɛ awie no, kɔmputa no betumi de nea “asua” no adi nsɛm afoforo ho dwuma. Ɛwom sɛ ebia sɛ wode nkyerɛase a kɔmputa no ayɛ toto kasa mmara ne kasa yɛbea ho a ɛtɔ sin de, nanso ɛtaa yɛ nea wotumi kenkan ma ɛda emu ntease ne nsɛm a ɛho hia a ɛka ho nyinaa adi.

Nkyerɛase a edi mũ no gyina nsɛm dodow ne nsɛm a ɛfata a wɔde hyɛɛ kɔmputa no mu mfiase no so kɛse. Saa kwan yi so na Bible no ada bo a ɛsom no adi. Wɔde ahwɛyiye akyerɛ ase akɔ kasa bebree mu, ɛyɛ mmerɛw sɛ wo nsa bɛka bi, na nsɛm pii wom. Enti sɛ obi retete kɔmputa ma akyerɛ kasa foforo bi ase a, Bible no ne nhoma a edi kan a ɔpaw.