Ahiade Bi A Wodii Ho Dwuma Wɔ Macedonia

“TWA bra Makedonia bɛboa yɛn.” (Asomafo Nnwuma 16:9) Saa nsɛm yi a ɔbarima bi kae wɔ anisoadehu a ɔsomafo Paulo nyae no mu no daa hia a ehia sɛ wɔka Onyankopɔn Ahenni ho asɛmpa wɔ asasesin foforo mu adi, wɔ nkurow a nnɛyi ɛwɔ Greece no mu.

Wɔ Macedonia man a ɛwɔ hɔ mprempren mu no, ɛsɛ sɛ Yehowa Danseni 1 biara ka asɛm kyerɛ nnipa 1,840. Nnipa pii ntee Yehowa Nyankopɔn ho asɛm da. Yiw, saa ɔman yi mu wɔ ahiade a egye ntɛmpɛ a ɛne sɛ wɔbɛte asomdwoe nkrasɛm no.—Mateo 24:14.

Onyankopɔn abue hokwan a wɔde bedi saa ahiade no ho dwuma. Da bi wɔ November 2003 mu no, Yehowa Adansefo adwumayɛdan a ɛwɔ Macedonia, Skopje, no nsa kaa ɔfrɛɛ bi wɔ telefon so a na wɔnhwɛ kwan. Na efi Macedonia Asoɛe a ɛhwɛ Amanaman Ntam Biakoyɛ no hɔ, na na wɔde reto nsa afrɛ Adansefo no sɛ wɔmmɛbɔ apata wɔ nnansa guabɔ bi a na ebefi ase wɔ November 20 no mu mfa nkyerɛkyerɛ wɔn gyidi mu nkyerɛ. Hwɛ hokwan kɛse ara a ɛyɛ sɛ wɔbɛka Ahenni no ho asɛmpa no akyerɛ nnipa mpempem pii a wɔntee asɛm no da no!

Adansefo atuhoamafo no de nsi siesiee beae hɔ na wɔhyehyɛɛ Yehowa Adansefo nhoma ahorow a ɛwɔ Macedoniafo kasa mu no. Wɔde nhoma ahorow no mfuamfua guguu hɔ sɛnea ɛbɛyɛ a nsrahwɛfo a wɔpɛ bi no betumi afa bi. Nhoma a wɔde guguu hɔ saa no maa nnipa pii hokwan ma wonyaa honhom fam nsu a ɛma abotɔyam no kwa.—Adiyisɛm 22:17.

Nsrahwɛfo no hwehwɛɛ nhoma ahorow a ɛka wɔn asetra mu ho nsɛm titiriw, te sɛ Questions Young People Ask—Answers That Work ne Nea Ɛde Abusua Mu Anigye Ba. a Nnipa aduɔkron awotwe na wɔde wɔn address mae sɛ Yehowa Adansefo mmɛsra wɔn. Nnipa pii kamfoo Yehowa Adansefo wɔ adwuma pa a wɔreyɛ ne wɔn nhoma ahorow no bo a ɛsom no ho.

Ɔbarima bi a okura ne babarima ketewa nsam baa apata no ase. Agya no bisae sɛ wɔwɔ nhoma a wɔayɛ ama mmofra anaa. Adansefo no de Me Nhoma a Ɛka Bible Mu Nsɛm b  nhoma no kyerɛɛ no. Obuebue nhoma no mu na ɔde anigye bisaa ne bo. Bere a ɔtee sɛ wɔde ntoboa a nkurɔfo fi wɔn pɛ mu yi na ɛboa Yehowa Adansefo nkyerɛkyerɛ adwuma no nyinaa no, n’ani gyee mmoroso. (Mateo 10:8) Ɔde nhoma no kyerɛɛ ne babarima no na ɔkae sɛ: “Nhoma a ɛyɛ fɛ bɛn ni! Papa bɛkenkan adesua baako akyerɛ wo da biara da!”

Nyansapɛ ho ɔbenfo bi kɔɔ apata no ase. Ná n’ani gye ɔsom ho, ne titiriw no nea ɛfa Yehowa Adansefo gyidi a wokura ho. Bere a ɔbenfo no hwɛɛ Onyankopɔn Akyi Kwan a Adesamma Hwehwɛ c nhoma no mu no, ɔkae sɛ: “Nokwarem, nsɛm a wɔada no adi wɔ ɔkwan a ɛfata so ni! Wɔada nsɛm adi wɔ ɔkwan a misusuwii sɛ ɛsɛ sɛ wɔyɛ no so pɛpɛɛpɛ.” Akyiri yi, adesuafo bi a wofi ɔbenfo no sukuu mu baa apata no ase ma wɔn mu biara begyee nhoma a ɔkyerɛkyerɛfo no abegye bi no bi. Na wɔpɛ sɛ wosua nhoma koro no ara bi. Na wogye di sɛ ɔde nhoma no bedi dwuma wɔ n’adekyerɛ mu.

Wɔ nkurɔfo bi fam no, dwumadi yi ma wonyaa hokwan a edi kan de kenkanee na wɔtee Kyerɛwnsɛm mu nokwasɛm no ase. Mmofra a wɔadu mpanyin afe so kuw bi a wɔyɛ mum ba bɛhwɛe sɛ wobenya biribi a wɔn ani begye ho anaa. Adansefo no mu biako maa wɔn ɔkasa tiawa a abeawa bi boa kyerɛɛ ase kɔɔ mum kasa mu. Ɔde mfonini a ɛwɔ Onipa a Ɔsen Biara a Watra Ase Pɛn d nhoma no mu kyerɛkyerɛɛ wɔn sɛ Yesu saa ayarefo yare, a wɔn a wɔyɛ mum ka ho. Wɔn ani gyei sɛ “wɔtee” Bible mu bɔhyɛ a ɛka sɛ ɛrenkyɛ Yesu bɛyɛ ade koro no ara ama nnipa a wɔte asase so wɔ yɛn mmere yi mu no ho. Wɔn mu pii de anigye gyee Bible ho nhoma ahorow, na wɔyɛɛ nhyehyɛe maa Ɔdansefo a onim mum kasa kɔsraa wɔn.

Wɔ Macedonia kasa akyi no, na wɔwɔ nhoma ahorow a ɛwɔ Albania, Engiresi, ne Turkey kasa mu nso. Ɔbarima bi a na ɔnka Macedoniafo kasa kae sɛ wɔmma no nhoma a ɛwɔ Engiresi mu. Bere a ne nsa kaa Ɔwɛn-Aban ne Nyan! nsɛmma nhoma no akyi no, ɔkyerɛe sɛ ɔka Turkey kasa. Bere a wɔde nhoma a ɛwɔ n’ankasa kasa mu kyerɛɛ no no, ne ho dwiriw no! Ohui sɛ Yehowa Adansefo pɛ sɛ wɔboa obiara.

Hwɛ adanse pa ara a wɔde mae wɔ saa bere no mu, ne nkuranhyɛ ara a ɛyɛ sɛ nnipa pii daa Bible mu nokware no ho anigye adi no! Yiw, Yehowa buee kwan a wɔde bɛtrɛw Ahenni no ho asɛmpa no mu akɔ akyiri wɔ Macedonia.

[Ase hɔ asɛm]

[Adaka/Mfonini wɔ kratafa 9]

NKƆSO TITIRIW BI!

Adeyɛ bi a ɛkɔɔ so wɔ May 17, 2003 no maa Onyankopɔn Ahenni no ho asɛmpa a wɔretrɛw mu wɔ Macedonia no nyaa nkɔanim kɛse. Wohyiraa Yehowa Adansefo adwumayɛdan a ɛwɔ Skopje no so. Wɔde mfe abien yɛɛ adansi adwuma de trɛw adwumayɛdan no mu ma ɛyɛɛ kɛse sen kan de no mpɛn anan.

Wɔwɔ adan afoforo abiɛsa a wɔde di fiehwɛ, ne nsɛm asekyerɛ, ne afei dabere, mukaase, ne beae a wɔhoro nneɛma ho dwuma. Guy Pierce, a ɔyɛ Yehowa Adansefo Sodikuw no muni no na ɔmaa adwumayɛdan no so hyira ɔkasa no. Nsrahwɛfo a wofi aman afoforo du so na wɔbaa ɔdan no so hyira dwumadi no ase. Wɔn nyinaa ani gyei wɔ adan foforo a ɛyɛ fɛ no ho.

[Asase mfonini wɔ kratafa 8, 9]

(Wopɛ nsɛm a wɔahyehyɛ awie no a, hwɛ nhoma no mu)

BULGARIA

MACEDONIA

Skopje

ALBANIA

GREECE

[Mfonini wɔ kratafa 8]

Skopje, Macedonia