Bible Abakɔsɛm Ɛyɛ Nokware Dɛn?

KAN Israel Mampanyin Chaim Herzog, ne fam a wotutu hwehwɛ tetefo nneɛma mu ho ɔbenfo Mordechai Gichon, a ɔwɔ Tel Aviv Sukuupɔn mu no kyerɛw wɔ wɔn nhoma Battles of the Bible mu sɛ:

“Obi ntumi mfa n’ankasa adwene nkyerɛkyerɛ . . . ɔko a wɔka ho asɛm wɔ Bible mu no mu. Sɛ nhwɛso no, ɛdɔɔso sɛ wode ɔsa a Gideon tui wɔ Midianfo ne wɔn a wɔne wɔn yɛɛ apam a wɔka ho asɛm wɔ Atemmufo ti 6-8 no bɛtoto Trojan ƆKo a Homer ka ho asɛm wɔ ne nhoma Iliad mu no ho. Ɛdefa Trojan Ɔko no ho no, ɛnyɛ den sɛ wubetumi de mpoano bi anaa kurow bi a wɔabɔ ho ban akyerɛ sɛ ɛhɔ na wɔkoe . . . Eyi nte saa wɔ Gideon ko a wɔaka ho asɛm wɔ Bible mu no ho. Mmeae a wotwaa mpasua ne sɛnea wɔkoe ne sɛnea afanu no nyinaa yɛɛ wɔn ade wɔ mmeae a wɔkoe a ne kɛse bɛyɛ kilomita 60 no nyɛ nea yebetumi akyerɛ sɛ esii wɔ baabiara kɛkɛ . . . Enti ɛsɛ sɛ yegye nokwasɛm a Bible no aka afa ɔko no ho no tom.”

Wubetumi de Bible mu asase mfonini nhomawa a ɛne ‘Hwɛ Asase Pa No’ a no kratafa 18 ne 19 no asua Gideon ɔsatu no ho ade. Asɛm no fii ase bere a “Midian ne Amalek ne Epueifo no nyinaa bɛboaa wɔn ho ano, na wotwa bɛbɔɔ nsra Yesreel bon mu” no. Gideon too nsa frɛɛ mmusuakuw a wɔbemmɛn no sɛ wɔmmɛboa. Adeyɛ no fii ase fii Herod asubura no ne More bepɔw no ho de kosii Yordan Bon no mu. Bere a Gideon tiw wɔn twaa Yordan Bon no wiei no, odii wɔn so.—Atemmufo 6:33–8:12.

Saa asase mfonini a ɛwɔ ‘Hwɛ Asase Pa No’ mu no kyerɛ mmeae atitiriw a wɔabobɔ din no ne nsase no yɛbea. Asase mfonini foforo (kratafa 15) ma yehu faako a Israel mmusuakuw no tete. Asase mfonini abien no betumi aboa wo ma woahu sɛnea Bible mu asɛm no yɛ nokware.

Eyi kyerɛkyerɛ nea Ɔbenfo Yohanan Aharoni, a wawu hui no mu sɛ: “Wɔ Bible mu nsase so no, asase ho nsɛm ne abakɔsɛm wɔ abusuabɔ araa ma abien no nyinaa ho hia na ama wɔate emu biara ase.”

[Ase hɔ asɛm]

[Mfonini Fibea wɔ kratafa 32]

Akyi asase mfonini: Based on maps copyrighted by Pictorial Archive (Near Eastern History) Est. and Survey of Israel