Nsɛmmisa a Efi Akenkanfo Hɔ

Bere a ɔsomafo Paulo ka kyerɛɛ Sanhedrin no sɛ: “Meyɛ Farisini” no, so na ɛnyɛ ne Kristofo gyidi mu na na ɔregyae asiesie no?

Sɛ yɛbɛte asɛm a Paulo kae wɔ Asomafo Nnwuma 23:6 no ase a, ɛsɛ sɛ yesusuw nea ɛma ɔkaa saa no ho.

Bere a Yudafo basabasayɛfo kuw bi tow hyɛɛ Paulo so wɔ Yerusalem akyi no, ɔkasa kyerɛɛ wɔn. Ɔkae sɛ “wɔkyerɛkyerɛɛ me wɔ [Yerusalem] wɔ Gamaliel nan ase sɛnea agyanom Mmara kyerɛ pɛpɛɛpɛ.” Ɛwom sɛ nkurɔfo kuw no tiee Paulo anoyi no kakra de, nanso akyiri yi bere a wɔn bo fuwii no, ɔsraani panyin no de no kɔɔ asraafo asoɛe hɔ. Bere a wɔyɛe sɛ wɔrebɛhwe no no, Paulo kae sɛ: “Mmara ma kwan sɛ moka Romani mpire bere a wommuu no fɔ?”—Asomafo Nnwuma 21:27–22:29.

Ade kyee no, ɔsahene no de Paulo kɔɔ Sanhedrin, Yudafo asennibea kɛse no anim. Paulo hwɛɛ wɔn dinn na ohui sɛ Sanhedrin no mufo yɛ Sadukifo ne Farisifo. Enti ɔkae sɛ: “Mmarima, anuanom, meyɛ Farisini, Farisifo ba. Owusɔre ho anidaso ho nti na wɔrebu me atɛn yi.” Nea efii mu bae ne sɛ, akasakasa sɔree wɔ Farisifo ne Sadukifo no ntam, “efisɛ Sadukifo no ka sɛ owusɔre anaa abɔfo anaa honhom nni hɔ, nanso Farisifo no kura ne nyinaa mu denneennen.” Na wɔn a wofi Farisifo kuw mu binom sɔre gyee akyinnye denneennen sɛ: “Yenhu mfomso biara wɔ onipa yi ho.”—Asomafo Nnwuma 23:6-10.

Esiane sɛ na wonim Paulo sɛ Kristoni a ɔyɛ nsi nti, na ɔrentumi mma Sanhedrin no nnye nni sɛ ɔyɛ Farisini mapa. Anka Farisifo a na wɔwɔ hɔ no rennye wɔn mu bi a onnye wɔn nkyerɛkyerɛ nnyinaa ntom no nni. Esiane eyi nti, ɛbɛyɛ sɛ asɛm a Paulo kae sɛ ɔyɛ Farisini no kyerɛ sɛ na ogye wɔn nkyerɛkyerɛ no bi di, na ɛbɛyɛ sɛ saa na Farisifo a na wɔwɔ hɔ no tee n’asɛm no ase.

Bere a Paulo kae sɛ awufo sɔre ho anidaso no nti na wɔabu no fɔ no, na ɔrekyerɛ pefee sɛ saa asɛm yi mu na ɔte sɛ Farisifo no. Sɛ akasakasa biara sɔre wɔ owusɔre yi ho a, wobehu sɛ Paulo ne Farisifo no kura gyidi biako na ɛnyɛ Sadukifo a wonnye owusɔre nni no.

Nea na Paulo gye di sɛ Kristoni ne nea na Farisifo no gye di fa owusɔre, abɔfo, ne Mmara no mu nsɛm bi ho no hyia. (Filipifo 3:5) Enti wɔ eyi mu nkutoo na na Paulo betumi de ne ho atoto Farisifo no ho, na wɔ saa ntease no mu nkutoo na Sanhedrin no mufo a na wɔahyia no tee ne nsɛm no ase. Enti na ɔde Yudani a ɔyɛ no redi dwuma ne Yudafo asɛnnibea kɛse a wokura adwemmɔne no adi nsɛm.

Nanso, adanse a edi mũ a ɛkyerɛ sɛ Paulo annyae ne gyidi mu ansiesie ne Yehowa anim dom a ɔkɔɔ so nyae no. Anadwo a Paulo kae sɛ, “Meyɛ Farisini” akyi no, Yesu ka kyerɛɛ no sɛ: “Nya akokoduru! Na sɛnea woadi me ho adanse akyerɛkyerɛ mu fann wɔ Yerusalem no, saa ara na ɛsɛ sɛ wudi adanse wɔ Roma nso.” Esiane sɛ na Paulo wɔ Onyankopɔn mpeneso nti, ɛsɛ sɛ yɛka sɛ Paulo annyae ne Kristofo gyidi mu ansiesie.—Asomafo Nnwuma 23:11.