Ɛhe na Wubetumi Anya Nokware Nkyerɛkyerɛ?

ƆBARIMA bi a ɔwɔ Tibet rehim kyɛnsee bi a wɔakyerɛw mpaebɔ agu mu abua so. Ogye di sɛ bere biara a kyɛnsee no bedi kyinhyia no, etĩ ne mpaebɔ no mu. Wɔ fie kɛse bi mu wɔ India no, wɔayi dan ketewa bi a wɔfrɛ no puja asi hɔ a wɔyɛ ɔsom amanne a wɔhyew aduhuam, nhwiren, ne nneɛma afoforo ma anyame ne anyamewa ahoni wom. Wɔ Italy a ɛwɔ akyirikyiri no, ɔbea bi kura rosary abu nkotodwe wɔ Maria, Yesu maame honi anim wɔ asɔredan bi a wɔahyehyɛ mu fɛfɛɛfɛ mu.

Ebia woahu sɛnea nyamesom anya nnipa asetra so nkɛntɛnso. The World’s Religions—Understanding the Living Faiths nhoma no ka sɛ: “Efi tete de besi nnɛ, nyamesom . . . adi akoten wɔ nnipa asetra mu wɔ wiase nyinaa.” Nhomakyerɛwfo John Bowker ka wɔ God—A Brief History nhoma no mu sɛ: “Adesamma abusua biara ntraa ase pɛn a wɔnkyerɛɛ Onyankopɔn mu gyidi, ne titiriw, sɛ ɔno ne amansan sodifo ne ɔbɔadeɛ. Ɛno yɛ nokware wɔ aman a wɔhyɛɛ da pawee sɛ wɔrennye Onyankopɔn nni no mpo mu.”

Nokwarem no, nyamesom anya nnipa ɔpepepem pii asetra so nkɛntɛnso. So eyi nyɛ adanse a emu yɛ den a ɛkyerɛ sɛ honhom mu nneɛma ho hia nnipa? Oduruyɛfo Carl G. Jung a wagye din sɛ adwene ne nneyɛe ho nimdefo no ka hia a ehia sɛ yɛsom tumi bi a ɛkorɔn ho asɛm wɔ ne nhoma The Undiscovered Self mu sɛ “ɛyɛ ade a ɛda adi wɔ adesamma abakɔsɛm nyinaa mu.”

 Nanso nnipa pii nnye Onyankopɔn nni na wonni nyamesom ho anigye biara. Nea enti a ebinom nnye Onyankopɔn nni anaa wɔka sɛ onni hɔ no ne sɛ ɔsom a wɔwom no antumi ammoa wɔn honhom mu. Wɔakyerɛ nyamesom ase sɛ “nnyinasosɛm bi so di; nokware turodoo a wodi; ahonim a wodi akyi; biribi ho dɔ kɛse anaa biribi a obi de ne ho bata ho denneennen.” Nkyerɛkyerɛmu yi ma ɛda adi sɛ, ɛkame ayɛ sɛ obiara da ɔsom ho gyidi adi wɔ n’asetra mu. Wɔn a wɔka sɛ wonnye Onyankopɔn nni mpo ka ho.

Mfe mpempem pii a nnipa de atra ase mu no, wɔabɔ mmɔden sɛ wɔn nsa bɛka nea wohia wɔ honhom fam na eyi ama wɔasɔ ɔsom ahorow pii ahwɛ. Nea afi mu aba ne sɛ, ɔsom ho adwene a nkurɔfo kura no gu ahorow wɔ wiase nyinaa. Sɛ nhwɛso no, ɛte sɛ nea ɔsom ahorow nyinaa kyerɛ sɛ wogye tumi bi a ɛkorɔn di de, nanso wɔn adwene nhyia wɔ onii ko anaa dekode a saa tumi no yɛ ho. Ɔsom ahorow nso si hia a nkwagye anaa ahofadi ho hia so dua. Nanso ɛsono sɛnea wɔkyerɛkyerɛ nkwagye ne ɔkwan a wɔfa so nya no mu. Ɔsom mu gyidi bebrebe a atwa yɛn ho ahyia nyinaa mu no, yɛbɛyɛ dɛn ahu nokware nkyerɛkyerɛ a ɛsɔ Onyankopɔn ani?