“Onitefo Hwɛ Ne Nantew Mu Yiye”

ONITEFO yɛ obi a onim nyansa, osusuw nsɛm ho yiye, n’adwene mu da hɔ na n’ani abue nso. Ɔnyɛ nkontomponi anaa ɔdaadaafo. Mmebusɛm 13:16 ka sɛ: “Onitefo yɛ n’ade nyinaa nimdeɛ mu.” Yiw, saa anitew anaa anifere yi yɛ suban pa.

Yɛbɛyɛ dɛn akyerɛ sɛ yɛn ani atew wɔ yɛn da biara da abrabɔ mu? Ɔkwan bɛn so na yɛda suban yi adi wɔ nea yɛpaw, sɛnea yɛne nnipa di nsɛm, ne sɛnea yɛyɛ ade wɔ tebea horow mu no? Mfaso bɛn na anitefo nya? Amane bɛn na wɔkwati? Tete Israel hene Salomo ma nsɛmmisa yi ho mmuae a ɛfata, sɛnea yɛkenkan wɔ Mmebusɛm 14:12-25 no. *

Yɛ W’ade Nyansam

Sɛ yebetumi asisi gyinae pa na yɛn abrabɔ asi yɛn yiye a, ehia sɛ yetumi hu bɔne ne papa ntam nsonsonoe. Nanso Bible no bɔ yɛn kɔkɔ sɛ: “Ɛwɔ ɔkwan bi a ɛteɛ onipa ani so, na n’awiei yɛ owu kwan.” (Mmebusɛm 14:12) Enti ɛsɛ sɛ yetumi hu nsonsonoe a ɛda adetrenee ankasa ne nea ɛsɛ adetrenee no ntam. Asɛm ‘owu akwan’ no kyerɛ sɛ nnaadaa kwan pii a ɛte saa na ɛwɔ hɔ. Susuw akwan a ehia sɛ yehu na yɛkwati no bi ho.

Wiase no mu asikafo ne nnipa a wɔagye din no na nkurɔfo taa kamfo wɔn di wɔn ni. Esiane sɛ wɔwɔ sika na wodi yiye wɔ asetra mu nti, ɛma ɛyɛ sɛ wɔn abrabɔ ye. Nanso ɔkwan bɛn na wɔn mu pii fa so nya wɔn ho anaa wɔde gye din? Wɔn akwan teɛ anaa wɔbɔ bra pa bere nyinaa? Ebinom nso wɔ hɔ a wɔbɔ wɔn som mu gyidi ho mmɔden paa. Nanso wɔn yam a woyi som no nko ara kyerɛ sɛ wɔn gyidi no teɛ anaa?—Romafo 10:2, 3.

Afei nso, obi betumi adaadaa ne ho asusuw sɛ ɔkwan bi ye. Nanso sɛ yegyina nea yɛn ankasa te nka sɛ eye nko ara so sisi gyinae a, na yɛde yɛn ho reto koma no a ɛyɛ ɔkwankyerɛfo kontomponi no so. (Yeremia 17:9) Sɛ yɛantete yɛn ahonim a, ebetumi ama yɛanya adwene sɛ ɔkwammɔne a yɛnam so no ye. Ɛnde dɛn na ɛbɛboa yɛn ma yɛapaw ɔkwan pa?

Ehia sɛ yɛde nsi sua Onyankopɔn Asɛm mu nokware a emu dɔ no ansa na yɛatumi ahu “papa ne bɔne mu nsonsonoe.” Bio nso, ɛsɛ sɛ yɛde Bible nnyinasosɛm “di dwuma” de tete saa tumi a ɛma yehu papa ne bɔne no. (Hebrifo 5:14) Ɛnsɛ sɛ yɛma ɔkwan bi a ɛte sɛ nea eye no twetwe yɛn ma yɛman fi ‘ɔkwan hihiaa no a ɛkɔ nkwa mu’ no so.—Mateo 7:13, 14.

Bere a “Koma Hu Yaw”

Yɛn ani betumi agye bere a yenni asomdwoe? Ɔserew ne anigye betumi abrɛ ɛyaw kɛse ase? Nyansa wom sɛ, esiane sɛ obi pɛ sɛ ne werɛ fi adwennwene kɛse a ɛda no so  nti ɔde nsawe, nnubɔnenom anaa ɔbrasɛe bɛyɛ n’adwuma? Mmuae no yɛ dabi. Ɔhene nyansafo no ka sɛ: “Ɔserew mu po koma hu yaw.”—Mmebusɛm 14:13a.

Ebia ɔserew bɛkata yawdi no so nanso ɛrentumi nyi mfi hɔ. Bible no se “ade biara wɔ ne bere a wɔahyɛ no.” Ampa “osũ wɔ ne bere, na ɔserew wɔ ne bere; nkɔmmɔdi wɔ ne bere, na asaw wɔ ne bere.” (Ɔsɛnkafo 3:1, 4) Sɛ adwennwene kɛse kɔ so haw yɛn a, ɛsɛ sɛ yɛbɔ mmɔden sɛ yebedi so, na sɛ ebehia a, yɛhwehwɛ “atɛmpa” anaa akwankyerɛ pa a yɛde bedi so. (Mmebusɛm 24:6) * Ɔserew ne anigyede tumi boa yɛn de, nanso mfaso a ɛwɔ so no sua. Salomo bɔ kɔkɔ wɔ anigyede a ɛmfata ne nea wɔyɛ tra so no ho sɛ: “Anigye no awiei yɛ awerɛhow.”—Mmebusɛm 14:13b.

Nea Onni Gyidi ne Onipa Pa—Wɔmee Ɔkwan Bɛn So?

Israel hene no toa so sɛ: “[Nea onni gyidi] akwan bɛmee no, na onipa pa nso ade bɛmee no.” (Mmebusɛm 14:14) Ɔkwan bɛn so na nea onni gyidi ne onipa pa nyinaa nneyɛe so aba mmee wɔn?

Obi a onni gyidi no, n’abrabɔ ho akontaa a obebu akyerɛ Onyankopɔn ho nhia no. Onipa a ɔte saa no, nea ɛteɛ wɔ Yehowa ani so a ɔbɛyɛ no ho nhia no. (1 Petro 4:3-5) Mmom ahonya akyi a odi no sɔ n’ani. (Dwom 144:11-15a) Nanso onipa pa de, Onyankopɔn apɛde a ɔbɛyɛ na ehia no. N’akwan nyinaa mu odi Nyankopɔn trenee gyinapɛn so. Esiane sɛ onipa a ɔte saa de Ɔsorosoroni Yehowa ayɛ ne Nyankopɔn a ɔde anigye kɛse som no nti, onya akomatɔyam kɛse.—Dwom 144:15.

‘Nnye Nsɛm Nyinaa Nni’

Salomo de atetekwaa abrabɔ toto onitefo de ho ka sɛ: “Atetekwaa gye nsɛm nyinaa di, na onitefo hwɛ ne nantew mu yiye.” (Mmebusɛm 14:15) Onitefo nyɛ tibɔnkɔso a obiara tumi daadaa no. Ɛnyɛ nea ebetwa n’asom nyinaa na ogye di na saa ara nso na ɔnnye adwene a nkurɔfo de ba nyinaa  ntom. Mmom ɔdwene nsɛm ho yiye. Ɔhwehwɛ nsɛm mu hu mu yiye ansa na wayɛ ho biribi.

Sɛ́ nhwɛso no, susuw asɛmmisa yi ho: “Onyankopɔn bi wɔ hɔ?” Obi a ɔyɛ atetekwaa gye nea nnipa pii pene so anaa nea nnipa a wɔagye din ka no tom. Nanso onitefo de, ɔtɔ ne bo ase hwehwɛ nokwasɛm mu. Ɔdwene kyerɛw nsɛm bi te sɛ Romafo 1:20 ne Hebrifo 3:4 ho. Wɔ ɔsom mu no, onitefo nnye nyamesom akannifo adwene ntom kɛkɛ. Mmom ‘ɔsɔ honhom mu nsɛm no hwɛ sɛ efi Nyankopɔn anaa.’—1 Yohane 4:1.

Nyansa wom sɛ ‘yennye nsɛm nyinaa nni’! Ɛsɛ sɛ wɔn a wɔde ahyɛ wɔn nsa sɛ wontu Kristo asafo no mufo fo no hyɛ eyi nsow yiye. Ehia sɛ ofotufo no hu nea asi no mu yiye. Ɛsɛ sɛ ɔtɔ ne bo tie afanu no hwehwɛ asɛm no mu nokwasɛm na ama n’afotu atɔ asom na wankogyina fã bi.—Mmebusɛm 18:13; 29:20.

‘Wɔtan Onipa a Ɔpam Apammɔne’

Israel hene no retwe adwene asi nsonsonoe foforo a ɛda onitefo ne atetekwaa ntam so no ɔka sɛ: “Onyansafo suro, na ɔsan fi bɔne ho, na ɔkwasea de n’ahodaso fa mu. Nea ne bo nkyɛ fuw di agyimisɛm, na onipa a ɔpam apammɔne, wɔtan no.”—Mmebusɛm 14:16, 17.

Onitefo suro sɛ ɔbɛfa ɔkwammɔne so ma ɛde ɔhaw aba. Enti ɔhwɛ yiye na n’ani sɔ afotu biara a ɛbɛboa no ma wakwati amumɔyɛ. Atetekwaa de onsuro. Esiane sɛ ogye ne ho di nti, ɔyɛ ahantan na ontie afotu. Ne bo nkyɛ fuw nti, odi agyimisɛm.

Mfitiase kasa a wɔkyerɛɛ ase sɛ “ɔpam apammɔne” no wɔ ntease abien. Wɔ ɔkwan a eye so no ebetumi akyerɛ nhumu anaa anifere. (Mmebusɛm 1:4; 2:11; 3:21) Wɔ ɔkwan a enye so no, asɛm koro no ara betumi akyerɛ apammɔne anaa adwemmɔne.—Dwom 37:7; Mmebusɛm 12:2; 24:8.

Sɛ mfitiase asɛm no kyerɛ obi a “ɔpam apammɔne” a, ɛnde ɛnyɛ nwonwa sɛ wɔtan onipa a ɔte saa. Nanso sɛ ɔkwan a eye so na ɛkyerɛ a, ɛnde adɛn nti na wɔtan nhumufo? Wiɛ, ɛnyɛ nokware sɛ “ɔmama ho yɛ ahi”? Ɛho nhwɛso ne sɛ, wɔn a wosusuw nsɛm ho yiye na wɔpaw sɛ ‘wɔnyɛ wiase no fã’ no, ɛyɛ a wiase no tan wɔn. (Yohane 15:19) Esiane sɛ Kristofo mmerante ne mmabaa a wɔdwene nsɛm ho yiye gyina atipɛnfo nhyɛsobɔne ano na wɔkwati brabɔne nti, nkurɔfo di wɔn ho fɛw. Nokwasɛm ne sɛ, wiase yi a ɛda Satan Ɔbonsam tumi mu no tan nokware asomfo.—1 Yohane 5:19.

“Abɔnefo Bɛbrɛ Wɔn Ho Ase”

Onitefo ne atetekwaa da nsow wɔ ɔkwan foforo bi nso so. “Ntetekwaa ade a wodi ne agyimisɛm, na anitefo de nimdeɛ hyehyɛ wɔn ho.” (Mmebusɛm 14:18) Esiane sɛ ntetekwaa nni nhumu nti, wɔn abrabɔ mu nyinaa wɔfa kwan a mfaso biara nni so so. Nanso nimdeɛ ma onitefo anim ba nyam sɛnea ahemmotiri hyɛ ɔhene anuonyam no.

Ɔhene nyansafo no se: “Abɔnefo bɛbrɛ wɔn ho ase apapafo anim, na abɔnefo akotow treneefo mmobowano.” (Mmebusɛm 14:19) Ɔkwan foforo so no, nea ɛbɛyɛ biara papa bedi bɔne so nkonim. Susuw sɛnea Onyankopɔn nkurɔfo adɔre afa ne abrabɔ pa a wɔbɔ nnɛ no ho hwɛ. Nhyira a Yehowa asomfo nsa ka yi bɛhyɛ asɔretiafo binom ma ‘wɔabrɛ wɔn ho ase’ ama nkaefo a wɔasra wɔn a wogyina hɔ ma Yehowa soro ahyehyɛde, sɛnkyerɛnne kwan so ɔbea no.  Sɛ asɔretiafo no annye antom kosi sɛ Harmagedon bɛba a, wɔbɛhyɛ wɔn ma wɔagye atom sɛ Onyankopɔn ahyehyɛde no fã a ɛwɔ asase so no gyina hɔ ma ɔsoro de no ampa.—Yesaia 60:1, 14; Galatifo 6:16; Adiyisɛm 16:14, 16.

“Ohu Amanehunufo Mmɔbɔ”

Salomo rekyerɛ sɛnea nnipa suban te mu no, ɔka sɛ: “Ohiani de, ne yɔnko po tan no, na ɔdefo adɔfo dɔɔso.” (Mmebusɛm 14:20) Eyi fa nnipa a yɛnyɛ pɛ ho paa! Pɛsɛmenkominya nti yɛtaa pɛ adefo asɛm sen ahiafo. Ɛwom sɛ ɔdefo nnamfo dɔɔso de, nanso wɔte sɛ n’ahode no ara, wonni gyina. Enti ɛnsɛ sɛ yegyina sika anaa adɛfɛdɛfɛsɛm so fa nnamfo.

Na sɛ yɛhwehwɛ yɛn mu yiye na ɛda adi sɛ yɛhwehwɛ adefo anim dom nanso yebu ahiafo animtiaa nso ɛ? Ɛsɛ sɛ yɛte ase sɛ Bible kasa tia animhwɛ a ɛte saa. Ɛka sɛ: “Nea obu ne yɔnko animtiaa yɛ bɔne, na nhyira ne nea ohu amanehunufo mmɔbɔ.”—Mmebusɛm 14:21.

Ɛsɛ sɛ yɛte nka ma wɔn a wɔrehu amane. (Yakobo 1:27) Yɛbɛyɛ dɛn ayɛ eyi? Ɛne sɛ yɛde “wiase asetrade” te sɛ sika, aduan, dabere ne ntade bɛboa wɔn na yɛama yɛn ani aku wɔn ho. (1 Yohane 3:17) Obi a ɔboa nnipa a wɔte saa no ani begye, efisɛ “ɔma mu wɔ anigye pii sen ogye.”—Asomafo Nnwuma 20:35.

Ewie Wɔn Sɛn?

“Nea onipa gu biara no, ɛno ara na obetwa.” Nnyinasosɛm yi fa onitefo ne atetekwaa nyinaa ho. (Galatifo 6:7) Onitefo yɛ papa, na atetekwaa pam apammɔne. Ɔhene nyansafo no bisa sɛ: “So wɔn a wɔbɔre asɛmmɔne mfom anaa?” Ampa ara, ‘wɔfom.’ Mmom “ɔdom ne nokware wɔ wɔn a wɔbɔre asɛmpa.” (Mmebusɛm 14:22) Nkurɔfo ani sɔ nnipa a wɔyɛ papa na Onyankopɔn nso dom wɔn.

Salomo kyerɛ sɛ adwumaden na ɛde yiyedi ba nanso kasatenten ne anihaw de, ɛne ɔbrɛgu na ɛnam. Enti ɔde ka ho sɛ: “Ɔbrɛ nyinaa mu wɔ nnɔbae, na anosɛm de, ohia ara nko.” (Mmebusɛm 14:23) Nnyinasosɛm yi fa mmɔden a yɛbɔ wɔ Onyankopɔn som ho nso. Sɛ yɛyere yɛn ho wɔ Kristofo som adwuma no mu a, mfaso a yenya ne sɛ yɛboa afoforo pii ma wobehu Onyankopɔn Asɛm a ɛma nkwa no. Sɛ yɛde nokwaredi yɛ Onyankopɔn som ho dwumadi biara a, ɛma yenya anigye ne akomatɔyam.

Mmebusɛm 14:24 ka sɛ: “Anyansafo abotiri ne wɔn ahode, nkwasea agyimisɛm yɛ agyimisɛm ara nko.” Eyi betumi akyerɛ sɛ nea anyansafo brɛ hwehwɛ ne wɔn ahode a ɛte sɛ abotiri anaa anuonyam no. Nkwaseafo nso de, nea wonya ara ne agyimisɛm. Nhwehwɛmu nhoma bi kyerɛ sɛ abebusɛm yi tumi kyerɛ nso sɛ “ahode yɛ ahyehyɛde ma wɔn a wɔhwɛ so yiye . . . [bere a] agyimisɛm nko ara na nkwaseafo wɔ.” Sɛnea ɛte biara no, ewie onitefo yiye kyɛn ɔkwasea.

Israel hene no ka sɛ: “Nokware dansefo gye nnipa nkwa, na nea ohuw atosɛm twa nkontompo.” (Mmebusɛm 14:25) Akyinnye biara nni ho sɛ atemmu mu no eyi yɛ nokware, nanso susuw sɛnea ɛfa yɛn som adwuma no ho. Yɛn Ahenni asɛnka ne asuafoyɛ adwuma no fa adanse a yebedi wɔ Onyankopɔn Asɛm ho nokware ho no ho. Saa adansedi no gye nkurɔfo nkwa fi atoro som mu. Sɛ yɛma yɛn ani ba yɛn ho ne yɛn nkyerɛkyerɛ no so bere nyinaa a, yebegye yɛn ho ne wɔn a wotie yɛn no nkwa. (1 Timoteo 4:16) Bere a yɛrekɔ so yɛ eyi no, momma yɛnna anitew anaa anifere adi wɔ yɛn abrabɔ nyinaa mu.

[Ase hɔ nsɛm]

[Mfonini wɔ kratafa 18]

Ɛsɛ sɛ yɛde nsi sua nokware a emu dɔ no na yɛatumi ayiyi papa ne bɔne mu

[Mfonini wɔ kratafa 18]

Ahonya akyidi ma akomatɔyam ampa?