Asetram Nsɛm

Migyinaa Pintinn Sɛ Kristo Sraani

SƐNEA YURII KAPTOLA KA KYERƐE

“Afei na mahu sɛ wowɔ gyidi ankasa!” Na menhwɛ kwan sɛ Soviet sraani panyin bi bɛka asɛm a ɛte saa. Ɔkaa saa asɛm no wɔ bere a ɛsɛ mu paa, na ɛhyɛɛ me nkuran. Ná wɔabu me fɔ de me ato afiase bere tenten, na na mabɔ mpae a emu yɛ den asrɛ Yehowa sɛ ɔmmoa me. Ná ebegye boasetɔ ne animia na mede agyina saa sɔhwɛ a ɛbɛkyɛ yi ano.

WƆWOO me wɔ October 19, 1962, na minyinii wɔ Ukraine atɔe fam. Wɔ saa afe no ara mu no, me papa a na wɔfrɛ ɔno nso Yurii no ne Yehowa Adansefo dii nkitaho. Ankyɛ na ɔbɛyɛɛ Yehowa somfo a odi kan wɔ yɛn akuraase hɔ. Aban mpanyimfo a wɔsɔre tiaa Yehowa Adansefo no huu adwuma a na ɔreyɛ no.

Nanso, yɛn afipamfo dodow no ara tee m’awofo ase wɔ wɔn Kristofo su a na wɔda no adi ne sɛnea na wodwen afoforo ho no ho. M’awofo de hokwan biara a wonyae de Onyankopɔn ho dɔ duaa me ne me nuabeanom baasa komam fi yɛn mmofraase, na eyi boaa me ma mitumi gyinaa nsɛnnennen pii a mihyiae wɔ sukuu mu no ano. Asɛnnennen bi a ɛsɔree ne bere a na ɛsɛ sɛ sukuuni biara bɔ baagye a ɛma wohu no sɛ ɔyɛ mmofra kuw bi a Lenin a na ɔyɛ Russia mampanyin atew no muni no. Esiane sɛ meyɛ Kristoni a minnyina obiara afã wɔ amanyɔsɛm mu nti, mammɔ baagye no, enti ɛma meyɛɛ soronko wɔ wɔn mu.—Yohane 6:15; 17:16.

Bere bi akyi no, bere a midii bɛyɛ mfe 9 no, na ɛsɛ sɛ sukuuni biara de ne ho hyɛ Komunis mmabun kuw bi a wɔfrɛ wɔn Young Pioneers no mu. Da bi wɔde yɛn adesuakuw no mufo  kɔɔ sukuu no abɔnten sɛ yɛnkɔkyerɛw yɛn din. Ná misuro, na minim sɛ wobedi me ho fɛw na wɔakasa atia me. Ná obiara de kuw no duku kɔkɔɔ foforo afi fie aba gye me nko, na sukuufo no too santen tenten wɔ sukuu sohwɛfo, akyerɛkyerɛfo, ne sukuufo a wɔanyinyin no anim. Bere a wɔka kyerɛɛ sukuufo a wɔanyinyin no sɛ wɔmfa duku no mmɔ yɛn kɔn mu no, misii me ti ase sɛnea ɛbɛyɛ a obiara ani mma me so.

Wɔde Me Kɔɔ Afiase a Ɛwowɔ Akyirikyiri

Bere a midii mfe 18 no, esiane sɛ meyɛ Kristoni a mankɔ sraadi nti, wobuu me fɔ sɛ menkɔda afiase mfe abiɛsa. (Yesaia 2:4) Mitwaa afe a edi kan no wɔ kurow bi a wɔfrɛ no Trudovoye a ɛwɔ Vinnitskaya Mantam mu wɔ Ukraine. Bere a na mewɔ hɔ no, mihyiaa nnipa foforo a na wɔyɛ Yehowa Adansefo bɛyɛ 30. Esiane sɛ na atumfoɔ no mpɛ sɛ yɛne yɛn ho yɛn ho bɛbɔ nti, wɔmaa anuanom baanu biara yɛɛ adwuma wɔ beae soronko.

Wɔ August 1982 mu no, wɔde me ne Eduard, Ɔdansefo foforo bi, ne nneduafo afoforo binom traa nnaka a esisi keteke so mu kɔɔ Ural Mmepɔw a ɛwɔ atifi fam no so. Yedii nnafua awotwe wɔ kwan so ansa na yekoduu Solikamsk Afiase, wɔ Permskaya Mantam mu. Na keteke no afã a wɔde nneduafo gu no yɛ hyew papa, ɛnna na emu nso san kyere. Wɔamfa me ne Eduard antra afiasedan biako mu. Nnawɔtwe abien akyi no, wɔsan de me toaa so kɔɔ akyirikyiri wɔ atifi fam kɔɔ Vels, a ɛwɔ Krasnovishersky mantam mu no.

Yɛn kar no koduu anadwo dasum, na ɛhɔ yɛ sum kabii. Ɛmfa ho sɛ na ɛhɔ yɛ sum no, afiasehwɛfo bi hyɛɛ yɛn sɛ yɛmfa hyɛmma ntwa asubɔnten bi. Ná yenhu asubɔnten no so ɛnna na yenhu hyɛmma no nso! Nanso, yɛde yɛn nsa kekaa nneɛma ara kosii sɛ yɛn nsa soo hyɛmma bi mu, na ɛmfa ho sɛ ehu kaa yɛn no yɛbɔɔ mmɔden twaa asubɔnten no. Bere a yetwaa asubɔnten no koduu agya no, yehuu kanea bi wɔ bepɔw bi a ɛbɛn hɔ so, na yehuu ntamadan kakra wɔ hɔ. Ná ɛha na yɛrebɛtra. Me ne nneduafo bɛyɛ 30 traa ntamadan bi a na emu sõ kakra mu. Edu awɔw bere a, na awɔw no ano tumi yɛ den paa ma ɛhɔ yɛ nwini sen frigye mu mpo, na ntamadan no antumi amma yɛn ho anyɛ yɛn hyew ahe biara. Na adwuma titiriw a nneduafo no yɛ ne sɛ wobebu nnua, nanso mede, na misisi adan ma nneduafo no.

Minyaa Honhom Fam Aduan Wɔ Yɛn Trabea a na Atew ne Ho No

Ná me nkutoo na meyɛ Ɔdansefo wɔ saa atrae hɔ; nanso Yehowa annyaw me. Da bi, me nsa kaa amenade bi fii me maame a na ɔda so te Ukraine atɔe fam no hɔ. Bere a ɔwɛnfo bi buee amenade no so no, Bible ne ade a odii kan hui. Ofii ase buebuee mu. Medwenee nea mɛka ho, sɛnea ɛbɛyɛ a wɔrennye honhom fam agyapade yi mfi me nsam. Ɔwɛnfo no bisae ntɛm ara sɛ, “Dɛn ade ni?” Afiasehwɛfo panyin bi a na ogyina yɛn nkyɛn hɔ maa no mmuae mpo ansa na meretumi adwen nea mɛka ho. Obuae sɛ: “Oo! Ɛyɛ nsɛm asekyerɛ nhoma.” Manka hwee. (Ɔsɛnkafo 3:7) Afiasehwɛfo panyin no hwehwɛɛ nneɛma a aka no mu na ɔde Bible a ɛsom bo no kaa ho de maa me. M’ani gyei araa ma memaa no nkate a na ɛka m’amenade no ho no bi. Bere a me nsa kaa saa nneɛma yi mihui sɛ na Yehowa werɛ mfii me. Ofii ayamye mu boaa me na ɔma minyaa me honhom fam ahiade nso.—Hebrifo 13:5.

Mekaa Asɛmpa no a Mannyae

Asram kakraa bi akyi no, ɛyɛɛ me nwonwa sɛ minyaa krataa bi fii onua Kristoni bi a na ɔda afiase bi a efi yɛn atrae hɔ kɔ hɔ no bɛyɛ kilomita 400 hɔ. Ɔka kyerɛɛ me sɛ menhwehwɛ ɔbarima bi a na wakyerɛ asɛm no ho anigye a ɛbɛyɛ sɛ ɔwɔ yɛn atrae hɔ saa bere no. Na ɛnyɛ papa koraa sɛ ɔbɛka nsɛm a obiara betumi akenkan ate ase saa wɔ krataa no mu, efisɛ na wɔkan yɛn nkrataa ansa na wɔde  ama yɛn. Anyɛ me nwonwa koraa sɛ afiase ahwɛfo mpanyimfo no biako frɛɛ me kɔɔ n’adwumayɛdan mu na ɔbɔɔ me kɔkɔ denneennen sɛ mma menka asɛmpa no. Afei ɔka kyerɛɛ me sɛ memfa me nsa nhyɛ krataa bi a ɛkyerɛ sɛ merenka me gyidi ho asɛm nkyerɛ afoforo bio ase. Meka kyerɛɛ no sɛ minhu nea enti a ɛsɛ sɛ mede me nsa hyɛ krataa a ɛte saa ase, efisɛ na obiara nim dedaw sɛ meyɛ Yehowa Dansefo. Meka kyerɛɛ no sɛ nneduafo binom pɛ sɛ wohu nea enti a wɔde me ato afiase. Enti dɛn na menka nkyerɛ wɔn? (Asomafo Nnwuma 4:20) Afiasehwɛfo panyin no hui sɛ ontumi nhunahuna me, enti ɔyɛɛ n’adwene sɛ obeyi me afi hɔ. Wɔde me kɔɔ atrae foforo.

Woyii me kɔɔ Vaya akuraase, na efi atrae a na mewɔ hɔ no kɔ hɔ yɛ kilomita 200. Wɔn a na wɔhwɛ hɔ no tee me gyinabea sɛ Kristoni no ase enti wɔamma manyɛ asraafo adwuma. Midii kan yɛɛ duadwumfo adwuma, ɛnna akyiri yi meyɛɛ anyinam ahoɔden ho adwuma. Nanso na ɔhaw wɔ saa nnwuma yi mu nso. Bere bi, wɔka kyerɛɛ me sɛ memfa me nneɛma a mede yɛ adwuma na menkɔ akuraa no anigyebea hɔ. Miduu hɔ no, asraafo a na wɔwɔ hɔ no ani gyei sɛ wohuu me. Na wɔn akanea a ɛma asraafo ahyɛnsode ahorow hyerɛn no ntumi nsɔ yiye. Ná wɔpɛ sɛ meboa wɔn na wosiesie nneɛma efisɛ na Russia asraafo no rebedi wɔn afe afe afahyɛ. Bere a mede mpaebɔ susuw asɛm no ho wiei no, meka kyerɛɛ wɔn sɛ mintumi nyɛ saa adwuma no. Mede me nneɛma a mede yɛ adwuma no maa wɔn, na migyaw hɔ kɔe. Wɔkɔka kyerɛɛ ɔkwankyerɛfo abadiakyiri no, na ɛyɛɛ me nwonwa sɛ otiee nsɛm a wɔka tiaa me no nyinaa, na ɔkae sɛ: “Mete no ase. Ɔyɛ obi a odi n’asɛm so.”

Minyaa Nkuranhyɛ Fii Baabi a na Menhwɛ Kwan

Wɔ June 8, 1984 no, bere a medaa afiase mfe abiɛsa akyi no, wogyaee me. Mesan kɔɔ Ukraine no, na ɛsɛ sɛ mekyerɛw me din wɔ asraafo no hɔ sɛ na meyɛ ɔdeduani. Asraafo mpanyimfo no ka kyerɛɛ me sɛ wɔbɛsan adi m’asɛm bio wɔ asram asia ntam, enti ɛbɛyɛ papa sɛ mefi ɔmantam no mu koraa. Enti mifii Ukraine, na bere bi akyi no, minyaa adwuma wɔ Latvia. Mitumi kaa asɛm no kyerɛɛ afoforo, na me ne Adansefo kakra a na wɔte ahenkurow Riga mu ne mpɔtam hɔ no bɔe kakra. Nanso, afe biako pɛ akyi no, wɔsan frɛɛ me sɛ menkɔ sraadi. Meka kyerɛɛ ɔsraani a na ɔwɔ baabi a wɔkyerɛw din no sɛ, bere bi a atwam no mankɔ sraadi. Ɔsraani no teɛɛm bisae sɛ: “So wunim nea woreyɛ ankasa? Yɛbɛhwɛ nea wobɛka akyerɛ ɔsraani panyin no!”

Odii m’anim de me kɔɔ dan bi a ɛwɔ abansoro dan a ɛto so abien no so, baabi a na ɔsraani panyin no te pon tenten bi akyi. Bere a mekyerɛkyerɛɛ me gyinabea mu kyerɛɛ no no, otiee me yiye, na ɔka kyerɛɛ me sɛ me da so wɔ bere a metumi de asan asusuw me gyinaesi no ho ansa na makɔ kuw a wɔkyerɛw din no anim. Bere a yefii ɔsraani panyin no dan mu hɔ no, ɔsraani no a na wadi kan akasa atia me no kae sɛ: “Afei na mahu sɛ wowɔ gyidi ankasa!” Bere a wɔfrɛɛ me asraafo boayikuw bi  anim no, mesan kae sɛ menkɔ sraadi, na wogyaee me.

Saa bere no, na mete ahɔhodan bi mu. Anwummere bi, metee sɛ obi rebɔ me pon mu brɛoo. Mibuee pon no huu papa bi a wasiesie ne ho kama a okura bag. Ɔdaa ne ho adi sɛ: “Mifi Ɔman Bammɔ Adwumam. Minim sɛ worehyia nsɛnnennen, na wɔde wo rebɛkɔ asɛnnibea akodi w’asɛm.” Mekae sɛ, “Yiw, ɛte saa.” Papa no san kae sɛ: “Sɛ wopene so sɛ wobɛyɛ adwuma ama yɛn a, yɛbɛboa wo.” Mekae sɛ, “Dabi, mintumi nyɛ saa. Mekura me gyidi a mewɔ sɛ Kristoni no mu.” Ohui sɛ ontumi nnan m’adwene no, ɔkɔe.

Wɔsan De Me Kɔɔ Afiase, Mifii Asɛnka Ase Bio

Wɔ August 26, 1986 no, Riga Ɔman Asɛnnibea no buu me fɔ sɛ menkɔda afiase mfe anan na menyɛ adwumaden, na wɔde me kɔɔ Riga afiase kɛse bi mu. Wɔde me ne nneduafo 40 koguu afiasedan kɛse bi mu, na mebɔɔ mmɔden sɛ mɛka asɛm akyerɛ obiara a ɔwɔ hɔ. Ebinom kae sɛ wogye Onyankopɔn di; afoforo nso serewee kɛkɛ. Mehyɛɛ no nsow sɛ na wɔahyehyɛ mmarima no akuwakuw, na nnawɔtwe abien akyi no, wɔn a wodi akuwakuw no anim no ka kyerɛɛ me sɛ esiane sɛ menyɛ nneɛma a wɔyɛ no bi nti, wɔremma menka asɛm no wɔ hɔ. Mekyerɛkyerɛ mu kyerɛɛ wɔn sɛ mede mmara soronko na ɛbɔ me bra, ɛno nti na wɔkyeree me too afiase.

Mekɔɔ so de anifere kaa asɛm no, na bere a minyaa ebinom a na wɔpɛ sɛ wosua Onyankopɔn ho asɛm no, mitumi ne wɔn mu baanan suaa Bible no. Sɛ yɛrebɔ nkɔmmɔ a, na wɔkyerɛw Bible nkyerɛkyerɛ atitiriw wɔ nhoma bi mu. Asram kakraa bi akyi no, wɔde me kɔɔ atrae bi a na ɛhɔ bammɔ mu yɛ den wɔ Valmiera. Meyɛɛ anyinam ahoɔden ho adwuma wɔ hɔ. Mitumi ne anyinam ahoɔden ho dwumayeni foforo bi suaa Bible wɔ hɔ ma mfe anan akyi no ɔbɛyɛɛ Yehowa Dansefo.

Wɔ March 24, 1988 no, woyii me fii atrae a ɛhɔ bammɔ mu yɛ den no kɔɔ atrae bi a na ɛbɛn hɔ mu. Eyi boaa me paa, efisɛ ɛma minyaa kwan pii kaa asɛm no. Wɔmaa mekɔyɛɛ adwuma wɔ baabi a wosisi adan, na mehwehwɛɛ hokwan de kaa asɛm no bere biara. Ná metaa fi atrae hɔ kɔka asɛm no ma ade sa ansa na masan aba, nanso manhyia ɔhaw biara bere a masan aba atrae hɔ no.

Yehowa hyiraa me mmɔdenbɔ so. Ná Adansefo kakraa bi te mpɔtam hɔ, nanso na Ɔdansefo biako pɛ na ɔwɔ kurow no ankasa mu—onuawa bi a ne mfe akɔ anim a wɔfrɛ no Vilma Krūmin̗a. Me ne Onuawa Krūmin̗a fii ase ne mmabun pii yɛɛ Bible adesua. Ɛwɔ hɔ a, anuanom mmarima ne mmea tu kwan fi Riga ba ha bɛyɛ asɛnka adwuma no, na daa akwampaefo binom nso mpo fii Leningrad bae (seesei wɔfrɛ no St. Petersburg). Ɛdenam Yehowa mmoa so no, yefii Bible adesua pii ase, na ankyɛ na mede me ho hyɛɛ akwampae adwuma no mu. Ná mede nnɔnhwerew 90 ka asɛm no ɔsram biara.

Wɔ April 7, 1990 no, wɔsan frɛɛ m’asɛm no wɔ Ɔman Asɛnnibea wɔ Valmiera. Bere a wofii m’asɛnnii no ase no, mihui sɛ minim kwaadubɔfo no. Ná ɔyɛ aberante bi a me ne no asusuw Bible no ho pɛn! Ɔno nso huu me na ɔserewee kakra nanso wanka hwee. Meda so ara kae asɛm a ɔtemmufo no ka kyerɛɛ me saa da no bere a na wɔredi m’asɛm no: “Yurii, na mmara mma ho kwan sɛ wodi w’asɛm de wo to afiase mfe anan. Ná anka ɛnsɛ sɛ wobu wo fɔ.” Enti ɛhɔ ara na minyaa ahofadi!

Kristo Sraani

Wɔ June 1990 mu no, na ɛsɛ sɛ mesan kɔkyerɛw me din wɔ asraafo adwumayɛbea hɔ na ama matumi anya tumi krataa atra Riga. Mesan kɔɔ adwumayɛdan a ɔpon tenten bi si hɔ a mfe anan a atwam no meka kyerɛɛ ɔsraani panyin no wɔ hɔ sɛ menkɔ sraadi no. Saa bere yi  de, ɔsɔre kyiaa me, na okyiaa me nsam kae sɛ: “Enye koraa sɛ wofaa tebea a ɛte saa nyinaa mu. Ɛyɛ me yaw sɛ ɛbaa no saa.”

Mekae sɛ: “Meyɛ Kristo sraani, na ɛsɛ sɛ meyɛ m’asɛyɛde. Bible betumi aboa wo ma wo nso woanya asetra a ɛyɛ anigye ne daakye a enni awiei a Kristo de ahyɛ n’akyidifo bɔ no bi.” (2 Timoteo 2:3, 4) Ɔsraani panyin no kae sɛ: “Matɔ Bible nnansa yi ara, na mafi ase rekenkan.” Ná mewɔ Wubetumi Atra Ase Daa wɔ Paradise wɔ Asase So nhoma no bi wɔ me ho. * Mibuee kɔɔ ti a ɛka nna a edi akyiri ho sɛnkyerɛnne ho asɛm no, na mekyerɛɛ no sɛnea Bible nkɔmhyɛ renya mmamu wɔ yɛn bere yi so. Ɔsraani panyin no kyerɛɛ obu ne anisɔ kɛse san kyiaa me nsam, na ɔka kyerɛɛ me sɛ ensi me yiye wɔ adwuma a mereyɛ no mu.

Ebeduu saa bere yi na afuw no ahoa sɛ wotwa wɔ Latvia. (Yohane 4:35) Mifii ase somee sɛ asafo mu panyin wɔ afe 1991 mu. Ná asafo mu mpanyimfo baanu pɛ na wɔwɔ ɔman no nyinaa mu! Wɔ ɔsram biako akyi no, wɔkyɛɛ asafo biako pɛ a na ɛwɔ Latvia no mu abien—na asafo biako ka Latvia kasa ɛnna biako nso ka Russia kasa. Minyaa hokwan somee wɔ asafo a wɔka Russia kasa no mu. Yɛn asafo no nyaa nkɔso ntɛmntɛm araa ma afe a edi hɔ no wɔkyɛɛ mu abiɛsa! Sɛ mekaakae nea atwam no a, ɛda adi sɛ na Yehowa ankasa na ɛrekyerɛ ne nguan kwan aba n’ahyehyɛde mu.

Wɔ afe 1998 mu no, wɔpaw me sɛ menkɔyɛ ɔkwampaefo titiriw wɔ Jelgava, kurow bi a efi Riga kɔ hɔ bɛyɛ kilomita 40, na ɛwɔ n’anafo fam atɔe. Saa afe no ara mu no, wɔtoo nsa frɛɛ me ma mekɔkaa wɔn a wodii kan too nsa frɛɛ wɔn wɔ Latvia ma wɔkɔɔ Asomfo Ntetee Sukuu a wɔyɛɛ no Russia kasa mu wɔ Solnechnoye, a ɛbɛn St. Petersburg, Russia no ho. Bere a na yɛreyɛ sukuu no, mibehuu sɛnea ɛho hia sɛ yɛda ɔdɔ adi kyerɛ nnipa na ama asɛnka adwuma no asow aba. Ade a ɛkaa me kɛse sen nea wɔkyerɛkyerɛɛ yɛn wɔ sukuu no mu nyinaa ne ɔdɔ ne bere a Betel abusua no ne sukuu no akyerɛkyerɛfo nyaa maa yɛn no.

Ade titiriw a mesan yɛe wɔ m’asetram ne bere a mewaree Karina, Kristoni bea hoɔfɛfo bi wɔ afe 2001 mu no. Karina bɛkaa me ho wɔ bere nyinaa som adwuma no mu, na da biara a mehu sɛ me yere fi asɛnka reba a n’ani agye no ɛhyɛ me nkuran. Nokwarem no, ɛyɛ anigye yiye sɛ obi bɛsom Yehowa. Sɔhwɛ a ɛyɛ den a mihyiae wɔ Komunis nniso ase no ma mihui sɛ ɛsɛ sɛ me de me ho to Yehowa so koraa. Afɔre biara obi bɛbɔ na ama wakɔ so ayɛ Yehowa adamfo na wagyina ne tumidi akyi no fata koraa. Afoforo a meboaa wɔn ma wosuaa Yehowa ho ade no ama manya atirimpɔw wɔ asetram. Manya hokwan a ɛso bi nni de asom Yehowa sɛ “Kristo Yesu sraani pa.”—2 Timoteo 2:3.

[Ase hɔ asɛm]

[Mfonini wɔ kratafa 10]

Wobuu me fɔ sɛ menkɔyɛ adwumaden mfe anan na wɔde metoo Riga afiase kɛse bi mu nso

[Mfonini wɔ kratafa 12]

Me ne Karina wɔ asɛnka mu