Yehowa Rennyaw Wo Da

NÁ Kristofo a wɔwɔ Yudea no rehyia ɔsɔretia a emu yɛ den, na na ɛsɛ sɛ wogyina adedodowpɛ ho adwene a nnipa a na wɔte wɔn mu kura no ano. Nea ɛbɛyɛ na ɔsomafo Paulo ahyɛ wɔn nkuran no, ɔfaa asɛm a Yehowa ka kyerɛɛ Israelfo no bere a na wɔrehyɛn Bɔhyɛ Asase so no kae. Paulo kyerɛwee sɛ: “Merennyaw wo, nanso merempa wo da.” (Hebrifo 13:5; Deuteronomium 31:6) Akyinnye biara nni ho sɛ saa bɔhyɛ yi hyɛɛ afeha a edi kan Hebri Kristofo no den.

Ɛsɛ sɛ saa bɔhyɛ yi ara nso hyɛ yɛn den ma yegyina dadwen a “mmere a emu yɛ den” a yɛte mu yi de ba no ano. (2 Timoteo 3:1) Sɛ yɛde yɛn ho to Yehowa so na yɛyɛ yɛn ade ma ɛne no hyia a, ɔbɛwowaw yɛn wɔ tebea a emu den paa mpo mu. Nea ɛbɛma yɛahu sɛnea Yehowa bedi bɔhyɛ yi so no, momma yensusuw bere a obi adwuma afi ne nsa mpofirim no ho sɛ nhwɛso.

Bere a Wo Tebea Sakra Mpofirim

Nnipa a wonnya adwuma nyɛ no redɔɔso wɔ wiase nyinaa. Sɛnea Poland nsɛmma nhoma bi kyerɛ no, wobu adwuma a wonnya nyɛ sɛ “ade a ɛde sikasɛm mu ahokyere ba paa.” Eyi aka aman a wɔanya nkɔso mpo. Sɛ nhwɛso no, eduu 2004 no, na nnipa a wonnya adwuma nyɛ wɔ aman a wɔwɔ Sikasɛm mu Biakoyɛ ne Nkɔso Ahyehyɛde mu mpo no dodow “boro ɔpepem 32, na akɔ soro sen Sikasɛm mu Ahokyere a ɛbae wɔ 1930 mfe mu hɔ no mu de.” Wɔ Poland no, Nnipa ho Akontaabu Adwumayɛbea no kyerɛ sɛ eduu December 2003 no, na nnipa ɔpepem abiɛsa na wɔnyɛ adwuma, na ɛyɛ “ɔmanfo a wɔaso adwumayɛ no mu ɔha mu nkyem 18.” Amanneɛbɔ bi kyerɛ sɛ, wɔ 2002 mu no, na Abibifo dodow a wɔwɔ South Africa no mu bɛyɛ ɔha mu nkyem 48 na wɔnyɛ adwuma!

Adwuma a wonnya nyɛ ne adwuma a ɛsɛe mpofirim yɛ ɔhaw kɛse ma nnipa pii, a Yehowa nkurɔfo ka ho. ‘Ɛbere ne asiane’ to obiara. (Ɔsɛnkafo 9:11) Ebia ɛno bɛma yɛaka asɛm a odwontofo Dawid kae yi bi: “Me koma mu ahohia so.” (Dwom 25:17) So wubetumi agyina tebea bɔne a ɛte saa ano? Ebetumi aka wo nkate, wo honhom ne wo honam fam yiyedi. Sɛ wonnyɛ adwuma a, so wubetumi abɔ wo ho mmɔden asan agyina w’anan so bio?

 Dadwen Ano a Wubegyina

Adwene ne nneyɛe ho nimdefo Janusz Wietrzyński kyerɛ sɛ, “mmarima adwuma a efi wɔn nsa tumi haw wɔn paa,” efisɛ wobu wɔn sɛ wɔn na wɔbɔ abusua no akɔnhama. Ɔkae sɛ, ebetumi ama ɔbarima afi ase “ahaw.” Afei nso, ebetumi ahyɛ no abufuw anaa n’abam bebu. Agya a wɔayi no adi afi adwumam betumi ahwere obu a ɔwɔ no “na wafi ase ne n’abusua aham.”

Adam, agya Kristoni bi a ɔwɔ mma baanu kyerɛkyerɛ sɛnea ɔtee nka bere a n’adwuma fii ne nsa no mu sɛ: “Ɛnkyɛ na me bo afuw; na biribiara yɛ me ahi. Na dae mpo a meso anadwo nyinaa fa adwuma ne sɛnea mɛhwɛ me mma ne me yere a na ɔno nso wɔayi no adi afi adwumam mpofirim no ho.” Bere a Ryszard ne Mariola, awarefo a wɔawo baako adwuma sɛee no, na wɔakogye bosea kɛse bi wɔ sikakorabea. Ɔyere no ka sɛ: “Na mehaw daa, ná m’ahonim kyerɛ me sɛ yɛadi mfomso sɛ yekogyee saa bosea no. Mekɔɔ so dwen ho sɛ me na mama eyi nyinaa aba.” Sɛ yɛkɔ tebea a ɛte saa mu a, ebia yɛn bo befuw ntɛmntɛm, yɛbɛdwennwen, na sɛnea yɛte nka no betumi ahyɛ yɛn so. Ɔkwan bɛn so na yebetumi adi nsusuwii bɔne a ebia ɛbɛba yɛn adwene mu no so?

Bible de afotu a mfaso wɔ so ma wɔ sɛnea ɛsɛ sɛ yenya adwempa no ho. Ɔsomafo Paulo de afotu mae sɛ: “Monnnwennwene biribiara nnhaw mo ho, na mmom momfa mpaebɔ ne nkotɔsrɛ ne aseda so mfa mo adesrɛ nto Nyankopɔn anim ade nyinaa mu; na Nyankopɔn asomdwoe a ɛboro adwene nyinaa so no bɛbɔ mo koma ne mo adwene nsusuwii ho ban denam Kristo Yesu so.” (Filipifo 4:6, 7) Yehowa a yɛbɛbɔ no mpae no bɛma yɛanya “Onyankopɔn asomdwoe,” asomdwoe a egyina Onyankopɔn mu gyidi a yɛwɔ so. Adam yere, Irena ka sɛ: “Yɛde yɛn tebea no too Yehowa anim wɔ mpaebɔ mu na yɛkyerɛɛ no sɛnea yɛpɛ sɛ yɛyɛ yɛn ho awiɛmfo no. Me kunu a na ɔtaa ma nsɛm haw no ntɛmntɛm no fii ase tee nka sɛ yebenya ɔhaw no ano aduru.”

Sɛ w’adwuma afi wo nsa mpofirim a, woanya hokwan a ɛbɛma wode Yesu Kristo afotu a ɔde mae wɔ Bepɔw so Asɛnka no mu no adi dwuma: “Monnnwennwene mo kra ho sɛ dɛn na mubedi anaa dɛn na mobɛnom, anaa mo nipadua ho sɛ dɛn na mobɛhyɛ. . . . Enti, monkɔ so nhwehwɛ ahenni no ne ne trenee kan, na ɔde nneɛma a aka yi nyinaa bɛka ho ama mo.” (Mateo 6:25, 33) Ryszard ne Mariola de afotu yi dii dwuma ma wogyinaa wɔn nkate ano. Mariola ka sɛ: “Me kunu kyekyee me werɛ bere nyinaa, na osii so dua sɛ Yehowa rennyaw yɛn.” Ne kunu de ka ho sɛ: “Yɛnam mpae a yɛkɔɔ so bom bɔe no so bɛnee Onyankopɔn ne yɛn ho yɛn ho kɛse, na ama yɛanya awerɛkyekye a yehia no.”

Onyankopɔn honhom kronkron no nso bɛboa yɛn ma yɛagyina. Honhom no betumi ama yɛanya ahosodi, na ɛno remma yɛn koma ntu. (Galatifo 5:22, 23) Ɛyɛ den de, nanso ebetumi ayɛ yiye efisɛ Yesu hyɛɛ bɔ sɛ “Agya a ɔwɔ soro no de honhom kronkron [bɛ]ma wɔn a wobisa no!”—Luka 11:13; 1 Yohane 5:14, 15.

 Mmu W’ani Ngu Wo Honhom Fam Ahiade So

Sɛ woyi Kristoni a ɔyɛ ne biribiara pɛpɛɛpɛ mpo fi adwumam mpofirim a, mfiase no obetumi ahaw, nanso sɛ ɛba saa a, ɛnsɛ sɛ yebu yɛn ani gu yɛn honhom fam ahiade so. Fa Mose a na wadi mfe 40 a n’asetra nyinaa sakrae bere a ɔhweree dibea a ɔwɔ wɔ ahemfie na ɔbɛyɛɛ oguanhwɛfo, adwuma a na Misrifo mfa nyɛ hwee no sɛ nhwɛso. (Genesis 46:34) Na ɛsɛ sɛ Mose yɛ nsakrae wɔ tebea foforo a ɔkɔɔ mu no mu. Wɔ mfe 40 a edi hɔ no mu no, ɔmaa Yehowa siesiee no maa adwuma foforo a na ɛda n’anim no. (Exodus 2:11-22; Asomafo Nnwuma 7:29, 30; Hebrifo 11:24-26) Ɛwom sɛ Mose hyiaa nsɛnnennen de, nanso ɔde n’ani sii ɔne Onyankopɔn ntam abusuabɔ so, na ofii ne pɛ mu gyee ntetee a Yehowa de maa no no toom. Mommma yɛmmma tebea bɔne nhyɛ yɛn honhom fam su pa a yɛwɔ no so!

Ɛwom sɛ adwuma a ebefi yɛn nsa mpofirim no betumi ahaw adwene de, nanso ɛyɛ bere pa a yɛde bɛhyɛ abusuabɔ a ɛda yɛne Yehowa Onyankopɔn ne yɛn nuanom ntam no mu den. Saa pɛpɛɛpɛ na Adam a yedii kan kaa ne ho asɛm no tee nka. Ɔka sɛ: “Bere a me ne me yere nyinaa adwuma sɛee no, yɛannwen ho koraa da sɛ yɛrenkɔ Kristofo nhyiam anaasɛ yɛbɛtew bere dodow a yɛde yɛ asɛmpaka adwuma no so. Saa adwene no bɔɔ yɛn ho ban ma enti yɛannwen nea ɛbɛba ɔkyena ho pii.” Ryszard nso te nka saa ara: “Sɛ ɛnyɛ nhyiam ne asɛnka a, anka yɛrentumi nnyina ano da; anka adwennwen bɛmene yɛn. Onyankopɔn som ho nsɛm a yɛka kyerɛ afoforo no hyɛɛ yɛn den,  efisɛ ɛma yɛde yɛn adwene kɔɔ wɔn ahiade so na ɛnyɛ yɛn de so.”—Filipifo 2:4.

Yiw, sɛ anka wubedwennwen adwumayɛ ho no, bɔ mmɔden fa bere pii no yɛ honhom fam nnwuma, kokoam adesua, fa wo ho hyɛ asafo dwumadi ahorow anaa trɛw wo som adwuma mu. Sɛ anka wobɛtra ase a wonyɛ adwuma biara no, ‘yɛ pii wɔ Awurade adwuma no mu’—ɛbɛma woanya anigye na obiara a otie Ahenni asɛm a woka no nso ani begye.—1 Korintofo 15:58.

W’abusua Honam Fam Ahiade a Wode Bɛma Wɔn

Nanso honhom fam nneɛma nkutoo a wubedi akyi no remma wo aduan nni. Ɛsɛ sɛ yɛma saa nnyinasosɛm yi tra yɛn adwene mu: “Nokwasɛm ni, sɛ obi nhwɛ n’ankasa ne nnipa, ne ne titiriw no, ne fiefo a, wapa gyidi no, na ɔyɛ nipa bɔne sen nea onnye nni mpo.” (1 Timoteo 5:8) Adam ka sɛ: “Ɛwom sɛ anuanom a wɔwɔ asafo no mu no yɛ ntɛm de yɛn honam fam ahiade ma yɛn de, nanso sɛ Kristofo no, ɛyɛ yɛn asɛyɛde sɛ yɛpɛ adwuma yɛ.” Yebetumi de yɛn ho ato Yehowa ne afoforo mmoa so de, nanso ɛnsɛ sɛ yɛn werɛ fi sɛ ehia sɛ yedi kan tu adwuma a yɛrepɛ ayɛ no ho anammɔn.

Anammɔn bɛn na wubetumi atu? Adam kyerɛkyerɛ mu sɛ: “Mmfa wo nsa nhyɛ wo damirifam nhwɛ kwan sɛ Onyankopɔn bɛfa anwonwa kwan bi so aboa wo. Sɛ worepɛ adwuma a, mma ɛnyɛ wo den sɛ wobɛka sɛ woyɛ Yehowa Dansefo. Adwumawuranom bu asɛm a ɛte saa yiye.” Ryszard tu fo yi sɛ: “Bisa obiara a wunim sɛ wate adwuma bi nka, kɔ so ara kɔ mmeae a nkurɔfo kɔpɛ adwuma, kenkan adwuma ho dawuru a wɔbɔ te sɛ: ‘Yɛpɛ ɔbea a ɔbɛhwɛ ɔyarefo’; anaa ‘Bere tiaa mu adwuma: Yɛpɛ obi a ɔbɛtew akutu.’ Kɔ so ara hwehwɛ adwuma! Sɛ adwuma a wubenya no ba fam anaa w’ani nnye ho a, nyɛ nyiyim pii.”

Yiw, ‘Yehowa ne wo boafo.’ ‘Ɔrennyaw wo na ɔrempa wo nso da.’ (Hebrifo 13:5, 6) Enhia sɛ wudwennwen boro so. Odwontofo Dawid kyerɛwee sɛ: “Fa wo kwan hyɛ [Yehowa, NW] nsam, na fa wo ho to no so, na ɔno na ɔbɛyɛ.” (Dwom 37:5) Sɛ́ yɛde yɛn akwan bɛhyɛ Yehowa nsam no kyerɛ sɛ yɛde yɛn ho bɛto no so na yɛayɛ nneɛma sɛnea ɔpɛ, sɛ tebea no nye mma yɛn mpo a.

Adam ne Irena nam mfɛnsere mu a wɔpopae ne atrapoe a wɔhohoroo so no so hwɛɛ wɔn ho. Afei nso na wɔntɔ nneɛma basabasa. Ná wɔtaa kɔ baabi a nkurɔfo kɔpɛ adwuma no. Irena ka sɛ: “Na yenya mmoa bere biara a yehia no.” Ne kunu toa so sɛ: “Osuahu yi ama yɛahu sɛ nneɛma a na yɛka ho asɛm wɔ yɛn mpaebɔ mu no ne Onyankopɔn apɛde nhyia. Eyi akyerɛ yɛn sɛ yɛmfa yɛn ho nto Yehowa nyansa so na yennyina yɛn ankasa ntease so nyɛ ade. Eye sɛ wobɛyɛ komm atwɛn ma Onyankopɔn akyerɛ wo ɔkwan a wobɛfa so adi ho dwuma.”—Yakobo 1:4.

Ná Ryszard ne Mariola nni adwuma pɔtee a wɔyɛ bere nyinaa, nanso bere koro no ara mu no, na wodi adanse wɔ nsasesin a wohia mmoa kɛse mu. Ryszard ka sɛ: “Na yenya adwuma a ɛfata no wɔ mmere a yenni hwee a yebedi no mu. Yɛannye adwuma a n’akatua so a na ebetumi atwitware yɛn teokrase dwumadi mu no. Yɛpaw sɛ yɛbɛtwɛn Yehowa.” Wogye di sɛ Yehowa dii nsɛm ho dwuma ma wotumi nyaa dan a na ɛho ka sua koraa na awiei no Ryszard nyaa adwuma.

Sɛ obi adwuma fi ne nsa a, ebetumi ahaw adwene paa. Nanso dɛn nti na wummu no sɛ hokwan a ɛbɛma woahu sɛ Yehowa rennyaw wo da? Yehowa bɛhwɛ wo. (1 Petro 5:6, 7) Ɔnam odiyifo Yesaia so ahyɛ bɔ sɛ: “Mma wo bo nntu, na mene wo Nyankopɔn. Mehyɛ wo den, nso meboa wo.” (Yesaia 41:10) Mma asɛm bi a esi mpofirim, te sɛ w’adwuma a ebefi wo nsa mma wo mmotow. Yɛ nea wubetumi biara na gyaw nea aka no hyɛ Yehowa nsa. ‘Yɛ komm’ twɛn Yehowa. (Kwadwom 3:26) Na wubenya nhyira pii.—Yeremia 17:7.

[Mfonini wɔ kratafa 9]

Fa bere no yɛ honhom fam nnwuma

[Mfonini ahorow wɔ kratafa 10]

Ntɔ nneɛma basabasa, na nyiyi adwuma mu bere a worepɛ bi no