Asetram Nsɛm

Minyaa ‘Nea Me Koma Pɛ’

SƐNEA DOMINIQUE MORGOU KA KYERƐE

Awiei koraa no, mekɔɔ Afrika wɔ December 1998 mu! Afei de, na nea na ɛda me koma so fi me mmofraase no abam. Bere nyinaa na Afrika asase pradada ne ɛso wuram mmoa a wɔn ho yɛ anika a midwennwen ho no ma m’ani gye. Seesei de na m’ani tua ankasa! Bere koro no ara na ade foforo a ɛda me koma so nso abam. Ná me yɛ bere nyinaa ɔsɛmpakafo a meresom wɔ amannɔne asase so. Ebia anka eyi bɛyɛ ade a ɛrentumi nyɛ yiye wɔ nnipa pii fam. M’ani nhu ade yiye koraa, na ɔkraman bi a wɔatete no ma otumi kyerɛ kwan wɔ Europa mmɔnten so na ɔkyerɛ me kwan bere a menam Afrika nkuraase mfutukwan so no. Ma menka nea ɛyɛe a mitumi kɔsomee wɔ Afrika ne sɛnea Yehowa maa me ‘nea me koma pɛ’ ho asɛm nkyerɛ wo.—Dwom 37:4.

WƆWOO me June 9, 1966, wɔ France anafo fam. Ná me na meyɛ mmofra baason no mu akumaa koraa. Na yɛyɛ mmarimaa baanu ne mmeawa baanum. Na awofo a wɔwɔ ɔdɔ na wɔhwɛɛ yɛn nyinaa. Nanso, awerɛhosɛm bi too me wɔ me mmofrase pɛɛ. Wɔde yare bi a ɛde nkakrankakra kowie anifurae mu woo me te sɛ me nanabea, me maame, ne me nuabeanom biako.

Meyɛ ababaawa no, na ɛsɛ sɛ migyina nnipa mu nyiyim, nnipa ho adwemmɔne, ne nyaatwomyɛ ano, na ɛno maa mesɔre tiaa afoforo.  Ɛyɛ saa bere a emu yɛ den yi mu na yetu kɔɔ Hérault mantam mu. Anwonwasɛm bi sii wɔ hɔ.

Kwasida anɔpa bi, Yehowa Adansefo baanu baa yɛn fie. Ná me maame nim wɔn nti ɔmaa wɔn agua. Mmea no biako bisaa Maame sɛ, ɔkae sɛ ɔhyɛɛ bɔ bere bi sɛ ɔbɛma wɔne ne no asua Bible daakye. Maame kaee, na obisae sɛ, “Bere bɛn na yemfi ase?” Wɔyɛɛ nhyehyɛe sɛ wobehyia Kwasida anɔpa biara, na me maame fii ase suaa “asɛmpa ho nokware no” wɔ saa kwan yi so.—Galatifo 2:14.

Minyaa Ntease

Maame yeree ne ho denneennen sɛ ɔbɛte nea na osua no ase na wakae. Esiane sɛ na n’ani afura nti, na ɛsɛ sɛ ɔkyere biribiara gu ne tirim. Adansefo no tɔɔ wɔn bo ase yiye maa no. Me de, bere biara a Adansefo no bɛba no, na mede me ho kosie wɔ me dan mu kosi sɛ wɔbɛkɔ ansa na mapue. Nanso, awia bi de, Ɔdansefo no biako a wɔfrɛ no Eugénie bɛtoo me, na ɔne me kasae. Ɔka kyerɛɛ me sɛ Onyankopɔn Ahenni beyi nyaatwomyɛ, ɔtan, ne nnipa ho adwemmɔne a ɛwɔ wiase no nyinaa afi hɔ. Ɔkae sɛ, “Onyankopɔn nkutoo na obetumi ayi afi hɔ.” Obisaa me sɛ mepɛ sɛ mihu pii anaa? Ade kyee no, mifii me Bible adesua ase.

Biribiara a misuae no yɛɛ me asɛm foforo. Afei mebɛtee ase sɛ ntease pa bi nti na Onyankopɔn ama nsɛmmɔnedi ho kwan wɔ asase so kosi bere bi. (Genesis 3:15; Yohane 3:16; Romafo 9:17) Mesan hui sɛ Yehowa ma yenya anidaso. Wahyɛ yɛn bɔ a ɛyɛ anigye sɛ yebenya daa nkwa wɔ Paradise asase so. (Dwom 37:29; 96:11, 12; Yesaia 35:1, 2; 45:18) M’ani a na ɛrefura nkakrankakra no bɛsan ahu ade bio wɔ saa Paradise no mu.—Yesaia 35:5.

Mifii Bere Nyinaa Som Adwuma Ase

Mede nsu mu asubɔ yɛɛ m’ahosohyira ho sɛnkyerɛnne maa Yehowa wɔ December 12, 1985, na mebɛkaa me nuabea Marie-Claire a na wadi kan abɔ asu dedaw no ho. Ankyɛ na me nuabarima Jean-Pierre ne me maame nso bɔɔ asu.

Ná daa akwampaefo anaa bere nyinaa asɛmpakafo pii wɔ asafo a na mewom no mu. Anigye ne nsi a na wɔde yɛ asɛnka adwuma no hyɛɛ me nkuran. Marie-Claire a na ɔyare n’ani na ɔsan hyɛ dade bi wɔ ne nan biako ho mpo no de ne ho hyɛɛ bere nyinaa som adwuma no mu. Ne nhwɛso da so hyɛ me nkuran wɔ Yehowa som adwuma no mu de besi nnɛ. Esiane sɛ na akwampaefo atwa me ho ahyia wɔ asafo no ne m’abusua mu nti, ɛboaa me ma minyaa ɔpɛ a emu yɛ den sɛ mede me ho bɛhyɛ bere nyinaa som adwuma no mu. Enti, wɔ November 1990 mu no, mifii ase somee sɛ ɔkwampaefo wɔ Béziers.—Dwom 94:17-19.

Migyinaa Abasamtu Ano

Ná akwampaefo foforo a me ne wɔn kɔ asɛnka no hwɛ me so yiye. Ɛno mpo no, esiane me yare no nti, ɛtɔ mmere bi a na m’abam abu na me yam a anka mitumi yɛ pii sen saa. Nanso, Yehowa wowaw me wɔ mmere a na m’abam bu no mu. Meyɛɛ nhwehwɛmu wɔ Watch Tower Publications Index no mu, hwehwɛɛ akwampaefo a wɔn nso nhu ade yiye te sɛ me no asetram nsɛm. Dodow a mihui no yɛɛ me nwonwa! Saa akwampaefo yi asetram nsɛm no hyɛɛ me nkuran ma mihui sɛ ɛsɛ sɛ mema m’ani sɔ nea na mitumi yɛ biara, na mefa me tebea no saa ara.

Sɛnea ɛbɛyɛ a metumi ahwɛ me ho no, me ne Adansefo foforo boom yɛɛ adwuma wɔ adetɔnbea. Ná yesiesie hɔ. Da bi, mihui sɛ wɔn a me ne wɔn yɛ adwuma no mu bi resan asiesie baabi a na mayɛ dedaw no. Ɛda adi sɛ manhu fĩ a na ɛwɔ hɔ no yiye. Mikohuu Valérie, a na ɔyɛ ɔkwampaefo a ɔda yɛn a na yesiesie hɔ no ano no, meka kyerɛɛ no sɛ ɔnka nokware nkyerɛ me sɛ mema adwuma no yɛ yɛ den ma wɔn a aka no anaa. Ofii ayamye mu gyaw maa me sɛ bere biara a mete nka sɛ mintumi nyɛ adwuma no bio no m’ankasa minsi ho gyinae. Migyaee saa adwuma no yɛ wɔ March 1994 mu.

 Mesan tee nka sɛ me so nni mfaso. Mebɔɔ Yehowa mpae denneennen, na minim sɛ otiee m’adesrɛ no. Bible no ne Kristofo nhoma ahorow a misuae no san boaa me paa. Ɛno mpo no, bere a na m’ani no refura nkakrankakra no, na ɔpɛ a mewɔ sɛ mɛsom Yehowa no mu reyɛ den. Dɛn na na metumi ayɛ?

Mfiase no Metwɛnee, Afei Misii Gyinae Bi Ntɛm

Mede akwammisa kɔɔ baabi a wɔtete anifuraefo ne wɔn a wɔn ani nhu ade yiye no hɔ wɔ Nîmes, na bere bi akyi no, wogyee me wɔ hɔ asram abiɛsa. Bere a midii wɔ hɔ no so baa mfaso yiye. Mebɛtee me yare no ase yiye na misuae sɛ mɛyɛ nsakrae. Nnipa a yare ahorow ahorow ayɛ wɔn a me ne wɔn bɔe no boaa me ma mihuu sɛnea daakye ho anidaso a mewɔ sɛ Kristoni no som bo fa. Anyɛ yiye koraa no na mewɔ botae, na na metumi ayɛ biribi a mfaso wɔ so. Bio nso, misuaa Anifuraefo Nkyerɛwee wɔ Franse kasa mu.

Bere a mesan baa fie no, m’abusua no huu sɛnea na ntetee no aboa me. Nanso, ade biako a na mempɛ ne poma fitaa a na ɛsɛ sɛ mede nantew no. Ná ɛyɛ den ma me sɛ mede saa “abaa” no bɛnantew. Enti misusuw ho sɛ, ebia minya ɔkraman a ɔkyerɛ anifuraefo kwan a ɛbɛboa me.

Mede abisade kɔe sɛ mepɛ ɔkraman nanso wɔka kyerɛɛ me sɛ nnipa bebree de wɔn abisade aba dedaw nti ɛsɛ sɛ metwɛn. Afei nso, na ɛsɛ sɛ adwumakuw no yɛ nhwehwɛmu, efisɛ wɔmfa ɔkraman a ɔkyerɛ anifuraefo kwan mma obiara kɛkɛ. Da bi, ɔbea bi a ɔboa kuw bi a wɔhwɛ anifuraefo ka kyerɛɛ me sɛ, bɔɔlbɔ kuw bi a ɛwɔ mpɔtam hɔ pɛ sɛ wɔde ɔkraman a ɔkyerɛ anifuraefo kwan ma onifuraefo bi anaa obi a n’ani nhu ade yiye a ɔte yɛn mpɔtam hɔ. Ɔkae sɛ me ho adwene baa ne tirim. Obisaa me sɛ, mepɛ  anaa? Mihui sɛ Yehowa nsa wɔ asɛm no mu nti mepenee so. Nanso, na ɛsɛ sɛ metwɛn kakra ansa na me nsa aka ɔkraman no.

Ná Afrika Ho Adwene Da So Wɔ Me Tirim

Bere a na meretwɛn no, mede m’adwene sii biribi foforo so. Sɛnea midii kan kae no, na m’ani gye Afrika ho paa fi me mmofraase. Ɛmfa ho sɛ na m’ani no refura no, na saa anigye a mewɔ wɔ Afrika ho no mu yɛ ara na ɛreyɛ den, titiriw esiane sɛ na mate sɛ nnipa a wɔwɔ Afrika no mu pii ani gye Bible ne Yehowa som ho nti. Bere bi a atwam no, meka de twaam ara kwa kyerɛɛ Valérie sɛ m’ani begye ho sɛ mɛkɔ akɔhwɛ Afrika. Mibisaa no sɛ ɔne me bɛkɔ anaa? Ɔpenee so, na yɛkyerɛw kɔɔ Yehowa Adansefo baa dwumadibea ahorow a wɔka Franse kasa wɔ Afrika.

Yenyaa mmuae fii Togo. M’ani gyei yiye na meka kyerɛɛ Valérie sɛ ɔnkenkan nkyerɛ me. Ná krataa no hyɛ nkuran, nti Valérie kae sɛ: “Ɛnde, yebetumi akɔ.” Bere a me ne anuanom a wɔwɔ baa dwumadibea no dii nkitaho wiei no, wɔkyerɛɛ me sɛ me ne Sandra, ɔkwampaefo bi a ɔwɔ Lomé, ahenkurow no mu nni nkitaho. Yɛyɛɛ nhyehyɛe sɛ yɛbɛkɔ December 1, 1998.

Ná ɛyɛ soronko koraa, nanso na ɛyɛ anika! Bere a wimhyɛn no koduu Lomé a yesii no, yehui sɛ Afrika yɛ hyew paa. Sandra behyiaa yɛn. Ná yenhyiae da, nanso amonom hɔ ara na ɛte sɛ nea yɛyɛ nnamfo dedaw. Bere tiaa bi ansa na yɛreba hɔ no, na wɔapaw Sandra ne Christine a ɔka ne ho no sɛ wɔnkɔyɛ akwampaefo atitiriw wɔ akuraa bi a wɔfrɛ hɔ Tabligbo ase. Enti yenyaa hokwan no ne wɔn boom kɔɔ akuraa a na wɔafi wɔn dwumadi no ase wɔ hɔ no ase. Yedii bɛyɛ asram abien wɔ hɔ, na bere a yɛsan kɔe no, na minim sɛ mɛsan aba.

M’ani Gyei sɛ Mesan Kɔɔ Togo

Mekɔɔ France no, mifii ase boaboaa me ho ntɛm ara maa kwan a na mɛsan atu akɔ Togo ne mprenu so no. Ɛdenam m’abusua mmoa so no, mitumi yɛɛ nhyehyɛe a ɛbɛma matumi atra hɔ asram asia. Enti, wɔ September 1999 mu no, mesan foro wimhyɛn kɔɔ Togo. Nanso, saa bere yi de me nkutoo na mekɔe. Susuw sɛnea m’abusuafo tee nka bere a me nkutoo mekɔe ɛmfa ho sɛ na m’ani nhu ade yiye no ho hwɛ! Nanso na biribiara nni hɔ a na ɛsɛ sɛ ɛhaw wɔn. Memaa m’awofo awerɛhyem sɛ me nnamfo a na wɔabɛyɛ te sɛ m’abusuafo no bɛba abehyia me wɔ Lomé.

Hwɛ anigye ara a na ɛyɛ sɛ mesan kɔɔ baabi a nnipa pii ani gye Bible no ho saa no! Ɛnyɛ nwonwa sɛ wubehu sɛ nnipa rekenkan Bible wɔ mmɔnten so. Nnipa taa frɛ yɛn sɛ yɛne wɔn mmɛbɔ Bible mu nkɔmmɔ wɔ Tabligbo. Na hwɛ hokwan a minyae sɛ me ne anuanom mmea akwampaefo atitiriw baanu traa fie korokorowa bi mu! Mibehuu amammerɛ foforo, ɔkwan foforo a nnipa fa so yɛ wɔn ade. Nea edi kan koraa no, mihui sɛ yɛn nuanom Kristofo mmarima ne mmea a wɔwɔ Afrika no de Onyankopɔn som di kan wɔ wɔn asetram. Sɛ nhwɛso no, ɛsɛ sɛ wɔnantew twa kwan kilomita pii ansa na wɔakɔ Ahenni Asa so, nanso ɛno nsiw asafo nhyiam a wɔbɛkɔ kwan. Misuaa  nneɛma pii fii ɔdɔ ne ahɔhoyɛ a wɔdaa no adi no mu.

Da bi a mifi asɛnka reba no, meka kyerɛɛ Sandra sɛ misuro sɛ mɛsan akɔ France. Ná fura ara na m’ani no refura. Ná misusuw sɛnea nnipadɔm tumi yɛ Béziers akwan so ma na ɛhɔ yɛ dede, ne atrapoe a ɛwɔ adan atenten mu, ne nneɛma foforo pii a ɛma asetra yɛ den ma obi a n’ani nhu ade yiye no ho. Nanso, ɛmfa ho sɛ wɔnkaa Tabligbo akwan so no, ɛhɔ yɛ koom, nnipadɔm nhyɛ hɔ ma na kar nso nkyere so wɔ hɔ. Saa bere yi a na m’ani abɛka Tabligbo no, na mɛyɛ dɛn atumi atra France?

Nnafua abien akyi no me maame frɛɛ me ka kyerɛɛ me sɛ sukuu a wɔtete nkraman a wɔkyerɛ anifuraefo kwan no rehwehwɛ me. Ná Canadafo kraman bi a wɔfrɛ no Océane ayɛ krado rebɛkyerɛ me kwan. Me nsa san kaa nea mihia bio ma me ho tɔɔ me. Bere a mede anigye yɛɛ me som adwuma wɔ Tabligbo asram asia akyi no, mesan kɔɔ France kohyiaa Océane.

Wɔde asram pii tetee Océane akyi no, wɔde no maa me. Mfiase no, na ɛnyɛ mmerɛw. Ná ɛsɛ sɛ obiara te ne yɔnko ase. Nanso, nkakrankakra mibehuu sɛnea mihia Océane paa. Nokwasɛm ne sɛ, seesei Océane abɛyɛ me yɔnko. Bere a nnipa a wɔwɔ Béziers hui sɛ me ne ɔkraman reba wɔn fie no, dɛn na wɔyɛe? Wɔdaa obu ne ayamye adi kyerɛɛ me. Obiara ani begyee Océane ho wɔ mpɔtam hɔ. Esiane sɛ nnipa pii taa yɛ basaa bere a obi a wadi dɛm wɔ wɔn ntam nti, ɔkraman no a ɔka me ho no boaa me ma mitumi kaa me yare no ho asɛm a anyɛ den amma me. Nkurɔfo de abotɔyam tiee me. Nokwarem no, Océane buee kwan maa mitumi ne afoforo bɔɔ nkɔmmɔ.

Me ne Océane Kɔɔ Afrika

Ná me werɛ mfii Afrika, mifii ase boaboaa me ho maa m’akwantu a ɛto so abiɛsa. Saa bere yi de me ne Océane na ɛkɔe. Anthony ne Aurore a wɔyɛ awarefo ne m’adamfo Caroline a wɔn nyinaa yɛ akwampaefo te sɛ me nso ne me kɔe. Yekoduu Lomé September 10, 2000.

Mfiase no na nnipa pii suro Océane. Esiane sɛ nkraman a wɔwɔ Togo no susua nti, na nnipa a wɔwɔ Lomé no mu kakraa bi pɛ na wɔahu ɔkraman kɛse a ɔte saa pɛn. Bere a wohuu ahama a ɛda ne kɔn mu no, na ebinom susuw sɛ ɔyɛ aboa a ne ho yɛ hu a ɛsɛ sɛ wodwudwo no. Océane de na wayɛ krado sɛ ɔbɛbɔ me ho ban afi biribiara a na ohu no sɛ ɛyɛ asiane ho. Nanso, ankyɛ na Océane ani kaa beae foforo no. Sɛ yɛde ahama no to ne kɔn mu a, na wafi n’adwuma ase—ɔnyɛ basabasa, ɔyɛ n’adwuma yiye, ɔtra me nkyɛn. Sɛ yeyi ahama no fi ne kɔn mu a, odi agoru, ɛtɔ da bi a ɔhaw adwene. Me ne no bom di agoru.

Yɛn nyinaa ne Sandra ne Christine kɔtrae wɔ Tabligbo. Sɛnea ɛbɛyɛ a anuanom mmarima ne mmea a wɔwɔ kurom hɔ no behu Océane yiye no, yɛtoo nsa frɛɛ wɔn ma wɔbɛsraa yɛn, na yɛkyerɛkyerɛɛ adwuma a ɔkraman a ɔkyerɛ anifuraefo kwan yɛ mu kyerɛɛ wɔn, nea enti a na mihia bi ne sɛnea wɔbɛyɛ wɔn ade bere a ɔwɔ hɔ. Asafo mu mpanyimfo no penee so sɛ metumi ne Océane akɔ Ahenni Asa so. Esiane sɛ na wonhuu biribi a ɛte saa da wɔ Togo nti, wɔkyerɛkyerɛɛ mu kyerɛɛ asafo no. Ná me ne Océane kɔ asɛnka bere a merekɔyɛ sankɔhwɛ ne Bible adesua nkutoo—baabi a sɛ mede no kɔ a ɛrenhaw wɔn.

Adanse a yedi wɔ saa asasesin yi mu kɔ so yɛ anigye. Ná m’ani sɔ sɛnea nnipa a wodwo no nam wɔn nneyɛe pa so da no adi sɛ wodwen nnipa ho no. Ebi ne sɛnea na wɔde ahopere pɛ sɛ wɔma me agua no. Wɔ October 2001 mu no, bere a merekɔ Togo nea ɛto so anan no, me maame ne me kɔe. Nnawɔtwe abiɛsa akyi no ɔde anigye ne ahotoso san kɔɔ France.

Meda Yehowa ase paa sɛ matumi asom wɔ Togo. Mewɔ awerɛhyem sɛ sɛ mekɔ so de nea mewɔ nyinaa som Yehowa a, ɔbɛkɔ so ama me ‘nea me koma pɛ.’ *

[Ase hɔ asɛm]

[Mfonini ahorow wɔ kratafa 10]

Bere nyinaa na Afrika asase pradada ne ɛso wuram mmoa a wɔn ho yɛ anika a midwennwen ho no ma m’ani gye

[Mfonini wɔ kratafa 10]

Na me ne Océane kɔyɛ sankɔhwɛ

[Mfonini wɔ kratafa 11]

Asafo mu mpanyimfo no penee so sɛ memfa Océane mmra asafo nhyiam