“Nna a M’ani Gye Sen Biara no Mu Biako”

ABAN adwumayɛkuw bi a ɛwɔ Australia a wɔboa nnipa a wɔahaw ka sɛ: “Ade a wɔtaa ka ho asɛm kɛse, na ebetumi aba sɛ ɛno ne yare a ɛka mmofra adwene paa ne adwenemhaw.” Nhwehwɛmu da no adi sɛ mmofra bɛyɛ 100,000 na wonya adwenemhaw afe biara wɔ Australia.

Kristofo mmofra nso tumi nya adwenemhaw. Nanso, Yehowa mu gyidi aboa wɔn mu pii ama wɔadi adwenemhaw so na asi wɔn yiye wɔ wɔn mmabun bere mu. Sɛ wɔyɛ saa a, ɛma afoforo ani begye wɔn ho. Ɔkwan bɛn so?

Susuw Claire a wadi mfe 18 suahu no ho hwɛ. Ɔne ne maame yɛ Yehowa Adansefo wɔ asafo bi a ɛwɔ Melbourne mu. Bere a Claire papa poo abusua no, onyaa adwenemhaw. Nanso, na ahotoso a ɔwɔ wɔ ne soro Agya, Yehowa mu no da so ara yɛ den. Da koro bi, oduruyɛfo, Lydia, a ɔhwɛ abusua no kɔɔ Claire fie kɔhwɛɛ Claire maame a na ɔyare. Ɛno akyi no, ofi ayamye mu de Claire traa ne kar mu kɔɔ aguadibea. Bere a wɔnam kwan so rekɔ no, oduruyɛfo no bisaa Claire sɛ ɔwɔ mpena anaa. Claire kyerɛkyerɛɛ mu kyerɛɛ no sɛ sɛ́ Yehowa Dansefo no, ɔne mmarimaa mpue nnyigye n’ani kɛkɛ. Eyi maa oduruyɛfo no ho dwiriw no. Afei Claire kyerɛkyerɛɛ no sɛnea Bible no aboa no ma wasisi gyinae a nyansa wom wɔ asetra mu. Awiei koraa no, Claire kae sɛ ɔbɛbrɛ oduruyɛfo no Bible ho nhoma bi a aboa no kɛse no bi. Na nhoma no asɛmti ne Questions Young People Ask—Answers That Work (Nsɛm a Mmofra Bisa—Mmuae a Mfaso Wɔ So).

Bere a Lydia nsa kaa nhoma no, ne nnansa akyi na ɔfrɛɛ Claire maame wɔ telefon so kyerɛɛ no sɛnea n’ani agye nhoma no akenkan ho. Enti ɔkae sɛ wɔmmrɛ no nhoma no nsia na ɔmfa mma ne mfɛfo adwumayɛfo. Bere a Claire de nhoma no kɔmaa oduruyɛfo no, ɔkyerɛkyerɛɛ sɛnea n’ani agye Claire gyidi ho no mu. Claire ka kyerɛɛ oduruyɛfo no sɛ ɔpɛ sɛ ɔne no sua Bible no, na ogye toom.

Claire ne oduruyɛfo no yɛɛ adesua no asram pii wɔ oduruyɛfo no awia ahomegye bere mu. Oduruyɛfo Lydia ka kyerɛɛ Claire sɛ ɔpɛ sɛ ɔma no ma ɔkasa bi fa adwenemhaw a mmabun hyia ho wɔ guabɔ bi ase. Ɛwom sɛ ehu kaa Claire de, nanso ɔpenee so. Nnipa bɛboro 60 na wɔbaa guabɔ no ase. Adwene ho aduruyɛfo baanan a wɔn nyinaa yɛ mpanyimfo kasa kyerɛɛ atiefo no. Afei na adu Claire so sɛ ɔkasa. Osii hia a ehia sɛ mmofra ne Onyankopɔn nya abusuabɔ so dua. Ɔkyerɛkyerɛɛ mu sɛ Yehowa Nyankopɔn dwen mmabun ho yiye paa na ɔboa wɔn a wɔkɔ ne nkyɛn kogye mmoa ne awerɛkyekye no nyinaa. Bio nso, ɔdaa ahotoso a ɔwɔ sɛ ɛrenkyɛ Yehowa beyi nyarewa nyinaa ne adwenem yare afi hɔ no adi. (Yesaia 33:24) Dɛn na efii adanse fɛfɛ a odii yi mu bae?

Claire kae sɛ: “Wɔ dwumadi no akyi no, nnipa pii baa me nkyɛn bɛkaa sɛnea wɔn ani gyei sɛ wohui sɛ ababaawa reka Onyankopɔn ho asɛm saa. Memaa Young People Ask (Mmofra Bisa) nhoma no 23. Mmabaa baasa bi a wobetiee dwumadi no bi de wɔn telefon nɔma maa me. Seesei mmabaa no mu biako resua Bible no. Ná ɛyɛ nna a m’ani gye sen biara wɔ m’asetram no mu biako.”