So Obi Betumi Ayɛ Wiase Yiye Ankasa?

“Ahiafo ka kyerɛ yɛn sɛ wɔpɛ asomdwoe ne ahobammɔ sen biribiara, na afei wɔpɛ hokwan ahorow a ɛbɛma wɔn asetra atu mpɔn. Bio nso wɔpɛ sɛ aman ne amanaman ntam ahyehyɛde ahorow ne wɔn di no atɛntrenee so sɛnea ɛbɛyɛ a aman a wodi yiye ne nnwumakuw a wɔanya wɔn ho no remfa wɔn tumi a ɛboro so no nsisi wɔn.”

SAA na ɔpanyin a ɔda amanaman ntam adwumakuw bi a wɔboa wɔn a wɔakɔ ahokyere mu ka faa nneɛma a ahiafo hwɛ kwan ne nea wɔpɛ ho. Nokwasɛm ni, asɛm a ɔkae no betumi afa wɔn a wɔahyia amanehunu ne atɛnkyea wɔ wiase yi mu nyinaa ho. Wɔn nyinaa yam a anka wɔanya wiase a asomdwoe ne ahobammɔ ankasa wom. So wiase a ɛte saa bɛba da bi? So obi wɔ hɔ a ɔwɔ tumi ne nimdeɛ ankasa a  obetumi de ayɛ wiase a nsisi ahyɛ mu ma yi yiye?

Mmɔden a Wɔabɔ sɛ Wɔbɛyɛ Nneɛma Yiye

Nnipa pii abɔ mmɔden sɛ wɔbɛyɛ nneɛma yiye. Sɛ nhwɛso no, Engiresini bea bi a ɔtraa ase wɔ 1800 mfe no mu a wɔfrɛ no Florence Nightingale de ne bere sii hɔ de ayamye hwɛɛ ayarefo, na ɔmaa ahotew baa ayarehwɛ mu. Wɔ ne bere so a na wonnya nnyaa nnuru a wɔde siw yare ano ne nnuru a wɔde kum ɔyare mmoawa no, na sɛnea wɔhwɛ ayarefo no nte sɛ nnɛ. Nhoma bi ka sɛ, “Na ayarehwɛfo nnim nhoma, wɔn ho ntew, na na asabow ne ɔbrasɛe ahyɛ wɔn ma.” So mmɔden a Florence Nightingale bɔe sɛ ɔbɛsesa nneɛma wɔ ayarehwɛ mu no yɛɛ yiye? Yiw, ɛyɛɛ yiye. Saa ara na nnipa a wɔnyɛ pɛsɛmenkominya a wodwen afoforo ho atumi aboa wɔ asetra mu nneɛma pii mu. Ebi ne akenkan ne akyerɛw, nhomasua, aduruyɛ, adan ne aduan ho nhyehyɛe. Nea afi mu aba ne sɛ ama mpɔntu kɛse aba nnipa ɔpepem pii a wɔwɔ ahokyere mu asetram.

Nanso, yɛrentumi mmu yɛn ani ngu nokwasɛm a ɛhaw adwene yi so: Akodi, nsɛmmɔnedi, ɔyare, ɔkɔm, ne awerɛhosɛm afoforo a esisi ama nnipa ɔpepem pii da so ara rehu amane wɔ wɔn asetram. Ireland adwumakuw bi a wɔboa wɔn a wɔakɔ ahokyere mu ka sɛ, “Ohia kunkum nnipa 30,000 da biara da.” Nkoasom mpo a mfe pii a abɛsen kɔ no ebinom de sii wɔn ani so sɛ wobetu ase no da so ara rekɔ so. Disposable People—New Slavery in the Global Economy (Nnipa a Wɔmfa Wɔn Nyɛ Hwee—Nkoasom Foforo Wɔ Wiase Sikasɛm Mu) nhoma no ka sɛ: “Nkoa a wɔwɔ hɔ nnɛ dɔɔso sen nnipa a wowiaa wɔn fii Afrika nyinaa bere a na wɔde nnipa gu po so hyɛn mu kɔ amannɔne kɔtɔn wɔn sɛ nkoa no.”

Dɛn na asɛe mmɔden a nnipa rebɔ sɛ wɔbɛsesa nneɛma ma ayɛ yiye no? So ɛyɛ asikafo ne wɔn a wɔwɔ tumi no tumi a ɛboro so a wɔwɔ ntia, anaasɛ biribi a ɛsen saa ka ho?

Nneɛma a Esiw Kwan

Sɛnea Onyankopɔn Asɛm kyerɛ no, ade titiriw a esiw mmɔden a nnipa rebɔ sɛ wɔde wiase a nsisi nnim bɛba kwan no ne Satan Ɔbonsam. Ɔsomafo Yohane ka kyerɛ yɛn sɛ, “wiase nyinaa da ɔbɔnefo no tumi mu.” (1 Yohane 5:19) Nokwasɛm ne sɛ, seesei Satan ‘redaadaa asase sofo nyinaa.’ (Adiyisɛm 12:9) Ɛnkosi sɛ wobeyi ne nkɛntɛnso bɔne no afi hɔ no, nnipa bɛkɔ so ahu nneɛma bɔne ne atɛnkyea. Dɛn na ɛde saa awerɛhosɛm yi bae?

Wɔde asase a wɔyɛe sɛ anka ɛbɛyɛ paradise fie ama nnipa nyinaa no maa yɛn awofo a wodi kan, Adam ne Hawa sɛ akyɛde. Ná ɛyɛ wiase a “eye papa.” (Genesis 1:31) Dɛn na ɛmaa nneɛma sesae? Satan na ɔyɛe. Ɔkasa tiaa hokwan a Nyankopɔn wɔ sɛ ɔhyehyɛ mmara ma mmarima ne mmea sɛ wɔmfa mmɔ wɔn bra no. Nea na ɔkyerɛ ne sɛ, Onyankopɔn nniso nyɛ papa. Ɔdaadaa Adam ne Hawa ma wɔfaa ɔkwan a wɔpɛ so sɛnea ɛbɛyɛ a wɔn ankasa betumi asisi papa ne bɔne ho gyinae. (Genesis 3:1-6) Eyi kɔfaa bɔne ne sintɔ bae, na ɛno nso yɛ ade foforo a esiw mmɔden a nnipa rebɔ sɛ wɔde wiase a atɛntrenee wom bɛba no kwan.—Romafo 5:12.

 Dɛn Nti na Onyankopɔn Maa Kwan?

Ebia ebinom bebisa sɛ, ‘Adɛn nti na Onyankopɔn maa bɔne ne sintɔ bae? Dɛn nti na wamfa ne tumi a enni ano no ansɛe atuatewfo no na wansan amfi ase foforo?’ Nsɛm a ebinom keka yi ma ɛyɛ te sɛ nea ɛyɛ mmerɛw. Nanso, sɛ nkurɔfo anni tumi yiye a ɛde ɔhaw kɛse ba. So ɛnyɛ ampa sɛ tumi a wodi no ɔkwammɔne so no ne ade titiriw a ɛhaw ahiafo ne nnipa a wɔhyɛ wɔn so no? Sɛ obi a ɔyɛ kankabi di ne tumi ɔkwammɔne so de yi obi a ɔne n’adwene nhyia wɔ ne nhyehyɛe ho fi hɔ a, so ɛmma nnipa komapafo adwenem nyɛ wɔn naa?

Sɛnea ɛbɛyɛ a Onyankopɔn bɛma nnipa komapafo anya awerɛhyem sɛ Ɔnyɛ otirimɔdenfo a odi tumi ɔkwammɔne so no, ɔmaa Satan ne nnipa a wɔtew atua no kwan sɛ wɔn ankasa nni wɔn ho so a ne mmara nkyerɛ wɔn kwan nkosi bere bi. Bere rekɔ so no, na ɛbɛda adi sɛ Onyankopɔn nniso nkutoo ne ɔkwan a ɛyɛ papa. Ná ɛbɛsan ada adi nso sɛ yɛn ara yɛn yiyedi nti na ɔhyehyɛ mmara ma yɛn. Nokwasɛm ni, awerɛhosɛm a atua a wɔtew tiaa Onyankopɔn nniso de aba no ama ada adi dedaw sɛ yɛn yiyedi nti na ɔhyehyɛ mmara ma yɛn. Awerɛhosɛm a ɛde aba no ama yɛahu sɛ sɛ Onyankopɔn de ne tumi kɛse no yi abɔnefosɛm nyinaa fi hɔ wɔ bere a ɔpɛ a, odi bem. Ɛrenkyɛ koraa na wayɛ saa.—Genesis 18:23-32; Deuteronomium 32:4; Dwom 37:9, 10, 38.

Ɛnkosi sɛ Onyankopɔn bɛyɛ ho biribi no, ‘yɛpenepene, na yehu amane,’ na wiase a nsisi wom no aka yɛn ahyem. (Romafo 8:22) Ɛmfa ho nea yɛbɛyɛ de asesa nneɛma biara no, yɛrentumi nyi Satan mfi hɔ, saa ara nso na yɛrentumi nyi sintɔ a ɛde amanehunu a yɛrehyia nyinaa aba no mfi hɔ korakora. Ɛboro yɛn ahoɔden so sɛ yebesiesie bɔne a yenya fii Adam hɔ no.—Dwom 49:7-9.

Yesu Kristo Bɛma Nneɛma Ayɛ Yiye Afebɔɔ

So eyi kyerɛ sɛ anidaso biara nni hɔ koraa? Dabida. Wɔde ahyɛ obi a ɔwɔ tumi sen onipa desani koraa nsa sɛ ɔnsesa nneɛma ma ɛnyɛ yiye afebɔɔ. Ɔne hena? Ɛyɛ Yesu Kristo. Bible ka ne ho asɛm sɛ Onyankopɔn Safohene a ɔnam no so begye nnipa nkwa.—Asomafo Nnwuma 5:31.

Seesei ɔretwɛn Onyankopɔn “bere a ɛsɛ” na wayɛ n’adwuma. (Adiyisɛm 11:18) Dɛn pɔtee na ɔbɛyɛ? Ɔno na ‘obesiesie nneɛma nyinaa a Onyankopɔn nam ne tete adiyifo kronkron no anom so aka no.’ (Asomafo Nnwuma 3:21) Sɛ nhwɛso no, Yesu ‘begye ohiani a osu frɛ no, ne ɔmanehunufo a onni boafo. Obegye wɔn kra afi nhyɛso ne atirimɔdensɛm mu.’ (Dwom 72:12-16) Onyankopɔn nam Yesu Kristo so hyɛ bɔ sɛ, ‘ɔbɛma akodi agyae akosi asase ano.’ (Dwom 46:9) Ɔhyɛ bɔ sɛ, “ɔmanfo [a wɔwɔ asase a wɔasiesie so] no mu bi renka sɛ: Magurow!” Wɔn a wɔn ani afura, asotifo, mpakye—wɔn a wɔyare nyinaa—bɛsan anya apɔwmuden a edi mu. (Yesaia 33:24; 35:5, 6; Adiyisɛm 21:3, 4) Wobenyan wɔn a wɔawuwu fi teteete no mpo. Ɔhyɛ bɔ sɛ obenyan wɔn a wobuu wɔn atɛnkyea ne wɔn a wɔhyɛɛ wɔn so no.—Yohane 5:28, 29.

Ɛnyɛ bere tiaa mu nsakrae bi na Yesu de bɛba. Obeyi nneɛma a esiw wiase a atɛntrenee wom kwan nyinaa afi hɔ koraa. Obeyi bɔne ne sintɔ afi hɔ, na wasɛe Satan Ɔbonsam ne wɔn a wɔfa atuatew kwan a ɔfaa so no. (Adiyisɛm 19:19, 20; 20:1-3, 10) Ahohia ne amanehunu a Onyankopɔn ama kwan akosi bere bi no “rensɔre mpɛn abien.” (Nahum 1:9) Saa asɛm yi na na ɛwɔ Yesu adwenem bere a ɔkyerɛɛ yɛn sɛ yɛmmɔ mpae sɛ Onyankopɔn Ahenni mmra na Onyankopɔn apɛde nyɛ hɔ “wɔ asase so sɛnea ɛte wɔ soro” no.—Mateo 6:10.

Nanso ebia wobɛka sɛ, ‘So Yesu ankasa anka sɛ “ahiafo de, daa wɔwɔ mo nkyɛn”? So ɛno nkyerɛ sɛ atɛnkyea ne ohia bɛkɔ so atra hɔ daa?’ (Mateo 26:11) Yiw, Yesu kae sɛ ahiafo bɛwɔ hɔ daa. Nanso, nea na ɔreka ho asɛm ne Onyankopɔn Asɛm mu bɔhyɛ ahorow ma yehu sɛ na ɔrekyerɛ sɛ mmere tenten a saa  wiase yi wɔ hɔ no, ahiafo bɛwɔ hɔ daa. Ná onim sɛ onipa biara nni hɔ a obetumi ayi ohia ne atɛnkyea afi wiase. Ná onim nso sɛ ɔno na ɔbɛsesa saa nneɛma no nyinaa. Ɛrenkyɛ, ɔde nhyehyɛe foforo koraa—“ɔsoro foforo ne asase foforo” a ɛyaw, ɔyare, ohia ne owu nnim bɛba.—2 Petro 3:13; Adiyisɛm 21:1.

“Mommma Mo Werɛ Mmfi Papayɛ”

So eyi kyerɛ sɛ mfaso biara nni so sɛ yɛbɛyɛ nea yebetumi biara de aboa afoforo? Ɛnkyerɛ saa. Bible hyɛ yɛn nkuran sɛ sɛ afoforo hyia sɔhwɛ na wɔkɔ ahohia mu a yɛmmoa wɔn. Ɔhene Salomo a ɔtraa ase tete bere mu no kyerɛwee sɛ: “Mfa yiyeyɛ nkame nea ɛsɛ no, bere a ɛwɔ wo tumi mu sɛ wobɛyɛ no.” (Mmebusɛm 3:27) Ɔsomafo Paulo hyɛ nkuran sɛ, “Mommma mo werɛ mmfi papayɛ ne nneɛma a mo ne afoforo bɛkyɛ.”—Hebrifo 13:16.

Yesu Kristo ankasa hyɛɛ yɛn nkuran sɛ yɛnyɛ nea yebetumi biara mfa mmoa afoforo. Ɔmaa mfatoho bi a ɛfa Samariani bi a ɔbɛtoo ɔbarima bi a wɔaboro no na wɔawia ne nneɛma wɔ kwan mu ho. Yesu kae sɛ “ɔyɛɛ” Samariani no “mmɔbɔ” ma ɔde n’ankasa nneɛma kyekyeree ɔbarima a wɔaboro no no akuru, na ɔhwɛɛ no ma ne ho tɔɔ no. (Luka 10:29-37) Saa Samariani mmɔborohunufo no anyɛ wiase no yiye, nanso ɔyɛɛ mmoa kɛse wɔ ɔbarima bi asetram. Yɛn nso yebetumi ayɛ saa ara.

Nanso, Yesu Kristo betumi ayɛ pii asen sɛ ɔbɛboa ankorankoro kɛkɛ. Obetumi ama nneɛma ayɛ yiye ankasa, na ɛrenkyɛ koraa ɔbɛyɛ saa. Sɛ ɔyɛ saa a, wɔn a wɔrehu amane nnɛ esiane atɛnkyea nti no betumi ama wɔn asetra atu mpɔn na wɔanya asomdwoe ne ahobammɔ ankasa.—Dwom 4:8; 37:10, 11.

Bere a yɛretwɛn sɛ ɛno bɛba no, mommma yɛnntwentwɛn yɛn nan ase sɛ yɛbɛyɛ biribiara a yebetumi wɔ honhom fam ne honam fam, sɛ ‘yɛbɛyɛ’ nnipa a esiane wiase a nsisi wom nti wɔrehu amane no nyinaa “yiye.”—Galatifo 6:10.

[Mfonini ahorow wɔ kratafa 5]

Florence Nightingale maa nneɛma yɛɛ yiye ankasa wɔ ayarehwɛ mu

[Asɛm Fibea]

Courtesy National Library of Medicine

[Mfonini ahorow wɔ kratafa 7]

Kristo akyidifo yɛ afoforo yiye

[Mfonini Fibea wɔ kratafa 4]

The Star, Johannesburg, S.A.