Wiase A Nsisi Wom

SO WUGYE tom sɛ yɛte wiase a nsisi wom mu? Akyinnye biara nni ho sɛ wugye tom saa. Nokwasɛm ne sɛ, ɛmfa ho ɔdom akyɛde ahorow a yɛwɔ ne sɛnea yɛbɛtoto yɛn nneɛma yiye no, ɛno nkyerɛ sɛ yebenya yɛn ho anaa ebesi yɛn yiye anaa yebenya yɛn ano aduan. Nea ɛtaa ba ne asɛm a Ɔhene Salomo nyansafo no kae yi: “Ɛnyɛ anyansafo de ne aduan, na ɛnyɛ nhumufo de ne ahonya, ɛnna ɛnyɛ animdefo de ne anuonyam.” Dɛn ntia? Efisɛ Salomo toaa so sɛ, “ɛbere ne akwanhyia to wɔn nyinaa.”—Ɔsɛnkafo 9:11, The New English Bible.

‘Bere a Bere Bɔne Ba Mpofirim’

Yiw “ɛbere ne akwanhyia” taa sɛe nhyehyɛe a yɛato yɛn bo ase ayɛ ne nneɛma a yɛn ani gye ho paa. Sɛnea Salomo kae no, yɛte “sɛ mpataa a woyi wɔn asawu bɔne mu ne nnomaa a woyi wɔn afiri mu . . . bere bɔne a ɛto wɔn mpofirim no mu.” (Ɔsɛnkafo 9:12) Sɛ nhwɛso no, nnipa ɔpepem pii yere wɔn ho denneennen dɔ afuw na ama wɔanya aduan ama wɔn mmusua, nanso sɛ osu antɔ na ɔpɛ sɛe wɔn nnɔbae a, mpofirim ara na “bere bɔne” ato wɔn.

Ebinom bɔ mmɔden sɛ wɔbɛboa, nanso ɛte sɛ nea mmoa a aman a ɛwɔ wiase no de ma wɔn a “bere bɔne” ato wɔn no ntaa nsɔ ani. Sɛ nhwɛso no, wɔ mmɔden a wɔrebɔ sɛ wɔbɛbrɛ ɔkɔm ase no, adwumakuw bi a wɔboa afoforo kae nnansa yi sɛ: “Sɛ wɔkyɛ sika a wɔsɛee no Amerika ne Iraq ko no mu anum a, emu biako pɛ na wɔde boaa aman a ɛwɔ [Afrika] asasepɔn so no nyinaa.” So na ɛyɛ adepa sɛ aman a wodi yiye no de sika a wɔde boae sɛ wɔde bɛtew ɛyaw ne amanehunu a ɔkɔm de baa aman bi so wɔ asasepɔn mua so no mmɔho anum dii ako wɔ ɔman biako so? Na so eye sɛ nnipa pii di yiye wɔ asetram bere a nnipa a wɔwɔ asase so 4 mu 1 da so di hia buruburoo anaasɛ mmofra ɔpepem pii wuwu afe biara wɔ yare a wobetumi asiw ano ho? Dabida!

Nokwarem no, ɛnyɛ “ɛbere ne akwanhyia” nko na ɛde ‘bere bɔne ba mpofirim.’ Nneɛma a ɛto yɛn wɔ asetram no bi nso fi basabasayɛ a enye koraa a ɛrekɔ so wɔ asetram no. Biribi a ɛte saa sii wɔ Beslan, Alania. Wokunkum  nnipa ɔhaha pii a wɔn mu pii yɛ mmofra nkumaa a na saa da no ne ɛda edi kan a wɔkɔɔ sukuu, bere a amumɔyɛfo ne bammɔ adwumayɛfo bi de ɔko gyinaa mu denneennen wɔ afe 2004 awiei mu hɔ baabi no. Nokwasɛm ni, ɛyɛ akwanhyia na wɔn a wowuwui no hyiae ɛnna ebinom ti yɛɛ yiye nyaa wɔn ti didii mu wɔ saa ɔko no mu, nanso ade titiriw a ɛde saa “bere bɔne” no bae yɛ nnipa akodi.

So Nsisi Bɛkɔ So Saa Daa?

Sɛ ebinom reka atɛnkyea anaa nsisi ho asɛm a, nea wɔka ne sɛ, “Saa na wiase te. Saa ara na ɛte fi teteete, na saa ara na ɛbɛyɛ daa.” Wɔkyerɛ sɛ, wɔn a wɔyɛ den no besisi wɔn a wɔyɛ mmerɛw no daa, na asikafo besisi ahiafo daa. Wɔka sɛ mmere dodow a nnipa da so te ase no, nsisi ne “bere ne akwanhyia” bɛkɔ so ato yɛn.

So saa na ɛsɛ sɛ ɛyɛ ankasa? So ebetumi ayɛ yiye ama wɔn a wɔde wɔn dom akyɛde yɛ adwumaden nyansam no sɛ bere bi bɛba a wobenya so akatua a ɛsɛ? So obi betumi ayɛ nsisi a ɛwɔ wiase no ho biribi ayi afi hɔ koraa? Susuw nea asɛm a edi hɔ no wɔ ka wɔ saa asɛm yi ho hwɛ.

 [Mfonini Fibea wɔ kratafa 2]

COVER: Man with a child: UN PHOTO 148426/McCurry/Stockbower

[Mfonini Fibea wɔ kratafa 3]

MAXIM MARMUR/AFP/Getty Images