‘Me Mmoa Fi Yehowa’

Ahofama De Yehowa Nhyira Ba

WƆ Cameroon no, ɔbarima bi de sakre tu kwan fa kwae mu. Ɔde nnɔnhwerew pii fa nsu, atɛkyɛ ne asiane mu na ama wakɔhyɛ afoforo den. Zimbabwe nso, anuanom binom nantew fa nsu a ayiri mu akwansin akron soa wɔn ntade ne mpaboa na anfɔw na wɔatumi akɔkyerɛkyerɛ kuw bi a atew ne ho. Baabi foforo nso, ɔbea bi sɔre anɔpa nnɔnan kɔkyerɛkyerɛ ɔyarehwɛfo bi a obetumi anya dɔnhwerew biako pɛ de asua ade.

Dɛn na saa nnipa yi rebɔ mmɔden sɛ wɔbɛyɛ? Wɔyɛ Yehowa Adansefo bere nyinaa asomfo a wɔreyɛ adwuma de akyerɛkyerɛ afoforo Bible mu nokware no. Wɔn mu binom yɛ daa akwampaefo, akwampaefo atitiriw, asɛmpatrɛwfo, ahwɛfo akwantufo, ne atuhoamafo mpempem pii a wɔyɛ adwuma wɔ Betel afie mu wɔ wiase nyinaa. Ade titiriw a wɔde hu wɔn ne wɔn ahofama. *

Adwempa

Yehowa Adansefo de afotu a ɔsomafo Paulo de maa Timoteo no reyɛ adwuma: “Yɛ nea wubetumi biara fa wo ho ma Onyankopɔn sɛ nea ɔfata, odwumayɛni a ɛnsɛ sɛ ɔfɛre hwee ho, a okura nokwasɛm no mu pɛpɛɛpɛ.” (2 Timoteo 2:15) Nanso dɛn na ɛkanyan Adansefo ɔpehaha pii ma wɔsom sɛ bere nyinaa asomfo?

Sɛ wobisa bere nyinaa asomfo nea enti a wɔyere wɔn ho wɔ Nyankopɔn som mu saa a, wobua sɛ ɔdɔ a wɔwɔ ma Yehowa ne wɔn yɔnko nnipa na ɛma wɔyɛ saa. (Mateo 22:37-39) Eyi fata paa, efisɛ sɛ ɛnyɛ ɔdɔ nti na wɔyɛ saa a, anka wɔn mmɔdenbɔ no bɛyɛ kwa.—1 Korintofo 13:1-3.

Ahofama a Wɔde Som

Kristofo a wɔahyira wɔn ho so agye Yesu ɔfrɛ yi so: “Sɛ obi pɛ sɛ odi m’akyi a, ma no mpa ne ho akyi na ɔmfa n’asɛndua na onni m’akyi daa.” (Mateo 16:24) Yɛn ho akyi a yɛbɛpa no kyerɛ sɛ yebefi yɛn pɛ mu de yɛn ho ama Yehowa Nyankopɔn ne Yesu Kristo na yɛama wɔakyerɛ yɛn kwan. Wɔ pii fam no, eyi ama wɔde ahofama reyɛ bere nyinaa som adwuma no.

Adansefo pii rebɔ mmɔden kɛse sɛ wɔbɛtrɛw ɔsom a wɔde ma Yehowa no mu. Susuw Júlia a ɔyɛ daa ɔkwampaefo a wadi mfe 56 a ofi São Paulo, Brazil, no ho hwɛ. Ɔka sɛ: “Onua bi a ofi China frɛɛ me wɔ telefon so bisaa me sɛ mepɛ sɛ misua China kasa anaa. Esiane mfe a madi nti, na minsusuw ho sɛ mesua kasa foforo biara. Nanso nna kakraa bi akyi no migye toom sɛ mesua. Ɛnnɛ, mitumi de China kasa ka Kyerɛwnsɛm mu nsɛm kyerɛ afoforo.”

Yehowa Adansefo Betel adwumayɛbea a ɛwɔ Peru no bɔ ammaneɛ sɛ: “Wɔ nnansa yi mfe  mu no, daa akwampaefo ɔhaha pii atu kɔ nsasesin a wɔmfa nhyɛɛ obiara nsa mu, na wɔda akokoduru ne ahofama adi. Wotu kɔ nkurow a ɛwɔ akyirikyiri a nneɛma te sɛ anyinam nkanea nni hɔ na nnwuma ho yɛ na wɔ hɔ. Saa anuanom mmarima ne mmea yi yɛ nea wobetumi biara na wɔakɔ so ayɛ adwuma no. Nanso, nea ɛho hia sen biara no, wɔn asɛnka adwuma no de nhyira aba mmeae pii. Ahwɛfo akwantufo bɔ ammaneɛ sɛ daa akwampaefo a wɔwɔ ahofama no aboa ma wɔatew akuw afoforo.”

Kristofo binom de wɔn nkwa ato esiane mu na ama wɔaboa wɔn mfɛfo gyidifo. (Romafo 16:3, 4) Ɔmansin sohwɛfo bi a ɔsom wɔ Afrika beae bi a akodi ayɛ hɔ pasaa no bɔ ammaneɛ sɛ: “Ansa na yɛredu beae a etwa to a asraafo gyina wɔ kwan no mu a ɛwɔ atuatewfo no ne aban asraafo no ntam no, atuatewfo mpanyimfo baanan ne wɔn awɛmfo betwaa me ne me yere ho hyiae, na wobisaa nnipa ko a yɛyɛ. Wɔrehwɛ nkrataa a ɛma wohu nnipa ko a yɛyɛ mu no, wohui sɛ yefi baabi a aban asraafo hwɛ hɔ no, ma enti wɔn tirim antene wɔn. Wɔbɔɔ me sobo sɛ meyɛ ɔkwansrafo. Ɛno nti, wosii gyinae sɛ wɔbɛtow me akyene amoa bi mu. Mekyerɛɛ wɔn nnipa ko a yɛyɛ, na awiei koraa no wogyaee yɛn ma yɛkɔe.” Hwɛ anisɔ ara a asafo ahorow no daa no adi bere a awarefo yi a wɔwɔ ahofama no tumi kɔsraa wɔn no!

Ɛmfa ho nsɛnnennen biara a wohyia no, bere nyinaa asomfo a wɔte saa no redɔɔso wɔ wiase nyinaa. (Yesaia 6:8) Adwumayɛfo a wɔyɛ nsi yi ani gye hokwan a wɔanya resom Yehowa no ho. Nnipa ɔpepem pii nso de ahofama a ɛte saa ara reyi Yehowa ayɛ nnɛ. Na ɔno nso hyira wɔn pii. (Mmebusɛm 10:22) Esiane sɛ adwumayɛfo nsiyɛfo yi wɔ ahotoso sɛ Yehowa bɛkɔ so ahyira wɔn na waboa wɔn nti, wɔne odwontofo no yɛ adwene bere a ɔkae sɛ: ‘Me mmoa fi Yehowa’ no.—Dwom 121:2.

[Ase hɔ asɛm]

[Asɛm a wɔafa aka wɔ kratafa 9]

“Wo man beyi wɔn yam koraa aba, wo koda no.”—DWOM 110:3

[Adaka wɔ kratafa 8]

YEHOWA ANI SƆ N’ASOMFO A WƆWƆ AHOFAMA

“Muntintim, munnhinhim, monyɛ pii wɔ Awurade adwuma no mu daa, a munim sɛ mo brɛ renyɛ kwa Awurade mu.”—1 Korintofo 15:58.

“Onyankopɔn nyɛ nea ɔnteɛ sɛ ne werɛ befi mo adwuma ne ɔdɔ a modaa no adi wɔ ne din ho.”—Hebrifo 6:10.