Wugye Di sɛ Ɔbonsam Wɔ Hɔ Ankasa?

KYERƐWNSƐM no ka Ɔbonsam ho asɛm sɛ obi a ɔwɔ hɔ ankasa. Nnipa ntumi mfa wɔn aniwa nhu no te sɛ nea wontumi mfa wɔn aniwa nhu Onyankopɔn no ara pɛ. Bible ka sɛ: “Onyankopɔn yɛ honhom.” (Yohane 4:24) Ɔbonsam yɛ honhom abɔde. Ɔbɔadeɛ no nni mfiase nanso Ɔbonsam wɔ mfiase.

Mfe pii ansa na Yehowa Nyankopɔn rebɔ nnipa no, na wabɔ honhom abɔde bebree. (Hiob 38:4, 7) Wɔ Bible mu no, wɔfrɛ saa honhom abɔde yi sɛ abɔfo. (Hebrifo 1:13, 14) Onyankopɔn bɔɔ wɔn nyinaa a na wɔyɛ pɛ—ná wɔn mu biako mpo nyɛ ɔbonsam anaasɛ ɔbɔfo a subammɔne bi te ne mu. Ɛnde ɛyɛɛ dɛn na wɔn mu bi bɛyɛɛ Ɔbonsam? Asɛmfua “ɔbonsam” kyerɛ “otwirifo” na ɛno kyerɛ obi a ɔka afoforo ho atosɛm. “Satan” kyerɛ “Ɔsɔretiafo.” Sɛnea sɛ nokwaredifo bi wia ade a ɔdan owifo no, saa ara na Onyankopɔn honhom mu mma a wɔyɛ pɛ no mu biako dii akɔnnɔ bɔne akyi bɛyɛɛ Satan Ɔbonsam. Bible kyerɛkyerɛ ɔkwan a obi fa so nya subammɔne yi mu sɛ: ‘Obi ankasa akɔnnɔ a ɛtwetwe no na ɛto no brada. Afei sɛ akɔnnɔ no nyinsɛn a, ɛwo bɔne; na bɔne no nso nyin a, ɛwo owu.’—Yakobo 1:14, 15.

Ɛda adi sɛ saa pɛpɛɛpɛ na esii. Bere a Yehowa Nyankopɔn bɔɔ nnipa baanu a wodi kan, Adam ne Hawa no, na ɔbɔfo a wayɛ n’adwene sɛ ɔbɛtew Nyankopɔn so atua no ani tua. Na onim sɛ Yehowa ahyɛ Adam ne Hawa sɛ wɔnwo, na nnipa treneefo a wɔbɛsom Ɔbɔadeɛ no nhyɛ asase so ma. (Genesis 1:28) Ɔbɔfo yi hui sɛ sɛ ɔyere ne ho a, obetumi anya anuonyam ne nidi a ɔhwehwɛ no. Esiane anibere nti, ɔpɛe sɛ onya ade a ɛsɛ sɛ wɔde ma Ɔbɔadeɛ no nkutoo—ɔsom a adesamma de bɛma Onyankopɔn. Sɛ́ anka Onyankopɔn honhom mu ɔba yi bɛpo akɔnnɔ bɔne a ɛte saa no, ɔmaa emu yɛɛ den, na nea efii mu bae ne atorodi ne afei atuatew. Susuw nea ɔyɛe no ho hwɛ.

 Ɔbɔfo tuatewfo no maa ɔwɔ kasa kyerɛɛ ɔbea a odi kan, Hawa. Ɔwɔ no bisaa Hawa sɛ: “Ampa na Onyankopɔn aka sɛ: Munnni turom ha nnua nyinaa bi?” Bere a Hawa kaa ahyɛde a Onyankopɔn de ama wɔn ne asotwe a sɛ wɔyɛ asoɔden a ebefi mu aba kyerɛɛ no no, ɔwɔ no kae sɛ: “Ɛnyɛ owu na mubewu: na Onyankopɔn nim sɛ da a mubedi bi no, mo ani bebue, na moayɛ sɛ Onyankopɔn ahu papa ne bɔne.” (Genesis 3:1-5) Asɛm a ɔde too Onyankopɔn so ne sɛ, wanka nokware ankyerɛ Adam ne Hawa. Nea na ɔrekyerɛ ne sɛ, sɛ Hawa di saa dua no aba no bi a, obetumi ayɛ sɛ Nyankopɔn, na n’ankasa asi nea ɛyɛ papa ne bɔne ho gyinae. Ɛno ne atoro a edi kan. Saa a ɔbɔfo no kae no ma ɔbɛyɛɛ otwirifo. Ɔsan bɛyɛɛ obi a ɔsɔre tia Nyankopɔn. Enti Bible no ka Onyankopɔn tamfo yi ho asɛm sɛ “ɔwɔ dedaw no, nea wɔfrɛ no Ɔbonsam ne Satan no.”—Adiyisɛm 12:9.

“Monwɛn”

Atoro a Ɔbonsam di kyerɛɛ Hawa no maa Ɔbonsam nyaa nea na ɔrehwehwɛ no. Bible ka sɛ: “Ɔbea no hui sɛ dua no ye sɛ wodi, na ɛyɛ aniwa fɛ, na dua no dɔ kɔn na ɛbɛtew ani no, ɔtew n’aba no bi, na odii, na ɔde bi maa ne kunu a ɔka ne ho no nso, na odii.” (Genesis 3:6) Hawa gyee Satan dii na ɔyɛɛ Onyankopɔn so asoɔden. Otumi nyaa Adam nso ma obuu Nyankopɔn mmara so. Enti Ɔbonsam tumi nyaa nnipa baanu a wodi kan no ma wɔtew Onyankopɔn so atua. Efi saa bere no, Satan anya nnipa asetra so nkɛntɛnso a wonhu akyi. Ne botae ne dɛn? Sɛ́ ɔbɛma nnipa agyae nokware Nyankopɔn no som na wɔabɛsom ɔno mmom. (Mateo 4:8, 9) Ɛno nti na Kyerɛwnsɛm no bɔ kɔkɔ sɛ: “Mo ani nna hɔ, monwɛn. Mo tamfo Bonsam nenam te sɛ gyata a ɔbobom apɛ obi amene no.”—1 Petro 5:8.

Hwɛ sɛnea Bible no ma emu da hɔ pefee sɛ Ɔbonsam yɛ honhom abɔde ankasa—ɔbɔfo a ɔsɛee n’akwan na ne ho yɛ hu! Ade a edi kan a ɛsɛ sɛ yehu na yɛatumi awɛn ne sɛ yebehu sɛ ɔwɔ hɔ ankasa. Nanso ɛnyɛ nea ehia ara ne sɛ yɛbɛma yɛn ani ada hɔ na yɛawɛn. Ɛho hia nso sɛ yɛremmu yɛn ani ngu Satan “pɔw a ɔbɔ” ne akwan a ɔfa so daadaa nnipa no so. (2 Korintofo 2:11) Ne nnaadaa no bi ne dɛn? Na ɔkwan bɛn so na yebetumi ako atia denneennen?

Ɔbonsam De Ɔsom Ho Adwene a Onipa Wɔ Daadaa No

Ɔbonsam ahwɛ sɛnea nnipa yɛ ade fi bere a wɔbɔɔ adesamma tɔnn. Onim sɛnea nnipa te—wɔn ahiade, nea wɔn ani gye ho, ne nea wɔpɛ. Satan nim yiye sɛ wɔde ɔsom ho adwene bɔɔ onipa, na Ɔbonsam nam anifere kwan so de saa ahiade yi adaadaa nnipa. Ɔkwan bɛn so? Denam ɔsom mu atoro nkyerɛkyerɛ so. (Yohane 8:44) Ɔsom ho nkyerɛkyerɛ pii a ɛfa Onyankopɔn ho no bɔ wɔn ho abira na ɛkyere adwene. Hena atirimpɔw ho dwuma na wususuw sɛ eyi di? Nkyerɛkyerɛ a ɛbɔ wɔn ho abira nyinaa ntumi nyɛ nokware. Ɛnde so ɛrentumi nyɛ nokware sɛ Satan na ɔnam ɔsom mu nkyerɛkyerɛ pii a ɛwɔ hɔ no so redaadaa nkurɔfo? Nokwarem no, Bible frɛ no “wiase yi nyame” a wafura nnipa adwene ani.—2 Korintofo 4:4.

Onyankopɔn ho nokwasɛm bɔ yɛn ho ban fi nyamesom mu nnaadaasɛm ho. Bible no de Onyankopɔn Asɛm mu nokware toto abɔso a na tete asraafo de bɔ wɔn mu na abɔ wɔn asen ho ban ho. (Efesofo 6:14) Sɛ wunya  Bible mu nimdeɛ na wode emu nsɛm no di dwuma a, ɛte sɛ nea wode abɔ w’asen, na Onyankopɔn Asɛm bɛbɔ wo ho ban afi ɔsom mu atosɛm ho.

Ɔpɛ a nnipa fi awosu mu wɔ sɛ wɔbɛsom no ama wɔahwehwɛ nneɛma a wonnim akyi kwan. Eyi ama Satan nnɛɛdɛe no bi anya wɔn. Satan nam ahonhonsɛmdi so atwe nnipa a wɔpɛ sɛ wohu nneɛma a ɛyɛ nwonwa no ahyɛ ne nkɛntɛnso ase. Sɛnea ɔbɔmmɔfo de nam anaa aduan sum mmoa afiri no, saa ara na Satan nam adebisa, nsoromma mu hwɛ, kaberɛkyere, abayisɛm, nsamhwɛ, ne ntafowayi so twetwe nnipa de sum wɔn afiri wɔ wiase nyinaa.—Leviticus 19:31; Dwom 119:110.

Wobɛyɛ dɛn abɔ wo ho ban wɔ ahonhonsɛmdi afiri ho? Deuteronomium 18:10-12 ka sɛ: “Mma wonnhu wo mu obi a ɔma ne babarima anaa ne babea fa ogya mu, ɔkɔmfo a ɔhyɛ abosonkɔm, ɔbayifo ne ɔdebisafo ne ntafoayifo, ne kaberɛkyerefo ne samanfrɛfo ne osumanni ne nea obisa afunu, efisɛ [Yehowa, NW] akyide ne wɔn a wɔyɛ eyinom nyinaa, na akyide yi nti na [Yehowa, NW] wo Nyankopɔn retu wɔn afi w’anim yi.”

Kyerɛwsɛm mu afotusɛm yi ka nea ɛsɛ sɛ yɛyɛ no pefee: Kwati ahonhonsɛmdi biara. Na sɛ wode wo ho ahyɛ ahonhonsɛmdi mu dedaw na afei wopɛ sɛ wotwe wo ho nso ɛ? Wubetumi asuasua tete Kristofo a na wɔwɔ Efeso kuropɔn mu no. Bible no ka sɛ bere a wogyee “Yehowa asɛm” toom no, “wɔn a wɔyɛ asumanne no mu pii de wɔn nhoma ba bɛhyew no ma obiara hui.” Na saa nhoma horow no bo yɛ den yiye. Na ne bo bɛyɛ nnwetɛbona 50,000. (Asomafo Nnwuma 19:19, 20) Nanso Efeso Kristofo no antwentwɛn wɔn nan ase sɛ wɔbɛsɛe no.

Satan Nam Nnipa Mmerɛwyɛ So Daadaa Wɔn

Obi a na ɔyɛ ɔbɔfo pa na ɔdanee Satan Ɔbonsam esiane ahomaso su a onyae nti. Ɔsan de ahomaso ne pɛsɛminkominya su a ɛbɛma Hawa kɔn adɔ sɛ ɔne Nyankopɔn bɛyɛ pɛ hyɛɛ ne mu. Ɛnnɛ, Satan di nnipa pii so denam ahomaso su a ɔma wonya so. Sɛ nhwɛso no, ebinom te nka sɛ abusua ne ɔman a wofi mu no ye sen afoforo de. Hwɛ sɛnea eyi ne nea Bible kyerɛkyerɛ no bɔ abira! (Asomafo Nnwuma 10:34, 35) Bible da no adi pefee sɛ: ‘Onyankopɔn yɛɛ nnipa aman nyinaa fii nipa baako mu.’—Asomafo Nnwuma 17:26.

Ade a yebetumi de ako atia mmɔden a Satan bɔ sɛ ɔde ahomaso bɛhyɛ yɛn mu ne ahobrɛase. Bible tu yɛn fo sɛ, ‘yemmmu yɛn ho nntra nea ɛsɛ.’ (Romafo 12:3) Ɛka sɛ: “Onyankopɔn siw ahantanfo kwan, na ɔdom ahobrɛasefo.” (Yakobo 4:6) Ɔkwan a etu mpɔn a yebetumi afa so ako atia mmɔden a Satan  rebɔ ne sɛ yɛde ahobrɛase bɛbɔ yɛn bra na yɛada su afoforo a Onyankopɔn pene so adi.

Ɔbonsam ani gye ho nso sɛ ɔde nnipa mmerɛwyɛ a ɛma wɔtɔ kɔ akɔnnɔ a ɛmfata so no bedi dwuma. Ná nea Yehowa Nyankopɔn pɛ ne sɛ nnipa ani begye wɔ asetram. Sɛ nneɛma a yɛpɛ ne Onyankopɔn apɛde hyia a, ɛde anigye ankasa na ɛba. Nanso Satan sɔ nnipa hwɛ ma wɔfa abrabɔ bɔne so dwudwo wɔn akɔnnɔ ano. (1 Korintofo 6:9, 10) Ɛyɛ papa sɛ yɛde yɛn adwene besi nneɛma a ɛho tew ne ɔbra pa so. (Filipifo 4:8) Eyi bɛboa ma woatumi ahyɛ wo ho so yiye.

Kɔ So Ko Tia Ɔbonsam

So wubetumi ako atia Ɔbonsam adi no so nkonim? Yiw, wubetumi. Bible ma yɛn awerɛhyem sɛ: “Munsiw Ɔbonsam kwan na obeguan afi mo ho.” (Yakobo 4:7) Sɛ wusiw ɔbonsam kwan mpo a, ɔremfi wo ho nkɔ ntɛmpa ara na bere a worenya Onyankopɔn ho nimdeɛ no, ɔrennyae wo haw. Dabi, Ɔbonsam bɛbɔ mmɔden abɛhaw wo “bere foforo” a eye ma no mu. (Luka 4:13) Nanso, ɛnsɛ sɛ wusuro no. Sɛ wokɔ so siw no kwan a, ɔrentumi ntwe wo mfi nokware Nyankopɔn no ho.

Sɛ wubesiw Ɔbonsam kwan a, ɛho hia sɛ wuhu onii ko a ɔyɛ ne sɛnea ɔdaadaa nnipa ne akwan horow a wobɛfa so abɔ wo ho ban afi ne nsusuwii ahorow ho. Beae koro pɛ na wubetumi anya saa nimdeɛ no afi, Onyankopɔn Asɛm, Bible no mu. Enti si wo bo pintinn sɛ wubesua Kyerɛwsɛm a efi honhom mu no, na fa nea wusua no bɔ wo bra. Yehowa Adansefo a wɔwɔ wo mpɔtam hɔ ani begye sɛ wɔbɛboa wo ma woasua Bible wɔ bere a wobɛhyɛ wɔn mu a worentua hwee. Yɛsrɛ wo ntwentwɛn no nan ase sɛ wobɛhwehwɛ wɔn anaa wobɛkyerɛw wɔn a wɔyɛɛ nsɛmma nhoma yi no.

Kae sɛ bere a woafi ase resua Bible no, Satan betumi asɔre atia wo anaasɛ wataa wo ma woagyae Onyankopɔn Asɛm mu nokware a woresua no. W’adɔfo binom bo betumi afuw wo esiane Bible no a woresua nti. Wobetumi ayɛ eyi esiane sɛ wonnim nokwasɛm a ɛyɛ anigye a ɛwom no nti. Ebia afoforo bedi wo ho fɛw. Nanso so wo ho mu a wubegyae ama nhyɛso a ɛte saa no bɛsɔ Onyankopɔn ani ankasa? Ɔbonsam pɛ sɛ obu w’abam sɛnea ɛbɛyɛ a wubegyae nokware Nyankopɔn no ho adesua. Dɛn nti na ɛsɛ sɛ woma Satan di nkonim? (Mateo 10:34-39) Wonne no ka biara. Wo nkwa ankasa gyina Yehowa so. Enti, bɔ mmɔden sɛ wobɛko atia Ɔbonsam na ma ‘Yehowa koma ani nnye.’—Mmebusɛm 27:11.

[Mfonini wɔ kratafa 6]

Wɔn a wɔbɛyɛɛ Kristofo no hyew wɔn nhoma a wɔde di asumansɛm no

[Mfonini wɔ kratafa 7]

Si gyinae pintinn sɛ wubesua Bible no