Asɛm a Wobɛka Ma Akanyan Abofra Koma

SO WOAHU sɛ abofra bi redi kɔmputa so agoru a akodi wom ma wo werɛ ahow pɛn? Esiane sɛ basabasayɛ ahyɛ nneɛma a wɔde gye wɔn ani wɔ wiase yi mu ma nti, mmofra nkumaa bebree mpo de nneɛma a ɛtete saa di agoru. Wobɛyɛ dɛn aboa abofra bi ma wagyae agodie a basabasayɛ wom di na n’ani abegye nea basabasayɛ nnim ho? Waltraud a ɔyɛ Yehowa Dansefo a ɔde mfe pii ayɛ asɛmpatrɛw adwuma wɔ Afrika no tumi boaa abarimaa bi ma ɔyɛɛ saa.

Esiane ɔko a na ɛrekɔ so wɔ Waltraud man mu nti na ɛsɛ sɛ ofi hɔ kɔ Afrika man foforo so. Oduu hɔ no, ofii ase ne abarimaa bi a wadi mfe anum maame suaa Bible no. Bere biara a na ɔbɛkɔ akɔsra maame no, na abarimaa no de rɔba tuo redi agoru, na na ɛno nkutoo ne ade a ɔde di agoru. Waltraud anhu da sɛ ɔretow tuo no de, nanso bere biara na ɔrefekyerefekyere tuo no te sɛ nea ɔde mmoba rehyehyɛ mu no.

Waltraud bisaa abarimaa no sɛ: “Werner, wunim nea enti a mewɔ wo man yi mu no? Ɛyɛ ɔko a ɛrekɔ so wɔ me man mu nti na miguan baa ha sɛnea ɛbɛyɛ a mmarima a wɔde atuo a ɛte sɛ wo de yi rekunkum nkurɔfo no renkum me. Wohwɛ a ɛyɛ papa sɛ obi bɛtow tuo?”

Werner de awerɛhow kae sɛ: “Dabi, ɛnyɛ papa.”

Waltraud kae sɛ: “Ɛyɛ ampa.” Afei obisaa no sɛ: “Wunim nea enti a nnawɔtwe biara meba wo ne wo maame nkyɛn no? Efisɛ Yehowa Adansefo pɛ sɛ wɔboa afoforo ma asomdwoe tra wɔne Onyankopɔn ne wɔn afipamfo ntam.” Werner maame penee so maa Waltraud ka kyerɛɛ ne ba no sɛ: “Sɛ wode wo tuo no ma me a, mɛtow akyene, na mabrɛ wo dua kar a wode bedi agoru.”

Werner de ne rɔba tuo no maa no. Na edii bosome biako ansa na ne nsa reka ne dua kar no, na n’ani gyee ho paa.

So wugye bere ne wo mma bɔ nkɔmmɔ, na wobɔ mmɔden sɛ wobɛka asɛm ma aka wɔn koma na akanyan wɔn ma wɔatow wɔn agode a ɛte sɛ atuo a wɔde kɔ ko no agu? Sɛ woyɛ saa a, ɛnde na worekyerɛ wɔn biribi a wobenya so mfaso daa.