“Nea Obu Nkaanim No Ani Bɛtew”

MMEBUSƐM 23:12 ka sɛ: “Fa wo koma bra nteɛso ho, na fa w’aso bra nimdeɛ nsɛm ho.” Wɔ saa kyerɛwsɛm yi mu no, “nteɛso” anaa abrabɔ ho ntetee fa yɛn ho so a yɛbɛhyɛ ne afei nkaanim a afoforo de ma yɛn ho. Nteɛso a ɛte saa hwehwɛ sɛ yehu nteɛso kõ a yɛde rema ne sɛnea yɛde bɛma. Enti “nimdeɛ nsɛm” a efi baabi a ɛfata ho hia wɔ nteɛso mu.

Nyansasɛm a edi mũ wɔ Bible mu nhoma a ɛne Mmebusɛm no mu. Mmɛ a ɛwom no ma ‘yehu nyansa ne nteɛso, sɛ yɛmfa nnye nimdeɛ, nteɛso, trenee, atemmu ne ade a ɛteɛ.’ (Mmebusɛm 1:1-3) Nyansa wom sɛ yɛde ‘yɛn aso’ betie. Mmebusɛm ti 15 ma yɛn akwankyerɛ pa a yebetumi de adi yɛn abufuw so, ahwɛ yɛn ano kasa yiye, na yɛama afoforo anya nimdeɛ. Ma yensusuw Mmebusɛm ti 15 no nkyekyɛm bi ho nhwɛ.

Dɛn na ‘Esianka Anibere’ Anaa Abufuw?

Bere a tete Israel hene Salomo reka sɛnea nsɛm a yɛka tumi de anibere anaa abufuw ba ho asɛm no, ɔkae sɛ: “Mmuae bɔkɔɔ sianka anibere, na asɛnnennen hwanyan abufuw mu.” (Mmebusɛm 15:1) Sɛ obi yɛ biribi de kyerɛ sɛ n’ani nnye biribi ho koraa a, ɛnna wɔfrɛ no “abufuw.” Ɛbɛyɛ dɛn na saa bɛ yi aboa yɛn ma yɛanya afoforo abufuw ho abotare na yɛahyɛ yɛn ho so wɔ yɛn ankasa abufuw nso ho?

Nsɛm a ɛyɛ yaw a yɛbɛka akyerɛ obi a ne bo afuw no betumi ahyɛ n’abufuw mu gya. Mmom no, mmuae bɔkɔɔ taa ma nnipa nya akomatɔyam. Nanso, ɛtɔ mmere bi a ɛyɛ den sɛ yɛbɛkasa bɔkɔɔ akyerɛ obi a ne bo afuw. Nanso, sɛ yɛbɔ mmɔden te nea enti a ne bo afuw no ase a, ɛboa. Bible ka sɛ: “Onipa nimdeɛ twentwɛn n’abufuw ase, na mfomso ho twa yɛ no anuonyam.” (Mmebusɛm 19:11) So ebetumi aba sɛ nea enti a obi bo afuw no ne sɛ onnye ne ho nni anaa ɔpɛ sɛ afoforo hu sɛ ɔno nso yɛ obi? Ebia ɛnyɛ nea yɛkae anaa yɛyɛe na ama ne bo afuw ankasa. Sɛ obi kasa kyerɛ yɛn abufuw so wɔ yɛn Kristofo som adwuma no mu a, so ɛnyɛ yɛn gyidi ho asɛm a  nkurɔfo anka no yiye ankyerɛ no anaa yɛn ho atosɛm bi a wate na ɛma ɔtaa yɛ saa? Adɛn nti na ɛsɛ sɛ yɛma eyi haw yɛn na yebua no yayaayaw? Sɛ yentumi nhu nea ama obi bo afuw yiye mpo a, sɛ yebua no yayaayaw a, ɛbɛkyerɛ sɛ yentumi nhyɛ yɛn ho so. Ɛnsɛ sɛ yɛyɛ saa.

Mfaso wɔ so paa sɛ yɛde afotu a ɛka sɛ yɛmma mmuae bɔkɔɔ no bɛyɛ adwuma na ama yɛn nso yɛahyɛ yɛn ho so wɔ yɛn ankasa abufuw ho. Sɛ yesua sɛ yɛrenkasa abufuw so nkyerɛ nea ɔretie yɛn no a, na yɛde saa afotu no reyɛ adwuma. Sɛ yɛne yɛn abusua mufo redi nsɛm a, sɛ́ anka yɛbɛka nsɛm a ɛyɛ yaw anaa yɛde din a ebu animtiaa bɛfrɛ wɔn no, yebetumi abɔ mmɔden akasa bɔkɔɔ akyerɛ wɔn. Sɛ yedidi obi atɛm a, ɛtaa ma ɔno nso ka bi kyerɛ yɛn. Sɛ yɛka sɛnea yɛte nka kyerɛ obi bɔkɔɔ a, ɛnyɛ no yaw pii na ebia ɛbɛka no ma wayɛ nsakrae.

‘Anyansafo Tɛkrɛma Yɛ Adepa’

Ɛsɛ sɛ yɛhyɛ yɛn ho so wɔ sɛnea yɛkasa ne nsɛm a yɛka nyinaa ho. Salomo kae sɛ: “Anyansafo tɛkrɛma de nimdeɛ yɛ adepa, na nkwasea ano woro nkwaseasɛm.” (Mmebusɛm 15:2, NW) Sɛ yenya ɔpɛ sɛ yɛbɛboa afoforo na yɛka Onyankopɔn atirimpɔw ne ne nsiesie a ɛyɛ nwonwa ho asɛm kyerɛ wɔn a, so na ɛnyɛ ‘adepa’ na yɛde ‘nimdeɛ reyɛ’? Esiane sɛ ɔkwasea nni nimdeɛ nti, ontumi nyɛ adepa.

Ansa na Salomo retoa so aka sɛnea yɛde yɛn tɛkrɛma di dwuma ho asɛm no, ɔkaa asɛm bi a ɛsɛ sɛ yedwen ho kɔ akyiri. ‘Yehowa aniwa wɔ mmaa nyinaa rehwɛ abɔnefo ne apapafo.’ (Mmebusɛm 15:3) Yebetumi adi eyi ho ahurusi efisɛ wɔama yɛn awerɛhyem sɛ: “[Yehowa, NW] de n’aniwa kyini fa asase nyinaa so, sɛ ɔde ne denyɛ bedi ama wɔn a wɔn koma di mũ wɔ ne ho no.” (2 Beresosɛm 16:9) Sɛ yɛreyɛ adepa a, Onyankopɔn nim. Ohu wɔn a wɔreyɛ bɔne no nso na ɔbɛma wɔabu ho akontaa.

Salomo san sii tɛkrɛma a ɛka kasa pa ho mfaso so dua sɛ: “Tɛkrɛmabere yɛ nkwa dua, na emu kyea yɛ honhom mu mmubui.” (Mmebusɛm 15:4) Asɛm “nkwa dua” no kura ayaresa ne denhyɛ ho adwene. (Adiyisɛm 22:2) Onyansafo kasa pa ma wɔn a wotie no bo tɔ wɔn yam. Ɛma wɔda su pa adi. Nanso, atoro tɛkrɛma ma wɔn a wɔretie asɛm no werɛ how.

Nteɛso a Wogye ne ‘Nimdeɛ a Wɔpete’

Ɔhene nyansafo no toaa so sɛ: “Ogyimfo tew n’agya nteɛso ahi, na nea obu nkaanim no ani bɛtew.” (Mmebusɛm 15:5) Ɛbɛyɛ dɛn na obi ‘abu nkaanim’ bere a wɔmfa mmaa no? So saa kyerɛwsɛm yi nkyerɛ sɛ sɛ nteɛso ho hia a ɛsɛ sɛ wɔde ma? Ɛyɛ awofo asɛyɛde, ne titiriw agyanom, sɛ wɔde nteɛso ma wɔ abusua no mu, na ɛyɛ abofra no nso asɛyɛde sɛ ogye tom. (Efesofo 6:1-3) Nanso, wɔteɛ Yehowa asomfo nyinaa so wɔ ɔkwan bi so. Hebrifo 12:6 ka sɛ: “Nea Yehowa dɔ no na ɔtwe n’aso; nokwarem no, obiara a ogye no sɛ ɔba no, ɔhwe no.” Sɛnea yɛyɛ yɛn ade wɔ nteɛso ho no bɛkyerɛ sɛ yɛyɛ anyansafo anaa nkwasea.

Salomo san kae sɛ: “Anyansafo ano pete nimdeɛ, na nkwasea koma ntim.” (Mmebusɛm 15:7) Nimdeɛ a wɔpete no te sɛ nea wɔregu aba ara pɛ. Tete no, na okuafo ngu n’aba nyinaa faako. Mmom no, na ɔtow aba no pete asase no nyinaa so nkakrankakra. Saa ara na ɛte wɔ nimdeɛ a wɔpete ho. Sɛ nhwɛso no, sɛ yehyia obi wɔ asɛnka mu a, ɛrenyɛ papa sɛ yɛbɛka Bible mu asɛm a yenim nyinaa akyerɛ no wɔ hɔ ara. Mmom no, onyansafo hwɛ ne kasa yiye. ‘Ɔpete’ nimdeɛ bere a ɔfa Bible mu nokware mmiako mmiako kyerɛkyerɛ mu wɔ  mmere ahorow mu, na ɔtoa so bere foforo, na osusuw sɛnea ne tiefo no te ase no ho. Yɛn nhwɛsofo Yesu Kristo yɛɛ saa ara bere a na ɔne Samariani bea no rekasa no.—Yohane 4:7-26.

Nimdeɛ a yɛkyerɛkyerɛ afoforo no hwehwɛ sɛ yɛka biribi a wobenya so mfaso na aboa wɔn. Sɛ yɛbɛka asɛm a ɛbɛma afoforo anya nimdeɛ na ahyɛ wɔn nkuran a, ɛsɛ sɛ yedi kan dwen ho. Enti, “ɔtreneeni koma dwen mmuae ho.” (Mmebusɛm 15:28) Hwɛ sɛnea ɛho hia sɛ yɛma yɛn nsɛm yɛ te sɛ osu a ɛtɔ a ano nyɛ den a ɛfɔw asase na ɛso ba mfaso no, na ɛnsɛ sɛ yɛkasa te sɛ nsunsuan a ɛpra biribiara a ɛwɔ ne kwan mu kɔ no!

‘Monyɛ Kronkron Mo Nneyɛe Mu’

Nyansa wom ankasa sɛ yɛbɛpete Yehowa ne n’atirimpɔw ho nimdeɛ na yɛde yɛn “anofafa aba” a ɛno ne “ayeyi afɔre” ama no. (Hebrifo 13:15) Nanso, sɛ Yehowa begye afɔre a ɛte saa atom a, ɛsɛ sɛ yɛyɛ ‘kronkron wɔ yɛn nneyɛe nyinaa mu.’ (1 Petro 1:14-16) Salomo buu mmɛ abien de twee yɛn adwene sii nokwasɛm titiriw yi so. Ɔkae sɛ: “Abɔnefo afɔre yɛ Yehowa akyide, na tẽefo mpaebɔ yɛ n’anisɔde. Ɔbɔnefo kwan yɛ Yehowa akyide, na trenee kyidifo na ɔdɔ no.”—Mmebusɛm 15:8, 9.

Wɔn a wɔagyae nkwa kwan no so fa no bu nkaanim dɛn, na dɛn na ɛbɛba wɔn so? (Mateo 7:13, 14) “Nteɛso a ano yɛ den bɛba nea ogyaw ɔkwan pa no so, na nea okyi animka no bewu.” (Mmebusɛm 15:10) Sɛ́ anka ebinom a wɔreyɛ bɔne begye nteɛso a Kristofo asafo mu mpanyimfo de ma wɔn atom na wɔanu wɔn ho nokwarem no, wogyae trenee kwan no so fa. Hwɛ sɛnea nyansa nnim!

Na sɛ obi yɛ ne ho sɛ wagye nteɛso atom nanso ne komam de ɛnte saa nso ɛ? Nyansa nni eyi nso mu. Israel hene no kae sɛ: “Asaman ne ɔsɛe amoa wɔ Yehowa anim, na menne nnipa mma koma.” (Mmebusɛm 15:11) Biribiara nni hɔ a yebetumi aka ho asɛm wɔ sɛnkyerɛnne kwan so sɛ ɛwɔ akyirikyiri wɔ Onyankopɔn anim sen asaman anaa Sheol a ɛyɛ baabi a awufo wɔ no. Nanso, ɛda so ara wɔ n’anim. Onim wɔn a wɔwɔ hɔ no nyinaa nipaban ne wɔn su ahorow, na obetumi anyan wɔn. (Dwom 139:8; Yohane 5:28, 29) Hwɛ sɛnea ɛyɛ mmerɛw ma Yehowa sɛ obehu nea ɛwɔ nnipa komam!  Ɔsomafo Paulo kyerɛwee sɛ: “Abɔde biara nni hɔ a ɛnna adi n’anim, na nneɛma nyinaa ho da hɔ, na ɛso abue pefee, nea yɛne no wɔ akontaabu no anim.” (Hebrifo 4:13) Yebetumi adaadaa nnipa na ɛnyɛ Onyankopɔn.

Ɛnyɛ animka nko na obi a onnye nteɛso ntom no kyi, na mmom ɔtan wɔn a wɔde ma no nso. Salomo kae sɛ: “Ɔfɛwdifo nnɔ nea ɔka n’anim.” Ɔtoaa so kaa asɛm no trɛw mu sɛ: “Ɔnkɔ anyansafo nkyɛn.” (Mmebusɛm 15:12) Anidaso biara nni hɔ sɛ onipa a ɔte saa no bɛteɛ n’akwan!

Momma Yennya Adwempa

Salomo mmɛ abiɛsa a edi so no ka “koma” ho asɛm. Bere a ɔhene nyansafo no reka sɛnea yɛn nkate da adi wɔ yɛn anim ho asɛm no, ɔkae sɛ: “Anigye koma ma anim tew, na komam awerɛhow bubu honhom.”—Mmebusɛm 15:13.

Dɛn na ebetumi ama yɛadi awerɛhow wɔ yɛn komam? Bible ka sɛ: “Onipa komam awerɛhow botow no.” (Mmebusɛm 12:25) Yɛbɛyɛ dɛn na yɛamma nneɛma a ɛhaw yɛn wɔ yɛn abrabɔ mu no anhyɛ yɛn awerɛhow? Sɛ́ anka yɛde yɛn adwene besi nneɛma a ebia yentumi nyɛ ho hwee so daa no, yebetumi asusuw honhom fam nhyira a Yehowa ama yɛanya seesei ne nea ɔbɛyɛ ama yɛn daakye ho. Eyi bɛma yɛabɛn no yiye. Yiw, “anigye Nyankopɔn” no a yɛbɛbɛn no no bɛma yɛn koma a awerɛhow ahyɛ no ma no anya anigye ɔkwan biara so.—1 Timoteo 1:11.

Bio nso, Bible mu asɛm ma yenya awerɛkyekye ne anigye a ɛso bi nni. Odwontofo no kae sɛ nhyira anaa anigye ne onipa a “[Yehowa, NW] mmara sɔ n’ani, na odwen ne mmara so awia ne anadwo.” (Dwom 1:1, 2) Sɛ awerɛhow hyɛ yɛn koma so mpo a, Bible no a yɛbɛkenkan na yɛadwennwen nea ɛka ho no bɛhyɛ yɛn nkuran. Asɛnka adwuma a Onyankopɔn de ama yɛn no nso wɔ hɔ. Wɔama yɛn awerɛhyem sɛ “wɔn a wɔde nusu gu de ahurusi betwa.”—Dwom 126:5.

Salomo kae sɛ: “Nhumufo koma hwehwɛ nimdeɛ, na nkwasea ano di agyimisɛm.” (Mmebusɛm 15:14) Saa bɛ yi ma yehu nsonsonoe kɛse a ɛda onyansafo afotu ne ɔkwasea afotu ntam. Obi a ɔwɔ nhumu koma hwehwɛ nimdeɛ ansa na ɔde afotu ama. Otie asɛm yiye ma ohu mu yiye. Ɔhwehwɛ Kyerɛwnsɛm no mu na ama wanya mmara ne nnyinasosɛm a ɛfa asɛm no ho. Ɔde n’afotu gyina Onyankopɔn Asɛm so pintinn. Nanso, ɔkwasea nhaw ne ho sɛ ɔbɛhwehwɛ asɛm no mu yiye, na ɔka nea ɛba n’adwenem biara. Enti sɛ yɛrehwehwɛ afotu a, nyansa wom sɛ yɛbɛkɔ wɔn a wɔwɔ nimdeɛ na wɔn ho akokwaw no hɔ sen sɛ yɛbɛkɔ wɔn a wɔbɛka asɛm a yɛpɛ sɛ yɛte no hɔ. Hwɛ sɛnea eye sɛ yɛwɔ ‘nnipa mu akyɛde’ wɔ Kristofo asafo no mu a ‘wɔhwehwɛ nimdeɛ’ ansa na wɔde afotu ama!—Efesofo 4:8.

Ɛbɛ a edi hɔ no ka mfaso kɛse a ɛwɔ adwempa a yebenya so ho asɛm. Israel hene no ka sɛ: “Ɔmanehunufo nna nyinaa yɛ bɔne, na koma pa te sɛ daa apontow.” (Mmebusɛm 15:15) Anigye ne amanehunu, ɔdɛw ne awerɛhow wɔ abrabɔ mu. Sɛ yɛde yɛn adwene si nneɛma a ɛhaw yɛn so nkutoo a, awerɛhow bɛhyɛ yɛn adwene so, na yɛayɛ mmɔbɔmmɔbɔ wɔ yɛn asetram daa. Nanso, sɛ yɛde yɛn adwene si nneɛma pa a yɛwɔ ne anidaso a Onyankopɔn ama yɛanya no so a, yɛn werɛ befi amanehunu a yehyia wɔ asetram, na yebenya anigye ankasa. Sɛ yenya adwempa a yebetumi anya “daa apontow.”

Ɛnde, sɛnea ɛte biara no, momma yemmu nteɛso sɛ ade a mfaso wɔ so paa. Momma yɛmma ɛnka yɛn nkate, yɛn kasa, yɛn nneyɛe, ne yɛn nsusuwii nso.

[Mfonini wɔ kratafa 13]

“Mmuae bɔkɔɔ sianka anibere”

[Mfonini wɔ kratafa 15]

Ɛyɛ awofo asɛyɛde sɛ wɔde nteɛso ma

[Mfonini wɔ kratafa 15]

“Anyansafo ano pete nimdeɛ”