“Afei na Magye Adi sɛ Onyankopɔn Wɔ Hɔ”

NÁ UKRAINNI bea bi a wɔfrɛ no Alexandra a ɔte Prague, Czech Republic, no apɔn adwuma rekɔ fie. Bere a lɔre a ɔte mu no gyinae ma osii no, ohuu bag ketewa bi sɛ ɛda fam a nkurɔfo rebɔ tra. Bere a ɔfaa bag no na obuee mu no, ohuu biribi a ɛmaa ne ho dwiriw no. Ná sika pii hyem! Wanhu nso sɛ nnipa a wɔwɔ hɔ no mu biara rehwehwɛ sika no. Sɛ́ ɔhɔho a watu bata akɔtra Czech Republic no, na Alexandra nhu ne ho ano koraa. Dɛn na ɔbɛyɛ?

Alexandra duu fie no, ɔde sika no kyerɛɛ ne babea Victoria. Wɔhwehwɛɛ bag no mu sɛ ebia wobehu edin anaa address na wɔde ahwehwɛ ne wura, nanso wɔanya bi. Nea wohui ne kratasin bi a wɔakyerɛwkyerɛw nɔma bi wɔ so. Ná wɔakyerɛw nɔma a wɔde yi sika wɔ sikakorabea wɔ krataa no fã bi, na na wɔakyerɛw nɔma pii wɔ ɔfã foforo nso. Wohuu krataa foforo bi nso wɔ mu a na ɛrekyerɛ ɔkwan a wɔfa so kɔ sikakorabea bi a ɛwɔ mpɔtam hɔ. Ná wɔakyerɛw so “330,000 koruny,” a ɛyɛ ɔman no mu sika a sɛ wɔsesa ba Ghana sika mu a, ɛbɛyɛ ¢91,000,000. Eyi ne sika dodow a na ɛhyɛ bag no mu.

Alexandra bɔɔ mmɔden sɛ ɔde nɔma no bi bɛfrɛ sikakorabea no, nanso anyɛ yiye. Enti ɔne ne babea no kɔɔ sikakorabea hɔ kɔkyerɛkyerɛɛ nea asi no mu kyerɛɛ wɔn. Wogyee nɔma a wohui wɔ bag no mu no hwɛe. Nanso, na sikakorabea no nni nɔma no ho kyerɛwtohɔ biara. Ade kyee no, Alexandra de nɔma foforo a ɛka ho no kɔmaa wɔn. Nokwarem no, nnipa a wɔyɛ adwuma wɔ sikakorabea hɔ no hui sɛ ɛyɛ ɔbea bi a ɔkora ne sika wɔ hɔ no de. Alexandra ne Victoria ne ɔbea no dii nkitaho na ɔkyerɛe sɛ sika no yɛ ne de. Bere a wohyiae no, ɔbea no daa wɔn ase paa, na ɔde anigye bisaa wɔn sɛ: “Dɛn na memfa ntua mo ka?”

Victoria buae sɛ: “Yɛmpɛ hwee. Ɔtoaa so sɛ, sɛ yɛpɛ sika no a anka yɛremfa mmmrɛ wo.” Ɔde Czech kasa kakra a onim no kyerɛkyerɛɛ mu sɛ: “Esiane sɛ yɛyɛ Yehowa Adansefo nti na yɛde wo sika no abrɛ wo. Yɛn ahonim a yɛde Bible atete no no mma kwan sɛ yɛbɛfa biribi a ɛnyɛ yɛn de.” (Hebrifo 13:18) Ɔbea no de anigye kae sɛ, “Afei na magye adi sɛ Onyankopɔn wɔ hɔ.”