Wabɔ Akwakoraa Nanso Ɔnyɛ Ankonam

SƐ NNIPA pii nyin a, wontumi nyɛ hwee, na ɔmanfo nso yi wɔn baako hyɛ wɔn nsa. Nanso na ɛnte saa wɔ Fernand Rivarol a owui wɔ Geneva, Switzerland a na wadi mfe 95 no fam. Esiane sɛ na ne yere awu na ne babea nso aware te ne fie nti, na ne nkutoo na ɔte. Ɛwom sɛ na obiara nka ne ho wɔ fie hɔ de, nanso na ɔnyɛ ankonam. Ná ɔtaa tra pon ho wɔ n’asa so de ne telefon frɛ nkurɔfo ne wɔn bɔ Bible mu nkɔmmɔ.

Wɔ Fernand asetram no, eduu bere bi a na wayɛ ankonam ankasa. Dɛn ntia? Bere a Fernand ne ne yere bɛyɛɛ Yehowa Adansefo wɔ afe 1939 mu no, ankyɛ koraa na Wiase Ko II fii ase wɔ Europa. Esiane Bible a na Fernand asua nti, ɔyɛɛ n’adwene sɛ ɔrenni obiara awu. Eyi nti, n’adwuma fii ne nsa, na ɔkɔdaa afiase mpɛn dodow bi. Sɛ wɔka ne nyinaa bom a, ɔde mfe anum ne fã na ɛdaa afiase. Saa bere no na ne yere ne ne babea ketewa no nka ne ho.

Fernand hwɛɛ nea asisi wɔ n’asetra mu kae sɛ: “Wɔ nnipa pii fam no, na wosusuw sɛ magyae adwuma pa a meyɛ no, ɛnna mato m’abusua nso asaworam. Nkurɔfo buu me animtiaa na wɔne me dii no sɛ ɔsɛmmɔnedifo. Ne nyinaa akyi no, sɛ misusuw amane a mihui saa bere no ho a, ade a mekae paa ne sɛnea Yehowa twitwa gyee yɛn na ɔboaa yɛn no. Mfe pii atwam de, nanso ahotoso a mewɔ wɔ Yehowa mu no nsakrae.”

Saa ahotoso yi na ɛkaa Fernand ma ɔkaa Kyerɛwnsɛm mu anidaso a ɔwɔ no ho asɛm kyerɛɛ afoforo wɔ telefon so. Sɛ onya obi a ɔkyerɛ asɛm no ho anigye a, ɔde Bible ho nhoma mena onii no. Akyiri yi ɔsan frɛ onii no hwɛ sɛ n’ani gyee nhoma no ho anaa. Ɛtɔ bere bi a, nkurɔfo kyerɛw krataa de kɔda no ase, na ɛma n’ani gye paa.

Ebia obi a ɔte sɛ Fernand a ɔwɔ wo mpɔtam hɔ bɛba wo nkyɛn. Adɛn nti na wuntie n’anom asɛm nhu nea ogye di? Yehowa Adansefo ani gye bere nyinaa sɛ wɔbɛka wɔn gyidi ho asɛm akyerɛ wo.