“Esiane Mfe Akron Ba Yi Nti”

BERE biara a na Yehowa Adansefo bɛkɔ Wiesława a ɔte Poland anafo fam fie no, na ogye wɔn fɛw so, nanso na ɔne wɔn mmɔ nkɔmmɔ. Da bi de, Samuel a wadi mfe akron ne ne maame kɔɔ fie hɔ. Saa bere yi de Wiesława yɛe sɛ obetie wɔn asɛm no, na ogyee nsɛmma nhoma a ɛka asase so paradise ho asɛm.

Esiane sɛ na Yesu Kristo wu Nkaedi no rebɛn nti, na Samuel pɛ sɛ ɔto nsa frɛ Wiesława ma ɔba saa afahyɛ titiriw yi ase. Enti, Samuel ne ne maame san kɔɔ hɔ bio, na Samuel de krataa too nsa frɛɛ no. Bere a Wiesława hui sɛ Samuel asiesie ne ho kama no, ɔka kyerɛɛ wɔn sɛ ɔreba kakra, na ɔbɔ wuraa dan mu kosiesiee ne ho. Ɔkɔ bae no, otiee Samuel, na ɔka kyerɛɛ no sɛ ɔbɛba, na obisaa no sɛ: “Me nko ara memmra anaasɛ metumi ne me kunu aba?” Ɔde kaa ho sɛ: “Sɛ me kunu amma mpo a, mede mɛba. Samuel wo nti, mɛba.” Samuel ani gyei sɛ Wiesława dii ne bɔhyɛ so.

Bere a na Nkaedi kasa no rekɔ so no, Samuel traa Wiesława nkyɛn, na ɔboaa no ma obuee kyerɛw nsɛm a na wɔresusuw ho no. Eyi maa Wiesława ani gyei paa. Wiesława ani gyei Nkaedi no ne sɛnea ɔkasafo no kyerɛkyerɛɛ nsɛm a emu dɔ mu ma emu daa hɔ fann no ho. Bio nso, n’ani gyee sɛnea anuanom daa ayamye adi kyerɛɛ no na wogyee no fɛw so no ho. Efi saa bere no, Wiesława akyerɛ nea osua fa Onyankopɔn ho no ho anigye, na wafi ase ne Yehowa Adansefo bɔ daa. Ɔkae nnansa yi sɛ: “Ɛyɛ me aniwu sɛ bere bi na moba me fie a na mintie mo. Sɛ mɛka paa a, esiane Samuel, mfe akron ba yi nti na mitiee asɛm no.”

Yehowa Adansefo mmofra pii a wɔte sɛ Samuel a ɔwɔ Poland no de wɔn kasa, wɔn abrabɔ pa, ne wɔn nneyɛe reyi Yehowa Nyankopɔn ayɛ. Enti sɛ woyɛ abofra a, wo nso wubetumi aboa nnipa komapafo ma wɔakyerɛ Onyankopɔn asɛm ho anigye.