Asetram Nsɛm

 Manya M’abusuafo Nokwaredi So Mfaso

SƐNEA KATHLEEN COOKE KA KYERƐE

BERE a me nanabea Mary Ellen Thompson kɔsraa n’abusuafo wɔ Glasgow, Scotland wɔ afe 1911 mu no, okotiee ɔkasa bi a Charles Taze Russell, a ɔyɛ Bible Asuafo a akyiri yi wɔbɛfrɛɛ wɔn Yehowa Adansefo no muni a wagye din mae no bi. Me Nanabea ani gyee asɛm a ɔtee no ho paa. Bere a ɔsan baa South Africa no, ɔhwehwɛɛ Bible Asuafo a wɔwɔ hɔ no akyi kwan. Wɔ ɔmantam nhyiam bi a Bible Asuafo no dii kan yɛe wɔ South Africa wɔ April 1914 ase no, na ɔka nnipa 16 a wɔbɔɔ wɔn asu no ho. Saa bere no, na Nanabea babea Edith a akyiri yi ɔbɛyɛɛ me maame no adi mfe asia.

Bere a Onua Russell wui wɔ afe 1916 mu no, mpaapaemu baa Bible Asuafo a wɔwɔ wiase nyinaa no mu. Bible Asuafo 60 a na wɔwɔ Durban no bi waee ma wɔbɛkaa anokwafo bɛyɛ 12. Me papa maame Ingeborg Myrdal, ne ne babarima biako, Henry, a ɔyɛ aberantewa a na ɔbɔɔ asu nkyɛe no anwae. Henry bɛyɛɛ Yehowa Adansefo bere nyinaa ɔsɛmpakafo wɔ afe 1924 mu. Ɔde mfe anum kaa asɛm no wɔ Afrika anafo fam mmeae pii. Henry ne Edith waree wɔ afe 1930 mu, na mfe abiɛsa akyi no, wɔwoo me.

Abusua Santen

Na yɛte Mozambique, nanso wɔ afe 1939 mu no, yetu kɔtraa Nanabea ne Nanabarima Thompson fie wɔ Johannesburg. Ná Nanabarima ani nnye Bible mu nokware no ho, na ɛtɔ mmere bi mpo a na ɔsɔre tia Nanabea, nanso na  n’ani gye ahɔhoyɛ ho yiye. Wɔwoo me nuabea Thelma wɔ afe 1940 mu, na wɔkyerɛɛ yɛn sɛnea wɔhwɛ nnipa a wɔn mfe akɔ anim. Mpɛn pii na na yɛde anwummere aduandi bere bɔ nneɛma a esisii ɛda no mu, anaa nneɛma a ɛyɛ anigye a yɛkaakae ho nkɔmmɔ.

Ná Adansefo a wɔba hɔ nsrahwɛ no bɛtra yɛn fie, ne titiriw no, wɔn a na wɔyɛ bere nyinaa asomfo no. Ná wɔne yɛn nyinaa bɔ nkɔmmɔ bere a yɛredidi anwummere no. Wɔn nkɔmmɔ no nso ka ho bi na ɛmaa yɛn ani begyee Onyankopɔn som ho kɛse no. Eyi hyɛɛ me ne Thelma nkuran ma yɛn ani begyee akwampae adwuma no ho sɛ wɔn.

Yɛn abusuafo boaa yɛn ma yɛn ani gyee akenkan ho fi yɛn mmofraase pɛɛ. Ná Maame, Paapa, ne Nanabea nyinaa kenkan ayɛsɛm nhoma a emu nsɛm ye ne Bible kyerɛ yɛn. Ná yɛmfa asafo nhyiamkɔ ne asɛnkakɔ nni agoru koraa. Na Paapa yɛ kuw somfo (seesei wɔfrɛ no ɔhwɛfo guamtrani) wɔ Johannesburg Asafo no mu, enti na ɛsɛ sɛ yedu asafo nhyiam ase ntɛm. Sɛ yɛyɛ ɔmantam nhyiam a, na Paapa na ɔhwɛ toto nhyiam no ho nneɛma, na na Maame hwehwɛ dabere ma nhyiamfo no.

Nhyiam Soronko Bi a Wɔyɛ Maa Yɛn

Ná ɔmantam nhyiam a wɔyɛe wɔ Johannesburg wɔ afe 1948 mu no yɛ soronko koraa. Ɛno ne nea edi kan koraa a Yehowa Adansefo adwumayɛbea ti a ɛwɔ Brooklyn, New York, no mufo baa bi. Wɔmaa Paapa de ne kar faa Nathan Knorr ne Milton Henschel wɔ nna a wodii wɔ hɔ no nyinaa. Saa nhyiam no ase na wɔbɔɔ me asu.

Ɛno akyi bere tiaa bi no, me nanabarima kaa asɛm bi kyerɛɛ Paapa maa ne ho dwiriw no. Ɔkae sɛ wanu ne ho paa sɛ bere a Onua Russell wui no, okodii awaefo a wɔtwee wɔn ho fii Bible Asuafo ho no akyi. Ɔkaa eyi no, asram kakraa bi akyi na owui. Nanabea Myrdal nso dii nokware kosii sɛ owiee n’asase so som adwuma wɔ afe 1955 mu.

Nsɛm a Esisii a Ɛsesaa M’asetra

Mifii ase yɛɛ daa akwampae adwuma wɔ February 1, 1949. Ankyɛ na yɛtee nkaebɔ sɛ wɔrebɛyɛ amanaman ntam nhyiam wɔ New York City wɔ afe a edi hɔ no mu, na eyi maa yɛn ani gyei paa. Ná yɛpɛ sɛ yɛkɔ bi, nanso na yenni sika. Nanso, Nanabarima Thompson wui wɔ February 1950, na Nanabea de sika a owu de gyaa no no maa yɛn baanum nyinaa de tuaa yɛn akwantu no ho ka.

Aka adapɛn kakra ma yɛakɔ no, minyaa krataa bi fii Yehowa Adansefo adwumayɛbea ti a ɛwɔ Brooklyn, New York no. Ná wɔretow nsa afrɛ me sɛ memmra asɛmpatrɛwfo sukuu a ɛwɔ Gilead no adesuakuw a ɛto so 16 no bi. M’ani gyei paa, efisɛ na minnya nnii mfe 17  mpo! Bere a yefii sukuu no ase no, hwɛ hokwan kɛse a minnyae sɛ na meka adesuafo du a wofi South Africa a wɔbaa bi no ho.

Bere a yewiee sukuu no wɔ February 1951 mu akyi no, wɔmaa yɛn mu baawɔtwe san baa South Africa bɛyɛɛ asɛmpatrɛw adwuma. Mfe kakra a edi hɔ no, me ne ɔsɛmpatrɛwfo a ɔka me ho no kaa asɛm no wɔ nkurow nketewa a wɔka Afrikaans kasa titiriw wɔ hɔ no mu. Mfiase no, na mintumi nka saa kasa no yiye, na mekae mpo sɛ bere bi a mepɔn asɛnka a mete me baesekre so rekɔ fie no, na meresu efisɛ mantumi amfa kasa no anni adanse yiye. Nanso, bere kɔɔ so no, minyaa nkɔso na Yehowa hyiraa me mmɔdenbɔ so.

M’aware ne Akwantu Adwuma

Mihyiaa John Cooke wɔ afe 1955 mu. Ansa na Wiase Ko II reba ne ɛno akyi no, na waboa ma wɔaka asɛm no wɔ France, Portugal, ne Spain, na na waba abɛyɛ ɔsɛmpatrɛwfo wɔ Afrika wɔ afe a mihyiaa no no mu. Ɛno akyi no, ɔkyerɛwee sɛ: “Nneɛma abiɛsa bi sisii wɔ m’asetra mu wɔ dapɛn biako mu maa me ho dwiriw me . . . Onua bi a ne yam ye paa kyɛɛ me kar ketewa bi; wɔpaw me sɛ ɔmantam sohwɛfo; na mihyiaa me dɔfo.” * Yɛwaree wɔ December 1957 mu.

Wɔ yɛn nantew a edi aware anim mu no, John ka kyerɛɛ me sɛ sɛ yɛware a, ɔremma asetra mfono me da, na ɛbaa saa ampa. Yɛsrasraa asafo ahorow a ɛwɔ South Africa nyinaa, titiriw mmeae a abibifo tete no. Dapɛn biara no, na tumi krataa kɛkɛ a yebenya de akɔ baabi a abibifo tete mpo nna fam, na kampɛsɛ yɛanya nea ɛbɛma yɛatumi ada hɔ. Ɛwom a, na yɛda sotɔɔ dan bi a hwee nnim a ɛbɛn aborɔfo atrae, na na yɛbɔ mmɔden biara sɛ yɛremma wɔn a wɔretwam no nhu yɛn. Ná yɛtaa tra Adansefo a wɔyɛ aborɔfo a wɔbɛn abibifo no afie, na ɛno mpo no na yetwa kwan kilomita bebree ansa na yɛadu abibifo no nkyɛn.

 Na yɛbrɛ nso ansa na yɛabɔ apata a yɛbɛyɛ ase nhyiam wɔ wuram. Na yeyi sini a Yehowa Adansefo ayɛ a ɛboa nkurɔfo ma wonya anisɔ ma yɛn wiase nyinaa onuayɛ kuw no. Esiane sɛ na anyinam ahoɔden nni saa mmeae no nti, na yɛde yɛn ankasa afiri a ɛma anyinam ahoɔden kɔ. Na yehyia nsɛnnennen wɔ amantam a Britania hwɛ hɔ no, na na wɔabara yɛn nhoma no wɔ hɔ. Na Zulu kasa a yebesua no nso yɛ asɛnnennen foforo. Nanso, yɛn nuanom a yetumi som wɔn no maa yɛn ani gyei.

Wɔ August 1961 mu no, John ne obi a odi kan wɔ South Africa a ɔkyerɛɛ ade wɔ Ahenni Som Sukuu a na wɔyɛ no bosome biako a wɔde boa asafo mu ahwɛfo no. Ná ɔyɛ ɔkyerɛkyerɛfo a otu mpɔn, na na ɔde nsɛm a emu da hɔ ne mfatoho a asete nyɛ den di dwuma ma ɛka n’adesuafo koma. Yɛde bɛyɛ afe ne fã tutuu akwan fi kurow biako so kɔɔ foforo so ma ɔkɔyɛɛ sukuu no ntoatoaso wɔ Borɔfo kasa mu. Sɛ John rekyerɛ ade a, na me ne Adansefo a wɔwɔ hɔ no kɔ asɛnka. Bere a na yɛn ani nna no, yɛn nsa kaa krataa bi sɛ efi July 1, 1964 no, yɛmmɛyɛ adwuma wɔ Yehowa Adansefo adwumayɛbea a ɛbɛn Johannesburg wɔ South Africa no.

Saa bere yi nyinaa na John afi ase reyareyare. Ɔbɔɔ nsamanwaw bere tiaa mu wɔ afe 1948 mu, na ɛno akyi no sɛ ɔyɛ adwuma kakraa bi a na wabrɛ. Ná ɛte sɛ nea wanya papu, na na ɛka no to hɔ nna pii, na sɛ ɛba saa a ontumi nyɛ hwe, na na ɔne obiara nkasa. Oduruyɛfo a yekohuu no ansa na yɛrekɔ Betel no kae sɛ John yare no yɛ adwenemhaw.

Ná yɛnyɛɛ yɛn adwene sɛ yebetie oduruyɛfo no asɛm a ɔkae no na yɛatew yɛn som adwuma so. Bere a yɛkɔɔ Betel no, wɔmaa John kɔyɛɛ adwuma wɔ Ɔsom Dwumadibea, na me nso meyɛɛ adwuma wɔ beae wɔhwɛ nhoma a wɔakyerɛ ase mu. Yɛn ani gyei paa sɛ yɛn ankasa yenyaa yɛn dan! Ansa na yɛrebɛware no, na John asom wɔ asasesin a wɔka Portugal kasa wom mu, enti wɔ afe 1967 mu no, wɔma yɛkɔboaa abusua biako pɛ a wɔyɛ Adansefo a wɔka Portugal kasa ma yɛyɛɛ asɛnka adwuma no wɔ mmeae a wɔka Portugal kasa wɔ Johannesburg ne mmeae a ɛbemmɛn hɔ no mu. Ná eyi kyerɛ sɛ ɛsɛ sɛ mesan sua kasa foforo.

Esiane sɛ na wɔn a wɔka Portugal kasa no ahwete nti, yetutuu akwan pii, na ɛtɔ mmere bi a na yetwa kwan kilomita 300 ansa na yɛadu wɔn a wɔfata no nkyɛn. Saa bere yi no, sɛ yɛyɛ nhyiam a na Adansefo a wɔka Portugal kasa a wɔwɔ Mozambique no ba nhyiam no bi, na eyi boaa wɔn a wɔyɛ foforo no kɛse. Wɔ mfe 11 a yɛde kaa asɛm no wɔ wɔn a wɔka Portugal kasa mu no, yehui sɛ na yɛn kuw ketewa a emu nnipa bɛyɛ 30 no adɔ ma yɛabenya asafo ahorow anan.

Nsakrae a Ɛkɔɔ so Wɔ Fie

Saa bere yi nyinaa na nsakrae bi rekɔ so wɔ m’awofo fie. Me nuabea Thelma waree ɔkwampaefo bi a ofi United States a wɔfrɛ no John Urban wɔ afe 1960 mu. Wɔ afe 1965 mu no, wɔkɔɔ Gilead adesuakuw a ɛto so 40 no bi, na wɔde nokwaredi yɛɛ asɛmpatrɛw adwuma mfe 25 wɔ Brazil. Wɔ afe 1990 mu no, wɔsan baa Ohio bɛhwɛɛ John awofo a na wɔyare no. Ɛwom sɛ wɔbrɛ wɔ wɔn awofo no hwɛ mu de, nanso ɛde besi saa bere yi wɔda so ara yɛ bere nyinaa asomfo.

Nanabea Thompson wiee n’asase so som adwuma wɔ afe 1965 mu a na wadi mfe 98, na ɔde nokwaredi som Onyankopɔn kosii ase. Paapa kɔɔ pɛnhyen saa afe no ara. Enti bere a wɔka kyerɛɛ me ne John sɛ yɛmmoa mma wɔnka asɛm no wɔ wɔn a wɔka Portugal kasa mu no, Paapa ne Maame bɛboaa yɛn. Wɔboa maa kuw no yɛɛ den, na asram kakraa akyi no, yenyaa asafo a edi kan wɔ hɔ. Ɛno akyi bere tiaa bi no, Maame yaree kokoram, na owui wɔ afe 1971 mu. Paapa wui wɔ mfe ason akyi.

Sɛnea Migyinaa John Yare no Ano

Eduu afe 1970 mfe no mu no, ɛbɛdaa adi sɛ na John yare no mu yɛ ara na ɛreyɛ den. Na ɛsɛ sɛ ɔde adwuma a ɔyɛ a n’ani gye ho wɔ Betel a ebi ne dapɛn biara Ɔwɛn-Aban Adesua a Betel  abusua no yɛ ne Daa Asɛm a wɔyɛ no anɔpa a ɔhwɛ so no bi gu hɔ nkakrankakra. Woyii no fii Ɔsom Dumadibea hɔ kɔɔ beae a wogye nkrataa a wɔkyerɛw ba Betel no, na akyiri yi ɔkɔyɛɛ adwuma wɔ beae a wɔaduadua nhwiren no.

Esiane sɛ na John yɛ nsi nti na ɛyɛ den ma no sɛ ɔbɛtew n’adwuma so. Sɛ mebɔ mmɔden sɛ mɛma watɔ ne bo ase a, na odi me ho fɛw frɛ me osiakwan, na mpɛn pii no, sɛ ɔka saa wie a, na ɔyɛ me atuu de da me ase. Awiei koraa no, yebehui sɛ ɛyɛ papa sɛ yefi asafo a wɔka Portugal kasa no mu na yɛba asafo a wohyiam wɔ Betel no mu.

Bere a na John akwahosan resɛe no, na ɛyɛ anigye paa sɛ mihui sɛ na ɔne Yehowa wɔ abusuabɔ pa. Sɛ na John sɔre ɔdasu mu a wahaw a, na yɛbɔ nkɔmmɔ kosi sɛ n’adwenem bɛda hɔ ma wabɔ mpae asrɛ Yehowa mmoa. Awiei koraa no, na ɔbɔ mmɔden sɛ n’ankasa bɛkɔ so atĩ nsɛm a ɛwɔ Filipifo 4:6, 7 a ɛka sɛ: “Monnnwennwene biribiara nnhaw mo ho, . . . ” no mu, na ɛboaa no maa otumi gyinaa ɔhaw no ano. Sɛ ɔyɛ saa a, na ɛma n’adwenem da hɔ ma otumi fi ase bɔ mpae. Mpɛn pii no, sɛ minyan a mehwɛ no dinn bere a ɔbesebese n’ano de n’adesrɛ to Yehowa anim no.

Esiane sɛ na yɛakyere so paa wɔ Betel hɔ nti, wofii ase sii Betel fie kɛse foforo wɔ beae foforo de kaa nea ɛwɔ Johannesburg no ho. Ná me ne John taa fi kurow no mu kɔ baabi a wɔresi dan foforo a dede nni hɔ na ɛhɔ mframa yɛ papa no. Wɔpɛɛ dan bi wɔ hɔ ma yetu kɔtraa mu bere tiaa bi kosii sɛ wowiee Betel dan foforo no si, na eyi boaa John paa.

Nsɛnnennen Afoforo

Bere a afei na John ntumi nnwen nsusuw nneɛma ho yiye koraa no, ɛbɛyɛɛ den maa no paa sɛ ɔbɛyɛ n’adwuma ahorow no. Sɛnea anuanom afoforo boaa John ma ɔyɛɛ n’adwuma no kaa me koma yiye. Sɛ nhwɛso no, sɛ na onua bi rekɔyɛ nhwehwɛmu wɔ ɔmanfo nhomakorabea a, na ɔde John kɔ. Ná John de nsɛmma nhoma ne nkratawa hyehyɛ ne kotoku mu pue kɔkyekyɛ. Eyi boaa John ma ɔtee nka sɛ ɔda so ara reyɛ asɛnka adwuma no bi na mfaso wɔ no so.

Awiei koraa no, yare bi kaa John adwene maa ne werɛ fii biribiara ma enti na ontumi nkenkan ade nte ase. Bible ho nhoma ne Ahenni nnwom mu nsɛm a wɔakyere agu kasɛt so boaa yɛn paa. Na yɛbɔ tie no mpɛn pii. Sɛ mantra John nkyɛn ne no antie a, na ne bo taa fuw, enti na mede bere pii tra ne nkyɛn nnwen nneɛma. Na eyi ma yebenyaa ntade a wɔde kõ awɔw ne kuntu pii!

Bere kɔɔ so no, John tebea no hwehwɛe sɛ mede bere pii hwɛ no. Ɛwom sɛ na metaa brɛ kɛse, na na ɛyɛ den sɛ mɛkenkan anaa mesua ade de, nanso mefaa no sɛ ɛyɛ hokwan a manya sɛ mɛhwɛ no akodu awiei. Saa awiei no bae wɔ afe 1998 mu bere a John dii mfe 85 no. Owui dinn wɔ me nsa so, na odii nokware koduu awiei. Mehwɛ kwan paa sɛ mehu no wɔ owusɔre mu bere a wate apɔw na otumi kae ade no.

Minyaa Akomatɔyam

John wu akyi no, na ɛyɛ den ma me sɛ me nkutoo mɛtra. Enti wɔ May 1999 mu no, mekɔsraa me nuabea Thelma ne ne kunu wɔ United States. Hwɛ sɛnea m’ani gyei na me koma tɔɔ me yam bere a mihuu me nnamfo pii a wɔde nokwaredi asom no, ne titiriw bere a yɛkɔsraa Yehowa Adansefo adwumayɛbea ti a ɛwɔ New York no! Ná ɛno ara na mihia na ama matumi akɔ so asom Onyankopɔn.

Sɛ mede anigye susuw sɛnea m’abusuafo abɔ wɔn bra no ho a, ɛma mekaakae nneɛma pii a wɔyɛe a ɛso aba me mfaso kɛse no. Menam wɔn akwankyerɛ, wɔn nhwɛso, ne mmoa a wɔde maa me so suaa sɛnea mɛtrɛw me dɔ mu ama nnipa a wofi aman ne mmusua afoforo mu. Misuaa abotare, boasetɔ, na ɛma mitumi tra baabiara. Nea ɛsen ne nyinaa no, mahu Yehowa, mpaebɔ Tiefo no ayamye. Mete nka te sɛ odwontofo a ɔkyerɛw asɛm edi so yi no: “Nhyira ne nea wuyi no na woma ɔbɛn wo sɛ ɔntra w’abangua so. Wo fi nnepa bɛmee yɛn, w’asɔrefi kronkron nnepa no.”—Dwom 65:4.

[Ase hɔ asɛm]

[Mfonini wɔ kratafa 8]

Nanabea ne ne mmabea

[Mfonini wɔ kratafa 9]

Me ne m’awofo bere a mebɔɔ asu wɔ afe 1948 mu

[Mfonini wɔ kratafa 10]

Me ne Albert Schroeder, a ɔyɛ Gilead sukuu no ho kyerɛwtohɔ ne adesuafo du a wofi South Africa

[Mfonini wɔ kratafa 10]

Me ne John wɔ afe 1984 mu